The Phnom Penh Post Search

Search form




Logo of Phnom Penh Post newspaper Phnom Penh Post - ជំរឿន​ជន​បរទេស​រក​ចំណូល​បាន​ជិត $២ សែន

ជំរឿន​ជន​បរទេស​រក​ចំណូល​បាន​ជិត $២ សែន

ភូមិ​បណ្តែត​ទឹក​ជន​ជាតិ​វៀតណាម នៅ​តាម​ដង​ទន្លេ​សាប​ក្នុង ខេត្ត​កំពង់ឆ្នាំង។
ភូមិ​បណ្តែត​ទឹក​ជន​ជាតិ​វៀតណាម នៅ​តាម​ដង​ទន្លេ​សាប​ក្នុង ខេត្ត​កំពង់ឆ្នាំង។ រូបថត សំ រិទ្ធ

ជំរឿន​ជន​បរទេស​រក​ចំណូល​បាន​ជិត $២ សែន

ភ្នំពេញៈ មន្រ្តី​អន្តោ​ប្រវេសន៍​បាន​ប្រាប់ ភ្នំពេញ ប៉ុស្តិ៍ កាល​ពី​ថ្ងៃ​អង្គារ​ថា ចាប់​តាំង​ពី​ការ​ធ្វើ​ជំរឿន​ជន​បរទេស​ទូទាំង​ប្រទេស​កាល​ពី ខែ​សីហា មក​ប្រាក់​ពិន័យ​សរុប​ជិត ២ សែន​ដុល្លារ ត្រូវ​បាន​បង់​ចូល​ថវិកា​ជាតិ។

លោក​ឧត្តម​សេនីយ៍ សុខ ផល អគ្គ​នាយក នៃ​អគ្គ​នាយកដ្ឋាន​អន្តោ​ប្រវេសន៍​ក្រសួង​មហាផ្ទៃ បាន​ថ្លែង​ថា៖ «ជន​បរទេស​ដែល​ត្រូវ​បាន​រក​ឃើញ​ថា គ្មាន​លិខិត​អនុញ្ញាត​ការងារ ត្រូវ​ទទួល​ពិន័យ»។

លោក​បន្ត​ថា៖ «យោង​តាម​ច្បាប់ នគរបាល​អន្តោ​ប្រវេសន៍​អាច​ពិន័យ​ពួក​គេ ២ សែន​រៀល [ប្រហែល ៤៩ ដុល្លារ] ទៅ ៥ សែន​រៀល ហើយ​ប្រាក់​នេះ​នឹង​បង់​ចូល​ថវិកា​ជាតិ។ រហូត​មក​ដល់​ពេល​នេះ​យើង​បាន​ប្រមូល​ប្រាក់​ពិន័យ​ប្រហែល ៧៥០ លាន​រៀល [ប្រហែល ១៨៤០០០ ដុល្លារ] ហើយ​អ្នក​ទាំង​ឡាយ​ដែល​គ្មាន​ឯកសារ​ក៏​អាច​ប្រឈម​នឹង​ការ​និរទេស​ផង​ដែរ។ ចាប់​តាំង​ពី​ចាប់​ផ្តើម​ធ្វើ​ជំរឿន យើង​បាន​និរទេស​ជន​បរទេស ៥៤០ នាក់»។

ជំរឿន​ដែល​លោក សុខ ផល បាន​ថ្លែង​ថា បាន​បញ្ចប់​រួច​ហើយ​ក្នុង​ខេត្ត​ចំនួន ២០ នោះ គឺជា​មធ្យោបាយ​មួយ​ក្នុង​ការ​រាប់​ជន​បរទេស​នៅ​កម្ពុជា​ឲ្យ​បាន​ច្បាស់​លាស់​និង​សម្រាប់​អនុវត្ត​ច្បាប់​អន្តោ​ប្រវេសន៍​កម្ពុជា។

លោក ផល បាន​បន្ថែម​ថា៖ «ជំរឿន​មាន​គោល​បំណង​រក​ថា​តើ គេ​មាន​លិខិត​អនុញ្ញាត​ការងារ​ឬ​អត់​ប្រសិន​បើ​គេ [ជន​បរទេស] ធ្វើ​ការ»។ លោក​បាន​បន្ថែម​ថា មន្រ្តី​សង្ឃឹម​ថា ជំរឿន​នឹង​បញ្ចប់​ទាំង​ស្រុង​នៅ​មុន​ចុង​ឆ្នាំ​នេះ។

ជន​បរទេស​មួយ​ចំនួន​បាន​ថ្លែង​ថា ពួក​គេ​មិន​ដឹង​ថា តើ​ពួក​គេ​ត្រូវ​បំពេញ​ឯកសារ​អ្វី​ខ្លះ​ដើម្បី​ឲ្យ​អាច​បន្ត​ស្នាក់នៅ​ក្នុង ប្រទេស​កម្ពុជា ជា​បន្ត​ទៀត​នោះ​ទេ។ អ្នក​ស្រី Andrea ជន​បរទេស​ដែល​ប្រាប់​តែ​នាម​ខ្លួន បាន​ថ្លែង​ថា ការ​មក​ដល់​របស់​មន្រ្តី​នៅ ខេត្ត​កំពត បាន​បង្ក​ការ​ភ័យ​ខ្លាច​និង​ភាន់​ច្រឡំ។

អ្នក​ស្រី​បាន​បន្ថែម​ថា៖ «ពួក​គេ​បាន​មក​គ្រប់​អាជីវកម្ម​នៅ ខេត្ត​កំពត ... ពួក​គេ​បាន​គំរាម​និរទេស​ជន​បរទេស​ចេញ​ពី​ប្រទេស ប្រសិន​បើ​គេ​គ្មាន​ឯកសារ​ក្នុង​រយៈ​ពេល ៣ សប្តាហ៍​ទៀត​នោះ​ទេ»។

អ្នក​ស្រី​បាន​បន្ថែម​ថា អ្នក​ស្នាក់​នៅ​បាន​ទទួល​ឯកសារ​បណ្តោះ​អាសន្ន ខណៈ​ពេល​កំពុង​រង់​ចាំ​លិខិត​អនុញ្ញាត​ការងារ​នោះ នឹង​ទទួល​រង​ការ​ពិន័យ​ប្រាក់​ច្រើន​ហើយ​អ្នក​ស្រី​បាន​បន្ត​ថា ជន​បរទេស​មិន​ដឹង​ថា តើ​ត្រូវ​ធ្វើ​អ្វី​ខ្លះ​បន្ទាប់​ទេ។

អ្នក​ស្រី​បញ្ជាក់​ថា៖ «យើង​មិន​ដឹង​ពី​របៀប​ទទួល​បាន​លិខិត​អនុញ្ញាត​ការងារ​ទេ មន្ទីរ​ការងារ ខេត្ត​កំពត មិន​មាន​សមត្ថភាព​ចេញ​លិខិត​អនុញ្ញាត​ការងារ នា​ពេល​នេះ​ទេ។ មាន​សារ​ផ្សេងៗ ដូច​គ្នា​គ្មាន​អ្នក​ណា​ដឹង​ថា តើ​ត្រូវ​ធ្វើ​អ្វី​ខ្លះ​ទេ»៕

អត្ថបទគួរចាប់អារម្មណ៍