.jpg)
ឡានដឹកឈើ ដែលត្រូវបានសមត្ថកិច្ចខេត្តស្ទឹងត្រែងចាប់ឃាត់។ FN
ស្ទឹងត្រែងៈ កម្លាំងចម្រុះខេត្តស្ទឹងត្រែងបាននិងកំពុងត្រួតពិនិត្យឈើចំនួន ២ រថយន្តធំៗរបស់ក្រុមហ៊ុនចិនមួយ បន្ទាប់ពីត្រូវបានកម្លាំងកងរាជអាវុធហត្ថបង្ក្រាបចាប់បានកាលពីយប់ថ្ងៃអង្គារនៅក្នុងសង្កាត់សាមគ្គី ក្រុងស្ទឹងត្រែង ក្រោម ការសង្ស័យថាបានដឹកឈើខុសពីច្បាប់អនុញ្ញាត។
ប៉ុន្តែលោកលៀង សេង ប្រធានមន្ទីរកសិកម្មខេត្តស្ទឹងត្រែងបានប្រាប់ភ្នំពេញប៉ុស្តិ៍កាលពីម្សិលមិញថា រថយន្តទាំង ២ នោះគឺដឹកឈើរបស់ក្រុមហ៊ុនចិន ដោយមានច្បាប់អនុញ្ញាតត្រឹមត្រូវ។ ប៉ុន្តែទំនងជាមានទំនាស់ផ្ទៃក្នុងរបស់ក្រុមហ៊ុននេះ ទើបមានការប្តឹងគ្នា ហើយអាជ្ញាធរមានសមត្ថកិច្ចក៏ឃាត់រថយន្តទាំង ២ គ្រឿងនោះដើម្បីធ្វើការត្រួតពិនិត្យមើល។
លោកបានបញ្ជាក់ដូច្នេះថា៖ «កំពុងធ្វើការតាមនីតិវិធីស្រាវជ្រាវហើយ។ ឈើហ្នឹងគឺឈើក្រុមហ៊ុនគេហ្នឹងហើយ។ ក្រុមហ៊ុនគេមានច្បាប់មានទម្លាប់។ វាគ្រាន់តែមិនត្រូវគ្នា។ វាប្តឹងគ្នា។ រឿងផ្ទៃក្នុងក្រុមហ៊ុនគាត់ហ្នឹង។ ប្តឹងគ្នា ច្រណែនគ្នា។ មានច្បាប់ដឹកជញ្ជូន តែវាអាចខុសលក្ខខណ្ឌឈើតិចតួចក៏មិនដឹងដែរ ព្រោះគេកំពុងតែពិនិត្យមើល»។
លោកបន្ថែមថា ក្រោយពីការចាប់ឃាត់រថយន្តដឹកឈើនោះមក អាជ្ញាធរពាក់ព័ន្ធក៏បានជួបប្រជុំលើបញ្ហានេះផងដែរ។ ប៉ុន្តែលោកមិនបានចាំពីចំនួនឈើដែលដឹកនោះទេ។ លោកថា ឈើទាំងនោះមានឈើខ្លះជាប្រភេទឈើលេខ ១ និងលេខ ២ ហើយខ្លះទៀតជាឈើមិនសូវល្អផងដែរ។ លោកក៏បានឲ្យដឹងផងដែរថា ក្រុមហ៊ុនចិននេះបានទទួលការអនុញ្ញាតពីរដ្ឋាភិបាល ដើម្បីដាំឈើឡើងវិញ។
នៅពេលទាក់ទងពីម្សិលមិញ លោកអឿង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងសុំមិនធ្វើអត្ថាធិប្បាយលើករណីនេះទេ។
យោងតាមសារព័ត៌មាន Fresh News ពីម្សិលមិញបានឲ្យដឹងថា រថយន្ត របស់ក្រុមហ៊ុនចិនទាំង ២ គ្រឿងនេះចេញមកពីស្រុក សៀមប៉ាង ហើយត្រូវកម្លាំងអាវុធហត្ថបង្រ្កាប ដោយសង្ស័យរឿងលួចដឹកឈើប្រណីតខុសច្បាប់។
លោកហូ សំអុល អ្នកសម្របសម្រួលអង្គការសិទ្ធិមនុស្ស អាដហុក ខេត្តស្ទឹងត្រែងឲ្យដឹងថា ក្រុមហ៊ុនចិននោះមានឈ្មោះសៀម៉ុន។ ប៉ុន្តែលោកមិនបានដឹងព័ត៌មានលម្អិតពីករណីនេះទេ។
ទឹកប្រាក់ប្រមាណជា ២០០ លានដុល្លារត្រូវបានក្រុមហ៊ុនសៀម៉ុន (ខេមបូឌា) អេហ្រ្គីខលឈ័រ ខេមប្រេហេនស៊ីវ ឌីវេឡុបម៉ិនធ្វើការវិនិយោគ ដើម្បីបង្កើតស្ថានីយដាំឈើលើផ្ទៃដីទំហំ ២៦ ៩៩០,៦៧ ហិកតា នៅក្នុងឃុំស្រែសំបូរ ស្រុកសៀមប៉ាង។
ករណីដាច់ដោយឡែកមួយទៀត កម្លាំងអាវុធហត្ថ ខេត្តពោធិ៍សាត់បានបង្ក្រាបការកាប់និងដឹកជញ្ជូនផលអនុផលព្រៃឈើដោយគ្មានច្បាប់អនុញ្ញាតកាលពីថ្ងៃអង្គារផងដែរ។
ហ្វេសប៊ុករបស់អាវុធហត្ថលើផ្ទៃប្រទេស កាលពីម្សិលមិញបានឲ្យដឹងថា កម្លាំងកងរាជអាវុធហត្ថខេត្ត និងកម្លាំងមូលដ្ឋាន កងរាជអាវុធហត្ថស្រុកក្រគរ ដឹកនាំដោយលោក ឌុច សម្ផស្ស នាយរងសេនាធិការដ្ឋានខេត្ត សហការជាមួយខណ្ឌរដ្ឋបាលព្រៃឈើខេត្តចុះបង្ក្រាបការកាប់ ប្រមូល ដឹកជញ្ជូនផលអនុផលព្រៃឈើដោយគ្មានច្បាប់អនុញ្ញាតស្ថិតនៅក្នុងភូមិថ្មី ឃុំត្នោតជុំ ស្រុកក្រគរ។
ក្នុងការបង្ក្រាបនោះ សមត្ថកិច្ចបានរឹបអូសឈើចម្រុះចំនួន ១៥០ សន្លឹកស្មើនឹង ៦,៥៣៧ ម៉ែត្រគុប។ ប៉ុន្តែម្ចាស់ឈើបានគេចខ្លួនបាត់។ កម្លាំងជំនាញបានប្រគល់វត្ថុតាងទៅឲ្យខណ្ឌរដ្ឋបាលព្រៃឈើខេត្តពោធិ៍សាត់ ដើម្បីចាត់ការបន្តតាមនីតិវិធី៕
