ភ្នំពេញៈ មុនពេលចាកចេញដោយត្រូវចប់អាណតិ្ត ឯកអគ្គរាជទូតជប៉ុនប្រចាំកម្ពុជា លោក ហ៊ីដេហ៊ីសា ហូរីណូអ៊ុជិ (Hidehisa Horinouchi) បានផ្ញើសារជូនប្រជាជនកម្ពុជាដោយបញ្ជាក់ថា ប្រទេសកម្ពុជារក្សាបាននូវកំណើនសេដ្ឋកិច្ចរឹងមាំគឺ ៧ ភាគរយ ជារៀងរាល់ឆ្នាំដូចអ្វីដែលរដ្ឋាភិបាលតែងតែអះអាង ហើយថា ទំនាក់ទំនងទ្វេភាគីរវាងប្រទេសទាំង ២ ក៏បានបោះជំហានទៅមុខយ៉ាងខ្លាំងផងដែរ។
យោងតាមហ្វេសប៊ុកស្ថានទូតជប៉ុនប្រចាំកម្ពុជាកាលពីថ្ងៃទី ២៣ សីហា លោក ហ៊ីដេហ៊ីសា ហូរីណូអ៊ុជិ ថ្លែងថាការធ្វើពាណិជ្ជកម្មទ្វេភាគី ការវិនិយោគផ្ទាល់ និងការផ្លាស់ប្តូរការបំពេញទស្សនកិច្ចផ្សេងៗមានកំណើនខ្ពស់គួរឲ្យកត់សម្គាល់។
លោកបញ្ជាក់ថា៖ «ខ្ញុំក៏បានចូលរួមពិធីសម្ពោធផ្សេងៗនៃគម្រោងជំនួយអភិវឌ្ឍន៍របស់រដ្ឋាភិបាលជប៉ុនដែលជានិមិត្តរូបនៃមិត្តភាពរវាងប្រទេសយើងទាំង ២ ដូចជាការជួសជុលស្ពានជ្រោយចង្វារជាដើម។ ចំណែកទំនាក់ទំនងក្នុងវិស័យនយោបាយវិញ ខ្ញុំមានភ័ព្វសំណាងដែលបានចូលរួមកិច្ចប្រជុំកំពូលជប៉ុន-កម្ពុជារវាងឯកឧត្តមនាយករដ្ឋមន្ត្រី (ជប៉ុន) អាបេ និងសម្តេចតេជោ នាយករដ្ឋមន្ត្រី ហ៊ុន សែន ចំនួន ៣ លើកក្នុងរយៈពេល ៣ ឆ្នាំកន្លងទៅនេះ»។
ឯកអគ្គរាជទូតរូបនេះបន្តទៀតថាប្រទេសជប៉ុនបាន និងកំពុងចូលរួមចំណែកលើកកម្ពស់លទ្ធិប្រជាធិបតេយ្យនៅកម្ពុជា ហើយបានបន្តផ្តល់ជំនួយដល់កំណែទម្រង់ការបោះឆ្នោតផងដែរ។ ប្រទេសជប៉ុនក៏បានអញ្ជើញយុវជនកម្ពុជាដែលចាប់អារម្មណ៍រឿងនយោបាយទៅឈ្វេងយល់បទពិសោធនៅប្រទេសជប៉ុន។
លោកបន្ថែមថា៖ «រាជធានីភ្នំពេញនឹងប្រែមុខមាត់ថ្មីនៅប៉ុន្មានឆ្នាំខាងមុខជាមួយនឹងព្រលានយន្តហោះថ្មី អគារខ្ពស់ៗជាច្រើនព្រមទាំងប្រព័ន្ធដឹកជញ្ជូនសាធារណៈថ្មី»។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាប្រាប់ភ្នំពេញប៉ុស្តិ៍ពីថ្ងៃទី ២៥ សីហាថា លោក ហ៊ីដេហ៊ីសា ហូរីណូអ៊ុជិ បានធ្វើទំនាក់ទំនងការទូតជាមួយកម្ពុជាប្រកបដោយវិជ្ជាជីវៈនៅក្នុងទំនាក់ទំនងល្អ និងកិច្ចសហប្រតិបត្តិការដោយបង្ហាញពីមិត្តមួយដ៏រឹងមាំ និងបម្រើផលប្រយោជន៍ប្រទេសទាំង ២។
លោកថ្លែងថា៖ «លោកបានជួយសម្រួលតាំងពីវិស័យវប្បធម៌រហូតដល់វិស័យយុវជន ហើយលោកមានភាពស្និទ្ធស្នាលជាមួយនឹងប្រជាពលរដ្ឋកម្ពុជា ។ ភាពស្និទ្ធស្នាលនេះធ្វើឲ្យរឹតតែលើកទឹកចិត្តដែលបន្ទាប់ពីថ្នាក់ដឹកនាំកំពូលរបស់កម្ពុជា-ជប៉ុន ដែលមានភាពជិតស្និទ្ធ ហើយសហប្រតិបត្តិការគ្នាដ៏ល្អ»។
ក្នុងជំនួបជាមួយលោកឯកអគ្គរាជទូតរូបនេះកាលពីថ្ងៃទី ១៣ ខែសីហាលោក ហ៊ុន សែន បានថ្លែងថានៅឆ្នាំ ២០១៨ ការនាំចេញរបស់ប្រទេសកម្ពុជាទៅកាន់ប្រទេសជប៉ុនមានទំហំទឹកប្រាក់ប្រមាណ ១៦០០ លានដុល្លារអាមេរិក។ ក្នុងឆ្នាំ ២០១៩ ត្រឹមតែ ៥ ខែប៉ុណ្ណោះ ទំហំពាណិជ្ជកម្មកម្ពុជាដែលនាំចេញទៅកាន់ប្រទេសជប៉ុនបានកើនឡើងដល់ ១៧០០ លានដុល្លារអាមេរិក។
លោក ហ៊ុន សែន អះអាងថា៖ «នេះគឺជាជោគជ័យដ៏ធំនៅក្នុងបេសកកម្មការទូតរបស់ឯកឧត្តមឯកអគ្គរាជទូតក្នុងការពង្រឹងទំនាក់ទំនង ហើយជំរុញពាណិជ្ជកម្ម វិនិយោគ និងទេសចរណ៍ដែលជាមូលដ្ឋានគ្រឹះនៃទំនាក់ទំនងរវាងប្រទេសទាំង ២»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគនយោបាយថ្លែងថាទំនាក់ទំនងកម្ពុជា-ជប៉ុនមានលក្ខណៈល្អប្រសើរដោយសារជាឥរិយាបថការងារផ្ទាល់របស់ឯកអគ្គរាជទូតដែលផុតអាណត្តិរូបនេះ និងគោលនយោបាយការបរទេសរបស់ប្រទេសជប៉ុនផ្ទាល់ផង។ ថ្នាក់ដឹកនាំកម្ពុជាទាំងជាន់ខ្ពស់ និងជាន់ទាប គោរពនូវគោលការណ៍របស់ជប៉ុនដែលប្រកាន់នូវគោលការណ៍មួយ «មិនជ្រៀតជ្រែកកិច្ចការផ្ទៃក្នុងរបស់កម្ពុជា»។ ការជួយរបស់ជប៉ុនគឺជួយជាលក្ខណៈបច្ចេកទេសសុទ្ធសាធដែលមិនមានលក្ខខណ្ឌឱ្យកម្ពុជាធ្វើតាមការចង់បានរបស់ជប៉ុននោះទេ។
លោកថ្លែងថា៖ «បើយើងមើលទំហំពាណិជ្ជកម្មក៏ដូចជាក្នុងវិស័យអប់រំ ឬក៏ទិដ្ឋភាពប្រវត្តិសាស្ត្រនៃប្រទេសទាំង ២ ហ្នឹងគឺល្អជាទូទៅ។ សម្រាប់ប្រជាពលរដ្ឋខ្មែរទូទៅគឺគេឱ្យតម្លៃខ្ពស់នៃចំណងទំនាក់ទំនងការទូតនៃកម្ពុជា-ជប៉ុន មិនតែក្រោមការដឹកនាំរបស់ឯកអគ្គរាជទូតបច្ចុប្បន្នជិតផុតអាណត្តិហ្នឹងទេ។ ឯកអគ្គរាជទូតមុនៗក៏គេតែងតែមានទស្សនៈវិជ្ជមានខ្លាំងចំពោះប្រទេស ជប៉ុន ចំពោះប្រជាជនជប៉ុន ហើយជាពិសេសការទទួលខុសត្រូវខ្ពស់របស់ប្រទេសជប៉ុន» ។
លោក មាស នី អ្នកវិភាគនយោបាយថ្លែងថាក្នុងវិបត្តិនយោបាយកម្ពុជាបច្ចុប្បន្នជប៉ុនហាក់ដូចជា នៅទ្រឹងមិននិយាយ ហើយគ្រាន់តែយូរៗម្តង លើកពីការព្រួយបារម្ភទៅលើការដើរថយក្រោយនៃលទ្ធិប្រជាធិបតេយ្យនៅកម្ពុជា។ ជប៉ុនមើលទៅហាក់ដូចជា មិនមានឥទ្ធិពលអ្វីធំដុំទេនៅពេលនេះដោយសារជប៉ុនរកស៊ីជាមួយកម្ពុជា ប៉ុន្តែជប៉ុនល្អបើប្រៀបធៀបជាមួយចិន ។
លោកថា៖ «បើយើងមើលវត្តមានតួនាទីរបស់ជប៉ុនក្នុងប្រទេសខ្មែរយើង ជប៉ុនគឺជាប្រទេសដែលបានផ្តល់ជំនួយទាំងកម្ចីទាំងជំនួយអភិវឌ្ឍន៍ផ្សេងៗទី ២ បន្ទាប់ពីចិន។ ក្នុងហ្នឹងក៏យើងឃើញថា ទោះបីជាជំនួយហ្នឹងបានមកដល់កម្ពុជាច្រើនក៏ដោយ ក៏ប៉ុន្តែជប៉ុនក៏ខ្ញុំគិតថា ក៏បានផលចំណេញច្រើនពីកម្ពុជាដែរ។ ដូចយើងដឹងហើយកម្ពុជាប្រើឡានប្រើអីពីប្រទេសជប៉ុន។ ការប្រើប្រាស់ទាំងអស់ហ្នឹងវាទាក់ទងនឹងការនាំចូលគ្រឿងបន្លាស់អីផង។ បើយើងគុណ ចែក បូក ដក ទៅ យើងគិតថា ជប៉ុននៅតែមានប្រៀបចំណេញមកលើប្រទេសកម្ពុជា»។
លោក ហ៊ីដេហ៊ីសា ហូរីណូអ៊ុជិ នឹងចាកចេញពីប្រទេសកម្ពុជានៅសប្តាហ៍នេះ។ លោកបានបំពេញការងារជាឯកអគ្គរាជទូតជប៉ុនប្រចាំកម្ពុជារយៈពេលជិត ៣ ឆ្នាំមកហើយចាប់តាំងពីឆ្នាំ ២០១៦៕