រតនគិរី ក្រុមសកម្មជនព្រៃឈើក្នុងស្រុក អូយ៉ាដាវ ខេត្តរតនគិរី បានថ្លែងឲ្យដឹងនៅថ្ងៃម្សិលមិញថា មានក្រុមឈ្មួញឈើក្នុងស្រុកមួយ កំពុងឃុបឃិតជាមួយក្រុមឈ្មួញឈើវៀតណាម នាំយករថយន្តបង្កង់ ៨ គ្រឿង (ប្រភេទរថយន្តសម្រាប់ដឹកឈើហ៊ុមធំៗចេញពីព្រៃ) ចូលទៅកាប់និងដឹកឈើពីក្នុងតំបន់ព្រៃសហគមន៍របស់ពួកគេ ដែលមានទីតាំងស្ថិតនៅចន្លោះស្រុកអូរយ៉ាដាវ និង ស្រុកអណ្ដូងមាស។
តាមការអះអាងរបស់ប្រជាសហគមន៍ភូមិភិៈ និង ភូមិប៉ាដល ក្រុមឈ្មួញឈើឈ្មោះ ហ៊ូវ ជីវ៉ៃ បានឲ្យតំណាងរបស់គេពីរនាក់ ម្នាក់ឈ្មោះ ប៉ិច និង ម្នាក់ទៀតឈ្មោះ ស៊ីនឿន ចូលទៅទិញទឹកចិត្តប្រធានសហគមន៍ម្នាក់ឈ្មោះ រំចង់ ផ្ញល និង អាជ្ញាធរមូលដ្ឋានរបស់ពួកគាត់ ដោយសន្យាថានឹងផ្ដល់លុយ៣ម៉ឺនដុល្លារ ជាថ្នូរនិងការជួយលាក់បាំង រឿងពួកគេនាំគ្រឿងចក្រនិងកម្លាំងកម្មករចូលទៅកាប់ឈើ និងដឹកឈើចេញពីក្នុងព្រៃសហគមន៍របស់ពួកគាត់។
តំណាងសហគមន៍ជនជាតិភាគតិចចារាយនៅក្នុងភូមិភិៈម្នាក់ គឺលោក សេវ ឌឿន បានអះអាងថា ក្រុមឈ្មួញឈើទាំងនោះបាននាំយកគ្រឿងចក្រចូលទៅកាប់និងដឹកឈើចេញពីតំបន់ព្រៃសហគមន៍ប៉ាដល ដោយឆ្លងកាត់ភូមិភិៈ និង ភូមិពូតាង ដើម្បីនាំយកទៅលក់នៅក្នុងប្រទេសវៀតណាម។
លោក ឌឿន ថ្លែងថា៖«ពួកសហគមន៍ភូមិភិៈយើង ខិតខំនាំគ្នាការពារធនធានធម្មជាតិ ប៉ុន្តែខាងសហគមន៍ ភូមិប៉ាដល បែរជានាំគ្នាឃុបឃិតជួយលាក់បាំងសកម្មភាពល្មើសច្បាប់របស់ក្រុមឈ្មួញឈើ ដែលចូលមកកាប់ឈើនៅក្នុងព្រៃសហគមន៍ទៅវិញ»។
លោក ឌឿន បានបន្ថែមថា៖«ករណីនេះ មុនដំបូង យើងឃើញមានអាជ្ញាធរឃុំ ចុះទៅសួរនាំ និងឃាត់ឃាំងដែរ ប៉ុន្តែក្រោយមកស្រាប់តែស្ងាត់បាត់ទៅ តែក្រុមឈ្មួញឈើនៅតែបន្តសកម្មភាពលួចដឹកឈើចេញដោយប្ដូរទិសដៅទៅតាមផ្លូវទឹកវិញ»។
ប្រជាសហគមន៍ម្នាក់ទៀត ឈ្មោះ លាង បានថ្លែងបន្ទរថា ក្រោយពីប្រជាសហគមន៍បានរាយការណ៍ទៅអាជ្ញាធរស្រុក និង ផ្នែករដ្ឋបាលព្រៃឈើ ឲ្យចុះជួយអន្តរាគមន៍ទប់ស្កាត់ ឥឡូវនេះ ក្រុមឈ្មួញឈើគេបានផ្អាកសកម្មភាពកាប់ឈើ ប៉ុន្តែពួកគេ មួយចំនួន កំពុងលាក់ខ្លួននៅក្នុងព្រៃ ដើម្បីរង់ចាំឱកាសល្អនៅពេលយប់ លួចនាំឈើចេញទៅតាមផ្លូវទឹក ទៅកាន់ប្រទេសវៀតណាមតែម្ដង។
លោកលាង បានអះអាងថា៖«ករណីនេះ អាជ្ញាធរមូលដ្ឋាន សុទ្ធតែបានដឹងគ្រប់គ្នាហ្នឹងប៉ុន្តែមិនព្រមចុះបង្ក្រាប ហើយក៏ពុំបានរាយការណ៍ដល់អាជ្ញាធរស្រុក ខេត្តនោះដែរ»។
លោក សេវ ស្វេន មេឃុំសេសាន មិនអាចទំនាក់ទំនងសុំការបំភ្លឺបានទេ កាលពីម្សិលមិញ។ ទោះជាបែបណាក្ដី លោក ម៉ា វិចិត្រ អភិបាលស្រុកអូរយ៉ាដាវ បានប្រាប់ភ្នំពេញប៉ុស្តិ៍ថា នៅពេលនេះក្រុមសមត្ថកិច្ចចម្រុះនៃអាជ្ញាធរសុក្រអូរយ៉ាដាវ កំពុងចុះល្បាត និង ស្រាវជ្រាវលើករណីនេះហើយ បន្ទាប់ពីទទួលបានសេចក្ដីរាយការណ៍ពីប្រជាសហគមន៍ក្នុងមូលដ្ឋានកាលពីបី បួន ថ្ងៃមុននេះ ។
លោក វិចិត្រ ថ្លែងថា៖«នៅពេលនេះ ក្រុមកម្លាំងសមត្ថកិច្ចយើងកំពុងបន្តចុះល្បាតនៅក្នុងព្រៃនោះ ហើយក្នុងរយៈពេលពីរថ្ងៃកន្លងមកនេះ យើងនៅពុំទាន់រកឃើញគ្រឿងចក្រ និង ក្រុមជនសង្ស័យ ដូចដែលអ្នកភូមិបានអះអាងនោះទេ ក្រៅពីដានស្នាមរថយន្តចាស់ៗ» ។
ប៉ុន្តែបើតាមការអះអាងរបស់លោក សុខ មីន មេបញ្ជាការកងរាជអាវុធហត្ថស្រុកអូរយ៉ាដាវ នៅរសៀលថ្ងៃម្សិលមិញនេះ ក្រុមសមត្ថកិច្ចបានជួបប្រទះឃើញគំនរឈើមួយកន្លែងស្ថិតនៅចំណុចភូមិពូតាង ចន្លោះព្រំប្រទល់រវាងព្រៃសហគមន៍និង ព្រៃសម្បទានសេដ្ឋកិច្ចរបស់ក្រុមហ៊ុន៧មករា។
លោក មីន បានបន្តថា៖«មកទល់ពេលនេះយើងនៅពុំទាន់ដឹងច្បាស់ទេថា កំណាត់ឈើដែលត្រូវបានគេគរទុកនៅក្នុងព្រៃនោះ ជាឈើរបស់ក្រុមហ៊ុន ៧ មករា ឬ ជាឈើដែលក្រុមជនសង្ស័យ បានប្រមូលចេញពីក្នុងព្រៃសហគមន៍ យកមកគរទុក ដើម្បីដឹកចេញទៅលក់់បន្តណៅប្រទេសវៀតណាមឬមួយយ៉ាងណានោះទេ។ ករណីនេះក្រុមសមត្ថកិច្ចយើងកំពុងបន្តធ្វើការស្រាវជ្រាវបន្ថែមទៀត»។
លោក មីន បានថ្លែងទៀតថា នៅពេលនេះក្រុមកម្លាំងសមត្ថកិច្ច កំពុងបន្តចុះល្បាតនៅក្នុងព្រៃនិងតាមដងទន្លេសេសាន យ៉ាងស្ងប់ស្ងាត់បំផុត ដើម្បីឃ្លាំមើលសកម្មភាពបទល្មើសព្រៃឈើនៅក្នុងតំបន់ខាងលើនេះ ព្រោះបើតាមការអះអាងរបស់ប្រជាសហគមន៍ ក្រុមជនល្មើសទំនងជាកំពុងលាក់ខ្លួននៅក្នុងព្រៃសហគមន៍ ឬ ព្រៃសម្បទានរបស់ក្រុមហ៊ុន៧មករានៅឡើយ៕