សៀមរាបៈ អាជ្ញាធរជាតិអប្សរានឹងបន្តយុទ្ធនាការដាំ និងចែកចាយដើមឈើ ចំនួន ១១ ម៉ឺនដើម ក្នុងតំបន់ឧទ្យានជាតិអង្គរសម្រាប់ឆ្នាំនេះដែលនឹងចាប់ផ្តើមក្នុងរដូវវស្សាខាងមុខ ដើម្បីបង្កើនគម្របព្រៃឈើក្នុងរមណីយដ្ឋានអង្គរឲ្យបានកាន់តែច្រើនបន្ថែមទៀតដោយកាលពីឆ្នាំ ២០១៩ ដាំដើមឈើបានជាង ៧ ម៉ឺនដើម។ នេះបើតាមមន្ត្រីនាំពាក្យអាជ្ញាធរជាតិអប្សរាបញ្ជាក់កាលពីថ្ងៃទី ៣ ឧសភា។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្តិ៍ថា យុទ្ធនាការដាំ និងចែកចាយដើមឈើចំនួន ១១ ម៉ឺនដើមនៅក្នុងតំបន់ឧទ្យានជាតិអង្គរសម្រាប់ឆ្នាំ ២០២០ នេះនឹងយកកូនឈើពីស្ថានីយបណ្ដុះកូនឈើចំនួន ៤ ទីតាំង។
ទី១ គឺស្ថានីយបណ្ដុះកូនឈើ ៨ ហិកតាដែលបណ្ដុះកូនឈើប្រណីត ៤ ប្រភេទមានដើមបេង គ្រញូង ច្រេះ និងធ្នង់។ ទី២ ស្ថានីយបណ្ដុះកូនឈើប្រាសាទតាកែវដែលបណ្ដុះ ប្រភេទកូនឈើលេខ ១ លេខ ២ លេខ ៣ និងក្រៅលំដាប់ថ្នាក់។ ទី៣ ស្ថានីយបណ្ដុះកូនឈើមណ្ឌល ៣ ដែលបណ្ដុះប្រភេទឈើលម្អ និងប្រភេទឈើព្រៃហូបផ្លែ និងទី៤ ស្ថានីយបាឡុង បណ្តុះ ថែទាំ និងផ្សាំកូនឈើបន្តវេនគ្រប់ប្រភេទ។
លោកថ្លែងថា៖ «ជាទូទៅយើងបណ្ដុះកូនឈើគ្រប់ប្រភេទរយៈពេល ១ ឆ្នាំទើបយើងយកទៅដាំ។ ក្នុងឆ្នាំ ២០២០ នេះគឺយើងនឹងបន្តយុទ្ធនាការដាំកូនឈើ ១១ ម៉ឺនដើមនេះឲ្យអស់តែម្ដង។ ឥឡូវនៅពេលភ្ញៀវទេសចរអញ្ជើញមកលេងរមណីយដ្ឋានអង្គរគឺបានឃើញដើមឈើខៀវស្រងាត់តែម្ដង។ ក្នុងរដូវប្រាំងនេះក្រុមការងារយើងបានជម្នះខិតខំស្រោចទឹក ដើម្បីឲ្យដើមឈើអាចរស់បានល្អ»។
អ្នកនាំពាក្យរូបនេះលើកឡើងថា យុទ្ធសាស្ដ្រនៃការដាំដើមឈើនេះ ព្រោះដើមឈើគឺជាផ្នែកមួយនៃតម្លៃសកលសម្រាប់បេតិកភណ្ឌអង្គរ។ បើសិនជាមិនមានព្រៃឈើក៏អាចបាត់បង់នូវតម្លៃជាបេតិកភណ្ឌនៃរមណីយដ្ឋានអង្គរដែរ។
លោកថា៖ «ព្រៃឈើដើរតួនាទីសំខាន់ណាស់ក្នុងការប្រមូលទឹក និងការអភិរក្ស ដើម្បីផ្គត់ផ្គង់ដល់ជីវភាពរស់នៅរបស់មនុស្ស។ ដើមឈើអាចជួយបន្ថយនូវល្បឿននៃខ្យល់កាត់បន្ថយការសឹករេចរឹលនៃថ្មប្រាសាទផងដែរ។ ដើមឈើគឺជាប្រភពនៃការទាក់ទាញទឹក ព្រោះទឹកគឺជាចំណុចយ៉ាងសំខាន់ក្នុងការថែរក្សាលំនឹងនៃប្រាសាទផងដែរ»។
លោកបន្ថែមថា បច្ចុប្បន្នក្រុមការងារនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរាកំពុងមមាញឹកបណ្ដុះ និងថែទាំកូនឈើទាំងនោះត្រៀមសម្រាប់ដាំនារដូវវស្សាខាងមុខនេះ។
លោក ឡី គឹមស៊ី មន្ត្រីបច្ចេកទេសនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន និងជាអ្នកទទួលបន្ទុកការងារបណ្ដុះកូនឈើ និងដាំឈើនៃអាជ្ញាធរជាតិអប្សរាបានថ្លែងដែរថា ស្ថានីយបណ្ដុះកូនឈើទាំង ៤ របស់អាជ្ញាធរជាតិអប្សរាកំពុងមមាញឹកខ្លាំងក្នុងការបណ្ដុះកូនឈើចម្រុះសម្រាប់ត្រៀមដាំក្នុងឆ្នាំនេះ។ លោកបន្តថា កូនឈើសរុបមានចំនួន ១១ ម៉ឺនដើម ត្រៀមដាំ និងចែកចាយក្នុងខែវស្សាខាងមុខនេះមានទាំងប្រភេទដើមឈើប្រណីត ដើមឈើលម្អ និងប្រភេទដើមឈើព្រៃហូបផ្លែផងដែរ។
លោកថ្លែងថា៖ «ប្រសិនបើស្ថានការណ៍ជំងឺកូវីដ ១៩ ល្អប្រសើរឡើងវិញនោះ នឹងមានការរៀបចំកម្មវិធីធំៗដែលចូលរួមពីមហាជនខាងក្រៅក្នុងការចូលរួមយុទ្ធនាការដាំដើមឈើ ១១ ម៉ឺនដើមនេះ។ ប៉ុន្ដែប្រសិនបើស្ថានការណ៍ដូចសព្វថ្ងៃនេះ អាជ្ញាធរជាតិអប្សរានឹងរៀបចំដាំកូនឈើជាលក្ខណៈផ្ទៃក្នុងទៅតាមគោលដៅដែលបានគ្រោងទុកតែម្ដង»៕