The Phnom Penh Post Search

Search form




Logo of Phnom Penh Post newspaper Phnom Penh Post - ជំទាវ សម មុន្នីកា ត្រូវ​បាន​បញ្ចប់​តំណែង​បន្ទាប់​ពី​រង​ការ​រិះគន់

ជំទាវ សម មុន្នីកា ត្រូវ​បាន​បញ្ចប់​តំណែង​បន្ទាប់​ពី​រង​ការ​រិះគន់

លោក​ជំទាវ សម មុន្នីកា បាន​ទទួល​លុយ​ពី​ជន​រងគ្រោះ​កន្លង​មក។
លោក​ជំទាវ សម មុន្នីកា បាន​ទទួល​លុយ​ពី​ជន​រងគ្រោះ​កន្លង​មក។ រូបថត សហការី

ជំទាវ សម មុន្នីកា ត្រូវ​បាន​បញ្ចប់​តំណែង​បន្ទាប់​ពី​រង​ការ​រិះគន់

ភ្នំពេញៈ លោក​ស្រី សម មុន្នីកា អតីត​រដ្ឋ​លេខាធិការ​ក្រសួង​ទេសចរណ៍ ដែល​ទទួល​រង​នូវ​ការ​រិះគន់​យ៉ាង​ចាស់​ដៃ​ទាក់​ទិន​រឿង​ទារ​ប្រាក់​សំណង​ពី​អ្នក​រត់​តាក់ស៊ី​ដែល​បាន​ស្នើ​សុំ​លាលែង​ពី​តំណែង អះអាង​ថា ដោយ​សារ​កិច្ច​ប្រឹង​ប្រែង​បម្រើ​ការងារ​រដ្ឋ​ជាង ៣៥​ឆ្នាំ មក​នេះ ហាក់​មិន​មាន​ន័យ រួម​នឹង​ការ​នឿយ​ហត់​ជុំវិញ​ការ​ស្តី​បន្ទោស​របស់​មតិ​សាធារណជន​មួយ​ចំនួន។

តាម​រយៈ​ព្រះ​រាជក្រឹត្យ​ចុះ​ថ្ងៃ ទី១៦ ខែ​វិច្ឆិកា ឆ្នាំ​២០១៤ ព្រះ​មហាក្សត្រ ព្រះ​បរមនាថ នរោត្តម សីហមុនី បាន​ត្រាស់​បង្គាប់​ឲ្យ​លោក​នាយក​រដ្ឋ​មន្រ្តី ហ៊ុន សែន បញ្ចប់​មុខ​តំណែង​លោក​ស្រី សម មុន្នីកា ពី​រដ្ឋ​លេខាធិការ​ក្រសួង​ទេសចរណ៍ ដោយ​សាមី​ខ្លួន​សុំ​លាលែង។

លោក​ស្រី សម មុន្នីកា ដែល​បាន​ដាក់​ស្នើ​សុំ​ព្រះ​មហាក្សត្រ​បញ្ចប់​មុខ​តំណែង​បាន​ឲ្យ​ដឹង​ថា៖ «ខ្ញុំ​ខំ​ធ្វើ​ការងារ​បម្រើ​រដ្ឋ​ជាង ៣៥ ឆ្នាំ​មក​ហើយ ទី​បំផុត​អត់​មាន​ន័យ គ្រាន់​តែ​ទាមទារ​រក​យុត្តិធម៌​សោះ បែរ​ជា​ត្រូវ​គេ​ជេរ​បញ្ចោរ ស្តី​បន្ទោស​ទៅ​វិញ។ ការ​ឈប់​នេះ គ្មាន​ការ​បង្ខំ​ពី​ខាង​ណា​នោះ​ទេ គ្រោះថ្នាក់​នោះ បាន​ធ្វើ​ឲ្យ​ខ្ញុំ​ជិត​អស់​ជីវិត​ទៅ​ហើយ ខ្ញុំ​ត្រូវ​ការ​ពេល​វេលា ដើម្បី​សម្រាក។ កន្លង​មក​ប្តី​របស់​ខ្ញុំ មិន​បាន​លូក​ដៃ​ក្នុង​រឿង​នេះ​ឡើយ គាត់​ស្លូត​បូត​ណាស់ រឿង​ទាំង​នេះ មិន​មាន​អ្វី​ទាក់​ទង​នឹង​គាត់ ឬ​ការងារ​គាត់​ឡើយ»។

លោក​ស្រី សម មុន្នីកា ត្រូវ​បាន​ស្គាល់​ថា ជា​ភរិយា​របស់​លោក ប៉ុល លឹម រដ្ឋ​លេខាធិការ​ក្រសួង​មហាផ្ទៃ។ លោក​ស្រី បាន​បញ្ជាក់​ថា ការ​ស្នើ​សុំ​លាលែង​ពី​តំណែង​នេះ គឺ​ដើម្បី​បន្ត​ការ​រស់​នៅ​ដោយ​ស្ងប់​ស្ងៀម និង​ដើម្បី​សម្រាក​ព្យាបាល​របួស និង​ជំងឺ​ផង​ដែរ ម្យ៉ាង​លោក​ស្រី មាន​វ័យ​ជាង ៦០​ឆ្នាំ ទៅ​ហើយ ទាម​ទារ​ការ​សម្រាក​ឲ្យ​បាន​គ្រប់​គ្រាន់។

ចំពោះ​រឿង​នោះ លោក គឹម ពិសិដ្ឋ ម្ចាស់​រថយន្ត ដែល​បាន​បង់​សំណង​ជំងឺ​ចិត្ត ៤ ពាន់​ដុល្លារ ទៅ​ឲ្យ​លោក​ស្រី សម មុន្នីកា បាន​ឲ្យ​ដឹង​ថា៖ «ខ្ញុំ​សប្បាយ​ចិត្ត​បន្ទាប់​ពី​ដោះ​ស្រាយ បាន​ឡាន​ត្រឡប់​មក​វិញ ប៉ុន្តែ​ខ្ញុំ​សោក​ស្តាយ​ដែរ ចំពោះ​លោក​ជំទាវ ដោយ​សារ​គាត់​មាន​តំណែង​ធំ​ដែរ»។

ជុំវិញ​រឿង​រ៉ាវ​នៃ​គ្រោះ​ថ្នាក់​ចរាចរណ៍​នៅ ខេត្ត​រតនគិរី នេះ បន្ទាប់​ពី​ទទួល​បាន​ប្រាក់​សំណង​ជំងឺ​ចិត្ត ៤ ពាន់​ដុល្លារ ប៉ុន្តែ​ប្រាក់​នោះ ត្រូវ​បាន​កាកបាទ​ក្រហម​កម្ពុជា ប្រកាស​មិន​ទទួល​យក ដោយ​ចាត់​ទុក​ថា ជា​ប្រាក់​ស្មោក​គ្រោក​មក លោក​ស្រី សម មុន្នីកា ដែល​គ្រា​នោះ ជា​រដ្ឋ​លេខាធិការ​នៃ​ក្រសួង​ទេសចរណ៍ ត្រូវ​បាន​អ្នក​ប្រើ​ប្រាស់​ហ្វេសប៊ុក រិះគន់​យ៉ាង​ដំណំ​និង​ចាស់​ដៃ បើ​ទោះ​បី​ជា លោក​ស្រី​អះអាង​ថា ជា​រឿង​អយុត្តិធម៌​សម្រាប់​លោក​ស្រី ហើយ​លោក​ស្រី​ជា​ជន​រង​គ្រោះ រង​ការ​ប្រមាថ​ពី​ម្ចាស់​រថយន្ត​ក៏​ដោយ។ ក្រោយ​មក កាកបាទ​ក្រហម​កម្ពុជា បាន​ឧបត្តម្ភ​ប្រាក់​ដល់​ម្ចាស់​ឡាន​នោះ ចំនួន ២ ពាន់​ដុល្លារ​បន្ថែម​ទៀត។

គេហទំព័រ​ហេ្វសប៊ុក​មួយ​ចំនួន​បាន​នាំ​គ្នា​សាទរ​ចំពោះ​ការ​សម្រេច​បញ្ចប់​មុខ​តំណែង​នេះ​ដោយ​អះអាង​ថា ជា​ការ​សម្រេច​ចិត្ត​ប្រកប​ដោយ​គតិយុត្ត​និង​ត្រឹម​ត្រូវ​បំផុត៕

អត្ថបទគួរចាប់អារម្មណ៍