.jpg)
សកម្មជននៃអតីតបក្សសង្គ្រោះជាតិឈ្មោះ ពុយ តាក់ នៅកំពង់ស្ពឺត្រូវបានចាប់ខ្លួនពីម្សិលមិញ។ រូបថត សហការី
ភ្នំពេញៈ គិតតាំងពីថ្ងៃទី ២០ កញ្ញា មកដល់ត្រឹមថ្ងៃទី ៩ តុលា មនុស្សសរុប ២៤ នាក់ហើយ ដែលត្រូវបានសមត្ថកិច្ចឃាត់ខ្លួនពាក់ព័ន្ធនឹងបទចោទប្រកាន់ «រួមគំនិតក្បត់» និងបទញុះញង់ ដោយសារពួកគេបានបង្ហាញជំហររង់ចាំទទួលដំណើរនិវត្តន៍វិលចូលស្រុកវិញរបស់លោក សម រង្ស៊ី ប្រធានស្តីទីនៃអតីតបក្សប្រឆាំង ខណៈដែលតុលាការធ្វើការចោទប្រកាន់ និងចេញដីកាចាប់ខ្លួនជាបន្តបន្ទាប់។
ការឃាត់ខ្លួន និងការចេញដីកាចាប់ខ្លួនជាបន្តបន្ទាប់មកនេះបានកើតឡើងចាប់តាំងពីក្រសួងយុត្តិធម៌ប្រកាសកាលពីថ្ងៃទី ២០ ខែ កញ្ញា ថា ដំណើរវិលត្រឡប់របស់លោក សម រង្ស៊ី គឺជាផែនការរដ្ឋប្រហារ។ តាំងពីពេលនោះមកមានមនុស្សសរុប ២៤ នាក់ហើយត្រូវបានចាប់ខ្លួនគិតត្រឹមថ្ងៃអង្គារទី ៩ ខែតុលានេះ។ នេះបើតាមការបញ្ជាក់របស់លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ។
កាលពីថ្ងៃម្សិលមិញសកម្មជនអតីតគណបក្សសង្គ្រោះជាតិបានឲ្យដឹងថា សកម្មជនរបស់ខ្លួនឈ្មោះ ពុយ តាក់ ដែលជាបេក្ខជនក្រុមប្រឹក្សាស្រុកបសេដ្ឋ ខេត្តកំពង់ស្ពឺត្រូវបានសមត្ថកិច្ចឃាត់ខ្លួនពាក់ព័ន្ធទៅនឹងបទចោទប្រកាន់ «រួមគំនិតក្បត់»។
បើតាមដីកាចាប់ខ្លួនរបស់តុលាការខេត្តកំពង់ស្ពឺ ការចាប់ខ្លួនម្សិលមិញមិនមែនមានតែឈ្មោះ ពុយ តាក់ ទេថែមទាំងមាន ឈ្មោះ អ៊ុំ យ៉ុន ម្នាក់ទៀត។ ទាំង ២ នាក់ មិនត្រូវបានចោទប្រកាន់ពីបទ «រួមគំនិតក្បត់» ទេ ប៉ុន្តែត្រូវបានចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ពីម្សិលមិញតុលាការខេត្តកំពង់ចាមបានចេញសេចក្ដីប្រកាសព័ត៌មានថា ឈ្មោះ ហម វុទ្ធី ដែលត្រូវបានចោទប្រកាន់ពីបទរួមគំនិតក្បត់កាលពីថ្ងៃទី ១ តុលា ត្រូវបានសមត្ថកិច្ចចាប់ខ្លួននៅថ្ងៃអង្គារ និងបញ្ជូនទៅសាលាដំបូងខេត្តហើយ។ ការចាប់ខ្លួននេះក៏ពាក់ព័ន្ធនឹងការចូលរួម «ផែនការផ្ដួលរំលំរាជរដ្ឋាភិបាលក្រោមផែនការវិលត្រឡប់របស់លោក សម រង្ស៊ី នៅថ្ងៃទី ៩ វិច្ឆិកា។
សាលាដំបូងខេត្តសៀមរាបពីម្សិលមិញក៏បានចេញដីកាចាប់ខ្លួនឈ្មោះ ឈុន វាន អាយុ ៣០ ឆ្នាំ អតីតក្រុមប្រឹក្សាឃុំក្ដីរុន ស្រុកពួក ខេត្តសៀមរាប បន្ទាប់ពីឈ្មោះនេះត្រូវបានចោទប្រកាន់កាលពីថ្ងៃទី ៨ តុលា ពីបទរួមគំនិតក្បត់។ តុលាការខេត្តបញ្ជាក់ថា៖ «ការចោទប្រកាន់ខាងលើគឺពាក់ព័ន្ធនឹងសកម្មភាពរបស់ឈ្មោះ ឈុន វាន បានបង្ហោះខ្លឹមសារតាមប្រព័ន្ធសង្គមហ្វេសប៊ុកពីប្រទេសថៃ ដើម្បីកៀរគរ និងបំផុសឲ្យមហាជនចូលរួមក្នុងផែនការផ្ដួលរំលំរាជរដ្ឋាភិបាលនៃព្រះរាជាណាចក្រកម្ពុជា»។
តុលាការខេត្តសៀមរាបបញ្ជាក់ថាសាររបស់ឈ្មោះ ឈុន វាន រួមមាន «តោះយើងទៅប្រទេសយើងវិញ» «ពួកយើងជាកូនខ្មែរមានភារកិច្ចជួយមាតុភូមិយើងកុំឈរឱបដៃមើលប្រទេសជាតិជួបគ្រោះមហន្តរាយ»។ «ថ្ងៃទី ៩ ខែវិច្ឆិកា ឆ្នាំ ២០១៩ រួមគ្នាបញ្ចប់របបផ្ដាច់ការនៅកម្ពុជា»។ «យុទ្ធនាការម្រាមដៃ ៩ វិច្ឆិកា ជួយជាតិខេមរាឲ្យរួចផុតពីជនផ្ដាច់ការ ហ៊ុន សែន»។
ស្របពេលជាមួយគ្នានេះសាលាដំបូងខេត្តបន្ទាយមានជ័យកាលពីថ្ងៃចន្ទ និងថ្ងៃអង្គារបានចោទប្រកាន់មនុស្ស ៣ នាក់ទៀតពីបទ «រួមគំនិតក្បត់» រួមមានឈ្មោះ ឆាំ សុភាន់ ឈ្មោះ ផុង សុជាតិ និងឈ្មោះ ឃុន សាវរ៉ាន និងគូកន។ តុលាការបញ្ជាក់ថាឈ្មោះទាំង ៣ បានកៀរគរ និងបំផុសឲ្យពលរដ្ឋធ្វើដំណើរទៅភ្នំពេញដើម្បីចូលរួមសកម្មភាពផ្ដួលរំលំរាជរដ្ឋាភិបាល។
ពាក់ព័ន្ធនឹងផែនការវិលត្រឡប់របស់លោក សម រង្ស៊ី តុលាការខេត្តសៀមរាប និងតុលាការខេត្តក្រចេះកាលពីម្សិលមិញបានបើកកិច្ចប្រជុំជាមួយអាជ្ញាធរខេត្ត និងសមត្ថកិច្ចអំពីការរក្សាសន្តិសុខពាក់ព័ន្ធនឹងការវិលត្រឡប់របស់លោក សម រង្ស៊ី។
សកម្មជនបក្សសង្គ្រោះជាតិឈ្មោះ សេង ម៉េងប៊ុនរ៉ុង បានសរសេរនៅលើបណ្ដាញសង្គមថាចាប់ពីដើមឆ្នាំ ២០១៩ នេះសកម្មជន និងសមាជិកអតីតគណបក្សសង្គ្រោះជាតិ ៣៥ នាក់ត្រូវបានចាប់ និងឃុំខ្លួនបណ្ដោះអាសន្ន ខណៈដែល ៦០ នាក់ទៀតបានរត់គេចខ្លួនទៅប្រទេសថៃដោយភ័យខ្លាចការចាប់ខ្លួន។
ពាក់ព័ន្ធនឹងការវិលត្រឡប់របស់លោក សម រង្ស៊ី កាលពីម្សិលមិញលោក ស ខេង រដ្ឋមន្ត្រីក្រសួងមហាផ្ទៃប្រាប់អ្នកសារព័ត៌មានបន្ទាប់ពីពិធីបិទមហាសន្និបាតអាណត្តិទី ២ របស់សមាគមជាតិ ក្រុមប្រឹក្សារាជធានី-ខេត្ត ថា វិធានការផ្លូវច្បាប់លើលោក សម រង្ស៊ី និងអ្នកគាំទ្រមិនមែនជាការគំរាមកំហែងលើសិទ្ធិបញ្ចេញមតិទេ។
លោកថ្លែងថា៖ «អ្នកលើកឡើងមតិខុសគ្នា ប៉ុន្ដែត្រង់ថាបើគាត់ធ្វើសកម្មភាពគាំទ្រអ្វីដែល សម រង្ស៊ី បានសម្រេចចិត្តបានប្រកូកប្រកាសនេះជាការខុសច្បាប់ អាហ្នឹងដើរហួស។ ដូច្នេះវាមិនមែនជាការគំរាមកំហែងទៅលើសិទ្ធិបញ្ចេញមតិនោះទេ។ បានន័យថា ពួកគាត់ធ្វើបំពានច្បាប់ ការប្រមាថព្រះមហាក្សត្រ ឬក៏គាត់ចង់ធ្វើរដ្ឋប្រហារតាមរយៈបដិវត្តន៍ពណ៌ ការប្រមូលកម្លាំងមហាជនផ្ដួលរំលំរដ្ឋាភិបាល អាហ្នឹងវាហួសក្របខ័ណ្ឌ ហើយការចាប់ខ្លួននឹងមើលតាមជាក់ស្ដែង»៕
រាយការណ៍បន្ថែម ម៉ិច ដារ៉ា
