.jpg)
ស្នាមមេដៃរបស់ដើមបណ្តឹង។
ភ្នំពេញៈ ដើមបណ្តឹងប្រមាណ ៩០០ នាក់បានចូលរួមនៅក្នុងបណ្តឹងប្រឆាំងនឹងក្រុមហ៊ុនវិនិយោគមួយឈ្មោះ Empire Big Capital ដែលត្រូវបានគេជឿថា បានបោកប្រាក់ប្រជាពលរដ្ឋកម្ពុជារាប់ពាន់នាក់ដែលមានទឹកប្រាក់រហូតដល់ ៤០០ លានដុល្លារហើយបណ្តឹងច្រើនទៀតនឹងចូលរួមនៅក្នុងបណ្តឹងប្រឆាំងនឹងក្រុមហ៊ុននេះនាសប្តាហ៍ខាងមុខ។
គិតមកត្រឹមថ្ងៃពុធសប្តាហ៍មុន ប្រជាពលរដ្ឋយ៉ាងហោចណាស់ ៩១ នាក់ក្នុងខេត្តបន្ទាយមានជ័យបានដាក់បណ្តឹងប្រឆាំងនឹងក្រុមហ៊ុននេះដែលមានមូលដ្ឋាននៅទីក្រុងហុងកុង។ នេះបើតាមស្នងការនគរបាលខេត្តបន្ទាយមានជ័យលោក អាត់ ខែម។
លោក ខែម បានថ្លែងបន្តថា៖ «ខ្ញុំជឿថាមានមនុស្សច្រើនជាង ១០០ នាក់នៅក្នុងខេត្តនេះដែលជាជនរងគ្រោះពីការបោកប្រាស់របស់ក្រុមហ៊ុននេះ»។
ក្រុមហ៊ុន EBC បានសន្យាផ្តល់នូវការប្រាក់ចំនួន ១០ ភាគរយនៃប្រាក់វិនិយោគអប្បបរមា ២០០០ ដុល្លារហើយបានធ្វើឲ្យប្រជាពលរដ្ឋកម្ពុជារាប់ពាន់នាក់បានចាញ់បោក។
លោក លីវ សុវណ្ណា ដែលជាមេធាវីរបស់ជនរងគ្រោះបានថ្លែងថា ម្នាក់ៗបានបាត់បង់ប្រាក់យ៉ាងហោចណាស់ ១០០០ ដុល្លារនៅក្នុងគម្រោង Ponzi ខណៈដើមបណ្តឹងម្នាក់បានបាត់បង់ប្រាក់រហូតដល់ ១៥០ ០០០ ដុល្លារ។ លោកបន្តថា៖ «ដោយសារប្រជាពលរដ្ឋមើលឃើញថាពួកគេទទួលបានប្រាក់ស្រួលៗ ពួកគេបានខ្ចីប្រាក់ពីធនាគារ និងចងការគេ។ គ្មាននរណាម្នាក់គេចផុតពីគម្រោងបោកប្រាស់នេះទេ»។
លោក សុវណ្ណា បានថ្លែងថាក្រុមរបស់លោក មានគ្នា ៥ នាក់បានប្រមូលបណ្តឹង និងភ័ស្តុតាងរួចហើយពីខេត្តចំនួន ១០ ក្នុងប្រទេសកម្ពុជា។
ដោយសង្ឃឹមថានឹងដាក់បណ្តឹងនេះនៅត្រឹមពាក់កណ្តាលខែមករាក្រុមនេះនឹងចុះទៅខេត្តត្បូងឃ្មុំ កំពង់ចាម សៀមរាប កំពង់ធំ និងឧត្តរមានជ័យនាសប្តាហ៍ក្រោយ។
ខណៈមានការចាប់ខ្លួនមនុស្សថ្នាក់ទាបចំនួន ២ នាក់រួមមានប្រធានរដ្ឋបាល និងប្រធានគណនេយ្យអ្នកដែលដើរតួសំខាន់នៅក្នុងផែនការបោកប្រាស់នេះរួមមាន សៀន តាន់ ប្រធានក្រុមហ៊ុន EBC និង Chi Gosaly នៅក្រុមហ៊ុន Asian Investment Fund និង ហួត សុវណ្ណ និង ឡុង សម្បត្តិ នៅសមាគមអ្នកប្រឹក្សាយោបល់វិនិយោគមិនទាន់ត្រូវបានចាប់ខ្លួននៅឡើយទេ។
លោក សុវណ្ណា បានថ្លែងថា៖ «ពួកគេបានគេចចេញពីប្រទេស។ នគរបាលដឹងថាពួកគេនៅកន្លែងណាឥឡូវនេះ។ ឥឡូវនេះនគរបាលកំពុងស្នើសុំជំនួយពីនគរបាលអន្តរជាតិ»។
លោក ឌី វិជ្ជា ប្រធាននាយកដ្ឋានសន្តិសុខកណ្តាលនៃក្រសួងមហាផ្ទៃ និងអ្នកនាំពាក្យក្រសួងលោក ខៀវ សុភ័គ មិនអាចទាក់ទងសុំអត្ថាធិប្បាយបានទេពីម្សិលមិញ៕ PS
