ភ្នំពេញៈ ដើមឈើប្រភេទធ្នង់ប្រមាណជិត ២ ពាន់ដើម នឹងត្រូវមន្ត្រីនៃមន្ទីរសាធារណការ និងដឹកជញ្ជូនរាជធានីភ្នំពេញយកទៅដាំនៅតាមសងខាងផ្លូវលេខ ២១៧ ចាប់ពីផ្លូវចូលមជ្ឈមណ្ឌលជើងឯករហូតដល់រង្វង់មូលកួរស្រូវ ក្នុងខណ្ឌដង្កោនាថ្ងៃទី ៣ ខែកញ្ញា នេះ ដើម្បីធ្វើឲ្យរាជធានីភ្នំពេញមានរុក្ខជាតិបៃតង និងលើកកម្ពស់បរិស្ថានឲ្យល្អប្រសើរថែមទៀត។
លោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញឲ្យដឹងពីម្សិលមិញថា ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញលោកអភិបាលបានសម្រេចឲ្យអង្គភាពលោកជាអ្នកដឹកនាំការដាំដើមឈើធ្នង់ជិត ២ ពាន់ដើមនេះដោយសហការជាមួយមន្ត្រីនៃមន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ និងអាជ្ញាធរមូលដ្ឋានខណ្ឌដង្កោ។
លោកបន្តថា ឈើដែលត្រូវដាំនោះមិនមែនកូនឈើតូចៗនោះទេ ពោលគឺជាប្រភេទឈើធ្នង់ធំៗដែលមានទំហំប៉ុនកំភួនជើងដែលមានប្រមាណពី ១ ៥០០ ដើមទៅ ២ ០០០ ដើម។ ឈើទាំងនោះនឹងត្រូវដាំអមសងខាងផ្លូវ ចន្លោះពីគ្នា ប្រមាណ ៨ ម៉ែត្រតាមបណ្ដោយផ្លូវ ២១៧ ក្នុងខណ្ឌដង្កោ។ ចាប់ផ្ដើមដាំពីផ្លូវចូលមជ្ឈមណ្ឌលជើងឯក រហូតដល់រង្វង់មូលកួរស្រូវជាប់ព្រំប្រទល់ខេត្តកណ្ដាលលើចម្ងាយផ្លូវប្រវែង ៧ គីឡូម៉ែត្រសងខាង (ស្មើ ១៤ គីឡូម៉ែត្រ)។
លោកបញ្ជាក់ថា៖ «យើងគ្រោងចាប់ផ្ដើមដាំដើមឈើធ្នង់នៅថ្ងៃទី ៣ ខែកញ្ញា នេះ ដែលមានមន្ត្រីនៃមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងអាជ្ញាធរមូលដ្ឋានខណ្ឌដង្កោ។ អាជ្ញាធរក៏អំពាវនាវឲ្យមានការចូលរួមពីប្រជាពលរដ្ឋដែរ។ ជាពិសេសគឺយើងអំពាវនាវឲ្យពលរដ្ឋជួយថែរក្សាដើមឈើដែលដាំនៅខាងមុខផ្ទះរបស់ពួកគាត់ផង។ ព្រោះដើមឈើខ្លះត្រូវដាំនៅក្បែរៗផ្ទះគាត់ដែរ»។
លោកស្រី គឹម ញឹប អភិបាលខណ្ឌដង្កោពីម្សិលមិញបដិសេធធ្វើអត្ថាធិប្បាយ ដោយថា កំពុងជាប់រវល់ប្រជុំ។ ប៉ុន្ដែគេហទំព័រក្រសួងព័ត៌មានបានដកស្រង់សម្តីលោកស្រីកាលពីថ្ងៃទី ១ កញ្ញា ឲ្យដឹងថាលោកស្រីគាំទ្រពេញទំហឹងចំពោះគម្រោងដាំដើមឈើប្រណីតៗនៅតាមបណ្តោយផ្លូវ ២១៧ នេះ។ លោកស្រីអះអាងថា ការដាំដើមឈើនេះអាចការពារបាននូវការរំលោភចំណីផ្លូវពីសំណាក់ប្រជាពលរដ្ឋមួយចំនួន និងលើកកម្ពស់បរិស្ថានក្នុងខណ្ឌដង្កោ រាជធានីភ្នំពេញផងដែរ។
លោក សៀង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញពីម្សិលមិញមិនទាន់អាចទាក់ទងសុំការបញ្ជាក់បន្ថែមជុំវិញការដាំដើមឈើធ្នង់នេះទេ។
ក្នុងកិច្ចប្រជុំជាមួយអាជ្ញាធរ និងមន្ត្រីជំនាញពាក់ព័ន្ធនៅសាលារាជធានីភ្នំពេញកាលពីថ្ងៃទី ២៨ សីហា លោក ឃួង ស្រេង ក៏បានណែនាំដល់អាជ្ញាធរខណ្ឌដង្កោ មន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងមន្ទីរសាធារណការ និងដឹកជញ្ជូនរាជធានីភ្នំពេញត្រូវចុះណែនាំធ្វើយ៉ាងណាឲ្យប្រជាពលរដ្ឋដែលរស់នៅតាមបណ្តោយផ្លូវ ២១៧ នេះចូលរួមសហការ និងថែទាំដើមឈើដែលបានដាំនៅខាងមុខផ្ទះរបស់ពួកគាត់ឲ្យបានល្អ។
លោកបន្តថា មន្ត្រីពាក់ព័ន្ធទាំងអស់ត្រូវតែសិក្សាឲ្យបានច្បាស់មុនដាំដើមឈើទាំងនេះដោយត្រូវគិតគូរឲ្យបានរួចរាល់អំពីទំហំនៃគម្រោងពង្រីកផ្លូវខាងលើ និងគិតគូរពីការដាក់ប្រព័ន្ធលូឲ្យហើយស្រេច។ ចៀសវាងមានបញ្ហានៅថ្ងៃក្រោយដែលអាចឈានដល់ការកាប់ដើមឈើចោលវិញ គឺពិតជាគួរឲ្យស្ដាយ។
កាលពីឆ្នាំ ២០១៩ រដ្ឋបាលរាជធានីភ្នំពេញបានដាំដើមឈើប្រណីតៗនៅតាមបណ្តោយផ្លូវ ៦០ ម៉ែត្រ (មហាវិថីសម្ដេចតេជោ ហ៊ុន សែន) ក្នុងខណ្ឌមានជ័យ និងខណ្ឌដង្កោបានចំនួន ១៥ ០០០ ដើម។ នៅតាមដងផ្លូវសាធារណៈក្នុងមូលដ្ឋានខណ្ឌទួលគោកបានចំនួន ៣០០ ដើម នៅក្នុងមូលដ្ឋានខណ្ឌកំបូល បានដាំរួចមានចំនួន ៥០០ ដើម និងនៅគល់ស្ពានជ្រោយចង្វារត្រើយខាងលិចក្នុងសង្កាត់ស្រះចក ខណ្ឌដូនពេញមានចំនួន ៣០០ ដើម។ ដើមឈើដែលបានដាំតាំងពីមុនក្នុងរាជធានី-ភ្នំពេញមានសរុបប្រមាណជាង ៥ ម៉ឺនដើម៕