ភ្នំពេញៈ គិតចាប់តាំងពីដើមឆ្នាំ ២០២១ មកដល់ត្រឹមថ្ងៃទី ២០ ខែឧសភា ជំងឺគ្រុនឈាមបានកើតឡើងជិត ៦០០ ករណីក្នុងក្របខ័ណ្ឌទូទាំងប្រទេសក្នុងនោះបានបណ្តាលឱ្យស្លាប់ចំនួន ១ ករណី ប៉ុន្តែមន្ត្រីសុខាភិបាលអំពាវនាវឱ្យមានការប្រុងប្រយ័ត្នខ្ពស់ បើទោះជាដើមរដូវវស្សាឆ្នាំនេះ ជំងឺគ្រុនឈាម មិនផ្ទុះខ្លាំងយ៉ាងណាក៏ដោយ។
យោងតាមតួលេខរបស់កម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនៃក្រសួងសុខាភិបាល បានឱ្យដឹងនៅថ្ងៃទី ២០ ខែឧសភាឆ្នាំ ២០២១ ថា៖ «តួលេខអ្នកកើតជំងឺគ្រុនឈាម ទូទាំងប្រទេសនៅដើមឆ្នាំ ២០២១ នេះគឺមានចំនួន ៥៨១ ករណីក្នុងនោះ ស្លាប់ ១ ករណី»។
កម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្របានឱ្យដឹងទៀតថា ក្នុងចំណោមអ្នកកើតជំងឺនេះ គឺភាគច្រើននៅក្នុងខេត្តកណ្តាល និងរាជធានីភ្នំពេញ ដោយសារតែតំបន់នេះមានអត្រាប្រជាជនរស់នៅច្រើន ដែលងាយឱ្យមានការឆ្លងរីករាលដាល ព្រោះភ្នាក់ងារចម្លង (មូសខ្លា) ងាយស្រួលក្នុងការចម្លងពីមនុស្សម្នាក់ទៅមនុស្សម្នាក់។
លោក លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាលបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ឧសភា ថាជំងឺគ្រុនឈាមនឹងចាប់ផ្តើមកើតមានច្រើននៅក្នុងរដូវវស្សា ហើយបើទោះជានៅដើមរដូវវស្សានៃឆ្នាំនេះ មិនសូវមានករណីជំងឺគ្រុនឈាមកើតឡើងច្រើនក៏ប្រជាពលរដ្ឋត្រូវតែមានការប្រុងប្រយ័ត្នដែរ។
ការស្នើឱ្យពលរដ្ឋមានការប្រុងប្រយ័ត្នបែបនេះ ដោយលោក សំអាង ថា ក្នុងអំឡុងពេលឆ្លងរីករាលដាលជំងឺកូវីដ ១៩ នេះ ពលរដ្ឋអាចនឹងប្រឈមគ្រោះថ្នាក់ បើពួកគេមានជំងឺទាំង ២ មុខនេះស្ថិតក្នុងពេលតែមួយ ដែលងាយនឹងបង្កផលប៉ះពាល់ដល់អាយុជីវិត។
លោកបានបញ្ជាក់ថា៖ «សូមបងប្អូន បន្តការរស់នៅប្រកបដោយអនាម័យ បរិស្ថានស្អាត ហើយបើមានក្តៅខ្លួន ដោយសង្ស័យថា មានជំងឺគ្រុនឈាម គឺត្រូវប្រញាប់យកអ្នកជំងឺទៅមន្ទីរពេទ្យ។ យើងភ័យនឹងកូវីដ គឺយើងភ័យហើយ ប៉ុន្តែយើងក៏ត្រូវការពារ កុំឱ្យកើតគ្រុនឈាមដែរ ព្រោះតាមការសិក្សានៅប្រទេសមួយចំនួនគឺមានការកើតកូវីដហើយ កើតគ្រុនឈាម គឺអត្រាគ្រោះថ្នាក់ខ្ពស់»។
បើទោះជាតាមការព្យាករ នៅឆ្នាំ ២០២១ នេះមិនមានការផ្ទុះជំងឺគ្រុនឈាមក្នុងលក្ខណៈទ្រង់ទ្រាយធំក៏ដោយ ប៉ុន្តែលោក លាង ឫទ្ធា បានឱ្យដឹងថា ក្រសួងសុខាភិបាលនឹងចែកថ្នាំអាល់ប៊ែត ចំនួន ១៦០ តោននៅទូទាំងប្រទេស ដើម្បីសម្លាប់មូស ដែលជាភ្នាក់ងារចម្លងជំងឺគ្រុនឈាម ខណៈដែលក្រសួងសុខាភិបាលក៏បានត្រៀមរួចជាស្រេចជាមួយនឹងសេរ៉ូសម្រាប់ធ្វើការព្យាបាលជំងឺគ្រុនឈាមនៅទូទាំងប្រទេសប្រមាណ ៦ ម៉ឺនប្លោក។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែឧសភាថា រាប់ចាប់ពីសប្តាហ៍ទី១ ដល់សប្តាហ៍ទី ១៦ នៃដើមឆ្នាំ ២០២១ នេះ គឺខេត្តកណ្តាលមានអ្នកឆ្លងជំងឺគ្រុនឈាមប្រមាណជិត ៦០ ករណីប៉ុណ្ណោះ។
លោកបានបន្ថែមថា ចំនួននៃអ្នកកើតជំងឺនេះគឺមានការធ្លាក់ចុះ បើប្រៀបធៀបទៅនឹងរយៈពេលដូចគ្នា កាលពីឆ្នាំ ២០២០ ខណៈដែលពលរដ្ឋមានការយល់ដឹងកាន់តែខ្ពស់ ចំពោះការការពារខ្លួនពីជំងឺគ្រុនឈាមនេះ។
លោក គួយ ប៊ុនធឿន បញ្ជាក់ថា៖ «ឆ្នាំនេះ គឺតិចជាងឆ្នាំទៅ យើងអាចគ្រប់គ្រងស្ថានការណ៍បានក្នុងពេលនេះ តាមរយៈការចុះអប់រំផ្សព្វផ្សាយ និងការចែកចាយថ្នាំអាល់ប៊ែតជូនប្រជាពលរដ្ឋ។ យើងបន្តធ្វើបន្តទៅទៀត ទោះជាតួលេខអ្នកឈឺមានចំនួនតិចក៏ដោយ»។
កាលពីឆ្នាំ ២០១៩ កម្ពុជាមានអ្នកស្លាប់ ដោយសារជំងឺគ្រុនឈាមចំនួន ៤៨ នាក់ ក្នុងចំណោមអ្នកជំងឺគ្រុនឈាមចំនួន ៦៨ ៥៩៧ ករណី ដែលជាចំនួនកើនឡើងប្រហែល ៣ ដង បើប្រៀបធៀបទៅនឹងឆ្នាំ ២០១៨។
បើតាមលោក លាង ឫទ្ធា ការកើនឡើងនៃជំងឺគ្រុនឈាមនៅក្នុងឆ្នាំ ២០១៩ ក៏ជាការកើនឡើងនៅក្នុងរយៈពេល ៥ ឆ្នាំម្តង នៃជំងឺគ្រុនឈាម ដែលតែងតែមានការផ្ទុះនៃជំងឺនេះខ្លាំង៕