ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈកាលពីម្សិលមិញបានឲ្យដឹងថា ក្រសួងបានបើកផ្ដល់អាហារូបករណ៍ចំនួន ១៣ ពាន់កន្លែងដែលជាប្រភេទជំនាញវិជ្ជាជីវៈកំពុងមានទីផ្សារនៅក្នុងប្រទេសកម្ពុជាសម្រាប់សិស្សដែលបានប្រឡងធ្លាក់បាក់ឌុប (សញ្ញាបត្រមធ្យមសិក្សាទុតិយភូមិ) កាលពីខែសីហាកន្លងមក។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា អាហារូបករណ៍ជាជំនាញវិជ្ជាជីវៈដែលកំពុងមានតម្រូវការខ្ពស់ជាងគេ រៀនហើយឆាប់បានការងារធ្វើនោះមានជំនាញជួសជុលរថយន្ត អគ្គិសនី សំណង់ស៊ីវិល អេឡិចត្រូនិក ជួសជុសម៉ាស៊ីនត្រជាក់ វិស្វកម្មរថយន្ត និងជាងកំបោរជាដើមដែលសិស្សម្នាក់ៗអាចទាក់ទងតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈរាជធានី និងខេត្តចាប់ពីខែកញ្ញារហូតដល់ចុងខែតុលា។ ជំនាញបណ្ដុះបណ្ដាលវិជ្ជាជីវៈនេះត្រូវបានចែកជា ៣ កម្រិតសម្រាប់សិស្សជ្រើសរើស។
លោក ហេង សួរ ថ្លែងថា៖ «កុំមើលឃើញតែផ្លូវឧត្ដមសិក្សាតែមួយដែលជាផ្លូវសម្រាប់ចាប់យកជំនាញនោះ។ តាមការពិតយើងនៅមានផ្លូវ ២ ផ្សេងទៀតគឺអាចសិក្សាកម្រិតមធ្យមបច្ចេកទេស ឬក៏បច្ចេកទេសជាន់ខ្ពស់ក៏បានដែរ។ បើសិនជាចប់ ២ ឆ្នាំចង់បន្ដការសិក្សាទៀតក៏អាចទទួលបានសញ្ញាបត្រកម្រិតបច្ចេកទេសថ្នាក់ឧត្ដមសិក្សាមានតម្លៃស្មើទៅនឹងបរិញ្ញាបត្រនៅតាមសាកលវិទ្យាល័យនានាដូចគ្នា»។
លោក សួរ បានអះអាងថាអាហារូបករណ៍ដែលផ្ដល់ជូនសិស្សនិស្សិត ប្រមាណជាង ១៣ ពាន់កន្លែងនោះមានសាលាបច្ចេកទេស និងបណ្ដុះបណ្ដាលវិជ្ជាជីវៈសរុបចំនួន ៣៩ សាលាស្ថិតក្រោមក្រសួងការងារ ខណៈនៅក្នុងមួយរាជធានី/ខេត្ដយ៉ាងតិចមានគ្រឹះស្ថានបណ្ដុះបណ្ដាល ១ ហើយនៅរាជធានីភ្នំពេញមានចំនួន ៨ សាលាធំៗសម្រាប់ឲ្យសិស្ស និស្សិត ជ្រើសរើសពិចារណាចូលរៀនបាន។
សេចក្ដីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈដែលត្រូវបានផ្សព្វផ្សាយកាលពីចុងខែសីហាបានឲ្យដឹងថា ឆ្នាំសិក្សា ២០១៨ -២០១៩ នេះក្រសួងការងារបានផ្តល់អាហារូបករណ៍ថ្នាក់បរិញ្ញាបត្រជាន់ខ្ពស់/អនុបណ្ឌិត បរិញ្ញាបត្របច្ចេកវិទ្យា/ឯកទេស សញ្ញាបត្រវិស្វករ សញ្ញាបត្រជាន់ខ្ពស់/បរិញ្ញាបត្ររង បច្ចេកវិទ្យា/ ឯកទេស សញ្ញាបត្របច្ចេកទេស និងវិជ្ជាជីវៈសរុបចំនួន ១៣ ៧៨៧ កន្លែង។
យ៉ាងហោចណាស់សិស្សប្រមាណជាង ៣៩ ពាន់នាក់បានប្រឡងបាក់ឌុបធ្លាក់កាលពីខែសីហាកន្លងមកនេះក្នុងនោះមានសិស្សមួយចំនួនបានប្ដឹងតវ៉ាចំពោះលទ្ធផលដែលពួកគេគិតថាមានភាពមិនប្រក្រតី ទើបក្រសួងអប់រំត្រួតពិនិត្យឡើងវិញដែលធ្វើឲ្យសិស្សមួយចំនួនមានការកែប្រែលទ្ធផលប្រឡងជាប់ឡើងវិញ។
ទោះបីគណៈកម្មការកោសល្យវិច័យនៃក្រសួងអប់រំ បានស្រាវជ្រាវរកឃើញកំហុសបច្ចេកទេស និងបានប្រកាសលទ្ធផលប្រឡងជាថ្មីហើយក៏ដោយ ប៉ុន្ដែមកដល់ល្ងាចថ្ងៃចន្ទ ទី ១៧ ខែកញ្ញានេះនៅតែបន្ដមានសិស្សានុសិស្សមកដាក់ពាក្យបណ្ដឹងចំពោះការមិនសុខចិត្ដនឹងលទ្ធផលនៅក្រសួងអប់រំនៅឡើយ។
លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡាបានថ្លែងថា៖ «នៅតែមានសិស្សមកដាក់ពាក្យបណ្ដឹងនៅក្រសួងអប់រំនៅឡើយ ប៉ុន្ដែយើងមិនទាន់បូកសរុបថាមានប៉ុន្មាននៅឡើយទេ»។
លោក ខាំបូលី បានបញ្ជាក់ថាកម្ពុជាបច្ចុប្បន្ននៅខ្វះអ្នកបច្ចេកទេសច្រើន ដើម្បីឲ្យសង្គមកម្ពុជាឆ្ពោះទៅចក្ខុវិស័យឆ្នាំ ២០៣០ ជាប្រទេសដែលមានចំណូលមធ្យមកម្រិតខ្ពស់ និងឆ្នាំ ២០៥០ ជាប្រទេសដែលមានចំណូលខ្ពស់គឺលុះត្រាតែវិនិយោគទៅលើការអប់រំបច្ចេកទេស វិជ្ជាជីវៈចាប់ពីពេលនេះតទៅដើម្បីធានាថាកម្ពុជានឹងមានអ្នកបច្ចេកទេសបំពេញទៅតាមតម្រូវការទីផ្សារការងារ៕