.jpg)
ប្រជាពលរដ្ឋធ្វើដំណើរដោយពាក់ម៉ាស់នៅតាមដងផ្លូវមួយក្នុងខណ្ឌមានជ័យ រាជធានីភ្នំពេញកាលពីថ្ងៃអង្គារ។ រូបថត ហុង មិនា
ភ្នំពេញៈ អ្នកនាំពាក្យក្រសួងសុខាភិបាលបញ្ជាក់ជាថ្មីពីម្សិលមិញថា រាជរដ្ឋាភិបាលរ៉ាប់រងថ្លៃធ្វើតេស្តរកមើលកូវីដ ១៩ ប៉ុន្តែបើមិនមានរោគសញ្ញាសង្ស័យ ឬមានប្រវត្តិធ្វើដំណើរទៅកន្លែងដែលមានមេរោគនេះ ការធ្វើតេស្តមិនចាំបាច់ទេ។ គិតត្រឹមថ្ងៃម្សិលមិញការធ្វើតេស្តរកកូវីដ ១៩ មានចំនួនជាង ១ ពាន់ករណី រីឯអ្នកបានឆ្លងកូវីដ ១៩ នៅកម្ពុជាសរុបមានចំនួន ៣៧ នាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលថ្លែងក្នុងសន្និសីទសារព័ត៌មាននៅទីស្ដីការគណៈរដ្ឋមន្ត្រីពីម្សិលមិញដោយ បញ្ជាក់ជាថ្មីថា ការធ្វើតេស្តរកមើលកូវីដ ១៩ ធ្វើឡើងដោយឥតគិតថ្លៃ ហើយការធ្វើតេស្តគិតត្រឹមថ្ងៃពុធម្សិលមិញមានចំនួន ១ ១១២ ករណី។ ចំនួនជាង ១ ពាន់ករណីនេះ បូករួមទាំងអ្នកដែលរកឃើញវិជ្ជមានកូវីដ ១៩ ចំនួន ៣៧ នាក់។
លោកស្រីថ្លែងយ៉ាងដូច្នេះថា៖ «ក្នុងចំណោម ១ ១១២ ករណីនេះយើងអត់មានយកលុយយកកាក់អី ១ រៀលទេ។ រាជរដ្ឋាភិបាលជាអ្នកចេញបន្ទុកទាំងអស់។ ហេតុអ្វីបានជាមានពាក្យនិយាយថា អូ! អ្នកដែលធ្វើតេស្តវិជ្ជមានគេអត់យកលុយទេ អ្នកធ្វើតេស្តអវិជ្ជមានគេយកលុយ។ ឥឡូវខ្ញុំសុំឲ្យបង្ហាញអត្តសញ្ញាណឲ្យច្បាស់ បង្ហាញសាច់រឿងឲ្យច្បាស់ កន្លែងណាគេយកលុយ អ្នកណាអ្នកយកលុយ»។
លោកស្រីបន្តថា៖ «អ៊ីចឹងសូមប្រកាសដល់បងប្អូនសាធារណជនម្ដងទៀតថាមិនមានការយកលុយកាក់ទេ នៅពេលមានការសង្ស័យថាមានផ្ទុកកូវីដ ១៩ នេះ ហើយមានការពិនិត្យធ្វើតេស្តដោយក្រុមគ្រូពេទ្យ ក្រុមការងារឆ្លើយតបបន្ទាន់របស់ក្រសួងសុខាភិបាល ឬមន្ទីរសុខាភិបាលខេត្ត។ បើសិនបងប្អូនមានការព្រួយបារម្ភសុំឲ្យទំនាក់ទំនងមកក្រុមគ្រូពេទ្យជាមុនសិន»។
ទោះយ៉ាងណាលោកស្រីបញ្ជាក់ទៀតថា វាមិនមានភាពចាំបាច់ក្នុងការធ្វើតេស្តរកមេរោគកូវីដ ១៩ ទេ ប្រសិនបើបុគ្គលនោះមិនមានប្រវត្តិធ្វើដំណើរទៅកន្លែងដែលមានការឆ្លងកូវីដ ១៩ ឬមិនមានរោគសញ្ញាគួរឲ្យសង្ស័យ។
លោកស្រីថ្លែងថា៖ «ជាការពិត យើងព្រួយបារម្ភសុខភាពយើងហើយឧបមាថា ឥឡូវរូបខ្ញុំ ខ្ញុំអត់មានរោគសញ្ញាអីទាំងអស់ ហើយខ្ញុំក៏អត់មានធ្វើដំណើរទៅណាដែរ តែខ្ញុំចេះតែភ័យ ខ្ញុំចង់ទៅធ្វើតេស្ត ថាតើខ្ញុំមានវីរុសកូវីដដែរឬទេ? វាអត់មានភាពចាំបាច់ទេបើសិនអស់លោក លោកស្រីទៅធ្វើតេស្តនៅថ្ងៃនេះលទ្ធផលដែលចេញមកអវិជ្ជមានគឺសឹងតែ ១០០ ភាគរយហើយ ដោយសារយើងមិនមានអីដែលពាក់ព័ន្ធទៅនឹងករណីសង្ស័យនៃកូវីដ ១៩»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលថ្លែងក្នុងសន្និសីទកាសែតម្សិលមិញនៅគណៈរដ្ឋមន្ត្រី។ហេង ជីវ័ន
អ្នកនាំពាក្យរូបនេះបន្ថែមថា៖ «ឧបមាថាធ្វើតេស្តថ្ងៃនេះឃើញ អវិជ្ជមានមិនមានន័យថាយើងអត់ឆ្លងកូវីដរហូតទេ ព្រោះធ្វើតេស្តថ្ងៃនេះអវិជ្ជមាន តែស្អែកអាចវិជ្ជមាន។ ថ្ងៃនេះអត់មានតែស្អែកអាចមានបើសិនយើងមិនអនុវត្តវិធានការការពារខ្លួនយើង»។
នាយកដ្ឋានប្រយុទ្ធនឹងជំងឺឆ្លង CDC ដែលជាទំព័រហ្វេសប៊ុកផ្ដល់ព័ត៌មានអំពីជំងឺនេះក៏បានឆ្លើយនឹងសំណួរលើទំព័រហ្វេសប៊ុករបស់ខ្លួនថា ការធ្វើតេស្តមើលកូវីដ ១៩ មិនមានការយកថ្លៃសេវាទេ ប៉ុន្តែមន្ទីរពេទ្យប្រហែលជាយកកម្រៃថ្លៃការប្រឹក្សាទូទៅដូចធម្មតា។
គិតត្រឹមថ្ងៃពុធម្សិលមិញ ក្រសួងសុខាភិបាលបានបញ្ជាក់ថា មានអ្នកឆ្លងកូវីដ ១៩ សរុប ៣៧ នាក់ នៅកម្ពុជាដែលក្នុងនោះ ៣៦ ករណី នាំចូលពីប្រទេសក្រៅ និង ១ ករណី ប៉ះពាល់ផ្ទាល់ជាមួយអ្នកជំងឺជនជាតិជប៉ុន។ អ្នកឆ្លងជំងឺនេះទាំងបរទេសទាំងខ្មែរ បាននិងកំពុងសម្រាកទទួលការថែទាំព្យាបាលនៅរាជធានីភ្នំពេញ និងខេត្ត ១១ ផ្សេងទៀត។ ភាគច្រើននៃពលរដ្ឋខ្មែរអ៊ិស្លាមត្រូវបានរកឃើញជំងឺនេះក្រោយពេលចូលរួមពិធីសាសនាអ៊ិស្លាមនៅប្រទេសម៉ាឡេស៊ី។ ពួកគេបានត្រឡប់មកកម្ពុជាវិញកាលពីដើមខែមីនានេះ។
ទោះយ៉ាងណាក្រសួងបញ្ជាក់ថាមិនទាន់មានការឆ្លងនៅក្នុងសហគមន៍ទេ ប៉ុន្តែលទ្ធភាពរាលដាលនៅសហគមអាចនឹងកើតមាន។
លោកស្រី ឱ វណ្ណឌីន បានពន្យល់ថា យន្តការនាពេលនេះគឺការចូលរួមទប់ស្កាត់ការរីករាលដាលនៃជំងឺនេះ ដោយចាប់ផ្ដើមពីបុគ្គលម្នាក់ៗ។ វិធានការការពារគឺងាយ និងសាមញ្ញនោះគឺលាងដៃនឹងសាប៊ូរយៈពេល ១ នាទីហើយរាល់ការធ្វើដំណើរទៅទីណាក៏ដោយ ត្រូវតែមានអនាម័យដោយលាងដៃនឹងសាប៊ូ ឬទឹកអាល់កុល ហើយកុំយកដៃប៉ះច្រមុះ ប៉ះមាត់។ ចំណែកវិធានការទី ២ គឺការបរិភោគម្ហូបអាហារដែលចម្អិនបានល្អ។
លោកស្រីនិយាយថា៖ «ការចូលរួមអនុវត្តនេះគឺបុគ្គលនីមួយៗត្រូវតែចូលរួមអនុវត្ត។ មិនមែនអង្គុយចាំឲ្យគេអនុវត្តឲ្យយើងទេ គឺបុគ្គលនីមួយៗត្រូវតែចូលរួមអនុវត្តហើយក្នុងដំណាក់កាលនេះ ដើម្បីការពារខ្លួន។ វិធានការគឺក្រសួងសុខាភិបាលបានជម្រាបជូនហើយថាត្រូវធ្វើម៉េចៗ។ តែការអនុវត្តគឺបុគ្គលដែលជាអ្នកអនុវត្ត»។
លោកស្រីបន្តថា បើសិនជាពលរដ្ឋមិនចូលរួមអនុវត្តវិធានការ អនាម័យទេ វិធានការនានាដូចជា បិទពិធីជួបជុំ បិទ KTV រោងភាពយន្ត និងទីកន្លែងផ្សេងទៀតនោះប្រហែលមិនមានប្រសិទ្ធភាពទេ។
ជាវិធានការបន្ថែមដើម្បីទប់ស្កាត់ការឆ្លងរាលដាលជំងឺនេះ ក្រសួងសុខាភិបាលបានសម្រេចផ្អាកការប្រគំតន្ត្រីនៅតាមទីសាធារណៈដែលមានមនុស្សចូលរួមច្រើននៅទូទាំងប្រទេសចាប់ពីថ្ងៃទី ១៧ មីនាតទៅរហូតដល់ស្ថានភាពជំងឺនេះមានភាពធូរស្រាលឡើងវិញ។
ដោយយោងលើការសម្រេចរបស់ក្រសួងសុខាភិបាលនោះ ក្រសួងព្រះបរមរាជវាំងក៏បានសម្រេចផ្អាកការចូលទស្សនាសម្រាប់ភ្ញៀវជាតិ និងអន្តរជាតិទៅកាន់ព្រះបរមរាជវាំងចាប់ពីថ្ងៃទី ១៨ មីនា តទៅរហូតដល់មានការជូនដំណឹងជាថ្មី៕
វីដេអូ៖
