សៀមរាបៈ ញោមលោកនេនចំនួន ៦អង្គ នៅវត្តកំបោរអរ ឃុំខ្វាវ ស្រុកជីក្រែង ខេត្តសៀមរាប បានប្តឹងដូនជីដែលជាញោមរបស់លោកចៅអធិការវត្តស្តីទីពីបទវាយធ្វើបាបនេនៗ ពីសប្តាហ៍មុនឲ្យមានរបួសស្នាម។
លោក មុយ មាន ប្រធានភូមិកំបោរអរ ក្នុងឃុំខ្វាវ កាលពីម្សិលមិញបានប្រាប់ថា បានកោះហៅដូនជីវ័យ៦៥ឆ្នាំដែលត្រូវបានគេចោទប្រកាន់ពីបទវាយលោកនេន៦អង្គឲ្យរបួសនោះ មកសាកសួរ និងធ្វើកិច្ចសន្យារួចហើយ។
លោកថា៖«គាត់ កាចណាស់។ គាត់បានបង្កបញ្ហាជាច្រើននៅក្នុងវត្ត ហើយពុទ្ធបរិស័ទនិងព្រះសង្ឃចាស់ៗ ជាច្រើនអង្គបានចាកចេញពីវត្តទៅគង់នៅវត្តផ្សេង»។
លោក មុយ មាន ថ្លែងបន្តថាញោមៗលោកនេនទាំងនេះ មិនអាចឈរមើលដូនជីប្រើហិង្សាលើកូនៗបានទេ ហេតុនេះហើយបានជាពួកគាត់ប្តឹងឲ្យមេភូមិចាត់វិធានការជាមួយនឹងគាត់។
លោកបញ្ជាក់ថា៖«នេះមិនមែនជាលើកដំបូងទេដែលដូនជីរូបនេះ ប្រព្រឹត្តបែបនោះលើព្រះសង្ឃនៅក្នុងវត្ត។ គាត់ប្លែកណាស់។ គាត់វាយព្រះសង្ឃក្មេង ទោះជាលោកមិនបានធ្វើអ្វីខុសក៏ដោយ។ គាត់ ប្រើដំបង កៅស៊ូកង និងខ្សែភ្លើងវាយព្រះសង្ឃទាំងនោះ»។
លោក មុយ មាន បន្តថា៖«ខ្ញុំមិនអនុញ្ញាតឲ្យគាត់នៅក្នុងវត្តទៀតទេបើគាត់ មិនគោរពពាក្យសន្យាជាមួយនឹងខ្ញុំម្តងទៀត។ គាត់សន្យាជាមួយនឹងខ្ញុំកាលពីលើកមុនម្តងរួចមកហើយ ថាមិនធ្វើដូច្នោះទៀតទេប៉ុន្តែ កាលពីសប្តាហ៍មុន គាត់បានវាយសង្ឃក្មេងៗឲ្យរបួស។ ខ្ញុំនឹងសុំឲ្យគាត់ចាកចេញពីវត្តនេះ ប្រសិនបើគាត់ធ្វើខុសម្តងទៀត»។
លោក មុយ មាន បានបញ្ជាក់ថាញោមរបស់លោកនេនពីរអង្គ ក្នុងចំណោម៦អង្គ ដែលត្រូវរបួស បានសម្រេចចិត្តឲ្យកូនរបស់គាត់សឹក ដោយសារតែញោមទាំងនោះបានបញ្ជូនសង្ឃទាំងនោះទៅរៀននៅក្នុងវត្តមិនមែនឲ្យដូនជីវាយទេ។
លោកមេភូមិបន្តថា៖ «ដូនជីម្នាក់នេះមកពីខេត្តបាត់ដំបង មានសុទ្ធតែរូបសាក់លើរាងកាយដែលខ្ញុំ មិនដែលបានឃើញសោះ»។
ដូនជី រូបនេះ ឈ្មោះ នុប ចាន់ថន ហើយចៅអធិការស្តីទីវត្តកំបោរអរ ព្រះនាម នុប កុល មិនអាចទាក់ទងធ្វើអត្ថាធិប្បាយបានទេកាលពីថ្ងៃម្សិលមិញ៕ NR
