.jpg)
សមត្ថកិច្ចកំពុងស្រង់កំណាត់ឈើនៅក្នុងទន្លេសេសាន។ រូបថត នគរបាល
រតនគិរី/កំពង់ស្ពឺ: ឈើចម្រុះចំនួន ៣៣ កំណាត់ ត្រូវបានសមត្ថកិច្ចខេត្តរតនគិរីប្រគល់ជូនមន្ត្រីជំនាញបរិស្ថានខេត្ត ដើម្បីរក្សាទុកកសាងសំណុំរឿងបញ្ជូនទៅតុលាការបន្ទាប់ពីបង្ក្រាបនៅស្រុកអូរយ៉ាដាវដោយម្ចាស់ឈើបានរត់គេចខ្លួន ខណៈដែលសមត្ថកិច្ចខេត្តកំពង់ស្ពឺបង្ក្រាបទីតាំងកែច្នៃឈើ ១ កន្លែង ដែលមានឈើចំនួន ២៥ កំណាត់ នៅស្រុកឱរ៉ាល់។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរីថ្លែងពីម្សិលមិញថា លោកបានទទួលឈើជាច្រើនប្រភេទលាយឡំគ្នាសរុបចំនួន ៣៣ កំណាត់ ពីមន្ត្រីជំនាញចម្រុះដែលបានចុះបង្ក្រាបកាលពីថ្ងៃទី ១២ ខែកក្កដា ប៉ុន្ដែលោកមិនទាន់ដឹងពីចំនួនដែលគិតជាម៉ែត្រគុបទេ។ ប្រតិបត្តិការបង្ក្រាបនោះកម្លាំងចម្រុះបានធ្វើឡើងនៅថ្ងៃទី ១១ កក្កដា នៅត្រង់ចំណុចកំពង់ចម្លងទន្លេសេសាននៅក្នុងភូមិបាដល ឃុំសេសាន ស្រុកអូរយ៉ាដាវ។
លោកថា៖ «ខ្ញុំបានឃើញទាំងអស់ហ្នឹងហើយ ឥឡូវនេះមន្ត្រីជំនាញកំពុងធ្វើការវាស់វែងចំនួនម៉ែត្រគុប ប៉ុន្ដែខ្ញុំមិនដឹងគេវាស់ហើយឬនៅទេព្រោះខ្ញុំជាប់រវល់មកប្រជុំនៅភ្នំពេញ»។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរីថ្លែងពីម្សិលមិញថា៖ «វត្ថុតាងដែលយើងបានបង្ក្រាបនោះត្រូវបានប្រគល់ឲ្យមន្ត្រីបរិស្ថានយកទៅរក្សាទុកដើម្បីចាត់ចែងតាមច្បាប់បន្ត ប៉ុន្ដែម្ចាស់ឈើបានរត់គេចខ្លួនបាត់អស់ហើយ។ ការងារបង្ក្រាបនេះគឺយើងនៅតែបន្តធ្វើជាហូរហែអ៊ីចឹង មិនលើកលែងឲ្យក្រុមឈ្មួញណាមួយទេ ដូចបងប្អូនយើងឃើញកន្លងមកនេះគឺយើងបានចាត់វិធានការគ្រប់រូបភាពហើយ»។
លោកបន្ថែមថា មុននឹងឈានដល់ការបង្ក្រាបកម្លាំងសមត្ថកិច្ចបានប្រើប្រាស់មធ្យោបាយកាណូតចុះល្បាតរុករកស្រាវជ្រាវក្នុងទន្លេសេសានក្នុងភូមិសាស្ត្រស្រុកអូរយ៉ាដាវ ទើបប្រទះឃើញឈើដែលក្រុមឈ្មួញគរលាក់ទុកក្នុងទន្លេនោះតែម្តងដោយសមត្ថកិច្ចបានធ្វើការរឹបអូសយកទៅប្រគល់ជូនមន្ត្រីជំនាញបរិស្ថានខេត្តរតនគិរីចាត់ចែងតាមច្បាប់។
ដោយឡែកសមត្ថកិច្ចចម្រុះខេត្តកំពង់ស្ពឺកាលពីថ្ងៃទី ១១ ខែកក្កដា បានចុះបង្ក្រាបទីតាំងកែច្នៃឈើ ១ កន្លែងស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ដោយរឹបអូសឈើប្រភេទលេខ ២ ចំនួន ២៥ កំណាត់ ស្មើនឹងជាង ៣ ម៉ែត្រគុប ខណៈម្ចាស់បានរត់គេចខ្លួនបាត់។
លោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺបានថ្លែងពីម្សិលមិញថា សមត្ថកិច្ចចម្រុះខេត្តកំពង់ស្ពឺប្រមាណជាង ៥០ នាក់បានចុះឆែកឆេរ និងបង្ក្រាបទីតាំងកែច្នៃឈើប្រណីតមួយកន្លែងដែលឈើទាំងអស់ត្រូវគេទម្លាក់ចូលក្នុងទឹកស្រះ ដើម្បីលាក់បាំងសមត្ថកិច្ច។
លោកថា៖ «យើងចុះទៅបង្ក្រាបនេះគឺមិនជួបម្ចាស់ទីតាំងទេ គឺគាត់រត់គេចខ្លួនបាត់ហើយ រីឯផ្ទះដែលជាកន្លែងកែច្នៃឈើហ្នឹង គឺចាក់សោទុកចោល។ ដូច្នេះយើងមានការសង្ស័យទើបស្នើសុំអនុសាសន៍ពីថ្នាក់លើសម្រេច ដើម្បីឆែកឆេរទីតាំងហ្នឹង ប៉ុន្ដែម្ចាស់បានលើកឈើទម្លាក់ទឹក ហើយលួចដឹកម៉ាស៊ីនអារឈើចេញអស់មួយចំនួន»។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (CANCIPO) ថ្លែងថា ក្រុមអង្គការរបស់លោកបានចូលរួមជាមួយអាជ្ញាធរដើម្បីបង្ក្រាបបទល្មើសទាំងអស់នេះ ប៉ុន្ដែគួរឲ្យស្ដាយដែលមិនបានឃាត់ខ្លួនម្ចាស់ទីតាំង។
លោកបញ្ជាក់ថា៖ «ក្រៅពីឈើទាំង ២៥ ដុំនេះយើងរកឃើញសំណាកម៉ាស៊ីនអារឈើដែលក្រុមឈ្មួញបានរើរុះយកមួយចំនួន ហើយនៅសេសសល់របស់របរមិនសូវសំខាន់ខ្លះប៉ុន្ដែយើងបានប្រមូលយកមកទាំងអស់ ដើម្បីរក្សាទុកកសាងសំណុំរឿងបញ្ជូនទៅតុលាការ»៕
