ភ្នំពេញៈ មន្ត្រីជំនាញបានអះអាងថា ជំងឺប៉េស្ដជ្រូកអាហ្រ្វិកបាន និងកំពុងបន្តរាលដាលដល់ស្រុកអង្គរបុរី ខេត្តតាកែវ និងស្រុកស្វាយជ្រំ ខេត្តស្វាយរៀង បន្ទាប់ពីការធ្វើតេស្ដឈាមជ្រូកងាប់ប្រហែល ៦០ ក្បាល ក្នុងខេត្តទាំង ២ ដែលបានចេញលទ្ធផលកាលពីថ្ងៃព្រហស្បតិ៍សប្ដាហ៍មុនឃើញមានករណីឆ្លងជំងឺប៉េស្ដជ្រូកអាហ្រ្វិក។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋាន សុខភាពសត្វនិងផលិតកម្មបានប្រាប់ ភ្នំពេញប៉ុស្ដិ៍ម្សិលមិញថា លោកមិនទាន់ទទួលបានព័ត៌មានលម្អិតអំពីករណីផ្ទុះជំងឺប៉េស្ដជ្រូកអាហ្រ្វិកនៅខេត្តតាកែវ និងស្វាយរៀងនៅឡើយទេ ប៉ុន្តែលោកបញ្ជាក់ថា ពុំទាន់មានការសង្ស័យថាជំងឺប៉េស្ដជ្រូកអាហ្រ្វិកនេះ បានរាលដាល ដល់ខេត្តផ្សេងទៀត ក្រៅតែពីខេត្តចំនួន ៤ ដូចជា ខេត្តរតនគីរី ត្បូងឃ្មុំ និងចុងក្រោយខេត្តស្វាយរៀង និងខេត្តតាកែវ។
លោកថា៖ «ក្រសួងកសិកម្មបានធ្វើលិខិតរាយការណ៍ទៅសម្ដេច [ហ៊ុន សែន] ហើយថា មាន (ជំងឺប៉េស្ដជ្រូកអាហ្រ្វិក) នៅខេត្តតាកែវ និងខេត្តស្វាយរៀង»។
ជាមួយគ្នានេះ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានចេញផ្សាយលិខិតចំនួន ២ ដាច់ដោយឡែកពីគ្នាកាលពីម្សិលមិញ ដោយលិខិតមួយប្រកាសអំពីតំបន់ផ្ទុះជំងឺប៉េស្ដជ្រូកអាហ្រ្វិកនៅក្នុងភូមិអម្ពិល ឃុំពន្លៃ ស្រុកអង្គរបុរី ខេត្តតាកែវ និងលិខិតមួយទៀតប្រកាសអំពីតំបន់ផ្ទុះស្ថិតក្នុងភូមិឫស្សី ជួរខាងត្បូង ឃុំក្រោលគោ ស្រុកស្វាយជ្រំ ខេត្តស្វាយរៀង ប៉ុន្តែលិខិតទាំងនោះ មិនបានបញ្ជាក់អំពីមូលហេតុ និងចំនួនជ្រូកប៉ុន្មានដែលបានងាប់នៅក្នុងខេត្តទាំង ២ នេះទេ។
កម្ពុជាបានឆ្លងជំងឺប៉េស្ដជ្រូកអាហ្រ្វិកដំបូង កាលពីថ្ងៃទី ២២ ខែ មីនា នៅស្រុកអូរយ៉ាដាវ និងស្រុកអូរជុំខេត្តរតនគិរី ដោយមានជ្រូកជាង ២ ១៤០ ក្បាល ត្រូវបានសម្លាប់ចោល និងងាប់ មុនពេលជំងឺនេះបន្តរាលដាលដល់ខេត្តត្បូងឃ្មុំដែលបានធ្វើឱ្យជ្រូក ៣ ក្បាល ងាប់កាលពីថ្ងៃ ២៣ មិថុនា មុនឆ្លងចូលមកដល់ខេត្តតាកែវ និងខេត្តស្វាយរៀងនាពេលនេះ។
លោក ញិប ស្រ៊ន ប្រធានមន្ទីរកសិកម្ម ខេត្តតាកែវ បានប្រាប់ភ្នំពេញប៉ុស្ដិ៍កាលពីម្សិលមិញដែរថា ជ្រូកនៅក្នុងស្រុកអង្គរបុរីបានចាប់ផ្ដើមងាប់តាំងពីថ្ងៃទី ១ ខែ កក្កដា ហើយតាមលទ្ធផលធ្វើតេស្ដឈាម ជ្រូកនៅភូមិអម្ពិល ក្នុងឃុំពន្លៃ ចំនួន ២៧ ក្បាល បានងាប់ដោយសារជំងឺប៉េស្ដជ្រូកអាហ្រ្វិក រីឯជ្រូកចំនួន ៥០ ក្បាលទៀត នៅក្នុងភូមិមួយចំនួននៃឃុំព្រៃផ្គាំក៏បានងាប់ដែរ ប៉ុន្តែលោកថាមិនមែនដោយសារជំងឺប៉េស្ដជ្រូកអាហ្រ្វិកនោះទេ។
លោកថា៖ «យើងបានផ្សព្វផ្សាយពីការការពារហើយ ហើយពីថ្ងៃទី ១ ដល់ថ្ងៃទី ៥ ក្រុមមន្ត្រីពេទ្យសត្វយើងខេត្ត ទាំងក្រុមពេទ្យស្រុក និងពេទ្យសត្វភូមិបានយកថ្នាំ TH4 ទៅបាញ់ធ្វើជីវសុវត្ថិភាពនៅគ្រប់ផ្ទះទាំងអស់ក្នុងភូមិអម្ពិល»។
ទោះជាយ៉ាងណា លោក ញិប ស្រ៊ន មិនបានបញ្ជាក់អំពីមូលហេតុដែលនាំឱ្យជ្រូកក្នុងខេត្តតាកែវឆ្លងជំងឺប៉េស្ដជ្រូកអាហ្រ្វិកឡើយ ដោយលោកបានអះអាងថា ខេត្តនេះពុំមានការនាំចូលជ្រូកពីប្រទេស វៀតណាម ទេ ចាប់តាំងពីខែមករា មក ហើយស្រុកអង្គរបុរី ក៏មានចម្ងាយប្រហែល ៣០ គីឡូម៉ែត្រ ពីប្រទេស វៀតណាម ដែរ។
លោកបន្តថា ម្យ៉ាងទៀតខេត្តតាកែវ មានតែការនាំចូលជ្រូកស៊ីភីពីខេត្តមួយចំនួនប៉ុណ្ណោះ ដូចជា ខេត្តកោះកុង កំពង់ស្ពឺ និងខេត្តកណ្ដាល ហើយជ្រូកទាំងនេះមួយចំនួន គឺបាននាំចេញបន្តពីខេត្តតាកែវ រួចចូលមកកាន់រាជធានីភ្នំពេញ។
កាលពីម្សិលមិញ ភ្នំពេញប៉ុស្ដិ៍មិនអាចសុំការបំភ្លឺពីលោក ថាច់ រតនា ប្រធានមន្ទីរកសិកម្មខេត្តស្វាយរៀងបានទេ ដោយហៅចូលលើកទី១ លោកឆ្លើយថា រវល់ប្រជុំ និងក្រោយមកលោកមិនលើកទូរស័ព្ទ។
ក្រសួងកសិកម្ម រុក្ខាប្រមាញ់និងនេសាទ ទើបប្រកាសដាក់ចេញវិធានការផ្អាកបណ្ដោះអាសន្ន ការចិញ្ចឹម ទិញ លក់ និងដឹកជញ្ជូនសត្វជ្រូកនិងផលិតផលមានដើមកំណើតពីសត្វជ្រូកគ្រប់ប្រភេទនៅតំបន់ផ្ទុះជំងឺគឺក្នុងភូមិកំពង់សេរីនិងភូមិសោយ ឃុំមៀន ស្រុកអូររាំងឪ ខេត្តត្បូងឃ្មុំកាលពីថ្ងៃទី ២ ខែ កក្កដា កន្លងមក ខណៈក្រសួងបានបញ្ជាក់ថា ថ្វីដ្បិតជំងឺនេះមិនមានថ្នាំព្យាបាលឱ្យជា ប៉ុន្តែមិនអាចឆ្លងមកមនុស្សនិងធ្វើឱ្យប៉ះពាល់មនុស្សឡើយ។
លោក ហេង ពិសិដ្ឋ ប្រធានមន្ទីរកសិកម្មខេត្តត្បូងឃ្មុំបានបញ្ជាក់ថា គិតចាប់ពីផ្ទុះឡើងក្នុងភូមិកំពង់សេរីនិងភូមិសោយមកគឺករណីជ្រូកងាប់បានកើនដល់ ៣២ ក្បាលហើយ ប៉ុន្តែជំងឺនេះ មិនទាន់ឆ្លងទៅដល់ភូមិផ្សេងទៀតនៅឡើយទេ។
លោកថា៖ «ភូមិផ្សេងទៀត ដូចជាមិនទាន់អីទេស្ងាត់ដែរ»។
ចំណែកលោក តាន់ ផាន់ណារ៉ា បញ្ជាក់ថា ក្រសួងកសិកម្មនឹងដាក់ចេញវិធានការដើម្បីទប់ស្កាត់ការរាលដាលជំងឺប៉េស្ដជ្រូកអាហ្រ្វិកនៅខេត្តតាកែវ និងខេត្តស្វាយរៀងដូចគ្នានឹងវិធានការដែលបានដាក់ចេញក្នុងខេត្តត្បូងឃ្មុំ និងខេត្តរតរគិរីដែរ៕