The Phnom Penh Post Search

Search form




Logo of Phnom Penh Post newspaper Phnom Penh Post - ជា មុនី ប្តឹង​ស្នងការ​ខេត្ត កំពង់ស្ពឺ

ជា មុនី ប្តឹង​ស្នងការ​ខេត្ត កំពង់ស្ពឺ

ជា មុនី ប្តឹង​ស្នងការ​ខេត្ត កំពង់ស្ពឺ

140131_03
កម្មករោងចក្រសាប្រ៊ីណាពេលតវ៉ាឲ្យដោះលែងតំណាងកម្មករដែលឃាត់ខ្លួននៅតុលាការកំពង់ស្ពឺ ហេង ជីវ័ន

កំពង់ស្ពឺៈ ប្រធាន​សហជីព​សេរី​កម្មករ លោក ជា មុនី បាន​ដាក់​ពាក្យ​បណ្តឹង​ទៅ​តុលាការ​ខេត្ត កំពង់ស្ពឺ កាល​ពី​ថ្ងៃ​អង្គារ​ប្តឹង​ស្នងការ​ខេត្ត​នេះ និង​មន្រ្តី​នគរបាល​យុត្តិធម៌​ពី​បទ​ធ្វើ​ឲ្យ​ខូច​ខាត​ដោយ​ចេតនា។

លោក ជា មុនី បាន​និយាយ​កាល​ពី​ថ្ងៃ​ម្សិលមិញ​ថា លោក​មិន​អាច​ទទួល​យក​បាន​ទេ​នូវ​ទង្វើ​បែប​មាក់ងាយ​មក​លើ​សហជីព​របស់ លោក​ពី​សំណាក់​ស្នងការ​ខេត្ត កំពង់ស្ពឺ និង​មន្រ្តី​នគរបាល​ដែល​ពាក់ព័ន្ធ​ដទៃ​ទៀត។ លោក​ថ្លែង​ថា៖ «ពួក​គេ​រឹបអូស​យក​ឡាន​របស់​ខ្ញុំ​ក្នុង​ហេតុ​ការណ៍​តវ៉ា នៅ​រោងចក្រ សាប៊្រីណា។ ពួក​គេ​មិន​បាន​យក​ឡាន​នោះ​ទៅ​ទុក​នៅ​តុលាការ​ទេ តែ​បែរ​ជា​យក​ទៅ​ទុក​នៅ​ស្នងការ​ហើយ​បាន​ធ្វើ​ឲ្យ​ខូច​ខាត​ឡាន​នោះ​ទាំង ខាង​ក្នុង និង​ខាង​ក្រៅ»។

យោង​តាម​ពាក្យ​បណ្តឹង​របស់​លោក ជា មុនី បាន​ឲ្យ​ដឹង​ថា កាល​ពី​ថ្ងៃ ទី៣ ខែ មិថុនា ឆ្នាំ ២០១៣ កង​កម្លាំង​នគរបាល​ខេត្ត កំពង់ស្ពឺ បាន​ចាប់​យក​រថយន្ត​របស់​សហជីព​សេរី​កម្មករ​ចំនួន ១ គ្រឿង ម៉ាក តាកូម៉ា ក្នុង​ហេតុ​ការណ៍​កម្មករ​រោងចក្រ សាប្រ៊ីណា ក្នុង​ស្រុក សំរោងទង ដែល​ធ្វើ​កូដកម្ម​ទាមទារ លក្ខខណ្ឌ​ការងារ​ល្អ​ប្រសើរ ហើយ​ក៏​កើត​មាន​អំពើ​ហិង្សា​ប៉ះ​ទង្គិច​គ្នា​រវាង​កម្លាំង​សមត្ថកិច្ច​និង កម្មករ។

លោក ជា មុនី និយាយ​ថា ក្រោយ​ការ​ចាប់​យក​នូវ​ទ្រព្យ​សម្ភារ​របស់​សហជីព និង​របស់​បុគ្គលិក​សហជីព ព្រម​ទាំង​របស់​កម្មករ​មួយ​ចំនួន​នោះ នគរបាល​មិន​បាន​បញ្ជូន​វត្ថុ​ចាប់​យក​នោះ​ប្រគល់​ឲ្យ​ស្ថាប័ន​តុលាការ​ភ្លាមៗ​ឡើយ ហើយ​ទើប​តែ​នៅ​ថ្ងៃ ទី៣ ខែ មករា បាន​សមត្ថកិច្ច​យក​មក​ប្រគល់​ឲ្យ​តុលាការ​បន្ទាប់​ពី​ដឹង​ថា តុលាការ​ខេត្ត កំពង់ស្ពឺ បាន​សម្រេច​ប្រគល់​វត្ថុ​ដែល​ចាប់​យក​ឲ្យ​ម្ចាស់​ដើម​វិញ។ «ខ្ញុំ​មិន​អាច​ទទួល​យក​បាន​ទេ ព្រោះ​គាត់​គាស់​ខ្ទេច​ខ្ទី​ក្នុង​កាប៊ីន​ឡាន​ខ្ញុំ និង​បាន​លុប​នូវ​អក្សរ​ខ្លះ​ដែល​ជា​ឈ្មោះ​របស់​សហជីព​យើង»។ លោក​បាន​ស្នើ​ទៅ​ដល់​តុលាការ​ឲ្យ​ផ្តន្ទាទោស​ទៅ​លើ​លោក​ស្នងការ​ខេត្ត កំពង់ស្ពឺ និង​មន្រ្តី​នគរបាល​យុត្តិធម៌​ពាក់ព័ន្ធ​ពី​បទ​ធ្វើ​ឲ្យ​ខូចខាត​ដោយ​ចេតនា​តាម​នីតិវិធី​ច្បាប់។

លោក កែវ ពិសី ស្នងការ​ខេត្ត កំពង់ស្ពឺ បាន​បដិសេធ​មិន​ឆ្លើយ​តប​នឹង​ការ​សាក​សួរ​ពី​កាសែត ភ្នំពេញ ប៉ុស្តិ៍ ទេ​ពី​ម្សិលមិញ៕

អត្ថបទគួរចាប់អារម្មណ៍