The Phnom Penh Post Search

Search form




Logo of Phnom Penh Post newspaper Phnom Penh Post - ដាក់​គុក​ឃាតក​«សិប្ប​និម្មិត»​២០​ឆ្នាំ




ដាក់​គុក​ឃាតក​«សិប្ប​និម្មិត»​២០​ឆ្នាំ

ដាក់​គុក​ឃាតក​«សិប្ប​និម្មិត»​២០​ឆ្នាំ

121228_01
លោក ប៊ន សំណាង និង លោក សុក សំអឿន ត្រូវបានប៉ូលិសអូសទាញទាំងដៃជាប់ខ្នោះនៅសាលាឧទ្ធរណ៍ពីថ្ងៃម្សិលមិញ ម៉ៃ វីរៈ

ភ្នំពេញៈ បុរស​វ័យ​កណ្តាល​ពីរ​នាក់ បាន​ស្រែក​ទ្រហោ​យំ នៅ​ក្នុង​បន្ទប់​សវនា​ការ សាលា​ឧទ្ធរណ៍ កាល​ពី​ព្រឹក​ម្សិល​មិញ ភ្លាមៗ បន្ទាប់​ពី​ចៅក្រម បាន​ប្រកាស​សាល​ដីកា យ៉ាង​ប្រញាប់​ប្រញាល់ បញ្ជា​ឲ្យ​កម្លាំង​នគរបាល ដែល​ត្រៀម​ចាំ​រួច​ជា​ស្រេច ចាប់​ឃុំ​ខ្លួន​បុរស​ទាំង​ពីរ​នាក់​នេះ​ឡើង​វិញ ចំពោះ​បទ​ចោទ​ប្រកាន់ សម្លាប់​មេដឹកនាំ​សហជីព​ដ៏​ល្បី​ឈ្មោះ ដែល​អង្គការ​សង្គម​ស៊ីវិល និង​សាធារណ​ជន​ជា​ច្រើន បាន​ធ្វើ​ការ​រិះគន់​យ៉ាង​ក្តៅ​គគុក​តាំង​ពី​យូរ​មក​ហើយ។

ភ្លាមៗ ក្រោយ​ពី​ប្រកាស​សាល​ដីកា កម្លាំង​នគរបាល ប្រមាណ​ជិត​១០​នាក់ ដែល​មាន​ពាក់​ស័កិ្ត ចាប់​ពី​ស័ក្តិ​ពីរ រហូត​ដល់​ផ្កាយ​មួយ បាន​ស្ទុះ​ទៅ​សង្គ្រប់​ចាប់​ក្រៀក​បុរស​ទាំង​ពីរ​នាក់។ ជន​ជាប់​ចោទ ប៊ន សំណាង បាន​ស្រែក​ទ្រហោ​យំ​ថា​ «ខ្ញុំ​មិន​គួរ​ជាប់​ទោស​ទេ។ ទោស ២០​ឆ្នាំ​នេះ គួរ​តែ​តុលាការ (ជួន ស៊ុន​ឡេង) ទៅ​វិញ​ទេ»។ ទាំង​សុក សំអឿន និង​ប៊ន សំណាង ស្រែក​ទ្រហោ​យំ​ទាំង​ក្រាញ​ននៀល ខណៈ​ដែល​កម្លាំង​នគរបាល បាន​ចាប់​ក្រៀក​យក​ទៅ​ផ្តិត​មេ​ដៃ លើ​ឯកសារ ហើយ​បាន​វាយ​ខ្នោះ រួច​នាំ​យក​ទៅ​រុញ​បញ្ចូល​ក្នុង​រថយន្ត ដែល​ចត​រង់​ចាំ​ជា​ស្រេច​នោះ​ថា៖ «សូម​ឲ្យ​ព្រះ​មហាក្សត្រ និង​សម្តេច​នាយក​រដ្ឋ​មន្រ្តី​ហ៊ុន សែន​ជួយ អន្តរា​គមន៍​ដល់​ពួក​យើង​ខ្ញុំ​ផង តុលាការ​អយុត្តិធម៌​ខ្លាំង​ណាស់»។

សាលដីកា​បាន​បង្គាប់​ឲ្យ​ជន​ជាប់​ចោទ ប៊ន សំណាង និង​សុក សំអឿន ជាប់​ពន្ធនាគារ ក្នុង​ម្នាក់ៗ ២០ ឆ្នាំ​និង​ពិន័យ​ជា​ប្រាក់​ចំនួន ៤០ លាន​រៀល ហើយ​រួម​គ្នា​សង​ទៅ​គ្រួសារ​សព លោក​ជា វិជ្ជា អតីត​មេដឹកនាំ​សហជីព​សេរី​កម្មករ​នៃ​ព្រះ​រាជាណា​ចក្រ​កម្ពុជា ដែល​ត្រូវ​បាន​បាញ់​សម្លាប់។

លោកជួន ស៊ុនឡេង អនុប្រធាន សាលា​ឧទ្ធរណ៍ និង​ជា​ប្រធាន​ក្រុម​ប្រឹក្សា​ជំនុំ​ជម្រះ បាន​អាន​សាល​ដីកា នៅ​ចំពោះ​មុខ​ប៊ន សំណាង និង​សុក សំអឿន ទាំង​រដិប​រដុប​ថា ក្រោយ​ពី​បាន​ពិនិត្យ​ពិចារណា លើ​សំណុំ​រឿង​ក្តី​របស់​ជន​ជាប់​ចោទ​រួច​មក​សាលា​ឧទ្ធរណ៍​អាច​ធ្វើ​ការ​ជំនុំ​ជម្រះ​ជា​ថ្មី​ដោយ​សារ​តែ​សំណុំ​រឿង​ចាស់ មិន​មាន​លក្ខណៈ​គ្រប់​គ្រាន់។ លោក​បន្ត​ថា៖​«យោង​តាម​ការ​ធ្វើ​កោសល្យ​វិច្ច័យ​សំបក​កន្ទុស ដែល​បាន​បាញ់​នោះ គឺ​ត្រូវ​នឹង​កាំភ្លើង ដែល​ជន​សង្ស័យ លាក់​ទុក​មែន។ រឿង​ថា ត្រូវ​ក្រុម​នគរបាល វាយ​បង្ខំ​ឲ្យ​ឆ្លើយ ពេល​សួរ​ចម្លើយ​នោះ ខាង​មន្រ្តី​នគរបាល ក៏​បាន​បដិសេធ​ថា មិន​ដូច​ការ​ឆ្លើយ​អះ​អាង​របស់​ប៊ន សំណាង​ដែរ វា​មិន​ស៊ី​សង្វាក់​គ្នា»។

លោក​ចៅក្រម ស៊ុន​ឡេង បន្ត​ទៀត​ថា៖​«ចម្លើយ​របស់​លោក​ស្រី វត្ថា អតីត​ប្រធាន​ពន្ធនាគារ PJ ថា មិន​មាន​ការ​ធ្វើ​ទារុណ​កម្ម​លើ​ប៊ន សំណាង ដូច​ការ​អះ​អាង​របស់​គាត់​ទេ»។

បន្ទាប់​ពី​អាន​សាល​ដីកា​ចប់ ក្រុម​មេធាវី​របស់​ជន​ជាប់​ចោទ​ទាំង ២ នាក់ បាន​ច្រាន​ចោល ចំពោះ​ការ​សម្រេច​នេះ ដោយ​លើក​ឡើង​ថា លោក​ចៅក្រម​ជំនុំ​ជម្រះ បាន​ដើរ​តួ​ជា​ព្រះ​រាជ​អាជ្ញា​ផង ជា​ចៅក្រម​ជំនុំ​ជម្រះ​ផង ដោយ​មិន​បាន​បង្កើត​សេចក្តី​សន្និដ្ឋាន​ជា​ថ្មី​ទេ ហើយ​ចោទ​កូន​ក្តី​របស់​ពួកគេ​ទាំង ២ នាក់​តែ​ម្តង។

Content image - Phnom Penh Post

មេធាវី​ជន​ជាប់​ចោទ បាន​ប្រកាស​ប្តឹង​សារ​ទុក្ខ ទៅ​តុលាការ​កំពូល​បន្ត​ទៀត គឺ​ប្រឆាំង​ចំពោះ​ការ​សម្រេច​ចាប់​ឃុំ​ខ្លួន​នេះ ដែល​ផ្ទុយ​គ្នា នឹង​សាល​ដីកា របស់​សាលា​កំពូល ដែល​ឲ្យ​ជន​ទាំង​ ២ នាក់​រួច​ខ្លួន​បណ្តោះ​អាសន្ន។

លោកហុង គឹមសួន មេធាវី​របស់​លោក សុខ សំអឿន មាន​ការ​ខក​ចិត្ត​យ៉ាង​ខ្លាំង។ លោក​បញ្ជាក់​ថា៖​«លោក​ព្រះ​រាជ​អាជ្ញា​នៅ​តែ​ទទួល​ស្គាល់​ដែរ​ថា សំណុំ​រឿង​នេះ នៅ​មាន​ការ​ខ្វះ​ចន្លោះ មិន​ទាន់​គ្រប់​នីតិវិធី។ អ៊ីចឹង​ខាង​ចៅ​ក្រម​ជំនុំ​ជម្រះ គាត់​សម្រេច​ខ្លួនឯង ដោយ​ដើរ​តួ​ជា​ព្រះ​រាជ​អាជ្ញា​ផង ជា​ចៅក្រម​ជំនុំ​ជម្រះ​ផង។ លោក​ព្រះ​រាជ​អាជ្ញា មិន​បាន​បង្កើត​សេចក្តី​សន្និដ្ឋាន​ជា​ថ្មី​ទេ ខ្ញុំ​ថា គ្មាន​យុត្តិធ៌ម​ទេ​ក្នុង​ការ​សម្រេច​នេះ»។

ភរិយា លោក សុក សំអឿន គឺ​អ្នក​ស្រី នាង សុខេន អាយុ ៣០ ឆ្នាំ ដែល​មាន​បី​កូន​តូច អាយុ ២ ឆ្នាំ​នៅ​ក្នុង​ដៃ នៅ​សាលា​ឧទ្ធរណ៍​កាល​ពី​ម្សិល​មិញ បាន​និយាយ​ជាមួយ​អ្នក​សារព័ត៌មាន ទាំង​ទឹក​ភ្នែក​រលីង​រលោង និង​យំ​ក្តុក​ក្តួល​ថា ប្តី​របស់​អ្នក​ស្រី​ជា​មនុស្ស​ស្លូត​បូត ទៀង​ត្រង់​ណាស់​មិន​ដែល​ធ្វើ​បាប​ប្រពន្ធ កូន និង​អ្នក​ជិត​ខាង​ទេ។

Content image - Phnom Penh Post

អ្នកស្រី បាន​រំឭក​ពាក្យ​សម្តី​ប្តី​របស់​អ្នក​ស្រី មុន​មក​ស្តាប់​សាល​ដីកា កាល​ពី​ម្សិល​មិញ​ថា៖​«ប្តី​ខ្ញុំ​មុន​មក​ទី​នេះ​ប្រាប់​ខ្ញុំ ដោយ​គ្មាន​ក្តី​បារម្ភ​ថា គាត់​មក​លើក​នេះ សាលា​ឧទ្ធរណ៍ នឹង​លើក​លែង​ការ​ចោទ​ប្រកាន់​គាត់ ឲ្យ​មាន​សេរីភាព​វិញ​ហើយ។ តែ​ពេល​នេះ​ប្តី​ខ្ញុំ​បែរ​ជា​ត្រូវ​ចាប់​ឃុំ​ទៅ​វិញ។ ខ្ញុំ​មាន​កូន​តូច ហើយ​ធ្វើ​ស្រែ អត់​ពី​គាត់​ទៅ​ខ្ញុំ​វេទនា​ណាស់»។

លោក ប៊ន សំណាង និង​សុក សំអឿន ត្រូវ​បាន​តុលាការ​កំពូល ដោះ​លែង ឲ្យ​នៅ​ក្រៅ​ឃុំ​បណ្តោះ​អាសន្ន កាល​ពី​ចុង​ខែ​ធ្នូ ឆ្នាំ​២០០៨ និង​បង្គាប់​ឲ្យ​តុលាការ​ឧទ្ធរណ៍ ធ្វើ​ការ​ស៊ើប​អង្កេត សំណុំ​រឿង​សម្លាប់​លោក​ជា វិជ្ជា សាជាថ្មី។

លោក ជា វិជ្ជា ដែល​ជា​មេដឹកនាំ​សហជីព​ដ៏​ល្បី​ល្បាញ ត្រូវ​ខ្មាន់​កាំភ្លើង​មិន​ស្គាល់​អត្តសញ្ញាណ​ពីរ​នាក់ ចូល​ទៅ​បាញ់​សម្លាប់ ទាំង​ព្រឹក នៅ​ក្នុង​ចំណោម​មនុស្ស​ច្រើន​កុះករ ខណៈ​លោក​កំពុង​អង្គុយ​អាន​កាសែត នៅ​មុខ​តូប​លក់​កាសែត​មួយ នៅ​ជាប់​របង ខាង​លិច​វត្ត​លង្កា ក្នុង​រាជធានី​ភ្នំពេញ កាល​ពី​ព្រឹក​ថ្ងៃ ២២ មករា ឆ្នាំ ២០០៤។ ការ​បាញ់​សម្លាប់​នេះ បាន​កើត​ឡើង ក្រោយ​ពី​លោក​ជា វិជ្ជា បាន​ទទួល​រង​ការ​គំរាម​សម្លាប់​តាម​ទូរស័ព្ទ ដែល​លោក​ជា វិជ្ជា កាល​ណោះ បាន​ដាក់​ពាក្យ​ប្តឹង​ទៅ​ក្រសួង​មហា​ផ្ទៃ ប្រឆាំង​និង​អ្នក​គំរាម​សម្លាប់​រូប​លោក​នោះ។

លោកជា វិជ្ជា ក៏​ធ្លាប់​បាន​ថ្លែង​ជា​សាធារណៈ នៅ​មុន​ថ្ងៃ​លោក​ត្រូវ​គេ​បាញ់​សម្លាប់​នោះ​ថា តាម​ប្រភព​ព័ត៌មាន​ដែល​លោក​ទទួល​បាន គឺ​អ្នក​ដែល​គំរាម​សម្លាប់​រូប​លោក​នោះ ជា​មន្ត្រី​ជាន់​ខ្ពស់​ក្រសួង​មហា​ផ្ទៃ។

នៅ​ក្រោយ​ហេតុ​ការណ៍​លោក ជា វិជ្ជា ត្រូវ​គេ​បាញ់​សម្លាប់ ប៊ន សំណាង និង​សុក សំអឿន ត្រូវ​បាន​ចាប់​ខ្លួន ដោយ​នគរបាល​ក្រសួង​មហា​ផ្ទៃ។ នៅ​ពេល​ក្រោយ​មក សាលា​ដំបូង​រាជធានី​ភ្នំពេញ បាន​សម្រេច​ផ្តន្ទា​ទោស ឲ្យ​ជាប់​ពន្ធនាគារ​ចំនួន ២០ ឆ្នាំ។ ក្រោយ​ពី​ជាប់​ពន្ធនាគារ​ប្រមាណ​ជា ៥ ឆ្នាំ ដែល​មាន​រយៈពេល ១៧៧៩ ថ្ងៃ ជា​ពេល​វេលា ដែល​ក្រុម​អង្គការ​សង្គម​ស៊ីវិល រួម​ទាំង​ក្រុម​គ្រួសារ​លោក​ជា វិជ្ជា បាន​ធ្វើ​ការ​រិះ​គន់​យ៉ាង​ខ្លាំង​ឥត​ឈប់​ឈរ ចំពោះ​ការ​ផ្តន្ទា​ទោស​បុរស​ទាំង​ពីរ​នាក់​នេះ ជា​អ្វី​ដែល​ពួកគេ បាន​ហៅ​ថា​ ជា​ឃាតក «សិប្ប​និម្មិត» នោះ នៅ​ទី​បំផុត តុលាការ​កំពូល​បាន​សម្រេច​ធ្វើ​ការ​ដោះ​លែង​បណ្តោះ​អាសន្ន​កាល​ពី​ឆ្នាំ ២០០៨ ដោយ​បញ្ជា​ឲ្យ​សាលា​ឧទ្ធរណ៍​ធ្វើ​ការ​ស៊ើប​អង្កេត​ជា​ថ្មី។

លោក អំ សំអាត មន្រ្តី​ស៊ើប​អង្កេត​ជាន់​ខ្ពស់​អង្គការ​សិទ្ធិ​មនុស្ស​លីកាដូ ដែល​ចុះ​ទៅ​ឃ្លាំ​មើល​ផ្ទាល់​នៅ​ក្នុង​សវនាការ​កាល​ពី ម្សិល​មិញ មាន​ការ​ភ្ញាក់​ផ្អើល​យ៉ាង​ខ្លាំង ចំពោះ​ការ​សម្រេច​របស់​តុលាការ។

លោក​បញ្ជាក់​ថា៖​«យើង​ចាត់​ទុក​ថា ប៊ន សំណាង និង​សុក សំអឿន ជា​ឃាតក​សិប្ប​និម្មិត​ដដែល ពី​ព្រោះ​ពួក​គាត់​មិន​មែន​ជា​អ្នក​ប្រព្រឹត្ត ដូច​ការ​ចោទ​ប្រកាន់​ទេ»។ លោកអំ សំអាត​រំឭក​ថា ដោយ​សារ​តែ​មាន​ចំណុច​ចន្លោះ​ប្រហោង​នេះ​ហើយ ទើប​តុលាការ​កំពូល សម្រេច​ដោះ​លែង​ឲ្យ​ជន​ជាប់​ចោទ​ទាំង ២ នាក់ នៅ​ក្រៅ​ឃុំ​បណ្តោះ​អាសន្ន និង​បាន​ចង្អុល​បង្ហាញ ដោយ​ចាត់​របៀប សុំ​ឲ្យ​សាលា​ឧទ្ធរណ៍​ធ្វើ​ការ​ស៊ើប​អង្កេត​ទៅ​លើ​ចំណុច​ចន្លោះ​ប្រហោង​ឡើង​វិញ។

លោក ជា មុនី ប្រធាន​សហជីព​សេរី​កម្មករ ដែល​ជា​ប្អូន​ប្រុស​លោក​ជា វិជ្ជា ថ្លែង​ថា ឃាតក​និង​អ្នក​នៅ​ពី​ក្រោយ​ឃាតក ដែល​បាន​បាញ់​សម្លាប់​បង​ប្រុស​របស់​លោក នៅ​តែ​មាន​សេរី​ភាព​នៅ​ឡើយ ហើយ​លោក​បាន​សម្តែង​ការ​អាណិត​អាសូរ​យ៉ាង​ខ្លាំង​ចំពោះ​ជន​ជាប់​ចោទ​ទាំង ២ នាក់ ដែល​លោក​ធ្លាប់​តែ​ហៅថា ជា​ឃាតក សិប្បនិម្មិត។

លោកជា មុនី បាន​បញ្ជាក់​ថា៖​«សម្រាប់​ខ្ញុំ មាន​ការ​ក្តុក​ក្តួល​ណាស់ ព្រោះ​មិន​បាន​ទទួល​យុត្តិធម៌ ចំពោះ​ការ​កាត់​ក្តី​របស់​សាលា​ឧទ្ធរណ៍​នេះ​ទេ។ លោក សុខ សំអឿន និង​លោក​ប៊ន សំណាង មិន​មាន​ភស្តុ​តាង​ណា​ដាក់​បន្ទុក​គាត់​ទេ»។

អ្នកស្រីវ៉ា សុធី ម្ចាស់​តូប​លក់​កាសែត ទី​ដែល​ខ្មាន់​កាំភ្លើង បាន​ដើរ​ចូល​ទៅ​បាញ់​សម្លាប់​លោក​ជា វិជ្ជា ហើយ​អ្នក​ស្រី​បាន​មើល​ឃើញ​ដោយ​ផ្ទាល់​ភ្នែក​នោះ បាន​និយាយ​ជា​បន្ត​បន្ទាប់​ថា ប៊ន សំណាង និងសុខ សំអឿន មិន​មែន​ជា​ឃាតក ដែល​បាន​បាញ់​សម្លាប់​លោក​ជា វិជ្ជា​នោះ​ទេ។ អ្នក​ស្រី វ៉ា សុធី ទទួល​បាន​សិទ្ធិ​ជ្រក​កោន​ខាង​នយោបាយ នៅ​សហរដ្ឋ​អាមេរិក​ចាប់​តាំង​ពី​ក្រោយ​ថ្ងៃ​បាញ់​ប្រហារ​ដែល​កើត​ឡើង​នៅ​ចំពោះ​មុខ​អ្នក​ស្រី​នោះ​មក៕

អត្ថបទគួរចាប់អារម្មណ៍