.jpg)
លោក សាយ សំអាល់ ចូលរួមជាអធិបតីសម្ពោធដាក់ឱ្យប្រើប្រាស់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ។ រូប ក្រសួងបរិស្ថាន
សៀមរាបៈ ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ និងប្រព័ន្ធផ្ទុកថាមពលអាគុយនៅមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ខេត្តសៀមរាប ត្រូវបានសម្ពោធដាក់ឱ្យប្រើប្រាស់ ដើម្បីសម្រួលដំណើរការស្រាវជ្រាវអត្តសញ្ញាណ និងរក្សាពូជរុក្ខជាតិដែលជិតផុតពូជ។ ពិធីនេះរៀបចំឡើងដោយក្រសួងបរិស្ថាន និងកម្មវិធីអភិវឌ្ឍន៍អង្គការសហប្រជាជាតិប្រចាំកម្ពុជា (UNDP) កាលពីថ្ងៃទី ២៧ ខែមករា។
រដ្ឋមន្ត្រីក្រសួងបរិស្ថានលោក សាយ សំអាល់ ដែលចូលរួមជាអធិបតីក្នុងពិធីសម្ពោធនោះថ្លែងថា ស្ថានីយផលិតថាមពលអគ្គិសនីដើរដោយពន្លឺព្រះអាទិត្យនេះមានកម្លាំង ៣២ គីឡូវ៉ាត់ និងប្រព័ន្ធផ្ទុកថាមពល (អាគុយ) ៨៧ គីឡូវ៉ាត់ម៉ោង។
លោកបញ្ជាក់ថា នេះគឺជាមជ្ឈមណ្ឌលទី១ នៅកម្ពុជា។ ស្ថានីយផលិតថាមពលពីពន្លឺព្រះអាទិត្យកំពុងដើរតួនាទីយ៉ាងសំខាន់សម្រាប់ពង្រឹងការចូលរួមដល់មជ្ឈមណ្ឌលក្នុងការស្រាវជ្រាវ កំណត់អត្តសញ្ញាណ និងការរក្សាពូជកេសរកូលព្រៃ រុក្ខជាតិ និងសត្វក្នុងស្រុក។ ជាពិសេសប្រភេទរុក្ខជាតិដែលកំពុងរងការគំរាមកំហែងប្រភេទ កម្រ និងប្រភេទជិតផុតពូជ សំដៅធានាដល់និរន្តរភាពនៃធនធានជីវចម្រុះសម្រាប់ការអភិវឌ្ឍសេដ្ឋកិច្ចសង្គម និងវប្បធម៌កម្ពុជា។
លោករដ្ឋមន្ត្រីចាត់ទុកសមិទ្ធផលនេះជាការបោះជំហានថ្មីមួយបន្ថែមទៀតសម្រាប់ការរៀបចំហេដ្ឋារចនាសម្ព័ន្ធគាំទ្រ [ការស្រាវជ្រាវ] ដទៃទៀតនាពេលអនាគត សំដៅអភិវឌ្ឍមជ្ឈមណ្ឌលនេះឱ្យដើរតួនាទីជាមូលដ្ឋាននៃកិច្ចសហប្រតិបត្តិការ។ ការសិក្សាស្រាវជ្រាវលក្ខណៈវិទ្យាសាស្ត្រការផ្លាស់ប្តូរចំណេះដឹង និងបច្ចេកវិទ្យា ការលើកកម្ពស់ការយល់ដឹងអំពីសារប្រយោជន៍នៃធនធានជីវចម្រុះ និងប្រព័ន្ធអេកូឡូស៊ី និងការអភិវឌ្ឍដោយនិរន្តរភាព។
លោក សាយ សំអាល់ ថ្លែងថា៖ «មជ្ឈមណ្ឌលស្រាវជ្រាវយើងនេះនឹងរួមចំណែកធ្វើពិពិធកម្មសេដ្ឋកិច្ចមូលដ្ឋាន ជាពិសេសទេសចរណ៍ ផ្សារភ្ជាប់នឹងវប្បធម៌ធម្មជាតិ និងជួយបង្កើនជម្រើសមុខរបរ ប្រភព ចំណូលបន្ថែម និងលើកកម្ពស់ជីវភាពរបស់ប្រជាពលរដ្ឋក្នុងមូលដ្ឋាននេះបាន ១ កម្រិតបន្ថែមទៀត ស្របតាមគោលនយោបាយរបស់រាជរដ្ឋាភិបាលកម្ពុជា»។
លោក សាយ សំអាល់ ពិនិត្យបន្ទះសូឡានៅខេត្តសៀមរាប ថ្ងៃទី ២៧ មករា។ រូបក្រសួងបរិស្ថាន
លោក ង៉ាន់ ភិរុណ អភិបាលរងខេត្តសៀមរាបគាំទ្រឱ្យមានសមិទ្ធផលបែបនេះសម្រាប់ខេត្តសៀមរាបដែលជាខេត្តគោលដៅទេសចរណ៍វប្បធម៌ និងធម្មជាតិ។ ព្រោះការប្រើប្រាស់ថាមពលព្រះអាទិត្យ មិនមានផលប៉ះពាល់ដល់បរិស្ថានទេ ពោលគឺជាចំណុចចាប់ផ្ដើមធ្វើជាគំរូដល់រមណីយដ្ឋានដទៃទៀតនៅក្នុងខេត្តសៀមរាបក៏ដូចជាខេត្តដទៃទៀត ដែលមិនទាន់មានបណ្ដាញអគ្គិសនីជាតិ។
លោកបញ្ជាក់ថា៖ «មជ្ឈមណ្ឌល ស្រាវជ្រាវ បង្កើតឡើងដើម្បីធ្វើការសិក្សាស្រាវជ្រាវលើ [ការកំណត់] អត្តសញ្ញាណធ្វើសារពើភណ្ឌ និងកំណត់លក្ខណវិនិច្ឆ័យ និងមុខងារ ពិសេសនៃប្រភេទ [កេសរកូលព្រៃ] នីមួយៗតាមបែបវិទ្យាសាស្ត្រ»។
លោកថា មជ្ឈមណ្ឌលនេះបានធ្វើការអភិរក្ស សង្គ្រោះ បង្កាត់ បណ្តុះ បន្សុទ្ធពូជ និងស្តារ ប្រភេទកេសរកូលព្រៃដែលកំពុងរងការគំរាមកំហែង និងជិតផុតពូជពីព្រៃធម្មជាតិឡើងវិញ។ ជាពិសេសសម្រាប់រក្សាពូជកេសរកូលព្រៃ ការអប់រំផ្សព្វផ្សាយ ជាកន្លែងអប់រំ និងផ្សព្វផ្សាយស្តីពីប្រភេទ និងចំនួនកេសរកូលព្រៃនៅកម្ពុជា និងការកម្សាន្តដែលផ្តល់ទស្សនីយភាពកេសរកូលព្រៃធម្មជាតិ ទីកន្លែងលម្ហែកាយ ទស្សនាធម្មជាតិ និងកម្សាន្តនានា។
លោកស្រី Sonali Dayaratne តំណាងកម្មវិធីអភិវឌ្ឍន៍អង្គការសហប្រជាជាតិប្រចាំកម្ពុជា វាយតម្លៃខ្ពស់ចំពោះសមិទ្ធផលដែលជួយឱ្យបរិស្ថានស្អាត ការការពារ និងអភិរក្សធនធានជីវៈចម្រុះ និងការគាំទ្រចំពោះគោលជំហរកម្ពុជាក្នុងការឆ្លើយតបនឹងការប្រែប្រួលអាកាសធាតុ។
លោកស្រីថ្លែងថា៖ «ក្រុមការងារជំនាញអន្តរជាតិ និងនាយកដ្ឋានជីវចម្រុះនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព បាននិងកំពុងបន្តប្រមូលប្រភេទកេសរកូលព្រៃពីតំបន់ភ្នំគូលែន និងតំបន់ដទៃទៀត ដើម្បីកត់ត្រា និងកំណត់អត្តសញ្ញាណបន្ថែមទៀត»។
លោក តាំង ម៉េងអៀង ប្រធាននាយកដ្ឋានសេដ្ឋកិច្ចបៃតងនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាពឱ្យដឹងថា គំនិតផ្តួចផ្តើមក្នុងការដំឡើងប្រព័ន្ធថាមពលសូឡាសម្រាប់ក្រសួងបរិស្ថាន ទទួលបានការគាំទ្រទាំងផ្នែកហិរញ្ញវត្ថុ និងបច្ចេកទេសពីកម្មវិធីអភិវឌ្ឍន៍សហប្រជាជាតិ រាជរដ្ឋាភិបាលកម្ពុជា និងដៃគូអភិវឌ្ឍន៍មួយចំនួន។
លោកថ្លែងថា៖ «ប្រព័ន្ធស្ថានីយផលិតថាមពលអគ្គិសនីដើរដោយ ថាមពលពន្លឺព្រះអាទិត្យនេះអាចផលិតថាមពលបានក្នុងរង្វង់ ១៥០ គីឡូវ៉ាត់ម៉ោងក្នុង ១ ថ្ងៃ។ ប្រព័ន្ធអគ្គិសនីនេះបានផ្តល់ប្រយោជន៍ដល់ការប្រើប្រាស់ម៉ាស៊ីនត្រជាក់ ឬម៉ាស៊ីនបូមទឹកបានរៀងរាល់ថ្ងៃ»៕
វីដេអូ៖
