ការផ្ទុះឡើង និងការរាតត្បាតនៃជំងឺកូវីដ ១៩ អាចធ្វើឱ្យសហគមន៍ និងសេដ្ឋកិច្ចមានការផ្លាស់ប្តូរជាសកល តាមរយៈការអនុវត្តវិធានការគម្លាតសង្គម ប៉ុន្តែសម្រាប់ប្រទេសជិតខាងថៃ និងកម្ពុជា ការជំរុញទំនាក់ទំនងទ្វេភាគីកាន់តែជិតស្និទ្ធ បានបង្ហាញនូវមធ្យោបាយវិជ្ជមានឆ្ពោះទៅកាន់ពិភពលោកដែលពោរពេញទៅដោយភាពវឹកវរ!
អំឡុងពេលដែលអ្វីៗ ក៏មិនប្រាកដប្រជាទូទាំងពិភពលោក ដោយសារការរាតត្បាតនៃជំងឺកូវីដ ១៩ ដែលបានធ្វើឲ្យប៉ះពាល់ដល់ជីវិតរស់នៅ និងអាជីវកម្មនៅពាសពេញពិភពលោកនោះ ប្រទេសថៃ និងកម្ពុជាបានបង្កើនកិច្ចខិតខំប្រឹងប្រែង ដើម្បីពង្រឹងចំណងទ្វេភាគីឲ្យកាន់តែរឹងមាំ ដែលផ្តល់អត្ថប្រយោជន៍ដល់ប្រទេសទាំងពីរ។
ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការបន្តប្រយុទ្ធប្រឆាំងជំងឺកូវីដ ១៩ រដ្ឋាភិបាលថៃបាននាំផ្លូវដោយការអភិវឌ្ឍនូវធនធានសំខាន់ៗ និងផ្តល់ជំនួយហិរញ្ញប្បទានដល់កម្ពុជា ខណៈពេលដែលប្រទេសទាំងពីរប្រារព្ធខួបលើកទី៧០ ការបង្កើតទំនាក់ទំនងការទូតរវាងកម្ពុជា-ថៃ។
ទន្ទឹមនឹងនេះដែរ ដើម្បីពង្រឹងទំនាក់ទំនងទ្វេភាគី និងទំនាក់ទំនងពាណិជ្ជកម្ម ក្រុមហ៊ុនថៃ និងសមភាគីរបស់ពួកគេ ដែលបានបង្កើតអាជីវកម្មនៅក្នុងវិស័យផ្សេងៗនៅទូទាំងប្រទេសកម្ពុជា បានឆ្លើយតបជាវិជ្ជមានចំពោះការអំពាវនាវរបស់រដ្ឋាភិបាលទាំងពីរក្នុងការជួយដោះស្រាយបញ្ហាប្រឈមនានាដែលបណ្តាលមកពីជំងឺកូវីដ ១៩។
ការគាំពារពាណិជ្ជកម្មតាមព្រំដែន
ផលប៉ះពាល់ដែលបង្កឡើងដោយជំងឺកូវីដ ១៩ បានបង្កជាបញ្ហាប្រឈមដែលមិនធ្លាប់មានពីមុនមក សម្រាប់សហគមន៍ទាំងអស់នៅតាមព្រំដែនកម្ពុជា-ថៃ។ ការរឹតបន្តឹងចំពោះការធ្វើដំណើរក្នុងអំឡុងពេលផ្ទុះឡើងដំបូងនៃជំងឺកូវីដ ១៩ បានបង្កភាពលំបាកយ៉ាងច្រើនដល់ប្រជាជនក្នុងការប្រកបអាជីវកម្មឆ្លងដែនរវាងប្រទេសទាំងពីរ។
ពាណិជ្ជកម្មឆ្លងដែន គឺមានទំហំធំបំផុតនៃពាណិជ្ជកម្មទ្វេភាគីរវាងថៃ និងកម្ពុជា ដែលមានប្រមាណ ៨០ ភាគរយ នៃទំហំពាណិជ្ជកម្មសរុប។ ទោះបីជួបភាពលំបាកយ៉ាងណាក៏ដោយ ក៏ការធ្វើពាណិជ្ជកម្មឆ្លងដែនរវាងប្រទេសទាំងពីរ មិនបានធ្លាក់ចុះនោះទេ ប៉ុន្តែនៅតែបន្តកើនឡើង ដោយឈានដល់ ២,៧៣ ពាន់លានដុល្លារ ក្នុងរយៈពេល ៥ ខែ ដើមឆ្នាំនេះ ពោលគឺកើនឡើង ២,២៧ ភាគរយធៀបនឹងឆ្នាំមុន។
នេះ គឺជាសមិទ្ធផលដ៏គួរឱ្យកត់សម្គាល់ ដូចឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ថា៖ «សារៈសំខាន់នៃពាណិជ្ជកម្មឆ្លងដែនរវាងប្រទេសយើងទាំងពីរ គឺមិនអាចវាយតម្លៃទាបបាននោះទេ គឺវាបានចូលរួមចំណែកយ៉ាងសំខាន់ដល់កំណើនសេដ្ឋកិច្ចជាតិ។ ទោះបីការធ្វើដំណើរចេញចូលរបស់ប្រជាជន និងយានយន្តត្រូវបានរឹតបន្តឹងដោយសារតែជំងឺកូវីដ ១៩ ក៏ដោយ ប៉ុន្តែសកម្មភាពនៃការនាំចេញនាំចូលទំនិញរវាងប្រទេសទាំងពីរនៅតែដំណើរការដូចធម្មតា»។
ឯកឧត្តម អ៊ុំ រាត្រី បានថ្លែងថា៖ «មុនពេលការរីករាលដាលជំងឺកូវីដ ១៩ មានប្រជាពលរដ្ឋកម្ពុជាក្នុង ១ ថ្ងៃចន្លោះពី ១ ម៉ឺននាក់ ទៅ ១ ម៉ឺនប្រាំពាន់នាក់ បានធ្វើដំណើរឆ្លងដែនចេញចូលប្រទេសថៃ តាមច្រកព្រំដែនអន្តរជាតិប៉ោយប៉ែត ដូចជាទៅប្រកបរបររកស៊ីលក់ដូរ ទៅស្វែងរកការងារនៅតាមរោងចក្រ ឬកសិដ្ឋាននានា និងមួយចំនួនទៀតជាអ្នកទេសចរ ដែលធ្វើដំណើរទៅកម្សាន្ត និងពិនិត្យសុខភាពនៅប្រទេសថៃ»។
ដើម្បីបន្ធូរបន្ថយស្ថានភាពនេះ អាជ្ញាធរខេត្តបន្ទាយមានជ័យ នៃព្រះរាជាណាចក្រកម្ពុជា និងខេត្តស្រះកែវ នៃព្រះរាជាណាចក្រថៃឡង់ដ៍ បានសហការគ្នា ដើម្បីអនុញ្ញាតឲ្យអ្នកជំនួញឆ្លងដែនអាចឆ្លងចូលតាមច្រកព្រំដែនអន្តរជាតិខ្លងលឹក-ប៉ោយប៉ែត ចាប់តាំងពីថ្ងៃទី ១៥ ខែកក្កដា មក ដើម្បីទៅប្រមូលទំនិញ និងរបស់របររបស់ពួកគេនៅក្នុងផ្សាររោងក្លឿ ព្រមទាំងជួយដល់ការដឹកជញ្ជូនទំនិញរបស់ប្រជាពលរដ្ឋកម្ពុជាក្នុង ១ ថ្ងៃចំនួន ៥០ គ្រឿង ក្នុង ១ គ្រឿង មិនលើសពី ២ នាក់ ក្នុងរយៈពេលពីរបីម៉ោង ព្រមទាំងតម្រូវឲ្យពិនិត្យសុខភាពពីមន្ត្រីសុខាភិបាលទាំងកម្ពុជា និងថៃ និងត្រូវបំពេញបែបបទតាមទម្រង់របស់មន្ត្រីចត្តាឡីស័កនៃភាគីទាំងពីរ។
ការរឹតបន្តឹងការចេញចូលបានធ្វើឲ្យប៉ះពាល់ដល់លំហូរទំនិញ ប៉ុន្តែរដ្ឋាភិបាលបានកាត់បន្ថយផលប៉ះពាល់នៃការបិទព្រំដែននេះ ដោយជួយសហគមន៍នៅតាមព្រំដែនក្នុងការធ្វើដំណើរឆ្លងកាត់ក្នុងពេលវេលាដ៏លំបាកនេះ និងរក្សាទំនុកចិត្តរបស់អ្នកប្រើប្រាស់ទំនិញនៅកម្ពុជា រួមទាំងស្រុកនៅតាមព្រំដែនដូចជា ក្រុងប៉ោយប៉ែតជាដើម ដើម្បីផ្គត់ផ្គង់ទំនិញថៃ ដែលមានគុណភាព។
នៅពេលសាកសួរអំពីវត្តមានរបស់ផ្សារទំនើប Big C នៅក្នុងក្រុងប៉ោយប៉ែត ឯកឧត្តម អ៊ុំ រាត្រី បានមានប្រសាសន៍ថា៖ «ការមានអាជីវកម្មថៃនៅក្នុងខេត្តបន្ទាយមានជ័យ ជាពិសេសក្នុងក្រុងប៉ោយប៉ែត បានរួមចំណែកផ្តល់ការងារដល់ប្រជាពលរដ្ឋកម្ពុជា និងបានផ្តល់នូវទំនិញ និងសេវាកម្មដែលមានគុណភាព និងស្តង់ដាខ្ពស់»។
មើលរំលងជំងឺកូវីដ ១៩ ទាំងរដ្ឋាភិបាលថៃ និងកម្ពុជា ពេលនេះកំពុងបង្កើនកិច្ចខិតខំប្រឹងប្រែងរបស់ខ្លួន ដើម្បីស្តារឡើងវិញឱ្យកាន់តែប្រសើរ និងរឹងមាំ ខណៈពាណិជ្ជកម្មតាមព្រំដែន គឺជាចំណុចដែលត្រូវយកចិត្តទុកដាក់ជាសំខាន់។ ច្រកព្រំដែនអន្តរជាតិជាច្រើនទៀតកំពុងស្ថិតនៅក្នុងការពិភាក្សា ឬកំពុងដំណើរការសាងសង់ហេដ្ឋារចនាសម្ព័ន្ធដូចច្រកមួយនៅស្រុកណងអៀន (ខេត្តស្រះកែវ) ស្ទឹងបត់ (ខេត្តបន្ទាយមានជ័យ ដែលប្រើរយៈពេលធ្វើដំណើរប្រហែល ១៥ នាទី ពីក្រុងប៉ោយប៉ែត)។ កិច្ចខិតខំប្រឹងប្រែងនេះ គឺដើម្បីជំរុញលំហូរពាណិជ្ជកម្មតាមព្រំដែន និងស្រូបយកចរាចរណ៍ទំនិញដែលកំពុងកើនឡើងនៅច្រកព្រំដែនអន្តរជាតិប៉ោយប៉ែត-ខ្លងលឹក។
ការជម្នះបញ្ហាប្រឈម
ជីវភាពរស់នៅរបស់ប្រជាពលរដ្ឋបានរងប៉ះពាល់យ៉ាងធ្ងន់ធ្ងរដោយសារជំងឺកូវីដ ១៩ ដែលធ្វើឲ្យបាត់បង់ប្រាក់ចំណូល និងការងារយ៉ាងច្រើន។
ទាំងរដ្ឋាភិបាលថៃ និងកម្ពុជា និងវិស័យឯកជន កំពុងសហការគ្នា ដើម្បីកាត់បន្ថយផលប៉ះពាល់នៃជំងឺកូវីដទៅលើប្រជាពលរដ្ឋ។
លោក Jirawuth Suwanna-Arj នាយកមជ្ឈមណ្ឌលពាណិជ្ជកម្មថៃប្រចាំព្រះរាជាណាចក្រកម្ពុជាបានបង្ហាញនូវជំនឿចិត្តថា បញ្ហាប្រឈមនានាដែលបង្កឡើងដោយជំងឺកូវីដ ១៩ ប្រាកដជាជម្នះបាន។
«ការរីករាលដាលនៃជំងឺកូវីដ ១៩ បានបង្កឲ្យមានផលប៉ះពាល់ជាច្រើនដល់សេដ្ឋកិច្ចទាំងអស់នៅជុំវិញពិភពលោក។ នៅក្នុងប្រទេសកម្ពុជា ប្រជាជនដែលបម្រើការងារនៅក្នុងវិស័យជាច្រើនដូចជា រោងចក្រកាត់ដេរ សំណង់ និងទេសចរណ៍ សុទ្ធតែទទួលរងផលប៉ះពាល់យ៉ាងធ្ងន់ធ្ងរ ដោយសារអាជីវកម្មភាគច្រើនត្រូវបិទទ្វារ និងត្រូវពឹងផ្អែកទៅលើវិធានការជួយសង្គ្រោះសេដ្ឋកិច្ចរបស់រដ្ឋាភិបាល ដូច្នេះធ្វើឲ្យអំណាចទិញធ្លាក់ចុះទាប ខណៈពួកគេមិនមានលុយច្រើនដើម្បីចំណាយ។
«ទោះបីវិធានការរឹតបន្តឹងការបំផ្លាស់ទីរវាងប្រទេសទាំងពីរ បានបង្កការលំបាកដល់ប្រជាជនក្នុងការធ្វើដំណើរទៅប្រកបការងារ និងអាជីវកម្មក្តី ក៏រដ្ឋាភិបាលទាំងពីរ កំពុងខិតខំប្រឹងប្រែងជួយសម្រួលដល់វិស័យឯកជនក្នុងអំឡុងពេលវិបត្តិជំងឺកូវីដ ១៩ នេះ ដូច្នេះអ្នកដែលមានតួនាទី និងបំពេញការងារនៅផ្នែកផ្សេងៗនៃសេដ្ឋកិច្ច នឹងទទួលរងផលប៉ះពាល់ស្រាលជាងមុន»។
«ចំពោះខាងយើង សកម្មភាពផ្សេងៗ ត្រូវបានរៀបចំឡើង ដើម្បីរក្សាទំនាក់ទំនងក្រុមហ៊ុនថៃ និងដៃគូកម្ពុជាឲ្យផ្សារភ្ជាប់ទៅនឹងកាលានុវត្តភាពអាជីវកម្មសម្រាប់ទំនិញឧបភោគ បរិភោគ រួមមាន កម្មវិធី «ThaifexAnuga Asia ២០២០» ដែលត្រូវបានរៀបចំឡើងចាប់ពីថ្ងៃទី ២២ ដល់ថ្ងៃ ២៧ ខែសីហា កម្មវិធី «Thai GROOVE Global Business GROOVE» ត្រូវបានរៀបចំឡើងពីថ្ងៃទី ១៥ ដល់ថ្ងៃ ១៧ ខែកញ្ញា និងកម្មវិធី «International Sport Economy» ត្រូវបានរៀបចំឡើងនៅថ្ងៃទី ៤ ខែកញ្ញា»។
លោក Jirawuth ថ្លែងថា៖ «លើសពីនេះទៀត រដ្ឋាភិបាលថៃតាមរយៈមជ្ឈមណ្ឌលពាណិជ្ជកម្មថៃប្រចាំព្រះរាជាណាចក្រកម្ពុជាបានរៀបចំរួមគ្នាជាមួយ ផ្សារទំនើប ម៉ាក្រូ ខេមបូឌា នូវពិព័រណ៍ «ផ្សព្វផ្សាយម្ហូបអាហារ និងភេសជ្ជៈថៃ» នៅផ្សារ ម៉ាក្រូ សែនសុខ ចាប់ពីថ្ងៃទី ២៩ ខែសីហា ដល់ថ្ងៃទី ៦ ខែកញ្ញា ខណៈពិព័រណ៍មួយទៀតដែលមានឈ្មោះថា» Mini Thailand Week 2020» ត្រូវបានធ្វើឡើងនៅផ្សារ ម៉ាក្រូ សៀមរាប ចាប់ពីថ្ងៃទី ៣ ដល់ទី ៦ ខែកញ្ញា»។
លោក Jirawuth បន្ថែមថា៖ «តាមរយៈការរៀបចំព្រឹត្តិការណ៍ទាំងនេះ ក្រុមហ៊ុនថៃ អាចជួយដៃគូកម្ពុជាឱ្យនៅដំណើរការ ទោះបីជាមានបញ្ហាប្រឈមផ្នែកអាជីវកម្មក្តី ដែលអាចជួយសម្រាលបញ្ហាលំបាកផ្នែកហិរញ្ញវត្ថុដល់អតិថិជនកម្ពុជាចំពោះថ្លៃចំណាយនៃការរស់នៅក្នុងពេលបច្ចុប្បន្ន ដូចជា អាហារថៃ និងផលិតផលថៃសម្រាប់ប្រើប្រាស់ក្នុងគ្រួសារដែលមានគុណភាពខ្ពស់ និងតម្លៃសមរម្យនៅតែទទួលបានការគាំទ្រយ៉ាងខ្លាំងពីអ្នកប្រើប្រាស់។
ទោះបីជាការរីករាលដាលនៃជំងឺកូវីដ ១៩ បានបង្កើតនូវបរិយាកាសមិនប្រាកដប្រជាយ៉ាងណាក្តី ក៏លោក Jirawuth នៅតែជឿជាក់ថា វត្តមានអាជីវកម្មថៃនៅកម្ពុជា នឹងបន្តកើនឡើងជាមួយនឹងការវិនិយោគបន្ថែមនាពេលអនាគត និងបង្កើតការងារកាន់តែច្រើនសម្រាប់ប្រជាជនកម្ពុជា។
ទំនុកចិត្តនេះផ្តើមចេញពីទំនាក់ទំនងទ្វេភាគីដ៏កក់ក្តៅ វិសេសវិសាល និងលក្ខណពិសេសមានតែមួយ រវាងប្រទេសទាំងពីរ ដែលមានអស់រយៈពេលជាង ៧ ទសវត្សរ៍មកហើយ រួមជាមួយនឹងចក្ខុវិស័យវែងឆ្ងាយរបស់ក្រុមហ៊ុនថៃធំៗ ចាប់តាំងពីពួកគេបានចូលមកដល់ប្រទេសកម្ពុជា។ វាជាចក្ខុវិស័យដូចគ្នារបស់អាជីវកម្មទាំងអស់ដែលស្វែងរកប្រាក់ចំណេញ និងការរីកចម្រើន ប៉ុន្តែទន្ទឹមនឹងនេះដែរ ពួកគេយកចិត្តទុកដាក់ចំពោះប្រជាជន និងសហគមន៍ដែលពួកគេកំពុងរស់នៅ និងធ្វើអាជីវកម្មជាមួយ។
ឆ្លើយតបទៅនឹងការរីករាលដាលនៃជំងឺកូវីដ ១៩ វិស័យឯកជនថៃនៅកម្ពុជាបានអនុវត្តយ៉ាងឆាប់រហ័សនូវវិធានការគម្លាតសង្គម និងនាំយកបច្ចេកវិទ្យាកាត់បន្ថយហានិភ័យដោយបានអនុញ្ញាតឱ្យបុគ្គលិក និងដៃគូអាជីវកម្មធ្វើការពីផ្ទះ ដោយប្រើវិធីសាស្ត្រតភ្ជាប់តាមរយៈប្រព័ន្ធឌីជីថល។
នេះមិនត្រឹមតែធានាបាននូវនិរន្តរភាពអាជីវកម្មប៉ុណ្ណោះទេ ប៉ុន្តែថែមទាំងជួយសង្គ្រោះប្រជាជននៅក្នុងប្រព័ន្ធអេកូអាជីវកម្មរបស់ពួកគេគេចផុតពីហានិភ័យនៃការឆ្លងមេរោគផងដែរ ដើម្បីជួយដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការទប់ស្កាត់ការចម្លងជំងឺកូវីដ ១៩។ ដោយមើលឃើញពីការយកចិត្តទុកដាក់ចំពោះកម្លាំងពលកម្មក្នុងស្រុកអាជីវកម្មថៃនៅកម្ពុជា ក៏នៅតែផ្តល់ការងារដល់បុគ្គលិកកម្ពុជា ដោយមិនមានរបាយការណ៍ស្តីពីការបញ្ឈប់សូម្បីតែបន្ទាប់ពីការធ្លាក់ចុះនៃសេដ្ឋកិច្ច។
ការលើកកម្ពស់ជីវភាពរស់នៅសម្រាប់បច្ចុប្បន្ន និងអនាគត
ក្នុងពេលទីផ្សារដែលកំពុងតែរីកចម្រើនពោរពេញទៅដោយឱកាស ដែលទីផ្សារកម្ពុជាមាន និងបន្តទាក់ទាញវិនិយោគិនមកពីគ្រប់ទិសទី ក្នុងនោះមានទាំងប្រទេសថៃ ផងដែរ។
អាជីវកម្មថៃ មាននៅក្នុងវិស័យផ្សេងៗជាច្រើន តាំងពីវិស័យថាមពល សំណង់ កសិកម្ម បសុសត្វ លក់រាយ សុខភាព បដិសណ្ឋារកិច្ច និងធនាគារ ។ល។ បច្ចុប្បន្នវិស័យជាច្រើនបានក្លាយជារបាយការណ៍ប្រើប្រាស់ក្នុងផ្ទះជាមូលដ្ឋាន និងមានតួនាទីសំខាន់ ដើម្បីបម្រើដល់អតិថិជនកម្ពុជា ថែមទាំងលើកកម្ពស់ជីវភាពរស់នៅរបស់ប្រជាជនផងដែរ។ កិច្ចខិតខំប្រឹងប្រែងរបស់ពួកគេ គឺដើម្បីបន្តរស់នៅ និងផ្សារភ្ជាប់ជាមួយប្រជាជនកម្ពុជាឆ្លងកាត់ដំណើរផ្សងព្រេងក្នុងការប្រកបជំនួញទាំងលំបាក និងស្រួល ខណៈនិរន្តរភាពគឺជាចំណុចសំខាន់នៃកិច្ចការរបស់ពួកគេ និងក្លាយជាផ្នែកមួយនៃផ្នត់គំនិតស្នូលរបស់ពួកគេ។
ការិយាល័យតំណាងភីធីធី (PTT) ត្រូវបានបង្កើតឡើងដំបូងនៅឆ្នាំ ១៩៩៥។ ៥ ឆ្នាំក្រោយមក ភីធីធី ខេមបូឌា ត្រូវបានបង្កើតឡើង ហើយចាប់តាំងពីពេលនោះមក វាបានក្លាយជាក្រុមហ៊ុនឈានមុខគេមួយ ដែលបានគាំទ្រដល់របៀបរបបរស់នៅបែបផ្សេងៗ របស់ប្រជាជនកម្ពុជា និងបាននាំមកនូវការងារក្នុងវិស័យផ្សេងៗដល់ប្រទេសកម្ពុជា។ ការបើកបរក្នុងផ្លូវឆ្ងាយពីខេត្តមួយទៅខេត្តមួយ ប្រហែលមិនមែនជារឿងសប្បាយប៉ុន្មាននោះទេ ប៉ុន្តែការចុះទៅទស្សនា និងសម្រាកនៅស្ថានីយប្រេងឥន្ធនៈភីធីធីនៅតាមបណ្តោយផ្លូវនោះ អាចជួយឲ្យពួកគេមានភាពស្រស់ស្រាយជាងមុន។
មានស្ថានីយប្រេងភីធីធីចំនួន ៩៧ កន្លែង នៅទូទាំងប្រទេសកម្ពុជា ក្នុងនោះ មានហាង Jiffy Shops ចំនួន ៥៦ ហាង និងហាងកាហ្វេអាម៉ាហ្សូនចំនួន ១៥៦ ហាង ដែលអ្នកបើកបរយានយន្ត និងអ្នកដំណើរអាចឈប់សម្រាកបានយ៉ាងមានផាសុកភាពមុនពេលត្រៀមធ្វើដំណើរបន្តទៀត ដោយពួកគេអាចចាក់សាំងហើយអាចទិញរបស់របរផ្សេងៗនៅក្នុងកន្លែងតែមួយ។ ការចាក់សាំង និងការសម្រាកឲ្យមានអារម្មណ៍ស្រស់ស្រាយនៅស្ថានីយប្រេងភីធីធី មុននឹងចាប់ផ្តើមបន្តដំណើរទៅមុខទៀត អតិថិជនមិនត្រឹមតែពេញចិត្តជាមួយនឹងសេវាកម្ម និងហាងលក់ទំនិញដ៏សម្បូរបែបប៉ុណ្ណោះទេ ប៉ុន្តែបុគ្គលិកក្នុងស្រុករបស់ភីធីធី ក៏ថែមទាំងអាចបន្តលើកស្ទួយគុណភាពជីវិតរស់នៅរបស់ក្រុមគ្រួសាររបស់ពួកគេផងដែរ ដែលជាការចូលរួមចំណែកចំពោះកិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការកាត់បន្ថយភាពក្រីក្រ។
បន្ទាប់ពីមានការផ្ទុះឡើងនៃជំងឺកូវីដ ១៩ អាជីវកម្មឈានមុខរបស់ថៃនៅកម្ពុជាបានកែប្រែការគ្រប់គ្រងអាជីវកម្មរបស់ពួកគេតាំងពីការកែប្រែទម្រង់ដំណើរការការងារ និងការធានានូវសុវត្ថិភាពនៅកន្លែងធ្វើការ ដើម្បីកាត់បន្ថយហានិភ័យនៃការឆ្លងជំងឺកូវីដ ១៩ ដោយគោលដៅរួមរបស់ក្រុមហ៊ុនធំៗទាំងនោះ គឺត្រូវយកចិត្តទុកដាក់ដល់និយោជិតរបស់ពួកគេក្នុងគ្រាមិនប្រាកដប្រជានេះ ដើម្បីកាត់បន្ថយផលប៉ះពាល់ និងរក្សាទិសដៅឆ្ពោះទៅរកអាជីវកម្មប្រកបដោយនិរន្តរភាព។
លោក Ratchayut Kasemchaisiri នាយកក្រុមហ៊ុន Siam Cement Group (SCG) Cambodia ប្រចាំកម្ពុជា ដែលជាក្រុមហ៊ុនឈានមុខគេរបស់ថៃ និងបានរួមចំណែកដល់ការរីកចម្រើនយ៉ាងឆាប់រហ័សនៃវិស័យសំណង់នៅកម្ពុជា គិតចាប់តាំងពីឆ្នាំ ១៩៩២ មក បានមានប្រសាសន៍ថា៖ «ចាប់តាំងពីដំណាក់កាលដំបូងនៃការផ្ទុះឡើងនៃជំងឺកូវីដ ១៩ យើងបានខិតខំប្រឹងប្រែងយ៉ាងខ្លាំង ដើម្បីធានាថា ជនគ្រប់គ្នានៅក្នុងក្រុមហ៊ុនរបស់យើងមានសុវត្ថិភាព និងគ្មានហានិភ័យនៃការឆ្លងជំងឺ។ យើងត្រូវផ្លាស់ប្តូររបៀបរបបការគ្រប់គ្រងអាជីវកម្មរបស់យើងដោយប្តូរពីការធ្វើការនៅក្នុងការិយាល័យ ទៅធ្វើការពីគ្រប់ទីកន្លែងដោយប្រើប្រាស់ការទាក់ទងគ្នាតាមប្រព័ន្ធឌីជីថល។
«ទន្ទឹមនឹងការផ្លាស់ប្តូររបៀបគ្រប់គ្រងរបស់យើង គោលដៅរបស់យើង គឺដើម្បីបន្តផលិតនូវផលិតផលដែលមានគុណភាព ដោយផ្តោតលើ «សង្គមបៃតង» និង «សេដ្ឋកិច្ចវិលជុំ» យើងប្រើប្រាស់វត្ថុធាតុដើមដែលមិនប៉ះពាល់បរិស្ថាន និងកាត់បន្ថយកាកសំណល់ ក្នុងគោលបំណងដើម្បីគាំទ្រដល់ការអភិវឌ្ឍប្រកបដោយចីរភាព»។ ដូច្នេះស្វ័យប្រវត្តិកម្ម និងទំនើបកម្មឌីជីថល ត្រូវបានដាក់បញ្ចូលទៅក្នុងកិច្ចដំណើរការរបស់យើង ដើម្បីធានាឱ្យមានប្រតិបត្តិការដោយរលូន ក៏ដូចជាការគ្រប់គ្រងប្រកបដោយប្រសិទ្ធភាព។ និយោជិតក្នុងស្រុកត្រូវបានបណ្តុះបណ្តាលជំនាញថ្មី និងជំនាញបន្ថែម ដើម្បីឲ្យឆ្លើយតបទៅនឹងបរិបទថ្មី ដែលវានឹងផ្តល់អត្ថប្រយោជន៍ក្នុងអាជីពរបស់ពួកគេ»។
«លើសពីនេះទៀត ក្នុងនាមជាក្រុមហ៊ុនទទួលខុសត្រូវសង្គមមួយ យើងបានបំពេញភារកិច្ចជួយជ្រោមជ្រែងសហគមន៍។ ទោះបីមាន ឬគ្មានជំងឺកូវីដ ១៩ ក្តី ក៏ក្រុមហ៊ុន SCG Cambodia នៅតែបន្តផ្តល់សេវាគ្លីនិកចល័ត ដើម្បីលើកកម្ពស់សុខភាពប្រជាជនកម្ពុជានៅក្នុងមូលដ្ឋានដែរ »។ អាហារូបករណ៍ក៏ត្រូវបានផ្តល់ជូនជារៀងរាល់ឆ្នាំក្រោមកម្មវិធី «ចែករំលែកក្តីសុបិន» ដើម្បីជួយជ្រោមជ្រែងដល់សិស្សនិស្សិតកម្ពុជា និងលើកទឹកចិត្តឱ្យពួកគេសម្រេចក្តីសុបិនរបស់ពួកគេ។ លោក Ratchayut បានបន្ថែមថា៖ «វាត្រូវបានធ្វើឡើងដោយមានគោលបំណងជួយប្រជាជនកម្ពុជា លើកកម្ពស់គុណភាពសុខភាព និងជីវិតរស់នៅរបស់ពួកគេ។ ប្រាកដណាស់ គំនិតផ្តួចផ្តើមរបស់ក្រុមហ៊ុន SCG Cambodia នឹងជួយដល់កិច្ចខិតខំប្រឹងប្រែងរបស់រដ្ឋាភិបាលកម្ពុជាក្នុងការអភិវឌ្ឍប្រទេស ក៏ដូចជា ដើម្បីកៀរគរកម្លាំងយុវជន ដើម្បីស្ថាបនាប្រទេសជាតិ»។ សម្រាប់ក្រុមហ៊ុនថៃដ៏ល្បីល្បាញមួយផ្សេងទៀត គឺក្រុមហ៊ុន C.P. Cambodia, ជាក្រុម-ហ៊ុនមួយដែលបានអនុវត្តប្រព័ន្ធសុវត្ថិភាពខាងជីវសាស្ត្រជាច្រើនទសវត្សរ៍មកហើយ បានចូលរួមចំណែកយ៉ាងខ្លាំងក្នុងការទប់ទល់ជាមួយនឹងការរីករាលដាលនៃជំងឺកូវីដ ១៩។
លោកវេជ្ជបណ្ឌិត Poohrich Sinwat ប្រធានផ្នែកអភិវឌ្ឍន៍យុទ្ធសាស្ត្រ និងទីផ្សាររបស់ក្រុមហ៊ុន C.P. Cambodia បានមានប្រសាសន៍ថា៖ «ផ្អែកលើចំណេះដឹង និងបទពិសោធយ៉ាងទូលំទូលាយរបស់យើងក្នុងការអនុវត្តប្រព័ន្ធសុវត្ថិភាពខាងជីវសាស្ត្រវិធីមួយចំនួនដែលយើងបានអនុវត្តចំពោះវិធានការបង្ការជំងឺកូវីដ ១៩ រួមមាន ការរៀបចំឱ្យមានបន្ទប់បាញ់ថ្នាំសម្លាប់មេរោគ ទីតាំងសម្រាប់ធ្វើចត្តាឡីស័កសម្រាប់ភ្ញៀវ និងការត្រួតពិនិត្យសុវត្ថិភាពដោយមានការប្រើប្រាស់បច្ចេកវិទ្យាជាច្រើន»។
នេះមិនមែនជាលើកទី១ ទេ ដែលក្រុមហ៊ុន C.P. Cambodia បានទប់ទល់ជាមួយនឹងការផ្ទុះឡើងនៃជំងឺឆ្លង។ តាមរយៈបទពិសោធកន្លងមកក្នុងការទប់ទល់នឹងជំងឺផ្តាសាយជ្រូកអាហ្វ្រិក (ASF) ដែលកើតលើសត្វជ្រូក ក្រុមហ៊ុន C.P. Cambodia បានបង្ហាញថា តាមរយៈការជួយជ្រោមជ្រែងដល់កសិករ ជាមួយនឹងការអប់រំ និងការបណ្តុះបណ្តាលយ៉ាងស័ក្តិសម អំពីការផ្តល់អាទិភាពទៅលើការគ្រប់គ្រងប្រព័ន្ធសុវត្ថិភាពខាងជីវវិទ្យា ផ្នែកអនាម័យ និងការចាក់វ៉ាក់សាំង ការរីករាលដាលនៃការឆ្លងអាចត្រូវបានទប់ស្កាត់បានយ៉ាងជោគជ័យ។
បន្ទាប់ពីនោះ កសិករបានដើរតួនាទីជាដៃគូសំខាន់របស់ C.P. Cambodia។ ចក្ខុវិស័យរបស់ក្រុមហ៊ុនគឺ «ផ្ទះបាយពិភពលោក» ដែលវត្ថុធាតុដើម គ្រឿងផ្សំ និងសាច់ ដែលត្រូវបានប្រើប្រាស់នៅក្នុងផលិតផលសម្រេច គឺត្រូវតែមានសុវត្ថិភាព និងមានគុណភាពខ្ពស់បំផុត ស្របតាមអាទិភាពបច្ចុប្បន្នរបស់រដ្ឋាភិបាលកម្ពុជាក្នុងការលើកកម្ពស់វិស័យកសិកម្ម ដើម្បីធ្វើពិពិធកម្មមូលដ្ឋានសេដ្ឋកិច្ចរបស់ប្រទេស។
«យើងមើលឃើញពីទំនាក់ទំនងដ៏រឹងមាំរវាងកសិដ្ឋាន ក្រុមហ៊ុនផលិត និងអតិថិជននៅកម្ពុជា។ តាមទស្សនៈរបស់អតិថិជន ពួកគេចង់បានផលិតផល និងសេវាកម្មដែលមានគុណភាពខ្ពស់នៅក្នុងបរិយាកាសដ៏ល្អប្រសើរដែលអាចរកបានងាយស្រួលតាមរយៈបណ្តាញលក់រាយដ៏ច្រើន ជាពិសេសនៅតំបន់ជនបទ ដែលមិនទាន់មានផ្សារទំនើប»។
លោក Poohrich មានប្រសាសន៍ថា៖ «ជាមួយនឹងបណ្តាញហាង 7-Eleven ដែលរំពឹងថានឹងចាប់ផ្តើមប្រតិបត្តិការនៅឆ្នាំ ២០២១ យើងជឿជាក់ថា យើងមានភ្នាក់ងារចែកចាយដែលអាចបម្រើដល់អតិថិជនរបស់យើងនៅទូទាំងប្រទេស។ ទន្ទឹមនឹងនេះដែរ វត្តមានហាងទំនើបដែលត្រូវបានគេលើកយកមកនិយាយច្រើនគ្នានេះ នឹងផ្តល់ឱកាសការងារដល់ប្រជាជនកម្ពុជាយ៉ាងច្រើននៅពេលវាពង្រីកបណ្តាញដ៏ធំទូលាយនៅទូទាំងប្រទេស ដែលនឹងជួយលើកកម្ពស់ជីវភាពរស់នៅរបស់ប្រជាជន និងគាំទ្រដល់ការចែកចាយប្រាក់ចំណូល»។
កិច្ចខិតខំប្រឹងប្រែងរបស់ថៃ និងកម្ពុជាក្នុងការពង្រឹងទំនាក់ទំនងនៅគ្រប់កម្រិត រាប់ចាប់ពីរដ្ឋាភិបាលរហូតដល់វិស័យឯកជន នឹងនៅតែបន្តឥតឈប់ឈរ ហើយថែមទាំងត្រូវពង្រឹងបន្ថែមទៀតនៅគ្រប់កម្រិត ទោះស្ថិតនៅក្នុងវិបត្តិជំងឺកូវីដ ១៩ ក្តី។
និមិត្តសញ្ញាសម្រាប់ទំនាក់ទំនងការទូតរវាងកម្ពុជា-ថៃ ខួបលើកទី ៧០ បានបង្ហាញពីការរីកចម្រើន និងវិបុលភាព ដែលអាចសម្រេចបានសម្រាប់ប្រជាជាតិទាំងពីរ តាមរយៈការសហការគ្នា ដូចនារីរបាំអប្សរាដែលស្លៀកពាក់តាមបែបខ្មែរ និងថៃ អមដោយផ្កាតំណាងប្រទេសនីមួយៗ គឺផ្កាលឿងរាជ និងផ្ការំដួល។ តាមរយៈការសហការគ្នា ប្រទេសថៃ និងកម្ពុជាអាចជម្នះបញ្ហាប្រឈមបច្ចុប្បន្នលើវិស័យសេដ្ឋកិច្ចសង្គម និងកាន់តែរីកចម្រើនថែមទៀតនៅក្នុងពេលវេលាមិនប្រាកដប្រជានេះ៕