The Phnom Penh Post Search

Search form

Logo of Phnom Penh Post newspaper Phnom Penh Post - ជម្លោះ​កម្មករ​នៅ​រោងចក្រ SLសង្ឃឹម​មាន​ការ​ព្រម​ព្រៀង​មួយ

ជម្លោះ​កម្មករ​នៅ​រោងចក្រ SLសង្ឃឹម​មាន​ការ​ព្រម​ព្រៀង​មួយ

ជម្លោះ​កម្មករ​នៅ​រោងចក្រ SLសង្ឃឹម​មាន​ការ​ព្រម​ព្រៀង​មួយ

131105_07c
កម្មកររោងចក្រ SL ក្នុងអំឡុងពេលធ្វើកូដកម្មតវ៉ាកន្លងមក ម៉ៃ វីរៈ

ភ្នំពេញៈ ខណៈ​សហជីព​និង​ថ្នាក់​ដឹក​នាំ​រោងចក្រ​មួយ ក្នុង​ចំណោម​រោងចក្រ​ធំ​មួយ នៅ​អាស៊ី ឈាន​ដល់​ចំណុច​ជាប់​គាំង​ពាក់​ព័ន្ធ​នឹង​បញ្ហា​កូដកម្ម​ដែល​បាន​អូស​បន្លាយ​អស់​ពេល​ជិត​បី​ខែ ក្រុម​អ្នក​ពាក់​ព័ន្ធ​កំពុង​ធ្វើ​ការ​សម្រុះ​សម្រួល​ឲ្យ​មាន​កិច្ច​ព្រម​ព្រៀង​មួយ​ដោយ​សង្ឃឹម​ថា នឹង​បញ្ចប់​ភាព​ជាប់​គាំង​នេះ។

ក្រុម​មន្រ្តី​គម្រោង​រោងចក្រ កាន់​តែ​ប្រសើរ​នៅ​កម្ពុជា (BFC) របស់​អង្គការ​ពលកម្ម​អន្តរជាតិ​និង​មូលនិធិ​ក្រុម​ប្រឹក្សា​អាជ្ញា​កណ្តាល​កម្ពុជា កាល​ពី​ម្សិលមិញ បាន​អះអាង​ថា ទាំង​ពីរ​ក្រុម​កំពុង​ធ្វើ​ការងារ​ជាមួយ​គ្នា។

លោក Jason Judd មន្រ្តី​ជំនាញ​របស់ BFC បាន​ថ្លែង​ថា ក្នុង​រយៈ​កាល​ពីរ​សប្តាហ៍​ចុង​ក្រោយ​នេះ​ក្រុម​ប្រឹក្សា​អាជ្ញា​កណ្តាល​និង BFC បាន​ប្រារព្ធ​កិច្ច​ប្រជុំ​ដោយ​ឡែក​គ្នា​ជាមួយ​ថ្នាក់​ដឹក​នាំ​រោងចក្រ អេស អិល (SL) និង​ជាមួយ​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​កាត់​ថា ស៊ីខៅឌូ ដែល​តំណាង​ឲ្យ​កម្មករ​ភាគ​ច្រើន​នៅ​រោងចក្រ អេស អិល ហើយ​ក្នុង​អំឡុង​កិច្ច​ប្រជុំ​នោះ​ពួក​គេ​បាន​ចំណាយ​ពេល​ជាច្រើន​ម៉ោង​ស្តាប់​បណ្តឹង និង​ការ​ទាមទារ​របស់​ភាគី​ទាំង​ពីរ។

លោក Judd បាន​ថ្លែង​កាល​ពី​ម្សិលមិញ​ថា៖ «ជាមួយ​ក្រុម​ប្រឹក្សា​អាជ្ញា​កណ្តាល យើង​បាន​ធ្វើ​សំណើ​ទៅ​ភាគី​ទាំង​ពីរ​តាម​ដែល​យើង​អាច​ជួយ​ពួក​គេ​បាន​ដើម្បី​ឈាន​ដល់​កិច្ច​ព្រម​ព្រៀង។ យើង​ពាក់​ព័ន្ធ​គឺ​ដោយ​សារ​ករណី​នេះ​ជា​ករណី​វិសាមញ្ញ»។

លោក គង់ អាទិត្យ អនុ​ប្រធាន ស៊ីខៅឌូ បាន​ថ្លែង​ថា បាតុកម្ម​នៅ​មុខ​រោងចក្រ​មួយ​របស់​រោងចក្រ អេស អិល នៅ​ខណ្ឌ មាន​ជ័យ បាន​បន្ត​កាល​ពី​ម្សិលមិញ ប៉ុន្តែ​វា​មាន​លក្ខណៈ​សន្តិវិធី​ជាង​សប្តាហ៍​មុន​នៅ​ពេល​ដែល​កូដករ ចំនួន ១០ នាក់​បាន​រង​របួស។

កាល​ពី​ថ្ងៃ​ព្រហស្បតិ៍​និង​ថ្ងៃ សុក្រ បុគ្គលិក​រោងចក្រ អេស អិល ត្រូវ​ចោទ​ប្រកាន់​ថា បាន​បាញ់​ចម្ពាម​កៅស៊ូ​ទៅ​លើ​អ្នក​តវ៉ា។

មន្រ្តី​រោងចក្រ អេស អិល កាល​ពី​ថ្ងៃ​អាទិត្យ​អះអាង​ថា បាតុករ​ទេ​ដែល​ចាប់​ផ្តើម​ការ​គប់ មិន​មែន​បុគ្គលិក​ក្រុមហ៊ុន​ទេ។

កម្មករ​នៅ​រោងចក្រ SL បាន​ចាប់​ផ្តើម​ដើរ​ចេញ​ពី​ការងារ​កាល​ពី​ខែ សីហា នៅ​ពេល​ដែល​ម្ចាស់​ភាគ​ហ៊ុន​គឺ​លោក មាស សុថា បាន​ជួល​មន្រ្តី​កង​រាជ​អាវុធហត្ថ​ទៅ​ឈរ​យាម​នៅ​ក្នុង​រោងចក្រ។

ដោយ​ឃើញ​សកម្មភាព​បែប​នោះ​ថា​ជា​ការ​បំភិត​បំភ័យ​កម្មករ​នៅ​រោងចក្រ អេស អិល ១ និង ២ បាន​ទាមទារ​ឲ្យ​បណ្តេញ​លោក មាស សុថា ចេញ។

ជាង​នេះ ទៀត កម្មករ​បាន​ទាមទារ​ដំឡើង​ប្រាក់ ៣ ដុល្លារ​ក្នុង​មួយ​ថ្ងៃ សម្រាប់​អាហារ​ថ្ងៃ​ត្រង់ និង​ចំណុច​ជាច្រើន​ដទៃ​ទៀត​។ ចាប់​តាំង​ពី​កូដកម្ម​បាន​ចាប់​ផ្តើម​រោងចក្រ អេស អិល និង​សហជីព ស៊ីខៅឌូ បាន​ធ្វើ​ការ​ចរចា​ជាច្រើន​លើក ប៉ុន្តែ​គ្មាន​បាន​ផល​បើ​ទោះ​ជា​មាន​ការ​សម្រប​សម្រួល​ពី​មន្រ្តី​រដ្ឋាភិបាល​ក៏​ដោយ។

ដោយ​ស្ទាក់​ស្ទើរ​មិន​និយាយ​ថា​ការ​សម្រុះ​សម្រួល​ត្រូវ​រ៉ូវ​គ្នា​ឬ​ក៏​យ៉ាង​ណា​នោះ​លោក សុខ ឡោ នាយក​ប្រតិបត្តិ​នៃ​ក្រុម​ប្រឹក្សា​អាជ្ញាកណ្តាល​បាន​ថ្លែង​ថា ក្រុម​ការងារ​របស់​លោក​និង BFC នឹង​ធ្វើ​ការ​សម្រុះ​សម្រួល​ឲ្យ​មាន​កិច្ច​ព្រម​ព្រៀង​ដោយ​ផ្អែក​ទៅ​តាម​ការ​ចង់​បាន​របស់​ភាគី​ទាំង​ពីរ ប៉ុន្តែ វា​អាស្រ័យ​ទៅ​លើ​ពួក​គេ។

លោក​បន្ត​ថា៖ «វា​គ្មាន​អ្វី​ថ្មី​សម្រាប់​ពួក​គេ​នោះ​ទេ ពួក​គេ​បាន​ដឹង​អំពី​បញ្ហា​របស់​ខ្លួន​នេះ​ហើយ»៕ PS

អត្ថបទគួរចាប់អារម្មណ៍