The Phnom Penh Post Search

Search form




Logo of Phnom Penh Post newspaper Phnom Penh Post - ជប៉ុន​ផ្តល់ ២៥១ លាន​យ៉េន​សម្រាប់​កែលម្អ​ផ្លូវ​ជាតិ​លេខ ១ ជំហាន ទី៤

ជប៉ុន​ផ្តល់ ២៥១ លាន​យ៉េន​សម្រាប់​កែលម្អ​ផ្លូវ​ជាតិ​លេខ ១ ជំហាន ទី៤

លោក​ឯក​អគ្គរាជ​ទូត​ជប៉ុន និង​លោក ហោ ណាំហុង ក្នុង​ពិធី​ចុះ​ហត្ថលេខា​ផ្តល់​ជំនួយ។
លោក​ឯក​អគ្គរាជ​ទូត​ជប៉ុន និង​លោក ហោ ណាំហុង ក្នុង​ពិធី​ចុះ​ហត្ថលេខា​ផ្តល់​ជំនួយ។ រូបថត សហការី

ជប៉ុន​ផ្តល់ ២៥១ លាន​យ៉េន​សម្រាប់​កែលម្អ​ផ្លូវ​ជាតិ​លេខ ១ ជំហាន ទី៤

ភ្នំពេញៈ គម្រោង​ធ្វើ​ឲ្យ​ប្រសើរ​ឡើង​វិញ​នូវ​កំណាត់​ផ្លូវ​ជាតិ​លេខ ១ ក្នុង​តម្លៃ ២៥១ លាន​យ៉េន ប្រមាណ​ជា ២,៣១ លាន​ដុល្លារ​សហរដ្ឋ​អាមេរិក ជា​ជំនួយ​ឥត​សំណង​របស់​រដ្ឋាភិបាល​ជប៉ុន ផ្តល់​មក​កម្ពុជា នឹង​ត្រូវ​ចាប់​ផ្តើម​អនុវត្ត​ចាប់​ពី ខែ​មិនា ឆ្នាំ​២០១៥ ហើយ​គ្រោង​អាច​នឹង​បញ្ចប់​ក្នុង​រយៈ​ពេល ១​ឆ្នាំ។

បន្ទាប់​ពី​ពិធី​ចុះ​ហត្ថលេខា​លើ​សារ​លិខិត​ផ្តល់​ជំនួយ​ឥត​សំណង​សម្រាប់​គម្រោង​នៅ​ក្រសួង​ការ​បរទេស កាល​ពី​ម្សិល​មិញ​នេះ អ្នក​នាំ​ពាក្យ​ក្រសួង​ការ​បរទេស​និង​សហ​ប្រតិបត្តិការ​អន្តរជាតិ​កម្ពុជា លោក កុយ គួង បាន​ថ្លែង​ឲ្យ​ដឹង​ថា គម្រោង​ពង្រឹង​គុណភាព​ផ្លូវ​នេះ គឺ​ដើម្បី​កែ​លម្អ​បន្ថែម​នូវ​កំណាត់​ផ្លូវ​ទី​ប្រជុំជន​តាម​ផ្លូវ​ជាតិ​លេខ ១ គិត​ចាប់​ពី​គល់​ស្ពាន​ព្រះមុនីវង្ស​ត្រើយ​ខាង​កើត ប្រវែង ៤៥០ ម៉ែត្រ។

លោក​ថ្លែង​បន្ត​ថា៖ «ថវិកា ២៥១ លាន​យ៉េន​នេះ គឺ​បន្ថែម​លើ​ដំណាក់​កាល ទី៤ នៃ​គម្រោង​ដែល​ត្រូវ​បាន​ចុះ​ហត្ថលេខា នៅ ទីក្រុង​តូក្យូ កាល​ពី ខែ​ធ្នូ ឆ្នាំ​២០១៣ មក​ម៉្លេះ ខណៈ​ដែល​ដំណាក់​កាល ទី១ ទី២ និង ទី៣ បាន​បញ្ចប់​ជា​ស្ថាពរ​ហើយ»។

លោក កុយ គួង បាន​បន្ត​ថា បើ​តាម​លោក ហោ ណាំហុង រដ្ឋ​មន្រ្តី​ក្រសួង​ការ​បរទេស ផ្លូវ​ជាតិ​លេខ ១ នេះ ដែល​អាស៊ាន​ដាក់​ឈ្មោះ​ថា អាស៊ាន​ហាយវ៉េ លេខ​១ ក៏​ជា​ច្រក​របៀង​សេដ្ឋកិច្ច​ខាង​ត្បូង​នៅ​ក្នុង​តំបន់​ដែរ...វា​នឹង​ជួយ​សម្រួល​ក្នុង​ការ​ដឹក​ជញ្ជូន​ទំនិញ ក្នុង​តំបន់ ដូច​ជា​ការ​ដឹក​ជញ្ជូន​របស់​ប្រជាជន​កម្ពុជា និង​ប្រជាជន​ក្នុង​តំបន់ ជា​ពិសេស​ដី​គោក​ភ្ជាប់​ពី​កម្ពុជា ទៅ វៀតណាម រហូត​ទៅ​ដល់​ម៉ាឡេស៊ី និង ក្រុង​សាំងហ្គាពួរ (សិង្ហបុរី)។

នៅ​ក្នុង​សុន្ទរកថា ឯក​អគ្គ​រាជទូត​វិសាមញ្ញ​និង​ពេញ​សមត្ថភាព​របស់​ជប៉ុន ប្រចាំ​កម្ពុជា លោក គូម៉ាម៉ារ៉ុ យូជិ បាន​ថ្លែង​ឲ្យ​ដឹង​ដែរ​ថា៖ «រដ្ឋាភិបាល​ជប៉ុន កំពុង​ផ្តល់​ជំនួយ​ឥត​សំណង​ដល់​រាជ​រដ្ឋាភិបាល​កម្ពុជា... ស្ពាន​អ្នក​លឿង ដែល​ឆ្លង​កាត់​ទន្លេ​មេគង្គ ដែល​ស្ថិត​នៅ​តាម​បណ្តោយ​ផ្លូវ​ជាតិ​លេខ ១ កំពុង​ត្រូវ​បាន​សាង​សង់​ដោយ​ជំនួយ​ឥត​សំណង​របស់ ប្រទេស​ជប៉ុន ហើយ​លោក​សង្ឃឹម​ថា សាង​សង់​នឹង​រួច​ជា​ស្ថាពរ​នៅ​ក្នុង ខែ​មីនា ឆ្នាំ​២០១៥ ខាង​មុន​នេះ។

លោក​មាន​ប្រសាសន៍​ថា ដោយ​គិត​ទាំង​ស្ពាន​អ្នក​លឿង​ផង​នោះ ជំនួយ​ឥត​សំណង​រដ្ឋាភិបាល​ជប៉ុន​ផ្តល់​ដល់​ជូន ប្រទេស​កម្ពុជា សម្រាប់​គម្រោង​ជួស​ជុល​កែ​លម្អ​ផ្លូវ​ជាតិ​លេខ ១ មាន​ទឹក​ប្រាក់​សរុប​ទាំង​អស់​ប្រមាណ​ជា ២២១ លាន​ដុល្លារ​អាមេរិក៕

អត្ថបទគួរចាប់អារម្មណ៍