ភ្នំពេញៈ រដ្ឋបាលរាជធានី-ភ្នំពេញឲ្យដឹងថាក្នុងរយៈពេល ៣ ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកក្នុងឆ្នាំនេះគឺដំណើរការនៃពិធីបុណ្យបានប្រព្រឹត្តទៅដោយរលូន ហើយជាមួយគ្នានោះការទុកដាក់សំរាមរបស់ប្រជាពលរដ្ឋក៏បានត្រឹមត្រូវជាងរាល់ឆ្នាំមុនៗ ដោយសារពលរដ្ឋមានការយល់ដឹងច្រើនពីបញ្ហាបរិស្ថាន។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញថ្លែងថា បរិយាកាសក្នុងរយៈពេល ៣ ថ្ងៃ នៃពិធីបុណ្យនេះគឺបានប្រព្រឹត្តទៅក្នុងបរិយាកាសសប្បាយរីករាយជាធម្មតាដោយមិនមានបាតុភាពមិនប្រក្រតីណាមួយគួរកត់សម្គាល់នោះទេ។ លោកចាត់ទុកឆ្នាំនេះ ពិសេសជាងឆ្នាំមុនដោយបញ្ហាសំរាមដែលតែងចោទឡើងជាបញ្ហាជារៀងរាល់ឆ្នាំនោះ ប៉ុន្តែសម្រាប់ឆ្នាំនេះ សំរាមត្រូវបានទុកដាក់មានសណ្តាប់ធ្នាប់ល្អប្រសើរ។
លោកបញ្ជាក់ថា៖ «ក្នុងថ្ងៃនោះ គ្មានបាតុភាពអ្វីធំដុំកើតឡើងនោះទេ គឺសន្តិភាពមែនទែនក្នុងរាជធានីយើង គ្មានបាតុភាពអ្វីធំដុំនោះទេ។ រឿងដែលកត់សម្គាល់គឺបញ្ហាសំរាម គឺឆ្នាំនេះឥរិយាបថរបស់ប្រជាពលរដ្ឋយើង ឃើញមាន (ការ) ផ្លាស់ប្តូរជាវិជ្ជមាន។ សំរាមមានច្រើននៅតែដដែលអ៊ីចឹង ព្រោះមានមនុស្សច្រើន មានការហូបចុកគឺមានកាកសំណល់ហើយ ប៉ុន្តែនេះសំរាមភាគច្រើនគឺនៅក្នុងធុងសំរាម មិននៅរាយប៉ាយនោះទេ»។
លោក មាសភក្តី បន្ថែមថាមានកត្តា ២ ដែលធ្វើឲ្យការទុកដាក់សំរាមក្នុងឱកាសព្រះរាជពិធីបុណ្យនេះមានលក្ខណៈល្អប្រសើរជាងឆ្នាំមុនៗ។ ទី១ គឺការរៀបចំទុកដាក់របស់អាជ្ញាធរពាក់ព័ន្ធដោយបានត្រៀមរួចជាស្រេចចំពោះការទុកដាក់សំរាម។ និងទី២ គឺការចូលរួម និងការយល់ដឹងរបស់ប្រជាពលរដ្ឋ ដែលមកចូលរួមទស្សនាក្នុងពិធីបុណ្យ។
លោក ប៊ុន វាសនា មន្ត្រីនៃគណៈកម្មាធិការជាតិរៀបចំបុណ្យជាតិ-អន្តរជាតិ ប្រាប់ភ្នំពេញប៉ុស្តិ៍ពីម្សិលមិញថា រយៈពេល ៣ ថ្ងៃនេះ សភាពការណ៍សន្តិសុខ សណ្តាប់ធ្នាប់មានភាពល្អប្រសើរដោយមានឧបទ្ទវហេតុតិចតួចបំផុត បើប្រៀបធៀបនឹងឆ្នាំមុន។ រឿងហេតុនោះដូចជាមានការលិចទូក ១ លើក ករណីខ្យល់គរ និងមានករណីអគ្គិភ័យនៅកន្លែងប្រារព្ធពិធី ប៉ុន្តែហេតុការណ៍ទាំងអស់នេះមិនបណ្តាលឲ្យមានមនុស្សស្លាប់នោះទេ។
លោកបន្ថែមថា ក្រោយពិធីបានបញ្ចប់ក្រុមការងារបានរៀបចំបោសសម្អាតបរិស្ថានឲ្យមានសភាពដូចដើម ជាពិសេសការទុកដាក់សំរាមដែលបានបន្សល់ទុករយៈពេល ៣ ថ្ងៃនេះ។ ប៉ុន្តែសម្រាប់ឆ្នាំនេះលោកអះអាងថាសំរាមមិនមែនជាបញ្ហាចោទទៀតនោះទេ។
លោក ប៊ុន វាសនា បញ្ជាក់ថា៖ «តាមរបាយការណ៍គឺឃើញថាមានការកើនឡើងតែតាមស្ថានភាពជាក់ស្តែងមិនមាន អីខុសប្លែកពីឆ្នាំ ២០១៧ និង ២០១៨ ទេគឺប្រជាពលរដ្ឋមានការចូលរួមរាប់លាននាក់មែនហើយ។ សម្រាប់ការបោសសម្អាតផ្នែកបរិស្ថានគឺយើងបានប្រគល់ឲ្យទៅសាលារាជធានីភ្នំពេញជាអ្នករៀបចំ។ ចុងក្រោយនេះគណៈកម្មការយើងជាប់រវល់ក្នុងការបើករង្វាន់ និងអំណោយជូនដល់តំណាងកីឡាករ កីឡាការិនីយើងរាប់ពីលេខ ១ ដល់លេខ ៤ ដែលមកទទួលប្រហែលជា ៩០ ភាគរយហើយ»។
តាមរបាយការណ៍របស់ក្រសួងសុខាភិបាលបានឲ្យដឹងពីម្សិលមិញដែរថា រយៈពេល ៣ ថ្ងៃ នៃព្រះរាជពិធីនេះមានប្រជាពលរដ្ឋសរុបចំនួន ១៨ ០៨៩ នាក់ (ស្រីចំនួន ៥ ២២០ នាក់) បានទទួលសេវាពិនិត្យព្យាបាលនៅតាមទីតាំងចំនួន ១២ កន្លែង និងក្រុមរថយន្តគិលានសង្គ្រោះចំនួន ៦៨ គ្រឿង ដែលបានដាក់ពង្រាយនៅតាមគោលដៅកំណត់។
លោក នេត្រ ភក្ត្រាអ្នកនាំពាក្យក្រសួងបរិស្ថានថ្លែងក្នុងទំព័រហ្វេសប៊ុករបស់លោកកាលពីថ្ងៃទី ១២ ថាការបោសសម្អាត និងថែរក្សាបរិស្ថានគឺមានការចូលរួមពីក្រុមយុវជនស្ម័គ្រចិត្តដែលបានលះបង់កម្លាំងកាយកម្លាំងចិត្ត ក្នុងការចូលរួមសម្អាតអនាម័យបរិស្ថាននៅអំឡុងព្រះរាជពិធីបុណ្យអុំទូក។
លោកថា សកម្មភាពសម្អាតអនាម័យបរិស្ថានយុវជនស្ម័គ្រចិត្តបានចូលរួមធ្វើជាសកម្មភាពដ៏មានតម្លៃសម្រាប់ការអប់រំបរិស្ថាន និងការប្រតិបត្តិមេត្រីភាពបរិស្ថានល្អក៏ដូចជាការបញ្ជ្រាបចំណេះដឹង និងការគ្រប់គ្រងសំណល់រឹង សំរាមដល់សាធារណជន។
លោកបញ្ជាក់ថា៖ «សកម្មភាពរបស់ប្អូនៗនឹងបន្សល់ទុកនូវការចងចាំសម្រាប់ ពលរដ្ឋខ្មែរបានបន្សល់នូវការគោរព ស្រឡាញ់បរិស្ថានក្នុងក្រអៅបេះដូងរបស់មនុស្សរាប់ម៉ឺនសែននាក់ដែលបានឃើញប្អូនៗសម្អាតអនាម័យបរិស្ថាន នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក»។
លោក កែវ ចាន់ណារិទ្ធ ប្រធានគណៈគ្រប់គ្រងទីលានចាក់សំរាមដង្កោ ប្រាប់ភ្នំពេញប៉ុស្តិ៍ពីម្សិលមិញថាក្នុងរយៈពេល ៣ ថ្ងៃ ភ្នាក់ងារជិត ១ ០០០ នាក់ និងឡានដឹកសំរាមជិត ២០០ គ្រឿងបានប្រមូលសំរាមទូទាំង ១២ ខណ្ឌមានចំនួនជាង ៦ ៥០០ តោន ខណៈឆ្នាំ ២០១៨ មានជាង ៨ ០០០ តោន។ លោកបន្តថា សំរាមដែលប្រមូលចេញពីកន្លែងប្រារព្ធពិធីមានប្រមាណ ៣០ ភាគរយ។
លោកបញ្ជាក់ថា៖ «តាមសង្កេតរបស់ខ្ញុំឆ្នាំនេះមានលក្ខណៈល្អប្រសើរជាងឆ្នាំមុនចំពោះការទុកដាក់សំរាម ដោយសារតែប្រជាពលរដ្ឋយើងមានការយល់ដឹងច្រើន ហើយយើងក៏មានការយកចិត្តទុកដាក់ខ្ពស់ដែរ និងផ្សព្វផ្សាយឲ្យប្រជាពលរដ្ឋទុកដាក់សំរាម វេចខ្ចប់បានត្រឹមត្រូវ។ ជារួមក្នុងពេលនោះសំរាមភាគច្រើនមិនត្រូវបានបញ្ចេញ (ពីផ្ទះ) ឬមិនត្រូវបានបោះចោលទេ»។
ទាក់ទងនឹងចំនួនពលរដ្ឋចូលរួមក្នុងពិធីបុណ្យលោក ម៉េត មាសភក្តី បញ្ជាក់ថា តួលេខសរុបនៃអ្នកចូលរួមទស្សនាក្នុងឱកាសព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុកមានចំនួនច្រើន។ នៅក្នុងថ្ងៃទី ១ មានប្រមាណ ៥៥ ម៉ឺននាក់ថ្ងៃទី ២ មានជាង ១ លាន ៥ សែននាក់ និងថ្ងៃទី ៣ មានប្រមាណ ៣ លាននាក់។
លោកបញ្ជាក់ថា៖ «(អ្នក) ជំនាញគេប៉ាន់ស្មានថា ជាង ៥ លាននាក់ ព្រោះគិតជាម៉ែត្រការ៉េមានប៉ុន្មាននាក់ ហើយសភាពណែនតាន់តាប់មានមនុស្សច្រើន គេគិត ១ ម៉ែត្រការ៉េមានមនុស្សប៉ុន្មានៗ អ៊ីចឹងទៅ។ សម្រាប់ព័ត៌មានផ្សេងគេផ្សាយអត់ផ្លូវការពីខ្ញុំ គឺគេផ្សព្វផ្សាយរឿងរបស់គេ តែសម្រាប់ខ្ញុំ ខ្ញុំជូន (តួលេខ) ជាង ៥ លាននាក់»៕