កំពង់ស្ពឺៈ រយៈពេលជិត ៥ ខែ ឆ្នាំ ២០២១ នេះ មន្ត្រីឧទ្យានុរក្ស ដែនជម្រកសត្វព្រៃភ្នំឱរ៉ាល់ បង្ក្រាបដកហូត និងរុះរើ កម្ទេចខ្ទមធ្វើពីឫស្សី និងធ្វើពីឈើប្រក់តង់ប្រក់ស័ង្កសី បានជាង ២០ ខ្ទម ព្រមទាំងដកហូតដីព្រៃ ១០ កន្លែង ស្មើនឹងជិត ៣០០ ហិកតា ទុកជាសម្បត្តិរដ្ឋវិញ។
លោក ហ៊ុល ម៉ារ៉ា ប្រធានដែនជម្រកសត្វព្រៃភ្នំឱរ៉ាល់ ប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែឧសភា នេះថា ក្នុងរយៈពេលជិត ៥ ខែ គិតចាប់ពីថ្ងៃទី ១ ខែ មករា ដល់ថ្ងៃទី ២០ ខែ ឧសភា ឆ្នាំ ២០២១ នេះ មន្ត្រីឧទ្យានុរក្ស បានចុះកម្ទេចខ្ទម និងរោងឈើសរុបចំនួន ២២ ខ្នងនិងដកហូតដីព្រៃ ១០ កន្លែង ស្មើនឹង ២៩៩ ហិកតា និង ១៣ អា ដែលជនប្រព្រឹត្តបទល្មើសទៅសង់ទន្ទ្រានលើដីព្រៃអភិរក្សរបស់រដ្ឋ។
លោក ហ៊ុល ម៉ារ៉ា ថ្លែងថា៖ «មិនមានការចាប់ខ្លួនមនុស្សបញ្ជូនទៅតុលាការនោះទេ ក្នុងរយៈពេលជិត ៥ ខែមកនេះ។ យ៉ាងណាមន្ត្រីជំនាញចុះល្បាត និងធ្វើការកម្ទេចចោលជាបន្តបន្ទាប់ ប៉ុន្តែ កម្ទេចកន្លែងនេះជនប្រព្រឹត្តបទល្មើសក៏ប្តូរទីទៅកន្លែងនោះ ម្តងទីនេះ ម្តងទីនោះចុះបង្ក្រាបមិនមានពេលទំនេរទេ»។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋលោក ជា ហ៊ាន កត់សម្គាល់ឃើញថា នៅតំបន់ការពារដែនជម្រកសត្វព្រៃភ្នំឱរ៉ាល់ ក៏ដូចជានៅតំបន់ឧទ្យានជាតិគិរីរម្យ នៃជួរភ្នំក្រវាញកណ្តាល មានការកាប់រានទន្ទ្រានដីព្រៃជាបន្តបន្ទាប់ជារៀងរាល់ថ្ងៃ ទោះបីមន្ត្រីឧទ្យានុរក្សចុះល្បាតជាប្រចាំយ៉ាងណាក្តី។
ជនប្រព្រឹត្តបទល្មើសតែងតែចល័តផ្លាស់ប្តូរទីតាំងម្តងចំណុចនេះ ម្តងចំណុចនោះ ក្រោមរូបភាពប្រជាពលរដ្ឋក្រីក្រ។
លោកថ្លែងថា៖ «ខ្ញុំសូមបញ្ជាក់ថា ការទន្ទ្រាននេះគឺមិនមែនពលរដ្ឋក្រីក្រទេខ្ទមនេះគ្រាន់តែជាល្បិចកលរបស់ឈ្មួញប្រើប្រាស់ពលរដ្ឋក្រីក្រតែប៉ុណ្ណោះ។ បើយើងមើលមួយភ្លែតឃើញថា អូរខ្ទមហ្នឹងពលរដ្ឋក្រីក្រណាស់ តាមពិតគឺអត់ទេ គឺពលរដ្ឋហ្នឹងចាប់ដីលក់ទៅឲ្យឈ្មួញតែម្តង»។
បើតាមលោក ជា ហ៊ាន ការដែលមន្ត្រីជំនាញចុះកម្ទេចខ្ទម រួចហើយធ្វើការដកហូតដីតំបន់អភិរក្សត្រឡប់មកវិញជារឿងល្អមួយ ប៉ុន្តែនៅពេលមានការដកហូតគោលដៅណាមួយហើយ ជនប្រព្រឹត្តបទល្មើសបានបែរទៅបន្តកាប់រុករានកន្លែងផ្សេងទៀតហេតុនេះមន្ត្រីជំនាញគួរតែមានវិធានការទប់ស្កាត់។
លោកថា៖ «អាជ្ញាធរក៏ដូចជាមន្ត្រីជំនាញលោកមិនអនុវត្តច្បាប់ បើសិនជាអនុវត្តច្បាប់ចាប់ជនប្រព្រឹត្តបទល្មើស យកទៅផ្តន្ទាទោសទៅគឺ ថាចប់ហើយ។ ប៉ុន្តែមន្ត្រីជំនាញឬអាជ្ញាធរមានការយោគយល់ ដោយគ្រាន់តែធ្វើកិច្ចសន្យាហើយឲ្យទៅផ្ទះវិញអ៊ីចឹងជនល្មើសអត់ខ្លាចច្បាប់»។
ឆ្លើយតបបញ្ហានេះ លោក ហ៊ុល ម៉ារ៉ា ប្រធានដែនជម្រកសត្វព្រៃភ្នំឱរ៉ាល់ បកស្រាយថា មន្ត្រីជំនាញសកម្មក្នុងការចុះល្បាត និងធ្វើការកម្ទេចចោលខ្ទមដែលសង់បំពានតំបន់ការពារ ប៉ុន្តែតាមមិនទាន់អ្នកប្រព្រឹត្តបទល្មើស ព្រោះពេលកម្លាំងជំនាញបានចុះទៅដល់កន្លែង ពួកគេបានរត់គេចខ្លួនអស់។
លោកថា៖ «ជនប្រព្រឹត្តបទល្មើសគាត់អត់ហ៊ាននៅក្បែរយើងដែរ ឲ្យតែពេលយើងចុះទៅគាត់គេចបាត់អស់ បន្សល់ទុកនៅតែខ្ទមហ្នឹង យើងធ្វើការកម្ទេចខ្ទមនិងរោងឈើ ហើយដុតចោលនៅនឹងកន្លែង រួចដកហូតដីមកជាសម្បត្តិរដ្ឋវិញ»៕