.jpg)
លោក គង់ សោភ័ណ្ឌ អភិបាលខេត្តកណ្ដាល ចុះសួរសុខទុក្ខអ្នកកើតជំងឺគ្រុនឈីកនៅស្រុកល្វាឯម ខេត្តកណ្ដាល កាលពីខែមុន។ រូបថត រដ្ឋបាលខេត្តកណ្ដាល
ភ្នំពេញៈ មន្ត្រីនៃក្រសួងសុខាភិបាលបានអះអាងកាលពីម្សិលមិញអំពីករណីរីករាលដាលជំងឺឆ្លងគ្រុនឈីកដែលធ្លាប់បានរាតត្បាតនៅតាមតំបន់មួយចំនួននៅក្នុងប្រទេស និងការនាំចូលជំងឺឆ្លងកូវីដ ១៩ ត្រូវបានព្យាបាលជាសះស្បើយជាបន្តបន្ទាប់ ដោយមិនមានករណីផ្ទុះជាហេតុនាំឱ្យមានការគំរាមកំហែងដល់អាយុជីវិតពលរដ្ឋនៅក្នុងប្រទេសនោះទេ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា ការទប់ស្កាត់ជំងឺរាតត្បាតរួមមានជំងឺកូវីដ ១៩ និងជំងឺឈីកទទួលបានស្ថានភាពល្អប្រសើរវិញនេះ គឺដោយសារតែមានការចូលរួមសហការពីមន្ត្រីសុខាភិបាល និងអាជ្ញាធរទូទាំងប្រទេស ដែលបានខិតខំបំពេញភារកិច្ចបានល្អប្រសើរបំផុតក្នុងការជួយពិនិត្យសុខភាព និងស្រាវជ្រាវរួមទាំងដាក់ចេញវិធានការនានា ដើម្បីទប់ស្កាត់ការចម្លងជំងឺនៅក្នុងប្រទេសកម្ពុជា។
ករណីជំងឺឆ្លងគ្រុនឈីកធ្លាប់ផ្ទុះជាលើកដំបូងនៅក្រុងប៉ោយប៉ែត ខេត្តបន្ទាយមានជ័យកាលពីខែកក្កដាមក និងបានរីករាលដាលទៅក្នុងតំបន់មួយចំនួនក្នុងខេត្តចំនួន ២១ នោះត្រូវបានឱ្យដឹងថាមានអ្នកជំងឺជិត ៦ ពាន់នាក់ ក្នុងនោះ ៩៤% នៃអ្នកជំងឺត្រូវបានព្យាបាលជាសះស្បើយ។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានប្រាប់ ភ្នំពេញ ប៉ុស្តិ៍ កាលពីម្សិលមិញថា ការរីករាលដាលនៃជំងឺឈីកដែលធ្លាប់កើតមាននៅក្នុងស្រុកល្វាឯម ស្រុកកៀនស្វាយ និងស្រុកមួយចំនួនទៀតគឺមានលក្ខណៈធូរស្រាល និងស្ទើរតែលែងមានអ្នកជំងឺ។
លោក ប៊ុនធឿន ថ្លែងថា៖ «ឥឡូវអត់មានទេ ព្រោះយើងបានណែនាំគាត់ នៅតាមមូលដ្ឋាន ពេលមានរោគសញ្ញាអ្វីទៅទទួលសេវា នៅមណ្ឌលសុខភាព។ វាមិនមានជាបញ្ហារសើបអ្វីទេ ព្រោះវារប៉េះរប៉ោះដូចជំងឺគ្រុនឈាមអ៊ីចឹង ឱ្យអត់មានសោះគឺមិនមានទេ តែឱ្យវាទៅជាករណីផ្ទុះនោះ គឺមិនមានទេ»។
លោក ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យបានប្រាប់ភ្នំពេញប៉ុស្តិ៍ពីម្សិលមិញដែរថា ចំពោះស្ថានភាពនៅក្នុងខេត្តនេះក៏មានលក្ខណៈធូរស្រាល បើទោះជាអំឡុងខែមុន មានលក្ខណៈកើនឡើងខ្លះនៅតំបន់មួយចំនួនក៏ដោយ។ ក្រុមការងារក៏បន្តចុះដាក់ថ្នាំអាបែត និងបាញ់ថ្នាំសម្លាប់មូស។
លោក ហួត បានថ្លែងឱ្យដឹងថា៖ «សម្រាប់ខេត្តខ្ញុំគឺថយមែន ដែលក្នុង ១ ខែមានជាង ១០ ករណីប៉ុណ្ណោះនៅទូទាំងខេត្ត។ ខ្ញុំជឿថា នៅតាមបណ្តាខេត្តផ្សេងក៏អាចមានការថយចុះបែបនេះដូចគ្នា ព្រោះក្នុងពេលនេះ វាមិនអាចហក់ឡើងបានទេ ដោយសារតែយើងបានពង្រាយថ្នាំអាបែតគ្រប់កន្លែងសង្ស័យមានជំងឺឈីក»។
ក្រសួងសុខាភិបាលកាលពីថ្ងៃទី ២៧ កញ្ញា បានឱ្យដឹងថា ចាប់តាំងពីការផ្ទុះជំងឺគ្រុនឈីកជាលើកដំបូងនៅក្រុងប៉ោយប៉ែត ខេត្តបន្ទាយមានជ័យកាលពីខែកក្កដាមក មានករណីសង្ស័យជំងឺគ្រុនឈីកជិត ៦ ពាន់នាក់នៅក្នុងរាជធានី-ខេត្តទាំង ២១ ហើយក្នុងនោះអ្នកដែលបានជាសះស្បើយមានចំនួន ៩៤ ភាគរយ។
ដោយឡែកករណីជំងឺឆ្លងកូវីដ ១៩ រហូតមកដល់ដើមខែតុលាឆ្នាំ ២០២០ នេះត្រូវបានរកឃើញចំនួន ២៨០ នាក់ ដែលជាករណីនាំចូលមកពីក្រៅប្រទេស ចូលមកកាន់ព្រះរាជាណាចក្រកម្ពុជាក្នុងនោះអ្នកព្យាបាលជាសះស្បើយចំនួន ២៧៦ នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៤ នាក់។ នេះបើយោងតាមរបាយការណ៍ប្រចាំថ្ងៃរបស់ក្រសួងសុខាភិបាល។
ក្រសួងសុខាភិបាលក៏បានឱ្យដឹងទៀតថា កាលពីម្សិលមិញអ្នកជំងឺកូវីដ១៩ម្នាក់ទៀតត្រូវបានជាសះស្បើយ ហើយបានចេញពីមន្ទីរពេទ្យក្រោយការធ្វើតេស្តអវិជ្ជមាន ២ ដង។ អ្នកជំងឺម្នាក់នេះគឺជាបុរសជនជាតិចិនអាយុ ២៨ ឆ្នាំហើយជាអ្នកដំណើរមកពីប្រទេសហ្វីលីពីន បន្តជើងហោះហើរនៅប្រទេសកូរ៉េខាងត្បូងមកដល់កម្ពុជាកាលពីថ្ងៃទី ២៧ ខែកញ្ញា។ នៅថ្ងៃម្សិលមិញនេះដែរ ក្រសួងសុខាភិបាលក៏បានអះអាងដែរថា មិនមានរកឃើញករណីវិជ្ជមានវីរុសកូវីដ ១៩ ថ្មីទេ៕
វីដេអូ៖
