The Phnom Penh Post Search

Search form




Logo of Phnom Penh Post newspaper Phnom Penh Post - ដកហូត​អាជ្ញាប័ណ្ណ​ក្រុមហ៊ុន​កាយ​ដី​ភ្នំ និង​លក់​ថ្ម​ចំនួន​ ៤

ដកហូត​អាជ្ញាប័ណ្ណ​ក្រុមហ៊ុន​កាយ​ដី​ភ្នំ និង​លក់​ថ្ម​ចំនួន​ ៤

ដកហូត​អាជ្ញាប័ណ្ណ​ក្រុមហ៊ុន​កាយ​ដី​ភ្នំ និង​លក់​ថ្ម​ចំនួន​ ៤

ព្រះសីហនុៈ អាជ្ញាធរ​ខេត្ត​បាន​សម្រេច​ដកហូត​អាជ្ញាប័ណ្ណ​អាជីវកម្ម​របស់​ក្រុមហ៊ុន​ចំនួន ៤ ដែល​ទទួល​បាន​សិទ្ធិ​ធ្វើ​សកម្មភាព​កាយ​ដី​ភ្នំ និង​លក់​ថ្ម ខ្សាច់ ក្នុង​ទំហំ​ដី​ជាង ១០ ហិកតា​ក្នុង​សង្កាត់​លេខ​ ២ និង​លេខ ៣ ក្រុង​ខេត្ត​ព្រះសីហនុ​បន្ទាប់ពី​អាជីវកម្ម​នោះ​បាន​បង្ក​ផលប៉ះពាល់​ដល់​បរិស្ថាន​ខូច​លូ និង​សោភណភាព​ផ្លូវ​ថ្នល់។

ការ​សម្រេច​ដកហូត​អាជ្ញាប័ណ្ណ​បូម​ខ្សាច់ និង​កាយ​ដី​ភ្នំ​នេះ​ត្រូវ​បាន​ធ្វើ​ឡើង​បន្ទាប់ពី​គណៈកម្មការ​ខេត្ត​ព្រះសីហនុ មន្ទីរ​បរិស្ថាន​ខេត្ត និង​អាជ្ញាធរ​មូលដ្ឋាន​ដឹកនាំ​ដោយ​អភិបាលរង​ខេត្ត​ព្រះសីហនុ​កាលពី​ថ្ងៃ​ទី ២៥ ខែ​កញ្ញា ចុះ​ត្រួត​ពិនិត្យ​ការដ្ឋាន​របស់​ក្រុមហ៊ុន​ទាំង​នោះ​ដោយ​រកឃើញ​នូវ​កំហុស​បច្ចេកទេស​ការងារ​ខ្លះ​បាន​បង្ក​ផល​ប៉ះពាល់​ដល់​បរិស្ថាន។

លោក សុខ ផន អភិបាលរង​ខេត្ត​ព្រះសីហនុ​បាន​ឲ្យ​ដឹង​ថា​អាជ្ញាធរ​ខេត្ត​ធ្លាប់​បាន​កោះ​ហៅ​ក្រុមហ៊ុន​ទាំង​នោះ​មក​ប្រជុំ និង​ពន្យល់​ពី​ផលប៉ះពាល់​ជុំវិញ​អាជីវកម្ម​បូម​ខ្សាច់ និង​កាយ​ដី​ភ្នំ​នេះ​ម្តង​ហើយ​កាលពី​ថ្ងៃ​ទី ១៥ ខែ​កញ្ញា​បន្ទាប់ពី​ទទួល​បាន​បណ្តឹង​ពី​ប្រជាពលរដ្ឋ​តែ​ក្រោយ​មក​មាន​តែ​ក្រុមហ៊ុន​មួយ​ក្នុង​ចំណោម​បួន​នោះ​បាន​កែសម្រួល​បច្ចេកទេស​ការងារ​តាម​ស្តង់ដារ មិន​បង្ក​ផលប៉ះពាល់​ដល់​បរិស្ថាន។

លោក​ថា៖ «ក្រុមហ៊ុន​ទាំង​នោះ​មាន​អាជ្ញាប័ណ្ណ​មាន​សុពលភាព​ត្រឹមត្រូវ​ប៉ុន្តែ​កិច្ចការងារ​បច្ចេកទេស​របស់​ពួកគេ​មិន​បាន​ត្រឹមត្រូវ និង​បាន​បង្ក​នូវ​ផលប៉ះពាល់​ត្រង់​ថា​ការ​ជីក​កាយ​ដី ថ្ម​ និង​ខ្សាច់​ធ្វើ​ឲ្យ​ហូរ​ច្រោះ​តាម​លូ ស្ទះ​បំពង់​លូ ពេញ​ផ្លូវ​ធ្វើឲ្យ​ទឹក​លិច​ចូល​ផ្ទះ​ប្រជាពលរដ្ឋ​ចំណែក​ការ​ដឹក​ជញ្ជូន​វិញ​គឺ​ហៀរ​តាម​ដង​ផ្លូវ ខូច​ផ្លូវ និង​សោភណភាព​ផ្លូវ​ផង​ដែរ»។

យ៉ាង​ណា​ក៏ដោយ​លោក សុខ ផន បាន​អះអាង​ថា​ដើម្បី​បញ្ចៀស​នូវ​ការ​ច្រណែន​គ្នា​អាជ្ញាធរ​បាន​សម្រេច​ដកហូត​អាជ្ញាប័ណ្ណ​របស់​​ក្រុមហ៊ុន​ទាំង ៤ នេះ​តែ​ម្តង​ព្រោះ​មាន​ទីតាំង​ជាប់​គ្នា​ក្នុង​ទំហំ​ដី​ជាង ១០ ​ហិកតា​បើ​ទោះបី​ជា​ក្នុង​នោះ​មាន​ក្រុមហ៊ុន​មួយ​បាន​គោរព និង​ប្រតិបត្តិ​ការងារ​បាន​ល្អ​ក្តី។

លោក​បញ្ជាក់​ថា៖ «ក្រោយ​ដក​អាជ្ញាប័ណ្ណ​យើង​ក៏​បាន​បង្កើត​គណៈកម្មការ​​វាយតម្លៃ​​ពី​ផលប៉ះពាល់​លើ​បរិស្ថាន​លើ​ករណី​នេះ​ផង​ដែរ​ដើម្បី​​ធ្វើការ​រៀបចំ​នូវ​លក្ខខណ្ឌ និង​កិច្ចការងារ​បច្ចេកទេស​ជាថ្មី​ឲ្យ​ក្រុមហ៊ុន​ទាំង ៤ នេះ​អាច​ដាក់​ពាក្យ​ស្នើសុំ​អាជ្ញាប័ណ្ណ​ម្តង​ទៀត​»។

លោក យន់ មីន អភិបាល​ខេត្ត​ព្រះសីហនុ​ថ្មី​ដែល​ទើប​ចូល​កាន់​តំណែង​ក៏​បាន​ឲ្យ​ដឹង​ដែរ​ថា​ក្រោយពី​ការ​ផ្អាក​អាជីវកម្ម​របស់​ក្រុមហ៊ុន​ទាំងនេះ​សមត្ថកិច្ច​ក៏​បាន​ធ្វើការ​ណែនាំ និង​អប់រំ​ជាថ្មី​ពី​ផលប៉ះពាល់​ក្នុង​ការ​កាយ​ដី បូម​ខ្សាច់ មិន​ស្រប​តាម​ស្តង់ដារ​បច្ចេកទេស​តែ​មិន​មាន​ចំណាត់ការ​អ្វី​ធ្ងន់ធ្ងរ​នោះ​ទេ​ព្រោះ​ក្រុមហ៊ុន​ទាំង​នេះ​មាន​អាជ្ញាប័ណ្ណ​ស្រប​ច្បាប់។

លោក​ថ្លែង​ទៀត​ថា៖ «ក្រោយ​ការ​វាយតម្លៃ​លើក​នេះ​បើ​នៅ​តែ​កើត​មាន​រឿង​អ៊ីចឹង​ទៀត​គឺ​ក្រុមហ៊ុន​នឹង​ប្រឈម​នឹង​ការ​ផាក​ពិន័យ ឬ​ឈាន​ដល់​ការ​ប្រឈម​មុខ​ផ្លូវ​ច្បាប់​បើ​អនុវត្ត​ផ្ទុយ​ពី​ការ​ណែនាំ​របស់​មន្ត្រី​ជំនាញ»។

លោក​អភិបាល​ខេត្ត​ក៏​បាន​ធ្វើការ​អំពាវនាវ​ទៅ​ដល់​ក្រុមហ៊ុន​ទាំងអស់​ដែល​​កំពុង​ដំណើរការ​ធ្វើ​អាជីវកម្ម​កាយ​ដី បូម​ខ្សាច់​ ក្នុង​ខេត្ត​ទេសចរណ៍​ជាប់​មាត់​សមុទ្រ​មួយ​នេះ​ត្រូវ​ចូលរួម​ការពារ​អនាម័យ បរិស្ថាន ឲ្យ​បាន​ល្អ និង​ត្រូវ​​សហការ​ជាមួយ​អាជ្ញាធរ​ដើម្បី​ចៀសវាង​នូវ​បញ្ហា​នានា​ផង​ដែរ៕

អត្ថបទគួរចាប់អារម្មណ៍