The Phnom Penh Post Search

Search form




Logo of Phnom Penh Post newspaper Phnom Penh Post - ជិត ៣០% នៃ​កុមារ​នៅ​តំបន់​ក្រីក្រ​ក្នុង​ក្រុង​ជួប​បញ្ហា​លូត​លាស់​រាង​កាយ




ជិត ៣០% នៃ​កុមារ​នៅ​តំបន់​ក្រីក្រ​ក្នុង​ក្រុង​ជួប​បញ្ហា​លូត​លាស់​រាង​កាយ

កុមារ​ដែល​ជា​កូន​របស់​ជន​រង​គ្រោះ​ដីធ្លី​ត្រូវ​បាន​ម្តាយ​នាំ​យក​មក​តវ៉ា​ជាមួយ។
កុមារ​ដែល​ជា​កូន​របស់​ជន​រង​គ្រោះ​ដីធ្លី​ត្រូវ​បាន​ម្តាយ​នាំ​យក​មក​តវ៉ា​ជាមួយ។ ហេង ជីវ័ន

ជិត ៣០% នៃ​កុមារ​នៅ​តំបន់​ក្រីក្រ​ក្នុង​ក្រុង​ជួប​បញ្ហា​លូត​លាស់​រាង​កាយ

ភ្នំពេញៈ ជិត ៣០ ភាគរយ​នៃ​កុមារ​តូចៗ​ដែល​ចិញ្ចឹម​នៅ​ក្នុង​តំបន់​ក្រីក្រ​ជុំវិញ​រាជធានី​ភ្នំពេញ​កំពុង​ជួប​បញ្ហា​នៃ​ការ​លូត​លាស់​នៃ​រាងកាយ​របស់​ពួក​គេ ខណៈ ៣៥ ភាគរយ​មាន​ទម្ងន់​ក្រោម​កំណត់ ដែល​តួលេខ​នេះ​ខ្ពស់​ខ្លាំង​ជាង​មធ្យម​ភាគ​ទូទាំង​ទីក្រុង។ នេះ​បើ​តាម​ការ​សិក្សា​មួយ​ដែល​បាន​បង្ហាញ។

អង្គការ Czech NGO People in Need ដោយ​សហការ​ជាមួយ​អង្គការ Unicef និង​សាលា​រាជធានី​ភ្នំពេញ បាន​សិក្សា​អំពី​ស្ថានភាព​រស់​នៅ​របស់​គ្រួសារ​រាប់រយ​គ្រួសារ​ដែល​តាំង​ទី​លំនៅ​ក្នុង​តំបន់​ទីក្រុង​ក្រីក្រ ដែល​ភាគ​ច្រើន​នៃ​ពួកគេ​មិន​ទទួល​បាន​សេវា​សាធារណៈ​មូលដ្ឋាន រួម​មាន​ដូច​ជា​ទឹក​ស្អាត អនាម័យ និង​អគ្គិសនី។

របាយ​ការណ៍​នេះ ដែល​នឹង​ដាក់​ចេញ​ជា​ផ្លូវ​ការ​នៅ​សប្តាហ៍​ក្រោយ ផ្តោត​សំខាន់​ទៅ​លើ​សុខភាព​និង​សុខុមាលភាព​របស់​កុមារ​ដែល​មាន​អាយុ​ចាប់​ពី ៦​ខែ ដល់​ជិត ៥​ឆ្នាំ និង​ស្ត្រី​មាន​ផ្ទៃ​ពោះ។

លទ្ធផល​បង្ហាញ​អំពី​អត្រា​ខ្ពស់​នៃ​ការ​ខ្វះ​អាហារូបត្ថម្ភ​និង​បញ្ហា​សុខភាព​រវាង​កុមារ​នៅ​ក្នុង​សហគមន៍​ទាំង​នេះ បើ​ធៀប​នឹង​អត្រា​កុមារ​ទូទាំង​ក្រុង​នៅ​ក្នុង​ការ​សិក្សា​វាស់​ស្ទង់​អំពី​ប្រជាសាស្ត្រ និង​សុខភាព​កម្ពុជា ឆ្នាំ​២០១០ របស់​រដ្ឋាភិបាល (CDHS)។

របាយ​ការណ៍​នេះ​បាន​និយាយ​ថា៖ «ការ​វាយតម្លៃ​បាន​សង្កេត​ឃើញ​កម្រិត​ខ្ពស់​នៃ​កុមារ​ក្រោម​ទម្ងន់ (៣៥,៦%) និង​កុមារ​ទទួល​រង​ការ​ប៉ះពាល់​ក្នុង​ការ​លូត​លាស់ (២៩,១%) ដែល​មាន​អាយុ​ពី ៦​ដល់ ៥៩ ខែ​បើ​ធៀប​នឹង CDHS ឆ្នាំ​២០១០ សម្រាប់​ភ្នំពេញ»។

អម​ជាមួយ​នឹង​បញ្ហា​ទាំង​អស់​នេះ តិច​ជាង ៦០ ភាគរយ​នៃ​កុមារ​ក្រោម​អាយុ ២ ឆ្នាំ​នៅ​ក្នុង​សហគមន៍​ទាំង​នេះ​ទទួល​បាន​ការ​ចាក់​វ៉ាក់សាំង​ពេញ​លេញ និង ១៦ ភាគរយ​នៃ​ស្ត្រី​មាន​ផ្ទៃ​ពោះ​កំពុង​ស្ថិត​ក្នុង​ហានិភ័យ​នៃ​ការ​មាន​ទារក​មិន​គ្រប់​ទម្ងន់​ដោយ​សារ​តែ​ការ​ទទួល​ទាន​អាហារ​មិន​គ្រប់​គ្រាន់។

ស្ទើរ​បី​ភាគ​បួន​នៃ​កុមារ​ដែល​ត្រូវ​បាន​សិក្សា​វាស់​ស្ទង់​មាន​អាការ​ដូច​ជា គ្រុន រាក​រុស និង​បញ្ហា​ផ្លូវ​ដង្ហើម ខណៈ​ប្រហែល ១២ ភាគរយ​នៃ​ផ្ទះ​របស់​ពួក​គេ​មិន​មាន​លទ្ធភាព​ទទួល​បាន​អនាម័យ។ ជាង​នេះ​ទៀត បញ្ហា​គឺថា កម្រិត​នៃ​ភាព​ក្រីក្រ​គឺ​ខ្ពស់​ខ្លាំង​ជាង​កម្រិត​មធ្យម​ក្នុង​ទីក្រុង។

របាយ​ការណ៍​បាន​បន្ត​ឲ្យ​ដឹង​ទៀត​ថា៖ «កម្រិត​ក្រីក្រ​គឺ​ខ្ពស់​ខ្លាំង​ជាង​កម្រិត​នៅ​ក្នុង​រាជធានី​ភ្នំពេញ (២៩% ធៀប​នឹង ១២,៨%)»។

ក្នុង​ចំណោម​គ្រួសារ​ទាំង​នោះ ប្រហែល ៦៩ ភាគរយ​គឺ​ជំពាក់​បំណុល​គេ។ ប្រហែល ៣០ ភាគរយ​បាន​និយាយ​ថា ពួក​គេ​ជំពាក់​បំណុល​គេ​ជាង ៤០០ ដុល្លារ។

នៅ​ក្នុង​សហគមន៍​ក្រីក្រ​មួយ​ក្នុង ខណ្ឌ​ឫស្សីកែវ កាល​ម្សិល​មិញ អ្នក​ស្រី ស៊ុន សារិទ្ធ អាយុ ២៨​ឆ្នាំ ដែល​ជា​ម្តាយ​វ័យ​ក្មេង​ដែល​កំពុង​បី​កូន​អាយុ ៤​ខែ បាន​និយាយ​អំពី​បញ្ហា​ដែល​អ្នក​ស្រី​ប្រឈម។

អ្នក​ស្រី​បាន​ថ្លែង​ថា៖ «ខ្ញុំ​ធ្លាប់​ធ្វើ​ការ​នៅ​រោងចក្រ​កាត់​ដេរ ប៉ុន្តែ​ខ្ញុំ​ឈប់​នៅ​ពេល​ខ្ញុំ​មាន​ផ្ទៃ​ពោះ»។

អ្នក​ស្រី​បន្ថែម​ថា អ្នក​ស្រី​មិន​ត្រូវ​បាន​ផ្តល់​ឲ្យ​នូវ​ការ​ឈប់​សម្រាក​មាតុភាព​ទេ។ អ្នក​ស្រី​បន្ត​ថា៖ «ប្តី​របស់​ខ្ញុំ​ធ្វើ​ការ​នៅ​ក្នុង​វិស័យ​សំណង់​និង​រក​ប្រាក់​បាន ១០០ ដុល្លារ​ក្នុង​មួយ​ខែ»។

អ្នក​ស្រី​បាន​ថ្លែង​ថា កូន​របស់​អ្នក​ស្រី​បាន​ទទួល​វ៉ាក់សាំង ២ ដង។

អ្នក​ស្រី​បាន​ថ្លែង​បន្ថែម​ទៀត​ថា៖ «ខ្ញុំ​មិន​ដឹង​ទេ​ថា តើ​កូន​របស់​ខ្ញុំ​នឹង​ត្រូវ​ការ​វ៉ាក់សាំង​បន្ថែម​ទៀត​ឬ​អត់ ខ្ញុំ​មិនមាន​លទ្ធភាព​ទេ»។

នៅ​ជិត​នោះ​ផង​ដែរ លោក សុខ វណ្ណា ដែល​រស់​នៅ​ក្នុង​បន្ទប់​តូច​មួយ​ជាមួយ​ប្រពន្ធ​និង​កូន ៦ នាក់​នៅ​ក្នុង​បន្ទុក​គ្រួសារ ក៏​មាន​ស្ថានភាព​ស្រដៀង​អ្នក​ស្រី​ដែរ។

លោក វណ្ណា ឈឺ និង​មិន​អាច​ធ្វើ​ការ​បាន​នាពេល​ឥឡូវ​នេះ ខណៈ​ប្រពន្ធ​របស់​គាត់​អាច​រក​ចំណូល​បាន​តែ​ប្រហែល ១ ម៉ឺន​រៀល​ក្នុង​មួយ​ថ្ងៃ។

ប្តី​ប្រពន្ធ​ទាំង​ពីរ​នាក់​លែង​ឲ្យ​កូន​ទៅ​រៀន​នៅ​ពេល​ពួក​គេ​រៀន​បាន​ត្រឹម​តែ​ថ្នាក់​ទី៤។

លោក វណ្ណា បាន​ថ្លែង​បន្ត​ថា៖ «ពួកគេ​ត្រូវ​ការ​ជួយ​យើង​រក​ស៊ី​និង​ចាប់​ផ្តើម​ការងារ​កម្មករ​សំណង់»។

លោក អ៊ី សារុំ នាយក​ប្រតិបត្តិ​នៅ​អង្គការ​សមាគម​ធាង​ត្នោត បាន​ថ្លែង​ថា ប្រាក់​ចំណូល​ទាប​បាន​នាំ​ឲ្យ​មាន​បញ្ហា​ជាច្រើន​នៅ​ក្នុង​សហគមន៍​ក្រីក្រ​ទាំង​នោះ។

លោក​បន្ត​ថា៖ «ចំណូល​ទាប​បណ្តាល​ឲ្យ​មាន​បញ្ហា​កង្វះ​អាហា​រូបត្ថម្ភ ហើយ​គ្រួសារ​ជាច្រើន​ប្រើ​បង្គន់​រួម​គ្នា។ យើង​ធ្វើ​ការ​អំពាវនាវ​ឲ្យ​រដ្ឋាភិបាល​ជួយ ប៉ុន្តែ​ជា​ញឹក​ញាប់​មន្ត្រី ធ្វើ​ការ​បម្រើ​គណបក្ស មិន​មែន​បម្រើ​ជាតិ​ទេ»។

ទោះ​យ៉ាង​ណា​ក្តី លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​ភ្នំពេញ​បាន​ថ្លែង​ថា អាជ្ញាធរ​របស់​លោក​កំពុង​ធ្វើ​ការ​ជាមួយ​អង្គការ​ក្រៅ​រដ្ឋាភិបាល​ដើម្បី​ជួយ​សហគមន៍​ក្រីក្រ។

លោក​បាន​ថ្លែង​ឲ្យ​ដឹង​ទៀត​ថា៖ «យើង​បញ្ជូន​គិលានុបដ្ឋាយិកា​និង​គ្រូ​ពេទ្យ​ដើម្បី​ផ្តល់​ការ​ចាក់​វ៉ាក់សាំង។ «យើង​ផ្តល់​អាហារ​ដល់​សហគមន៍​ក្រីក្រ ប៉ុន្តែ​យើង​មិន​មាន​គ្រប់​គ្រាន់​ដើម្បី​ផ្គត់ផ្គង់​ពួក​គេ​ទេ»។

អនុសាសន៍​នៅ​ក្នុង​របាយ​ការណ៍​នេះ​រួម​មាន​ការ​ដោះ​ស្រាយ​បញ្ហា​ផ្គត់​ផ្គង់​ទឹក​ស្អាត និង​បញ្ហា​អនាម័យ កែ​លម្អ​លទ្ធភាព​នៃ​ការ​ទទួល​ការ​អប់រំ និង​ផ្តល់​យុទ្ធនាការ​ចាក់​វ៉ាក់សាំង និង​ការ​បណ្តុះ​បណ្តាល​វិជ្ជាជីវៈ៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។