ភ្នំពេញ៖ក្នុងរយៈពេល ២៦ ថ្ងៃ គិតចាប់ថ្ងៃទី ១ ដល់ ២៦ ខែឧសភា នគរបាលចរាចរណ៍ផ្លូវគោកបានត្រួតពិនិត្យយានយន្តចំនួន ១៥០ ៥៤០ គ្រឿង នៅទូទាំងប្រទេសហើយបានរកឃើញយានយន្តល្មើសច្បាប់សរុបចំនួន ៨ ៦២៩ គ្រឿង ក្នុងនោះមានម៉ូតូចំនួន ៥ ៧០៣ គ្រឿង ដោយបានផាកពិន័យតាមអនុក្រឹត្យលេខ ៣៩ អនក្រ.បក។ នេះបើតាមរបាយការណ៍របស់អគ្គស្នងការដ្ឋាននគរបាលជាតិនៅថ្ងៃទី ២៧ ឧសភា ឆ្នាំ ២០២២។
របាយការណ៍ដដែលឱ្យដឹងថា ដោយឡែកនៅថ្ងៃទី ២៦ ខែឧសភា ឆ្នាំនេះ កម្លាំងនគរបាលចរាចរណ៍ផ្លូវគោកបានដាក់គោលដៅចំនួន ១១០ ហើយមានយានយន្តចូលគោលដៅចំនួន ៥ ៥២១ គ្រឿង ក្នុងនោះមានម៉ូតូ ៣ ២៦៦ គ្រឿង ហើយបានរកឃើញយានយន្តល្មើសច្បាប់សរុបចំនួន ២៥៤ គ្រឿង ត្រូវបានផាកពិន័យ ក្នុងនោះមានម៉ូតូចំនួន ១៥៤ គ្រឿង។
របាយការណ៍ដដែលបានវាយតម្លៃរយៈពេល ២៦ ថ្ងៃ នៃខែឧសភានេះ ឃើញថា ការអនុវត្តតាមអនុក្រឹត្យថ្មីក្នុងការផាកពិន័យយានយន្តល្មើស ច្បាប់បានដំណើរការទៅយ៉ាងល្អប្រសើរ ដោយទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់បានចូលរួមគោរពច្បាប់ចរាចរណ៍យ៉ាងល្អប្រសើរ។
លោក ហ៊ឹម យ៉ាន អគ្គស្នងការរងនគរបាលជាតិបានឱ្យដឹងថា បើទោះបីស្ថិតនៅក្នុងស្ថានភាពប្រទេសកម្ពុជា កំពុងប្រយុទ្ធប្រឆាំងនឹងជំងឹកូវីដ ១៩ ក៏ដោយ ក៏កម្លាំងនគរបាលចរាចរណ៍ផ្លូវគោកនៅតែបន្តអនុវត្តច្បាប់ផ្សព្វផ្សាយច្បាប់ រួមសហការជាមួយនឹងក្រុមការងារសុខាភិបាលបានចុះបិទខ្ទប់ក្រុង និងតំបន់។
លោកបានបញ្ជាក់ថា៖ «បើទោះបីមានការបិទខ្ទប់ក៏ដោយការស្លាប់ និងរបួស ដែលបង្កឡើងដោយគ្រោះថ្នាក់ចរាចរណ៍នៅតែមានរាល់ថ្ងៃ ជាពិសេសក្នុងប៉ុន្មានថ្ងៃនៃការបើកឱ្យមានចរាចរណ៍ឡើងវិញនេះមានអ្នកស្លាប់ដោយគ្រោះថ្នាក់ចរាចរណ៍ចន្លោះពី ៦ ទៅ ៨ នាក់។ នៅក្នុងពេលបិទខ្ទប់នេះ មន្ត្រីនគរបាលចរាណ៍មានការងារ ២ គឺការងារកូវីដផង និងការងារ អនុវត្តច្បាប់ផងដែរ»។
បើតាម លោក ហ៊ឹម យ៉ាន ការអនុវត្តរឹតបន្តច្បាប់ចរាចរណ៍ផ្លូវគោកនេះសម្រាប់ខែឧសភានិងខែមេសា ឆ្នាំ ២០២១ មានចំនួនយានយន្តដែលចូលគោលដៅ និងផាកពិន័យ ប្រហាក់ហែលគ្នា ដោយសារស្ថានភាពនៃការបិទចរាចរណ៍នៅក្នុងតំបន់លឿង និងតំបន់ក្រហមដូចគ្នា ។
ទោះជាយ៉ាងណា លោកបានបញ្ជាក់ទៀតថា ចំពោះការផាកពិន័យវិញមានពលរដ្ឋដែលល្មើសច្បាប់ខ្លះក៏បានបង់រួចរាល់ និងមួយចំនួននៅមិនទាន់បានបង់ទេ ដោយសារតែទីតាំងដែលគាត់រស់នៅត្រូវបានបិទ។ ដូច្នេះសមត្ថកិច្ចក៏មានការយោគយល់ត្រង់ចំណុចនេះដែរ។
លោក គឹម បញ្ញា នាយកអង្គការមូលនីធិបង្ការរបួសអាស៊ី (AIP) បានស្វាគមន៍ចំពោះកម្លាំងនគរបាលចរាចរណ៍ផ្លូវគោកដែលបានប្តេជ្ញាចិត្តក្នុងការបន្តពង្រឹងការអនុវត្តច្បាប់នៅទូទាំងប្រទេសជាពិសេសនៅក្នុងតំបន់ដែលពុំមានការបិទខ្ទប់ខ្លាំង ដូចជា នៅក្នុងខេត្តកណ្តាលជាដើម។
លោកបានបន្តថា ចំពោះការរឹតបន្តឹងច្បាប់ចរាចរណ៍ផ្លូវគោកត្រូវតែបន្តធ្វើជាប្រចាំ ដូចដែលយើងបានឃើញហើយក្នុងពេលបើកឱ្យមានចរាចរណ៍ ចំនួនអ្នកគ្រោះថ្នាក់មានការកើនឡើងគួរឱ្យកត់សម្គាល់មិនដូចពេលមានការបិទខ្ទប់ទីក្រុងភ្នំពេញ និងក្រុងតាខ្មៅនៃខេត្តកណ្តាល និងតំបន់ផ្សេងទៀត មានករណីគ្រោះថ្នាក់ចរណ៍ ១ លើក ឬ ក៏គ្មានសោះនៅក្នុងថ្ងៃខ្លះ។
លោក គឹម បញ្ញា ថ្លែងថា៖ «ក្រៅពីរឹតបន្តឹងអនុវត្តច្បាប់ចរាចរណ៍ផ្លូវគោក ខ្ញុំសូមឱ្យអាជ្ញាធរពាក់ព័ន្ធជាពិសេសស្ថាប័នរាជរដ្ឋាភិបាលលោក បង្កើនការអប់រំផ្សព្វផ្សាយយើងឃើញថា ទាក់ទង់ជាមួយនឹងកូវីដនេះ យើងផ្សព្វផ្សាយបានទូលំទំលាយណាស់ទាំងទូរទស្សន៍ និងតាមប្រព័ន្ធទូរស័ព្ទនៅពេលខលទៅលើកណាក៏ឮសូរតែយើងរួមគ្នាប្រយុទ្ធប្រឆាំងជំងឹកូវីដ ១៩ ហូរហែ អ៊ីចឹងមក ប្រសិនបើយើងធ្វើបានបន្ថែមលើកពីការអនុវត្តការគ្រោះថ្នាក់ចរាចរណ៍នឹងមានការថយចុះ»៕
វីដេអូ៖