The Phnom Penh Post Search

Search form

Logo of Phnom Penh Post newspaper Phnom Penh Post - ឈ្មួញ​ដឹក​ឈើ​ប្រណីត​៥​នាក់ ត្រូវ​មន្ត្រី តុលាការ​ខេត្ត​កំពង់​ឆ្នាំង សម្រេច​ឃុំ​ខ្លួន




ឈ្មួញ​ដឹក​ឈើ​ប្រណីត​៥​នាក់ ត្រូវ​មន្ត្រី តុលាការ​ខេត្ត​កំពង់​ឆ្នាំង សម្រេច​ឃុំ​ខ្លួន

ឈ្មួញ​ដឹក​ឈើ​ប្រណីត​៥​នាក់ ត្រូវ​មន្ត្រី តុលាការ​ខេត្ត​កំពង់​ឆ្នាំង សម្រេច​ឃុំ​ខ្លួន

130226_10
ឈើនិងរ៉ឺម៉ក ដែលសមត្ថកិច្ចចម្រុះខេត្តកំពង់ឆ្នាំង ឃាត់ពីក្រុមឈ្មួញល្មើសច្បាប់ នប.ជក

កំពង់ឆ្នាំងៈ ជន​សង្ស័យ​៥​នាក់​ម្នាក់​ជា​ថៅកែ​ដែល​ដឹក​ឈើ​ប្រណីត​ខុស​ច្បាប់ រួច​ត្រូវ​សមត្ថកិច្ច​ចម្រុះ​ឃាត់​ខ្លួន នៅ​ផ្ទះ​សំណាក់​នៅ​ក្រុង​កំពង់ឆ្នាំង កាល​ពី​ថ្ងៃទី​២៤ ខែ​កុម្ភៈ ខាង​សាលា​ដំបូង​ខេត្ត​បាន​បញ្ជូន​ទៅ​ឃុំ​ខ្លួន​នៅ​ពន្ធនាគារ​ខេត្តហើយ។

លោក ជិន សុផាត នាយ​នគរបាល​សេដ្ឋកិច្ច​ខេត្ត​កំពង់ឆ្នាំង បាន​ឲ្យ​ដឹង​ថា អ្នក​ទាំង​៥​នាក់​ដែល​សមត្ថកិច្ច​ឃាត់​ខ្លួន​កាល​ពីថ្ងៃ​ទី២៤ ខែ​កុម្ភៈ បញ្ជូន​ទៅ​សាលា​ដំបូង​ខេត្ត​នោះ ត្រូវ​បាន​បញ្ជូន​បន្ត​ទៅ​ឃុំ​នៅ​ក្នុង​ពន្ធនាគារ​បណ្តោះ​អាសន្ន នៅ​ល្ងាច​ថ្ងៃ​ដដែល តាម​មាត្រា​៩៨ នៃ​ច្បាប់​ព្រៃឈើ។

លោករំឭក​ប្រាប់ថា ប្រតិបត្តិ​ការ​បង្ក្រាប ធ្វើ​ឡើង​បន្ទាប់​ពី​ភ្នាក់ងារ​សម្ងាត់​រាយការណ៍​មក​ពី​ខេត្ត​ពោធិ៍សាត់ ហើយ​និង​ការ​រាយការណ៍​ពី​ពលរដ្ឋ ប្រទះ​ឃើញ​ពួកគេ​នៅ​ផ្ទះ​សំណាក់ ក្នុង​ភូមិ​កណ្តាល​សង្កាត់-​ក្រុង​កំពង់​ឆ្នាំង។

លោកឲ្យដឹងថា បុរស​ទាំង៥​នាក់​មាន​ឈ្មោះ យឹក សុផាត​អាយុ​៣៥​ឆ្នាំ នៅ​ភ្នំពេញ ជា​ថៅកែ ញឹម សុវណ្ណ អាយុ​២១​ឆ្នាំ​ នៅ​ស្រុក​ព្រៃឈរ ខេត្ដ​កំពង់ចាម សូ ទី អាយុ​៣១​ឆ្នាំ នៅ​រាជធានី​ភ្នំពេញ ឈ្មោះ ម៉ៅ ឡាយ​ អាយុ​៣១​ឆ្នាំ និងម៉ី សុខ​នី អាយុ​២២​​ឆ្នាំ ពួក​គេ​ទាំង​ពីរ​នាក់​ នៅ​ស្រុក​ក្រគរ ខេត្ដ​ពោធិ៍សាត់។

ក្រុមជន​សង្ស័យ​ហាក់​មិន​បារម្ភ​នឹង​បទ​ល្មើស​ពួកគេ​ទេ​ដោយ​ចត​រ៉ឺម៉ក​ដឹក​ឈើ​ទុក​ចោល ហើយ​ត្រូវ​សមត្ថកិច្ច​ចូល​បង្ហើប​មើល​ច្បាស់​ទើប​ព័ទ្ធ​ចាប់​និង​រឹបអូស បាន​ប្រភេទ​ឈើ​ធ្នង់ បេង និង​នាង​នួន​ជាង​មួយ​ម៉ែត្រ​គុប។

លោកឲ្យដឹង​ទៀតថា ឈ្មួញ​ដឹក​ជញ្ជូន​ឈើ​តាម​រ៉ឺម៉ក តាំង​ពី​ខេត្ត​ពោធិ៍សាត់​មក​ដល់​ខេត្ត​កំពង់​ឆ្នាំង​ដោយ​បាន​ឆ្លង​កាត់ សមត្ថ​កិច្ច​ជា​ច្រើន​ដំណាក់ ដោយ​គ្មាន​សមត្ថកិច្ច​ណា​សង្ស័យ​ឡើយ បើ​មិន​យក​ដៃ​ទៅ​ស្ទាប​មើល​នោះ ព្រោះ ថាឈ្មួញ​គ្រប​កៅស៊ូ​តង់​ពណ៌ខៀវ​ជិត​ធ្វើ​មិន​ឲ្យ​មាន​ការ​ចាប់​អារម្មណ៍​ឡើយ។​

លោក ស៊ិន កុសល​ នាយ​ខណ្ឌ​រដ្ឋបាល​ព្រៃឈើ​ខេត្ត​ប្រាប់​ថា​ករណី​ឃាត់​ឈើ​និង​ម្ចាស់ រួមទាំង​កម្មករ​ទាំង​៥​នាក់​នោះ ខាង​មន្ត្រី​ជំនាញ​របស់​លោក​បាន​ចាត់​ការ​ទៅ​តាម​នីតិវិធី​ច្បាប់ ដោយ​មាន​ខាង​តុលា​ការ​ជា​អ្នក​សម្រេច​ផង​ដែរ។ រីឯ​វត្ថុតាង​ជា​ឈើ​ប្រណីត​និង​រ៉ឺម៉ក លោក​បាន​ទទួល​រក្សា​ទុក​ជា​ភ័ស្តុតាង ដើម្បី​ដោះស្រាយ​នៅ​ពេល​ក្រោយ។

លោក ពេញ វិបុល ព្រះរាជ​អាជ្ញា​ខេត្ត​កំពង់ឆ្នាំង ដែល​កាន់​សំណុំ​រឿង​នេះ​មិន​អាច​សុំ​បំភ្លឺ​បាន​ទេ​កាល​ពី​ម្សិល ដោយ​អ្នក​លើក​ទូរស័ព្ទ​លោក ថា​ច្រឡំ​លេខ៕

អត្ថបទគួរចាប់អារម្មណ៍