មណ្ឌលគិរីៈ គណៈកម្មការពិគ្រោះថ្លៃលក់ឈើវត្ថុតាង បានប្រកាសដាក់ដេញថ្លៃជាសាធារណៈនូវឈើវត្ថុតាងចំនួនជាង ១ ៥៣៨ ម៉ែត្រគុប ក្នុងតម្លៃមូលដ្ឋានជាង ១ ៤៣៦,៥ លានរៀល។ នេះបើយោងតាមសេចក្ដីជូនដំណឺងរបស់អគ្គនាយកដ្ឋានរដ្ឋបាលការពារនិងអភិរក្សធម្មជាតិ ចុះថ្ងៃទី ៦ ខែ មិថុនា ឆ្នាំ ២០១៩ ដែលភ្នំពេញប៉ុស្តិ៍ទទួលបានកាលពីម្សិលមិញ។
លោក មាស សុផល ប្រធានគណៈកម្មការពិគ្រោះថ្លៃលក់ឈើវត្ថុតាង បានគូសបញ្ជាក់នៅក្នុងសេចក្ដីជូនដំណឹងនោះថា ឈើវត្ថុតាងទាំងនោះនឹងប្រកាសដាក់ដេញថ្លៃជាសាធារណៈនៅថ្ងៃទី ១១ ខែ កក្កដា ឆ្នាំ ២០១៩ គឺបានមកពីការប្រមូលចាប់រឹបអូសបានពីក្នុងតំបន់ព្រៃការពារធម្មជាតិ ខេត្តមណ្ឌលគិរី។ បច្ចុប្បន្ន ឈើវត្ថុតាងទាំងនោះ កំពុងត្រូវបានរក្សាទុកយ៉ាងមានសុវត្ថិភាព នៅតាមទីតាំងស្នាក់ការតំបន់ការពារធម្មជាតិ ខេត្តមណ្ឌលគិរី។
លោកថ្លែងថា៖ «រូបវន្តបុគ្គល និងនីតិបុគ្គលទាំងអស់ លើកលែងតែអ្នកធ្លាប់មានប្រវត្តិប្រព្រឹត្តបទល្មើសព្រៃឈើ និងអ្នកជាប់ជំពាក់បំណុលរដ្ឋ អាចចូលរួមដេញថ្លៃបាន ដោយត្រូវបំពេញសំណុំបែបបទ និងលក្ខខណ្ឌមួយចំនួន ដែលមានចែងក្នុងសៀវភៅបន្ទុកដេញថ្លៃ»។
លោកថ្លែងថា៖ «អង្គភាពប្រឆាំងអំពើពុករលួយនិងសមត្ថកិច្ចផ្សេងទៀត អាចចូលរួមសង្កេតការណ៍គ្រប់ដំណាក់កាលដេញថ្លៃឈើវត្ថុតាងទាំងនេះ»។
បើតាមសេចក្ដីជូនដំណឹងខាងលើ បរិមាណឈើទាំងនោះ ត្រូវបានប្រកាសដាក់ឲ្យដេញថ្លៃក្នុងតម្លៃមូលដ្ឋានសរុបចាប់ពីប្រហាក់ប្រហែល ៣៥៣-៤១៨ ដុល្លារឡើងទៅ។ កាលបរិច្ចេទនៃការដាក់និងទទួលពាក្យស្នើសុំដេញថ្លៃនឹងចាប់ផ្ដើមពីថ្ងៃទី ៧ ខែ មិថុនា ដល់ថ្ងៃទី ៥ ខែ កក្កដា ឆ្នាំ ២០១៩ នៅនាយកដ្ឋានរដ្ឋបាលផែនការ និងហិរញ្ញវត្ថុនៃអគ្គនាយកដ្ឋានរដ្ឋបាលការពារនិងអភិរក្សធម្មជាតិ នៃក្រសួងបរិស្ថាន។
ទោះជាបែបណាក្ដី កាលពីម្សិលមិញមន្ត្រីម្នាក់នៃគណ:កម្មការនេះ បានប្រាប់ភ្នំពេញប៉ុស្តិ៍ថា គិតរហូតមកទល់ពេលនេះ នៅពុំទាន់មានរូបវន្តបុគ្គល ឬនីតិបុគ្គលណាម្នាក់ ទំនាក់ទំនងមកដាក់ពាក់សុំដេញថ្លៃឈើវត្ថុតាងទាំងនោះនៅឡើយទេ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានប្រាប់ភ្នំពេញប៉ុស្តិ៍ថា ឈើវត្ថុតាង ដែលគណៈកម្មការពិគ្រោះថ្លៃ អគ្គនាយកដ្ឋានរដ្ឋបាលការពារ និងអភិរក្សធម្មជាតិ បានដាក់ប្រកាសដេញថ្លៃនោះ គឺជាឈើចម្រុះប្រភេទ ដែលត្រូវបានក្រុមមន្ត្រីឧទ្យានុរក្សបានស្រាវជ្រាវរកឃើញ និងចាប់រឹបអូសពីតំបន់ការពារធម្មជាតិខេត្តមណ្ឌលគិរី តាំងពី ៣ ឆ្នាំមុនមកម្ល៉េះ។ បច្ចុប្បន្នឈើមួយចំនួនក៏បានពុកផុយខ្លះហើយដែរ។
លោក កែវ សុភគ៌ បានថ្លែងបញ្ជាក់បន្ថែមទៀតថា៖ «ថវិកាដែលបានមកពីការដេញថ្លៃលក់ឈើវត្ថុតាងទាំងនោះ មួយផ្នែកនឹងត្រូវបានផ្ដល់សម្រាប់ការលើកទឹកចិត្តដល់មន្ត្រីឧទ្យានុរក្ស ដើម្បីប្រើប្រាស់សម្រាប់ពង្រឹងការចុះល្បាត (ទៅក្នុងតំបន់ព្រៃ) ទប់ស្កាត់បទល្មើសព្រៃឈើ និងសត្វព្រៃក្នុងតំបន់ការពារធម្មជាតិ ខណៈមួយផ្នែកធំទៀត នឹងត្រូវដាក់បញ្ចូលជាថវិការដ្ឋ ឬនឹងត្រូវប្រើប្រាស់ទៅលើផ្នែកផ្សេងៗទៀតគឺអាស្រ័យតាមការចាត់ចែងរបស់ក្រសួងបរិស្ថាន»៕