ភ្នំពេញៈ អ្នកនយោបាយអតីតគណបក្សប្រឆាំងចំនួន ៤០ នាក់ដែលត្រូវបានហាមប្រាមមិនឲ្យធ្វើនយោបាយ ៥ ឆ្នាំបានសម្ដែងជំហររៀងៗខ្លួនខណៈជាងពាក់កណ្តាលនៃពួកគេបានប្តេជ្ញាថាមិនស្នើសុំការស្តារនីតិសម្បទានយោបាយ ហើយអ្នកខ្លះរង់ចាំការដោះលែងលោក កឹម សុខា ស្របពេលដែលអ្នកវិភាគនយោបាយខ្លះមិនរំពឹងថា អ្នកត្រឡប់ចូលនយោបាយវិញនឹងមានចំនួនច្រើន និងខ្លះថាអតីតបក្សប្រឆាំង នេះនឹងបែកជា ៤ ផ្នែក។
កាសែតភ្នំពេញ ប៉ុស្តិ៍ បានសម្ភាសជាមួយមន្ត្រីគណបក្សសង្គ្រោះជាតិ ៤០ នាក់ក្នុងចំណោមមន្ត្រី ១១៨ នាក់ដែលត្រូវបានហាមប្រាមមិនឲ្យធ្វើនយោបាយតាមទូរស័ព្ទ និងហ្វេសប៊ុក។
ជាការឆ្លើយតបគឺមានជាងពាក់កណ្តាលនៃពួកគេថានឹងមិនស្នើសុំជាដាច់ខាត ខណៈអ្នកខ្លះនិយាយថា ពួកគេកំពុងទាមទារឲ្យមានការដោះលែងលោក កឹម សុខា ហើយចង់ឲ្យមានសិទ្ធិធ្វើនយោបាយជាកញ្ចប់។ រីឯ ២-៣ នាក់ក្នុងចំណោមពួកគេបានថ្លែងថា មិនគិតអំពីបញ្ហានេះទេ។
មន្ត្រីចំនួន ២៣ នាក់រួមមាន ឥស្សរជនល្បីៗដូចជា អនុប្រធានអតីតគណបក្សសង្គ្រោះជាតិ លោកស្រី មូរ សុខហួរ និងលោក អេង ឆៃអ៊ាង, លោក ឡុង រី, លោក ហូ វ៉ាន់ លោក លិម គិមយ៉ា, លោក គង់ សភា លោក ងីម ញេង,លោក យន្ត ថារូ ,លោក ថាច់ សេដ្ឋា,លោក គឹមសួរ ភីរិទ្ធ, លោក ឃី វណ្ណដេត.និងសមាជិកជាច្រើនទៀតនៃគណៈកម្មការនាយក របស់អតីតគណបក្សសង្គ្រោះជាតិ បានថ្លែងថា ពួកគេនឹងមិនស្នើសុំទេ។
លោកស្រី មូរ សុខហួរ បានប្រាប់ភ្នំពេញប៉ុស្តិ៍ថា លោកស្រីនឹងមិនធ្វើសំណើសុំស្តារនីតិសម្បទានយោបាយទេ ដោយសារសិទ្ធិធ្វើនយោបាយសង្គមនិងសេដ្ឋកិច្ច ត្រូវបានចែងនៅក្នុងរដ្ឋធម្មនុញ្ញកម្ពុជារួចហើយ។
លោកស្រីបានថ្លែងថា៖ «សិទ្ធិនយោបាយរបស់ខ្ញុំ ព្រមទាំងសិទ្ធិរបស់សហការីរបស់ខ្ញុំគឺត្រូវបានហាមប្រាមដោយខុសច្បាប់ជាមួយនឹងការរំលាយគណបក្សសង្គ្រោះជាតិ។ យើងមិនបានប្រព្រឹត្តអ្វីខុស។ សិទ្ធិពេញលេញរបស់យើងគឺពលរដ្ឋបានការពារ ហើយមិនមែនសម្រាប់យើងការពារ និងដាក់ញត្តិស្នើសុំទេ។ ច្បាប់នោះត្រូវបានតាក់តែង និងអនុម័តដោយរដ្ឋសភាឯកបក្សដែលមិនគោរពទៅតាមរដ្ឋធម្មនុញ្ញ»។
លោកស្រីបានបន្ថែមថា លោកស្រីនឹងត្រឡប់មកប្រទេសកម្ពុជាវិញ ហើយប្រើប្រាស់សិទ្ធិរបស់លោកស្រីជាពលរដ្ឋ។
លោក គឹមសួរ ភីរិទ្ធ អតីតតំណាងរាស្ត្រមណ្ឌល ខេត្តកំពង់ចាម បានថ្លែងថា លោកនឹងមិនស្នើសុំទេ ដោយសារលោកមិនបានប្រព្រឹត្តអ្វីខុស។
លោកបានថ្លែងតាមទូរស័ព្ទថា៖ «ខ្ញុំមិនត្រូវការស្នើសុំនរណាម្នាក់ឲ្យលើកលែងទោសខ្ញុំទេ ដោយសារខ្ញុំមិនបានប្រព្រឹត្តអ្វីខុស។ ខ្ញុំបានធ្វើការនៅសភា ២០ ឆ្នាំហើយ ខ្ញុំមិនដែលក្បត់ប្រទេសរបស់ខ្ញុំទេ។ខ្ញុំស្មោះត្រង់នឹងប្រទេសរបស់ខ្ញុំ។ ខ្ញុំស្មោះត្រង់នឹងប្រទេសរបស់ខ្ញុំ និងប្រជាពលរដ្ឋរបស់ខ្ញុំ។ ក្នុងអំឡុងសវនាការនៅ [នៅតុលាការកំពូល] ខ្ញុំមិនត្រូវបានអញ្ជើញឲ្យទៅធ្វើសក្ខីកម្ម ហើយខ្ញុំថែមទាំងមិនទទួលបានសាលដីកាតុលាការរហូតមកដល់ថ្ងៃនេះ»។
លោក ភីរិទ្ធ បានថ្លែងថា លោកនឹងរស់នៅជាពលរដ្ឋធម្មតា ដោយសង្កត់ធ្ងន់ថា លោកនឹងអាចរស់ដោយមិនចូលរួមនយោបាយដូចជនរួមជាតិជាង ១០ លាននាក់។
លោក យន្ត ថារូ អតីតតំណាងរាស្ត្រអតីតគណបក្សសង្គ្រោះជាតិមណ្ឌលខេត្តបន្ទាយមានជ័យ មានការទាមទារខ្ពស់ រួមមាន ត្រូវអនុញ្ញាតឲ្យលោក សម រង្ស៊ី ត្រឡប់ចូលប្រទេសវិញ និងទម្លាក់រាល់បទចោទប្រកាន់ លើលោក កឹម សុខា។
លោក បានថ្លែងថា៖ «លោក សម រង្ស៊ី និងលោក កឹម សុខា គឺជាមនុស្សតែមួយ»។ លោកបានសរសើរលោក សម រង្ស៊ី ថាជាគូបដិបក្ខពិតប្រាកដរបស់លោកនាយករដ្ឋមន្ត្រី ហ៊ុន សែន។
រីឯមន្ត្រីដទៃៗទៀតបានទាមទារលក្ខខណ្ឌ ២ ដើម្បីឲ្យពួកគេស្នើសុំ រួមមាន ការដោះលែង លោក កឹម សុខា និងទម្លាក់បទចោទប្រកាន់ពីបទក្បត់ជាតិ និងផ្តល់ការស្តារនីតិសម្បទាសិទ្ធិនយោបាយជាកញ្ចប់។ នៅក្នុងការទាមទារលក្ខខណ្ឌប្រភេទនេះរួមមាន ព្រះអង្គម្ចាស់ ស៊ីសុវត្ថិ ធម្មិកោ, អតីតតំណាងរាស្ត្រលោក កង គឹមហាក់,លោក ម៉ៅ មុនីវណ្ណ, លោកអ៊ូ ច័ន្ទរ័ត្ន និង លោក ជីវ កត្តា រួមទាំង មេដឹកនាំវ័យក្មេង លោក ហ៊ីង សុខសាន្ត និងសមាជិកមួយចំនួនទៀតរបស់គណៈកម្មការនាយកអតីតគណបក្សសង្គ្រោះជាតិ។
លោក ជីវ កត្តា អតីតតំណាងរាស្ត្រគណបក្សសង្គ្រោះជាតិមណ្ឌលខេត្តកំពង់ចាមបានថ្លែងថា លោកនៅតែរង់ចាំមើលដំណើរវិវឌ្ឍន៍នយោបាយក្នុងប្រទេសកម្ពុជា។
លោកបានថ្លែងថា៖ «ជំហររបស់ខ្ញុំផ្អែកលើអ្វីដែលផ្តល់អត្ថប្រយោជន៍ដល់យើងទាំងអស់គ្នា មិនមែនតែសម្រាប់លោក កឹម សុខា ឬលោក សម រង្ស៊ី នោះទេ»។
លោក ហ៊ីង សុខសាន្ត មេដឹកនាំវ័យក្មេង របស់អតីតគណបក្សសង្គ្រោះជាតិ បានសម្ដែងជំហររបស់លោកតាមហ្វេសប៊ុកដោយថ្លែងថា លោកនឹងទទួលយកការស្តារនីតិសម្បទានយោបាយលុះត្រាតែតុលាការទម្លាក់បទចោទប្រកាន់ លោក កឹម សុខា។
លោកបានសរសេរនៅលើហ្វេសប៊ុកថា៖ «ខ្ញុំជឿថា មន្ត្រីជាន់ខ្ពស់ដទៃៗទៀតដែលសិទ្ធិនយោបាយរបស់ពួកគេត្រូវបានដកហូតអាចនឹងមិនមានជំហរខុសពីខ្ញុំទេ»។
លោក ផាន់ ច័ន្ទសាក់ មេធាវីម្នាក់ក្នុងចំណោមមេធាវីការពារក្តីរបស់ លោក សុខា និងក៏ជាមនុស្សម្នាក់ក្នុងចំណោមបញ្ជី ១១៨ នាក់បានថ្លែងថា ការស្តារនីតិសម្បទាសិទ្ធិនយោបាយគឺធ្វើឡើងជាកញ្ចប់។
លោកបានពន្យល់ថា សាលដីការបស់តុលាការកំពូលគឺជាសេចក្តីសម្រេចចុងក្រោយដែលមិនអាចប្តឹងជំទាស់បាន។ លោកបានថ្លែងថា៖ «ស្មារតីនៃសេចក្តីសម្រេចរបស់តុលាការកំពូលគឺធ្វើឡើងជាកញ្ចប់។ ប្រសិនបើមន្ត្រីគណបក្សសង្គ្រោះជាតិត្រូវបានតម្រូវឲ្យធ្វើការស្នើសុំជាលក្ខណៈបុគ្គលម្នាក់មួយៗ យើងមិនដឹងថា ធ្វើយ៉ាងម៉េចនោះទេ ដោយសារតុលាការហាមប្រាមយើងជាកញ្ចប់»។
អ្នកវិភាគនយោបាយ លោក ឡៅ ម៉ុងហៃ បានថ្លែងថា លោកមិនអាចប៉ាន់ប្រមាណថា តើប៉ុន្មានភាគរយនៃ ១១៨ នាក់នឹងស្នើសុំឲ្យទទួលបាននីតិសម្បទាខាងនយោបាយវិញនោះទេ។
លោកបានប្រាប់ភ្នំពេញប៉ុស្តិ៍កាលពីថ្ងៃចន្ទថា៖ «ប៉ុន្តែខ្ញុំអាចនិយាយថា ការច្រានចោលរបស់ពួកគេចំពោះការផ្តល់ការស្តារនីតិសម្បទានយោបាយនឹងមានន័យថា ពួកគេនៅតែប្រកាន់ខ្ជាប់ចំពោះការអះអាងរបស់ពួកគេអំពីភាពមិនស្របច្បាប់នៃការហាមប្រាមរយៈពេល ៥ ឆ្នាំរបស់តុលាការកំពូលទៅលើសកម្មភាពនយោបាយរបស់ពួកគេ»។
ចំណែក លោក គិន ភា អគ្គនាយកនៃវិទ្យាស្ថានទំនាក់ទំនងអន្តរជាតិកម្ពុជា បានថ្លែងថា ដំណើរការនេះវាពិបាកធ្វើការប៉ាន់ស្មាន។
លោកបានថ្លែងថា៖ «ខ្ញុំគិតថា តិចជាងពាក់កណ្តាល តិចជាង ៥០ ភាគរយ [នឹងធ្វើការស្នើសុំ]។ ប្រសិនបើយើងក្រឡេកមើលក្រុមប្រឹក្សាឃុំសង្កាត់ មានការអំពាវនាវជាច្រើនឲ្យពួកគេចូលរួម [ជាមួយគណបក្សប្រជាជនកម្ពុជា] ដោយផ្តល់ឲ្យពួកគេនូវតំណែងនៅឃុំសង្កាត់។ ប៉ុន្តែក្នុងចំណោមមន្ត្រីគណបក្សសង្គ្រោះជាតិជាង ៥០០០ នាក់ មានតិចជាង ១ ពាន់នាក់»។
លោកបានថ្លែងថា៖ «ពួកគេជាកម្លាំងមូលដ្ឋាន ហើយមិនចុះចូល ចុះចំពោះកម្លាំងនៅមូលដ្ឋានចម្បង? តើពួកគេនឹងសម្រេចយ៉ាងម៉េច? វាពិបាក»។
លោកបានថ្លែងថា ឧបសគ្គមួយទៀតសម្រាប់ពួកគេស្នើសុំគឺដោយសារលក្ខខណ្ឌ ៧ ចំណុចរបស់លោក សម រង្ស៊ី សម្រាប់អ្នកដែលចង់ស្នើសុំ។
លោក គិន ភា បានថ្លែងថា អ្នកដែលមិនស្នើសុំនឹងបន្តសកម្មភាពរបស់ពួកគេនៅក្រៅប្រទេសហើយរង់ចាំភ្លើងខៀវពីរដ្ឋាភិបាលឬតាមរយៈការចរចានយោបាយរវាងគណបក្សទាំង ២។
លោកបានថ្លែងថា៖ «សម្រាប់ឥឡូវនេះ ប្រសិនបើពួកគេមិនស្នើសុំ ពួកគេនឹងនៅក្រៅនយោបាយកម្ពុជាមួយរយៈ។ ចំពោះអ្នកដែលស្នើសុំ ពួកគេនឹងប្រឆាំងនឹងគោលនយោបាយរបស់លោក សម រង្ស៊ី។ ខ្ញុំគិតថា ពួកគេអាចដើរលើផ្លូវផ្សេងពីគណបក្សសង្គ្រោះជាតិដូចអ្វីដែលលោក គង់ គាំ និងលោកគង់ បូរ៉ា កំពុងធ្វើ»។
លោកបានថ្លែងថា គណបក្សសង្គ្រោះជាតិឥឡូវនេះបែកជា ៤ ផ្នែក គឺខាងលោក សម រង្ស៊ី លោក កឹម សុខា, ការបង្កើតបក្សថ្មី និងការចូលរួមជាមួយគណបក្សដទៃ៕PS