.jpg)
ឈើ និងរថយន្តដឹកឈើត្រូវសមត្ថកិច្ចចាប់បាននៅស្ទឹងត្រែង។ រូបថត FN
ក្រចេះ/ស្ទឹងត្រែងៈ ឈើចម្រុះប្រភេទជាច្រើនម៉ែត្រគុប រួមទាំងមធ្យោបាយដឹកជញ្ជូនឈើខុសច្បាប់ដែលរួមមានរថយន្ត និងកាណូតសរុប ៤ គ្រឿងទៀត ត្រូវបានកងរាជអាវុធហត្ថ រួមសហការជាមួយកម្លាំងរដ្ឋបាលព្រៃឈើចាប់និងរឹបអូសបានក្នុងខេត្តចំនួន ៣ ផ្សេងគ្នា។
លោក ស៊ុំ សុគន្ធា មេបញ្ជាការកងរាជអាវុធហត្ថស្រុកសំបូរឲ្យដឹងថាកាលពីល្ងាចថ្ងៃសុក្រកម្លាំងបង្ក្រាបបទល្មើសធនធានធម្មជាតិនៃកងរាជអាវុធហត្ថស្រុកសំបូរបានបើកប្រតិបត្តិការល្បាតតាមដងទន្លេមេគង្គហើយបានប្រទះឃើញកាណូតដឹកឈើមួយគ្រឿងចតនៅចំណុចភូមិតាងួន ឃុំវឌ្ឍនះ ស្រុកសំបូរ ខេត្តក្រចេះក៏បានចូលទៅពិនិត្យ និងបង្ក្រាបចាប់រឹបអូសប្រគល់ឲ្យរដ្ឋបាលព្រៃឈើខេត្តដើម្បីធ្វើការវាស់វែង និងចំណាត់ការបន្តតាមនីតិវិធីច្បាប់។
លោកបន្តថា៖ «បើតាមអ្នកភូមិ ទូកនោះបានចូលចត និងទម្លាក់ឈើចូលទៅក្នុងទូកកាលពីព្រឹកថ្ងៃសុក្រ ប៉ុន្តែគ្មាននរណាម្នាក់ដឹងថា ម្ចាស់ទូកជានរណា និងស្នាក់នៅឯណានោះទេ ព្រោះឃើញតែកម្មករ ២-៣ នាក់ប៉ុណ្ណោះ ហើយពួកគេបានគេចខ្លួន បន្ទាប់ពីឃើញកម្លាំងសមត្ថកិច្ចមកដល់»។
លោក បួយ រតនា នាយរងខណ្ឌរដ្ឋបាលព្រៃឈើក្រចេះបានប្រាប់ភ្នំពេញប៉ុស្តិ៍ថា នៅពេលនេះក្រុមមន្ត្រីជំនាញកំពុងធ្វើការវាស់វែងឈើទាំងនោះ និងរៀបចំសំណុំឯកសារដើម្បីប្រកាសរកម្ចាស់ទូកដឹកឈើនោះឲ្យចូលខ្លួនដោះស្រាយតាមផ្លូវច្បាប់។ លោកបញ្ជាក់ថា៖ «ក្នុងករណីពុំមាននរណាម្នាក់ចេញមុខមកអះអាងថា ជាទូក និងឈើរបស់ខ្លួនទេនោះ សមត្ថកិច្ចយើងនឹងរឹបអូសជាសម្បត្តិរដ្ឋ ដោយចាត់ទុកទូក និងឈើទាំងនោះជាអញ្ញតជន»។
ករណីដាច់ដោយឡែកផ្សេងទៀតកម្លាំងសមត្ថកិច្ចចម្រុះខេត្តស្ទឹងត្រែងបានបង្ក្រាបចាប់រឹបអូសរថយន្តដឹកឈើ ២ គ្រឿង ទូកម៉ាស៊ីន ១ គ្រឿង និងឈើកែច្នៃជាច្រើនម៉ែត្រគុបផងដែរ។
លោក អន ច័ន្ទសុជាតិ នាយខណ្ឌរដ្ឋបាលព្រៃឈើខេត្តស្ទឹងត្រែងបានប្រាប់ភ្នំពេញប៉ុស្តិ៍នៅថ្ងៃអាទិត្យថា ក្នុងប្រតិបត្តិការរយៈពេល ៣ ថ្ងៃ ដែលចាប់ផ្ដើមពីថ្ងៃទី ១៨-២០ ខែ វិច្ឆិកា ឆ្នាំ ២០១៩ កម្លាំងសមត្ថកិច្ចចម្រុះខេត្តស្ទឹងត្រែងបានបង្ក្រាបចាប់រឹបអូសទូកដឹកឈើ ១ គ្រឿង នៅចំណុចស្រែតាចាន់ក្នុងឃុំក្បាលរមាសស្រុកសេសាន និងរថយន្តសាំងយ៉ុងដឹកឈើ ២ គ្រឿង នៅលើដងផ្លូវជាតិលេខ ៧ ក្បែរស្នាក់ការសន្តិសុខ ៧២២ ស្ថិតក្នុងស្រុកសៀមបូក។
លោកថា៖ «សមត្ថកិច្ចយើងបានកំណត់អត្តសញ្ញាណម្ចាស់រថយន្តដឹកឈើគ្រឿងផ្ទះនោះហើយនិងកំពុងរៀបចំលិខិតអញ្ជើញម្ចាស់រថយន្តទាំង ២ គ្រឿងនោះចូលខ្លួនមកដោះស្រាយតាមច្បាប់ ព្រោះឈើទាំងនោះជាឈើកែច្នៃជាបង្អួច និងទ្វារ»។
ដោយឡែកនៅឯខេត្តឧត្តរមានជ័យកាលពីថ្ងៃទី ២០-២១ ខែ វិច្ឆិកា ២០១៩ កម្លាំងកងរាជអាវុធស្រុកអន្លង់វែងសហការជាមួយមន្ត្រីជំនាញរដ្ឋបាលព្រៃឈើ បានចុះបង្ក្រាបទីតាំងសិប្បកម្មកែច្នៃគ្រឿងសង្ហារិម និងស្តុកឈើអត់ច្បាប់ ៧ កន្លែងនៅក្នុងភូមិស្រះឈូក ឃុំត្រពាំងប្រីយ៍ ស្រុកអន្លង់វែងដោយចាប់រឹបអូសឈើបានជាង ៥០ ម៉ែត្រគុប។
លោក ងួន រិទ្ធី មេបញ្ជាការកងរាជអាវុធហត្ថស្រុកអន្លង់វែងថ្លែងថា៖ «បើទោះជាឈើទាំងនោះពួកគាត់បានប្រមូលទិញពីប្រជាពលរដ្ឋក្នុងស្រុកដែលកាប់កាត់នៅតាមតំបន់ព្រៃនឹងនៅតាមស្រែចម្ការរបស់ពួកគាត់ក៏ដោយ ប៉ុន្តែសំខាន់គឺពួកគាត់បើកអាជីកម្មអត់ច្បាប់ ឬច្បាប់អនុញ្ញាតធ្វើអាជីវកម្មរបស់ពួកគាត់ពីមុនមក ផុតសុពលភាព»៕
