.jpg)
ព្រះវិហារ/រតនគិរីៈ កុមារាម្នាក់នៅខេត្តព្រះវិហារ បានរងរបួសភ្នែកម្ខាង និងដាច់ម្រាមដៃចំនួន ៣ ដោយសារដុតគីបក្បាលគ្រាប់ ៨០ មិល្លីម៉ែត្រ ខណៈនៅខេត្តរតនគិរី បុរសម្នាក់ បានរងរបួសដាច់កដៃស្ដាំ ក្រោយពីបំផ្ទុះគ្រាប់បែកកែច្នៃដោយខ្លួនឯង ដើម្បីចាប់ត្រីខុសបច្ចេកទេស។
លោក ស៊ន់ ទិន នាយប៉ុស្តិ៍ជាំក្សាន្ត ស្រុកជាំក្សាន្ត ប្រាប់ភ្នំពេញប៉ុស្តិ៍ថា កាលពីរសៀលថ្ងៃទី ២៦ ខែមករា ឆ្នាំ ២០១៩ មានករណីកុមារាម្នាក់ឈ្មោះ ឆយ វិឆៃ អាយុ ៩ ឆ្នាំ បានយកគីបក្បាលគ្រាប់ ៨០ មិល្លីម៉ែត្រ ១ គ្រាប់ ដែលរើសបាននៅតាមផ្លូវពេលចេញពីសាលារៀន មកដុតលេងនៅក្រោមផ្ទះជីដូន ស្ថិតនៅភូមិ-ឃុំជាំក្សាន្ត បណ្ដាលឲ្យផ្ទុះត្រូវរបួសភ្នែកខាងស្ដាំ និង ដាច់ម្រាមដៃស្ដាំចំនួន ៣ ព្រមទាំងរងរបួសជើងនិងពោះផងដែរ។
លោកថ្លែងថា៖ «យោងតាមស្ថានភាពនៃមុខរបួស កុមាររងគ្រោះ អាចនឹងពិការភ្នែកខាងស្ដាំ។ នៅពេលនេះ កំពុងស្ថិតក្រោមការពិនិត្យព្យាបាលពីក្រុមគ្រូពេទ្យជំនាញនៃមន្ទីរពេទ្យបង្អែកខេត្តសៀមរាប»។
កាលពីម្សិលមិញ ឪពុករបស់កុមាររងគ្រោះ គឺ លោក ឆន ប៊ុនឆយ អាយុ ៣៦ ឆ្នាំ បានប្រាប់ភ្នំពេញប៉ុស្តិ៍ថា កូនរបស់លោក បានដឹងខ្លួនពីសន្លប់ហើយ និងកំពុងរង់ចាំការវះកាត់ភ្នែក បន្ទាន់។
លោកថា៖ «នៅថ្ងៃ [ចន្ទ] នេះ ក្រុមគ្រូពេទ្យ នឹងធ្វើការវះកាត់ភ្នែករបស់វា ប៉ុន្តែគ្រូពេទ្យបានប្រាប់ឲ្យដឹងជាមុនថា កែវភ្នែកខាងស្ដាំរបស់វា អាចនឹងត្រូវខូច [ពិការ] ព្រោះមានកម្ទេចតូចៗមុតជាប់នឹងកែវភ្នែក។ ចំណែកមុខរបួសលើពោះ និងជើង គឺស្រាលទេ លើកលែងតែដៃស្ដាំដាច់អស់ម្រាមចំនួន ៣»។
នៅរសៀលថ្ងៃទី ២៦ ខែមករា ឆ្នាំ ២០១៩ នោះដែរ នៅឯខេត្តរតនគិរី បុរសជនជាតិភាគតិចចារ៉ាយម្នាក់ បានរងរបួសដោយដាច់កដៃខាងស្ដាំ និងរងរបួសក្បាលនិងទ្រូង បន្ទាប់ពីគាត់បានបំផ្ទុះគ្រាប់បែកកែច្នៃមួយគ្រាប់ដើម្បីចាប់ត្រីខុសបច្ចេកទេស។
លោក ស៊ូយ សំណាង អធិការស្រុកអូរយ៉ាដាវ ឲ្យដឹងថា បុរសជនជាតិចារ៉ាយ ដែលរងគ្រោះឈ្មោះ ពូយ យុច អាយុ ៤៦ ឆ្នាំ រស់នៅភូមិដរធំ ឃុំយ៉ាទង់ ស្រុកអូរយ៉ាដាវ។ មុនពេលកើតហេតុជនរងគ្រោះ បានយកគ្រាប់ផាវមូលៗ ប៉ុនមេជើងចំនួន ៦ គ្រាប់ មកកែច្នៃធ្វើជាគ្រាប់បែកដៃ សម្រាប់បោកចាប់ត្រី ដោយគាត់បានយករំសេវផាវទាំងនោះ ដាក់ចូលទៅក្នុងកំប៉ុងត្រីខរូបស្រី ៣ នាក់ រួចហើយយកទៅបោកចាប់ត្រីនៅចំណុចអូរតាង។
លោកថា៖ «ក្រោយពីឮសំឡេងផ្ទុះក៏មានការភ្ញាក់ផ្អើលដល់អ្នកភូមិ និងរាយការណ៍មកសមត្ថកិច្ចយើងឲ្យជួយអន្តរាគមន៍ ដោយប្រាប់ថា លោក យុច បានរងរបួសដាច់កដៃស្ដាំ និងរងរបួសក្បាលនិងទ្រូង ដោយសារការបំផ្ទុះគ្រាប់បែកកែច្នៃដោយខ្លួនឯង។ ក្រុមសមត្ថកិច្ចមូលដ្ឋានបានចុះអន្តរាគមន៍ នាំជនរងគ្រោះទៅព្យាបាលនៅមន្ទីរពេទ្យវៀតណាមមួយ នៅក្នុងស្រុកយ៉ាឡៃ»។
បើតាម លោក សំណាង អាជ្ញាធរជារឿយៗ តែងចុះផ្សព្វផ្សាយអប់រំអំពីគ្រោះថ្នាក់នៃគ្រាប់យុទ្ធភណ្ឌមិនទាន់ផ្ទុះរួមទាំងផាវដែលជាគ្រឿងរំសេវជាតិផ្ទុះផងដែរ ដោយហាមប្រាមពលរដ្ឋមិនឲ្យប៉ះពាល់ឬយកមកកែច្នៃអ្វីនោះទេ។ ប៉ុន្តែអ្នកភូមិមួយចំនួននៅតែលួចកែច្នៃដោយខុសច្បាប់នូវអាវុធជាតិផ្ទុះទាំងនេះ៕
