The Phnom Penh Post Search

Search form

Logo of Phnom Penh Post newspaper Phnom Penh Post - ឈូក បណ្ឌិត​ត្រូវ​បាន​ដោះលែង​ពី​ពន្ធនាគារ




ឈូក បណ្ឌិត​ត្រូវ​បាន​ដោះលែង​ពី​ពន្ធនាគារ

Content image - Phnom Penh Post
លោក​ ឈូក បណ្ឌិត នៅ​ពេល​ដើរ​ចូល​ឲ្យ​សមត្ថកិច្ច​ចាប់​ខ្លួន​កាលពី​ខែ​សីហា​ឆ្នាំ​ ២០១៥។ រូបថត សហការី

ឈូក បណ្ឌិត​ត្រូវ​បាន​ដោះលែង​ពី​ពន្ធនាគារ

ភ្នំពេញៈ អតីត​អភិបាល​ក្រុង​បាវិត​លោក ឈូក បណ្ឌិត ត្រូវ​បាន​ដោះលែង​ឲ្យ​មាន​សេរីភាព​​វិញ​ហើយ​កាលពី​ម្សិលមិញ​​បន្ទាប់ពី​​បាន​ទទួល​ទោស​ក្នុង​ពន្ធនាគារ​រួចរាល់​អស់​រយៈពេល ១៨ ខែ​គិត​ចាប់​តាំង​ពី​ថ្ងៃ​​ដែល​លោក​បាន​ចូល​សារភាព​​កាលពី​ខែ​សីហា​ឆ្នាំ​ ២០១៥ គឺ​ ៣ ឆ្នាំ​ក្រោយ​​ពី​បុរស​មាន​អំណាច​ម្នាក់​នេះ​បាន​​​បាញ់​​រះ​ទៅ​លើ​កម្មការិនី​រោងចក្រ​កាត់ដេរ​​ ៣ ​នាក់​ឲ្យ​​រងរបួស​ធ្ងន់​នៅក្នុង​ការ​តវ៉ា​មួយ​នៅ​ក្រុង​បាវិត​ខេត្ត​ស្វាយរៀង​។

លោក សន កែវ អនុប្រធាន​នាយកដ្ឋាន​កែប្រែ​នៃ​អគ្គនាយកដ្ឋាន​ពន្ធនាគារ ​ក្រសួង​មហាផ្ទៃ​បាន​​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​លោក​ ឈូក បណ្ឌិត ទទួល​បាន​ការ​ដោះលែង​នៅ​ថ្ងៃ​ពុធ​ព្រោះ​គាត់​​បាន​ទទួល​ទោស​​គ្រប់​ចំនួន​កំណត់​របស់​តុលាការ​ហើយ​។ លោក​ថា៖ «គាត់​ត្រូវ​បាន​ដោះលែង​ពី​មណ្ឌល​កែប្រែ​ទី​ ១ (ម១ ឬ​ព្រៃស) ពីព្រោះ​គាត់​បាន​ទទួល​ទោស ១៨ ​ខែ​រួចរាល់ មិនមែន​ជា​ការ​លើក​លែង ​ឬ​បន្ធូរ​បន្ថយ​ទោស​នោះ​ទេ»។

លោក ឈូក បណ្ឌិត អតីត​អភិបាល​ក្រុង​បាវិត​ដែល​បាន​​បាញ់​កម្មការិនី ៣ ​​នាក់​ឲ្យ​រងរបួស​ក្រោយពី​គេច​ខ្លួន​ជាង​ ៣ ​ឆ្នាំ​ពី​ការ​​អនុវត្ត​ទោស​បាន​ដើរ​ចូល​មក​សារភាព​ដោយ​ខ្លួនឯង​កាលពី​ល្ងាច​ថ្ងៃ​ទី​ ៨ ខែ​សីហា​ឆ្នាំ​ ២០១៥ និង​ត្រូវ​បញ្ជូន​​ទៅ​ដាក់​ពន្ធនាគារ​ខេត្ត​ស្វាយរៀង​។ ការ​ចូល​សារភាព​នេះ​បាន​ធ្វើ​ឡើង​បន្ទាប់ពី​ការ​ប្រកាស​របស់​​លោក​នាយក​រដ្ឋមន្ត្រី​ ហ៊ុន សែន បាន​រយៈពេល​ ៥ ​ថ្ងៃ​ដោយ​អំពាវនាវ​ឲ្យ​សមត្ថកិច្ច​ស្វែងរក​ចាប់​ខ្លួន​ដោយ​មាន​ការ​សហការ​​ជាមួយ​ប៉ូលិស​អាំងទែរប៉ូល។ ក្រោយ​មក​លោក​បណ្ឌិត​ត្រូវ​បាន​គេ​ផ្ទេរ​មក​ដាក់​នៅ​ពន្ធនាគារ​​ព្រៃស​វិញ​កាលពី​ដើម​ខែ​ធ្នូ​ឆ្នាំ​ ២០១៥​ ដដែល។

លោក បណ្ឌិត ត្រូវ​បាន​សាលា​​ដំបូង​ខេត្ត​ស្វាយរៀង​កាត់​ទោស​ដាក់​ពន្ធនាគារ ១៨ ខែ​ និង​ពិន័យ​ជា​ប្រាក់​ចំនួន ៣៨ លាន​រៀល​ជា​សំណង​ដល់​ជនរងគ្រោះ​ក្នុង​បទ​បង្ក​របួស​ស្នាម​ដោយ​អចេតនា​បើ​ទោះបី​ជា​ជន​នេះ​បាន​ប្រើ​កាំភ្លើង​បាញ់​ទៅ​លើ​កម្មការិនី​បណ្តាល​ឲ្យ​រងរបួស​ធ្ងន់​រហូត​ដល់​ទៅ​ ៣ ​នាក់​ក្តី​។ ការ​ចោទ​ប្រកាន់​នេះ​ធ្វើ​ឡើង​​បន្ទាប់ពី លោក បណ្ឌិត ត្រូវ​បាន​គេ​រកឃើញ​ថា​បាន​បាញ់​រះ​ធ្វើ​ឲ្យ​កម្មការិនី​នៃ​រោងចក្រ​ស្បែកជើង​កៅវ៉េ (​Kaoway​) ក្នុង​ក្រុង​បាវិត​ចំនួន ៣ នាក់​រងរបួស​​ធ្ងន់​ក្នុង​ពេល​ពួកគេ​តវ៉ា​ទាមទារ​លក្ខខណ្ឌ​ការងារ​​ឲ្យ​បាន​ល្អ​កាលពី​ថ្ងៃ​ទី ២០ ខែ​កុម្ភៈ ឆ្នាំ​ ២០១២​។

ទោះ​ទទួល​ទោស​រួច​ក្តី​មន្ត្រី​សង្គម​ស៊ីវិល​ដែល​ធ្លាប់​ឃ្លាំ​មើល​លើ​បញ្ហា​​សិទ្ធិ​កម្មករ​នៅ​តែ​យល់​ថា​ការ​កាត់ទោស​លោក បណ្ឌិត មាន​ទំហំ​ស្រាល និង​មិន​សម​​ដែល​ជន​នេះ​បាន​ប្រើ​កាំភ្លើង​​បាញ់រះ​​ទៅ​លើ​កម្មករ​ជា​នារី​ទន់​ខ្សោយ​ដែល​មាន​តែ​ដៃ​ទទេ​នោះ​ឡើយ។

លោក មឿន តុលា ប្រធាន​មជ្ឈមណ្ឌល​សម្ព័ន្ធភាព​​ការងារ និង​សិទ្ធិ​មនុស្ស​ហៅ​កាត់​សង់​ត្រាល់ (Central) ថ្លែង​ថា​ការ​ដោះលែង​មិន​មាន​បញ្ហា​ខុស​ឆ្គង​លើ​ផ្នែក​ច្បាប់​ទេ​ព្រោះ​គេ​ឃុំ​ខ្លួន​តាម​ដីកា​ចែង​ថា ១ ​ឆ្នាំ​​​កន្លះ ប៉ុន្តែ​បញ្ហា​ទោស​របស់​គាត់​គឺ​ «មិន​ស័ក្តិសម​នឹង​អ្វី​ដែល​គាត់​បាន​ប្រព្រឹត្ត​ទេ»។ លោក​បន្ត​ថា​រំឭក​ពី​ពេល​ដែល​លោក​បណ្ឌិត​ដើរ​ចូល​ខ្លួន​មក​តុលាការ​ឧទ្ធរណ៍​ឲ្យ​មាន​ការ​ចាប់​ខ្លួន​ពេល​នោះ​លោក​បណ្ឌិត​មិន​បាន​ពន្យល់​ពី​ហេតុផល​នៃ​ការ​បាញ់​នោះ​ទេ​តែ​បែរ​ជា​លើក​ឡើង​ពី​ករណី​ខ្លួនឯង​ជា​មន្ត្រី​បក្ស​ប្រជាជន​ដែល​ខិតខំ​ធ្វើការ​លះបង់​ដើម្បី​បក្ស​កាន់​អំណាច​មួយ​នេះ​ទៅ​វិញ​ហើយ​តុលាការ​​ចំណាយ​ពេល​ស្តាប់។ លោក​ថា៖ «បើ​ពិនិត្យ​មើល​តុលាការ​ជា​របស់​គណបក្ស​ប្រជាជន​កម្ពុជា​ព្រោះ​ទាំង​ព្រះរាជ​អាជ្ញា និង​ចៅក្រម​ជា​សមាជិក​សកម្ម​របស់​បក្ស​នយោបាយ​អ៊ីចឹង​តុលាការ​ដូចជា​របស់​បក្ស​​។ អ៊ីចឹង​រឿង​អី​កាត់​ក្តី​ឲ្យ​គ្នា​ឯង​មាន​ទោស​ធ្ងន់។ វា​មិន​ស័ក្តិសម​នឹង​ស្ថាន​ទម្ងន់​ទោស​ឡើយ​»។

ជនរងគ្រោះ​ជា​ស្ត្រី​ទាំង​បី​នាក់​មិន​អាច​ទាក់ទង​សុំ​ការ​អធិប្បាយ​បាន​ទេ​កាលពី​ម្សិលមិញ​ក៏​ប៉ុន្តែ​មេធាវី​របស់​ពួកនាង​គឺ​លោកស្រី សាវី បុត្រចរិយា បាន​ឲ្យ​ដឹង​ថា​លោក​ បណ្ឌិត បាន​ផ្តល់​សំណង​គ្រប់​ចំនួន ៣៨ ​លាន​រៀល​ទៅ​ឲ្យ​ស្រ្តី​រងគ្រោះ​អស់​ហើយ​ បន្ទាប់ពី​លោក​បណ្ឌិត​បាន​ចូល​សារភាព​ហើយ​លោកស្រី​បាន​ប្តឹង​ទាមទារ​សំណង​៕

អត្ថបទគួរចាប់អារម្មណ៍