.jpg)
ត្បូងឃ្មុំៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីម្សិលមិញបានចេញប្រកាសដោយបានកំណត់តំបន់ផ្ទុះជំងឺប៉េស្តជ្រូកអាហ្រ្វិកចំនួន ២ កន្លែង នៅភូមិកំពង់សេរី និងភូមិសោយ ឃុំមៀន ស្រុកអូររាំងឪ ខេត្តត្បូងឃ្មុំ ជាមួយគ្នានេះដែរក៏មានការសង្ស័យការផ្ទុះជំងឺនេះនៅក្នុងស្រុកអង្គរបុរីខេត្តតាកែវផងដែរ។
លោក វេង សាខុន បានថ្លែងនៅក្នុងសេចក្ដីប្រកាសថា៖ «ការចិញ្ចឹម ទិញ លក់និងដឹកជញ្ជូនសត្វជ្រូក និងផលិតផលមានដើមកំណើតពីសត្វជ្រូកគ្រប់ប្រភេទនៅក្នុងតំបន់ផ្ទុះជំងឺប៉េស្តជ្រូកអាហ្រ្វិកត្រូវផ្អាកបណ្ដោះអាសន្ន»។
លោក សាខុន អះអាងថា ការអនុញ្ញាតឲ្យចរាចរឡើងវិញមិនទាន់មានពេលកំណត់ ប៉ុន្តែការបើកឡើងវិញនឹងត្រូវកំណត់ដោយប្រកាសថ្មី។
លោក សាខុន បញ្ជាក់ជាថ្មីថា៖ «ជំងឺប៉េស្តជ្រូកអាហ្រ្វិកមិនឆ្លងនិងមិនប៉ះពាល់ដល់មនុស្សទេ ប៉ុន្តែជំងឺនេះបណ្ដាលឲ្យជ្រូកឈឺ និងងាប់មានអត្រាខ្ពស់រហូតដល់ ១០០ ភាគរយដែលបង្កការខាតបង់ធ្ងន់ធ្ងរដល់អ្នកចិញ្ចឹមជ្រូកតែប៉ុណ្ណោះ»។
យោងតាមសេចក្ដីប្រកាសស្ដីពីការកំណត់តំបន់ផ្ទុះជំងឺប៉េស្ដជ្រូកអាហ្រ្វិកនៅខេត្តត្បូងឃ្មុំចុះថ្ងៃទី ២ កក្កដា ម្សិលមិញ លោក វេង សាខុន បានសម្រេចឱ្យអគ្គនាយកដ្ឋានសុខភាពសត្វ និងផលិតកម្មសត្វ ត្រូវចាត់វិធានការ ដូចជាបំផ្លាញចោលចំពោះសត្វជ្រូកគ្រប់ប្រភេទនៅតំបន់ផ្ទុះ ផ្អាកការទិញលក់ និងការដឹកជញ្ជូនសត្វជ្រូក សាច់ជ្រូក និងផលិតផលធ្វើពីសត្វជ្រូកគ្រប់ប្រភេទចេញចូលក្នុងរង្វង់ ៣ គីឡូម៉ែត្រ ពីចំណុចផ្ចិតនៃតំបន់ផ្ទុះ ហើយត្រូវត្រួតពិនិត្យឃ្លាំមើលចលនាសត្វជ្រូក សាច់ជ្រូក និងផលិតផលធ្វើពីសាច់ជ្រូកក្នុងរង្វង់ ១០ គីឡូម៉ែត្រ ពីចំណុចផ្ចិតនៃតំបន់ផ្ទុះ។
យោងតាមលិខិតរបស់អគ្គនាយកដ្ឋានសុខភាពសត្វ និងផលិតកម្មសត្វ បានអះអាងថា កាលពីថ្ងៃទី ២៣ មិថុនា នៅភូមិកំពង់សេរី និងភូមិសោយដែលមានសត្វជ្រូកសរុប ៥៦៨ ក្បាល ត្រូវបានចិញ្ចឹមជាលក្ខណៈគ្រួសារបានឈឺចំនួន ១៩ ក្បាល និង ងាប់មេជ្រូកអស់ចំនួន ៣ ក្បាល។ ជ្រូកមេដែលងាប់ទាំងនោះគឺមានរោគសញ្ញាឡើងកម្ដៅ និងរលូតកូន និងពុំអាចព្យាបាលជាឡើយ ហើយបន្ទាប់ពីបូមឈាមយកទៅធ្វើតេស្ដនៅវិទ្យាស្ថានសុខភាពសត្វ និងផលិតកម្មសត្វ លទ្ធផលបង្ហាញថា មានផ្ទុះជំងឺប៉េស្ដជ្រូកអាហ្រ្វិក។
លោក តាន់ ផាន់ណារ៉ា ប្រធានអគ្គនាយកដ្ឋានសុខភាពសត្វ និងផលិតកម្មសត្វធ្លាប់បានឲ្យដឹងថា ត្បូងឃ្មុំជាខេត្តសកម្មជាងគេក្នុងចំណោមខេត្តមានព្រំដែនជាមួយប្រទេស វៀតណាម ដែលមានការលួចនាំចូលជ្រូកខុសច្បាប់ពីប្រទេស វៀតណាម ហើយបើតាមមន្ត្រីពេទ្យសត្វនៅខេត្តនេះបានអះអាងដែរថា បន្ទាប់ពីក្រសួងកសិកម្មបានណែនាំឲ្យទប់ស្កាត់ការនាំជ្រូកខុសច្បាប់ចេញពីប្រទេសវៀតណាមតាំងពីខែមីនារហូតដល់ថ្ងៃទី ២៨ មិថុនា គឺខេត្តត្បូងឃុំបង្ក្រាបបានប្រហែល ៣០ ករណី ដែលមានជ្រូកសរុបជិត ៧០០ ក្បាល។
លោក ផាន់ណារ៉ា បានឲ្យដឹងថា ៖ «តាមលទ្ធផលវិភាគរបស់វិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វបានបញ្ជាក់ថា មានវត្តមានវីរុសជំងឺប៉េស្តជ្រូកអាហ្រ្វិក (ASF) »។
លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំបានប្រាប់ភ្នំពេញប៉ុស្ដិ៍ម្សិលមិញថា មកដល់ពេលនេះមិនទាន់មានជ្រូកផ្សេងទៀតបានងាប់នៅឡើយទេ ក្រៅតែពីមេជ្រូកចំនួន ៣ ក្បាលដែលងាប់កាលពីថ្ងៃទី ២៣ មិថុនា។
លោក ពិសិដ្ឋ ថ្លែងថា៖ «អត់មានព័ត៌មានថាងាប់ទៀតផង ចាំមើលទៅតាមដានទៀតមើលមានជ្រូកងាប់ទៀតអត់ ព្រោះខាងខ្ញុំទើបទៅបាញ់ថ្នាំកាលពីថ្ងៃទី ២៨ (មិថុនា) ប៉ុន្តែអត់មានងាប់អីទៀតផង»។
ប្រទេស កម្ពុជា បានឆ្លងជំងឺប៉េស្ដជ្រូកលើកដំបូងពីប្រទេស វៀតណាម កាលពីថ្ងៃទី ២២ មីនា ដោយផ្ទុះឡើងក្នុងស្រុកអូរយ៉ាដាវ ខេត្តរតនគិរី និងបានរាលដាលបន្តពីស្រុកអូរយ៉ាដាវទៅស្រុកអូរជុំ ប៉ុន្តែការរាលដាលក្នុងស្រុកទាំង ២ របស់ខេត្តរតនគិរីនេះត្រូវបានមន្ទីរកសិកម្មខេត្តបានអះអាងថា បានស្ងប់ស្ងាត់ទៅវិញតាំងពីខែមេសា មកដែលមានសត្វជ្រូកប្រហែលជាង ២១៤០ ក្បាលបានងាប់និងសម្លាប់ចោល។
ជាមួយគ្នានេះ នៅក្នុងខេត្តតាកែវក៏កំពុងសង្ស័យថា អាចផ្ទុះជំងឺប៉េស្ដជ្រូកអាហ្រ្វិកដូចខេត្តត្បូងឃ្មុំ និងខេត្តរតនគិរីដែរ បន្ទាប់ពីមន្ត្រីបានអះអាងថា មានជ្រូកជាច្រើនក្បាលស្ថិតក្នុងស្រុកអង្គរបុរីបានងាប់ ហើយត្រូវបានបូមឈាមយកទៅពិនិត្យនៅវិទ្យាស្ថានសុខភាពសត្វ និងផលិតកម្ម។
លោក ញិប ស្រ៊ន ប្រធានមន្ទីរកសិកម្មខេត្តតាកែវបានលើកឡើងកាលពីថ្ងៃម្សិលមិញដែរថា កាលពីសប្ដាហ៍មុន មានជ្រូកងាប់ជាច្រើនកន្លែង ហើយក្នុង ១ កន្លែងមានជ្រូកងាប់ចាប់ពី ៤ ទៅ ១០ ក្បាល ប៉ុន្តែលោកអះអាងថា នៅក្នុងខេត្តតាកែវ គឺពុំបានមានការនាំជ្រូកខុសច្បាប់ចេញពីប្រទេសវៀតណាមម្ដងណាឡើយ ចាប់ពីមានវិធានការណែនាំរបស់ក្រសួងកសិកម្មមក។
លោក ញិប ស្រ៊ន បានថ្លែងឲ្យដឹងផងដែរថា៖ «ងាប់ហ្នឹងដោយសារឈឺ ហើយយើងបានបូមឈាមយកទៅពិនិត្យហើយ ប៉ុន្តែមិនទាន់ទទួលបានលទ្ធផលនោះទេ»៕
