.jpg)
ជប៉ុនផ្តល់ប្រាក់ជិត $២៣០ លានដើម្បី ពង្រឹងការការពារសន្តិសុខ និងប្រឆាំងកូវីដដល់ប្រទេសកម្ពុជា។ ហុង មិនា
ភ្នំពេញ: រាជរដ្ឋាភិបាលជប៉ុនបានផ្ដល់ហិរញ្ញប្បទានឥតសំណង និងឥណទានសម្បទានសរុបជិត ២៣០ លានដុល្លារអាមេរិកដល់រាជរដ្ឋាភិបាលកម្ពុជា ដើម្បីទិញសម្ភារសម្រាប់ការពារសន្តិសុខក្នុងព្រឹត្តិការណ៍ធំៗ និងដើម្បីជួយទប់ស្កាត់ការរីករាលដាលជំងឺកូវីដ។
សេចក្ដីប្រកាសព័ត៌មានរបស់ស្ថានទូតជប៉ុនកាលពីថ្ងៃទី ៦ ខែវិច្ឆិកាបានឲ្យដឹងថា ឆ្លើយតបតាមសំណើរបស់រដ្ឋាភិបាលកម្ពុជាក៏ដូចជាដើម្បីពង្រឹងទំនាក់ទំនងមិត្តភាព និងសហប្រតិបត្តិការរវាងប្រទេសទាំង ២ រដ្ឋាភិបាលជប៉ុនបានសម្រេចផ្តល់ហិរញ្ញប្បទានឥតសំណងចំនួន ៣០០ លានយ៉េនស្មើ នឹងប្រមាណ ២,៧ លានដុល្លារ និងឥណទានសម្បទាន ២៥ ប៊ីលានយ៉េនស្មើនឹងប្រមាណ ២២៧ លានដុល្លារដល់រាជរដ្ឋាភិបាលកម្ពុជា។
ហិរញ្ញប្បទានឥតសំណងគឺសម្រាប់កម្មវិធីអភិវឌ្ឍន៍សេដ្ឋកិច្ច និងសង្គមដោយផ្ដល់ជូនទៅអគ្គស្នងការនគរបាលជាតិ និងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីទិញសម្ភាររួមមាន យានយន្តសម្រាប់ការពារសន្តិសុខ ដើម្បីទុកការពារក្បួនគណៈប្រតិភូ និងម៉ាស៊ីនត្រួតពិនិត្យកាំរស្មីអ៊ិចសម្រាប់ប្រើប្រាស់នៅតាមព្រំដែនគោក។
សេចក្តីប្រកាសបន្តថា សម្ភារទាំងនេះនឹងជួយការពារសន្តិសុខដល់ព្រឹត្តិការណ៍ទ្រង់ទ្រាយធំដូចជាសន្និសីទអន្ដរជាតិនាពេលខាងមុខជាដើម។ ចំពោះឥណទានសម្បទានសម្រាប់កម្មវិធីគាំទ្របន្ទាន់ដើម្បីឆ្លើយតបទៅនឹងវិបត្តិជំងឺកូវីដ ១៩ គឺនឹងជួយទប់ស្កាត់ការរីករាលដាលនៃជំងឺនេះ រក្សាលំនឹងនិងភាពសកម្មនៃសកម្មភាពសេដ្ឋកិច្ច និងសង្គម និងការពារកិច្ចគាំពារសង្គម។
ឥណទាននេះ គឺបន្ថែមពីលើហិរញ្ញប្បទានឥតសំណង ៥ ពាន់លានយ៉េន (ប្រមាណ ៤៥ លានដុល្លារ) ដើម្បីឆ្លើយតបទៅនឹងជំងឺកូវីដ ១៩ តាមរយៈការធ្វើឲ្យប្រសើរឡើងវិញនូវមន្ទីរពេទ្យបង្អែកក្នុងខេត្តសៀមរាប ការផ្តល់ឧបករណ៍វេជ្ជសាស្ត្រនៅទូទាំងប្រទេស និងជំនួយបច្ចេកទេសជាដើម។
ការប្រកាសព័ត៌មាននេះធ្វើឡើងបន្ទាប់ពីមានកម្មវិធីចុះហត្ថលេខាផ្លូវការរវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជាកាលពីថ្ងៃទី ៦ ខែវិច្ឆិកានៅទីស្ដីការក្រសួងការបរទេស។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានថ្លែងពីម្សិលមិញថា រដ្ឋាភិបាលជប៉ុននឹងផ្តល់ជំនួយជាសម្ភារដូចជារថយន្តសម្រាប់ការពារសន្តិសុខ និងរថយន្តដឹកនាំក្បួនប្រតិភូ ដើម្បីទុកការពារគណៈប្រតិភូក្នុងព្រឹត្តិការណ៍ធំៗ ក៏ដូចជាសន្និសីទអន្ដរជាតិនាពេលខាងមុខ។ លើសពីនេះ ក៏មានម៉ាស៊ីនត្រួតពិនិត្យកាំរស្មីអ៊ិចមួយចំនួន សម្រាប់ប្រើប្រាស់នៅតាមច្រកព្រំដែនគោកផងដែរ។
លោកបញ្ជាក់ថា៖ «ខ្ញុំអត់ចាំចំនួនសម្ភារទាំងអស់ហ្នឹងច្បាស់ទេ ប៉ុន្ដែរថយន្តប្រហែល ២០ គ្រឿង។ សម្ភារ និងរថយន្តដែលជាជំនួយរបស់ជប៉ុនទាំងអស់នេះនឹងមកដល់កម្ពុជានៅអំឡុងពាក់កណ្ដាលឆ្នាំ ២០២១»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលថ្លែងពីម្សិលមិញថា ក្រសួងសុខាភិបាលមានកិច្ចសហប្រតិបត្តិការល្អជាមួយប្រទេសជប៉ុនដែលកន្លងមក ជប៉ុនបានជួយលើការសាងសង់ហេដ្ឋារចនាសម្ព័ន្ធសុខាភិបាលនៅរាជធានីភ្នំពេញ និងបណ្តាខេត្តមួយចំនួន។ «រយ:ពេលប៉ុន្មានឆ្នាំចុងក្រោយនេះក្រសួងបានស្នើសុំជប៉ុនតាមរយ:អង្គការ JICA ពិនិត្យក្នុងការជួយជួសជុល និងសាងសង់មន្ទីរពេទ្យខេត្តសៀមរាប។ ដូច្នេះការសម្រេចចិត្តរបស់ជប៉ុននាពេលនេះគឺស្របពេលដែលយើងកំពុងប្រយុទ្ធនឹងជំងឺកូវីដ១៩ ជាផ្នែកមួយក្នុងការជួយបង្កើនសមត្ថភាពមន្ទីរពេទ្យឲ្យកាន់តែមានភាពល្អប្រសើរថែមទៀត ដើម្បីដោះស្រាយនូវតម្រូវការប្រើប្រាស់សេវារបស់ប្រជាជនទូទៅ»។ បើតាមលោកស្រី វណ្ណឌីន បច្ចុប្បន្នមានអ្នកជំងឺច្រើនលើសពីចំនួនគ្រែដែលមន្ទីរពេទ្យមាន។
លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាបបានថ្លែងពីម្សិលមិញថា មន្ទីរសុខាភិបាលខេត្តសៀមរាបបានទទួលសម្ភារមួយចំនួន ដែលទាក់ទងវិស័យសុខាភិបាល និងសាងសង់អគារវះកាត់ និងអគារសង្គ្រោះបន្ទាន់នៃមន្ទីរពេទ្យបង្អែកខេត្តសៀមរាប។
លោកបញ្ជាក់ថា៖ «គម្រោងនេះ ខ្ញុំបានដាក់សំណើទៅយូរឆ្នាំដែរហើយ ប៉ុន្ដែភាគីជប៉ុនទើបតែសម្រេចផ្ដល់ជូន ព្រោះពួកគាត់ត្រូវមកធ្វើការសិក្សាជាច្រើនដំណាក់កាល។ ជំនួយនេះនឹងជួយដល់វិស័យសុខាភិបាលខេត្តសៀមរាបបានច្រើន ព្រោះយើងទទួលបានអគារ និងបរិក្ខារពេទ្យមួយទៀតបំពាក់ក្នុងអគារដែរ»៕
