The Phnom Penh Post Search

Search form




Logo of Phnom Penh Post newspaper Phnom Penh Post - ជីកកាយ​ដី​ស្រែ​ប្រទះ​ឃើញ​អាវុធ ​CK ១០ ដើម​និង​បង់​គ្រាប់​ចំនួន​៣

ជីកកាយ​ដី​ស្រែ​ប្រទះ​ឃើញ​អាវុធ ​CK ១០ ដើម​និង​បង់​គ្រាប់​ចំនួន​៣

អាវុធ​ដែល​ជីក​ប្រទះ​ឃើញ​ក្នុង​ដីស្រែ​។
អាវុធ​ដែល​ជីក​ប្រទះ​ឃើញ​ក្នុង​ដីស្រែ​។ រូបថត វេបសាយ​នគរបាលជាតិ

ជីកកាយ​ដី​ស្រែ​ប្រទះ​ឃើញ​អាវុធ ​CK ១០ ដើម​និង​បង់​គ្រាប់​ចំនួន​៣

បន្ទាយមានជ័យៈ អាវុធ​ខូច​គុណភាព ប្រភេទ CK ១០​ដើម និង​បង់​គ្រាប់​ចំនួន ៣ ដែល​មន្រ្តី​ជំនាញ​ជឿជាក់​ថា នៅ​សេសសល់​តាំងពី​សម័យ​សង្គ្រាម​នា​ទសវត្សរ៍​ឆ្នាំ​ជាង ៨០ ត្រូវ​បាន​ប្រជាពលរដ្ឋ​ប្រទះ​ឃើញ ខណៈ​ជីកកាយ​ដី​ស្រែ​មួយ​កន្លែង​នៅក្នុង​ភូមិ​តាដូល ឃុំ​ផ្គាំ ស្រុក​ស្វាយចេក​។

អធិការរង​ស្រុក​ស្វាយចេក ទទួល​បន្ទុក​ផ្នែក​ព្រហ្មទណ្ឌ និង​យុត្តិធម៌ លោក សុង សុខុន បាន​ឲ្យ​ដឹង​ថា បុរស​ម្ចាស់​ស្រែ​ឈ្មោះ វ៉ាន់ វោន អាយុ​៤៩​ឆ្នាំ បច្ចុប្បន្ន​រស់នៅ​ភូមិ​ប្រាសាទ​វៀន ឃុំ​ផ្គាំ ស្រុក​ស្វាយចេក បាន​ប្រទះ​ឃើញ​អាវុធ​នេះ នៅ​ម៉ោង​ជាង​ ៦ ​ល្ងាច កាលពី​ថ្ងៃ​ទី​១៣ ខែ​កុម្ភៈ នៅ​ចំណុច​វាលស្រែ​ខាង​ជើង​នៃ​ភូមិ​តាដូល ចម្ងាយ​ប្រហែល​៧០០០ ម៉ែត្រ ស្រប​ពេល​កំពុង​ភ្ជួរ​ដីស្រែ ដើម្បី​ដាំ​ដំឡូង ដូច​សព្វ​ដង​។

លោក​បាន​និយាយ​ទៀត​ថា៖ «​ដោយសារ​គាត់​ភ្ជួររាស់​ដី​ហ្នឹង ជា​បន្តបន្ទាប់​ទៅ​ដី​ក៏​កាន់តែ​រាក់​ទៅ ស្រាប់តែ​ប្រទះ​ឃើញ​ដំបូង ១ ដើម​ទេ ព្រោះ​គាត់​មាន​ត្រាក់ទ័រ​ផង​គាត់​ក៏​បន្ត​កាយ​ទៀត ទៅ​រកឃើញ​សរុប​១០ ដើម និង​បង់​៣ ប៉ុន្តែ​អាវុធ​ទាំងនេះ រលេះរលួយ​អស់​ទៅ​ហើយ ប្រើ​ការ​មិន​កើត​នោះ​ទេ»។

បើ​តាម​លោក សុង សុខុន អាវុធ​ធុន CK នេះ មាន​សណ្ឋាន​ស្រដៀង​គ្នា​ទៅ​នឹង​ធុន CKC ដែរ ហើយ​ត្រូវ​បាន​មន្រ្តី​ជំនាញ​បញ្ជាក់​ថា ត្រូវ​បាន​នាំ​ចូល​មកពី​ប្រទេស​ចិន ដើម្បី​ប្រើប្រាស់​កាលពី​ក្នុង​អំឡុង​សម័យ​សង្គ្រាម​ឆ្នាំ​ជាង ៨០។

លោក​បាន​បញ្ជាក់​ថា៖ «​ពេល​នេះ អាវុធ​ទាំងនោះ ត្រូវ​បាន​រក្សា​ទុក​នៅ​ប៉ុស្តិ៍​នគរបាលរដ្ឋបាល​ឃុំ​ផ្គាំ ដើម្បី​រង់ចាំ​បញ្ជា​ពី​ស្នងការ​ខេត្ត​ថា តើ​ត្រូវ​កម្ទេច​ចោល ឬ​យ៉ាង​ណា?»​។

អាវុធ និង​យុទ្ធភណ្ឌ​មិន​ទាន់​ផ្ទុះ នៅ​តែ​បន្ត​កប់​នៅក្នុង​ដី​នៅ​តាម​តំបន់​ជាច្រើន ក្នុង​ប្រទេស​កម្ពុជា​៕

អត្ថបទគួរចាប់អារម្មណ៍