.jpg)
ទិដ្ឋភាពដីបឹងនៅស្រុកស្អាងខេត្តកណ្ដាលដែលទើបដាក់ចូលជាសម្បត្តិរដ្ឋ ។ រូបថត Fresh News
កណ្ដាលៈ បឹងធម្មជាតិចំនួន ៤ នៅលើផ្ទៃដីជិត ៣០០ ហិកតា នៅស្រុកស្អាង ខេត្តកណ្ដាល ត្រូវបានដាក់បញ្ជូលជាសម្បត្តិរបស់រដ្ឋនិងបឹងមួយចំនួនទៀតកំពុងរៀបចំដាក់បញ្ចូលបន្ថែមបន្ទាប់ពីមានជនខិលខូចមួយចំនួនលួចចុះបោះបង្គោលក្នុងបឹងប៉ងកាន់កាប់ជាសម្បត្តិផ្ទាល់ខ្លួន។ នេះបើតាមលោក ម៉ៅ ភិរុណ អភិបាលខេត្ដកណ្ដាលប្រាប់ភ្នំពេញបុស្ដិ៍នៅថ្ងៃទី ២៩ ខែសីហានេះ។
លោក ម៉ៅ ភិរុណ បានថ្លែងថា នៅឆ្នាំនេះ លោកបានធ្វើកិច្ចការងារមួយចំនួនរួចហើយ ចំពោះការដាក់បញ្ចូលដីធ្លី ដែលជាសម្បត្ដិរបស់រដ្ឋដើម្បីទុកបម្រើដល់ផលប្រយោជន៍សាធារណៈពិសេសពលរដ្ឋដែលកំពុងរស់ក្នុងតំបន់នោះផ្ទាល់។
លោកបន្ដ៖«ដីបឹងនៅស្រុកស្អាងដែលទើបដាក់បញ្ចូលជាសម្បត្ដិរបស់រដ្ឋនេះគឺជាការសម្រេចចិត្ដរបស់ខ្ញុំហើយយើងនៅមានគម្រោងមួយចំនួនទៀតដែលកំពុងសិក្សានិងដាក់បញ្ចូលក្នុងបញ្ជីជាសម្បត្តិរបស់រដ្ឋបន្ថែមទៀតដើម្បីគ្រប់គ្រងសម្បត្ដិសាធារណៈរបស់រដ្ឋឲ្យគងវង្សកុំឲ្យមានការរំលោភបំពានយកដីសាធារណៈនេះពីសំណាក់ជនខិលខូចមួយចំនួន»។
លោក ញឹម វណ្ណឌិន អភិបាលស្រុកស្អាង បានឲ្យដឹងថា នៅថ្ងៃទី ២៨ ខែសីហា ឆ្នាំនេះ ដើម្បីអនុវត្តតាមការណែនាំពីលោកអភិបាលខេត្តកណ្តាលលោកបានចុះកំណត់បឹងមួយចំនួនដូចជា៖បឹងត្នោតមានចំនួន៨៣ហិកតាបឹងទឹកជោរជាង១១ហិកតា បឹងទទឹងថ្ងៃជាង៤១ហិកតា និងបឹងរានមានជាង១៣៦ហិកតា ដែលបានចុះបញ្ជីជាទ្រព្យសម្បត្តិរដ្ឋរួចហើយនិងកំពុងចុះបន្តដើម្បីទៅកំណត់បឹងមួយចំនួនទៀតផងដែរ។
លោកបានបញ្ជាក់ថា៖«កាលពីថ្ងៃទី២១ខែមិថុនាកន្លងមកនេះអាជ្ញាធរស្រុកបានចុះទៅដកបង្គោលដែលបានបោះក្នុង (បឹង ៥០០) មានចំនួនរហូតដល់ជាង ២៧០ បង្គោលដោយមានជនខិលខូចបានទន្ទ្រានកាន់កាប់ដីសាធារណៈរបស់រដ្ឋដោយត្រូវរក្សាដីបឹងទាំងនោះទុកជាសម្បត្តិសាធារណៈចំនួនប្រហែល៤០០ហិកតានិងធ្វើទៅដល់ដីនៅតំបន់អាងទឹកយុវជនប្រហែល ១០០ ហិកតាទៀតដែលជនមួយចំនួនបានបោះចូលធ្វើឲ្យអាជ្ញាធរឈឺក្បាល»។
បើតាមលោកអភិបាលស្រុកស្អាង«ករណីនេះធ្វើឲ្យអ្នករំលោភទាំងនោះមិនសប្បាយចិត្តរួចបានប្រើគ្រប់វិធីរិះគន់អាជ្ញាធរពាក់ព័ន្ធដែលបានអនុវត្កលើការងារនេះទាំងមិនសមហេតុផល»។
ដោយឡែកប្រជានេសាទនៅស្រុកស្អាងមានការសប្បាយចិត្តនិងសាទរចំពោះអាជ្ញាធរដែលបានយកចិត្តទុកដាក់ដល់ពួកគាត់ព្រោះបឹងរដ្ឋគឺជាអាយុជីវិតពួកគាត់ហើយប្រសិនបើបាត់បង់ទៅគឺជីវិតគ្រួសារគាត់ទាំងមូលត្រូវប្រឈមបញ្ហាជាច្រើន ដែលកូនៗអាចឈប់ពីការសិក្សាឬក៏ឈានទៅធ្វើជាពលករឆ្លងដែន។នេះបើតាមលោកអភិបាលស្រុកស្អាង។
បើតាមលោក ម៉ៅ ភិរុណ រដ្ឋបាលខេត្ដកណ្ដាលមិនត្រឹមតែបញ្ចូលបឹងទាំងនេះជាសម្បត្ដិរដ្ឋនោះទេ ប៉ុន្ដែលោកនឹងបន្ដដាក់បញ្ចូលបឹងធម្មជាតិ និងដីសាធារណៈជាច្រើនទៀតចូលជាសម្បតិរដ្ឋផងដែរ។
លោកថា៖«មកទល់ពេលនេះយើងបានចុះបញ្ជីដីធ្លីចូលជាសម្បតិ្ដរបស់រដ្ឋនេះមានចំនួនជា ១ ២០០ ហិកតា ហើយនៅទូទាំងខេត្ដកណ្ដាល ចំណែកស្រុកស្អាង យើងមិនត្រឹមតែបញ្ចូលជាង ៣០០ ហិកតានេះទេ យើងគ្រោងបញ្ចូលដីជាសម្បិតរបស់រដ្ឋសរុបជាង ១ ០០០ ហិកតា»៕
