The Phnom Penh Post Search

Search form




Logo of Phnom Penh Post newspaper Phnom Penh Post - ដើម​បណ្តឹង​រដ្ឋប្បវេណី​និង​មេធាវី​ពិភាក្សា​គ្នា​ពី​ការ​វិវត្ត​នៃ​សំណុំ​រឿង ០០២/០១-០២

ដើម​បណ្តឹង​រដ្ឋប្បវេណី​និង​មេធាវី​ពិភាក្សា​គ្នា​ពី​ការ​វិវត្ត​នៃ​សំណុំ​រឿង ០០២/០១-០២

ពលរដ្ឋ​រង​គ្រោះ​ក្នុង​របប​ប្រល័យ​ពូជ​សាសន៍​មក​ទស្សនកិច្ច​សាលា​ក្តី​ខ្មែរ​ក្រហម​កន្លង​មក។
ពលរដ្ឋ​រង​គ្រោះ​ក្នុង​របប​ប្រល័យ​ពូជ​សាសន៍​មក​ទស្សនកិច្ច​សាលា​ក្តី​ខ្មែរ​ក្រហម​កន្លង​មក។ រូបថត អ.វ.ត.ក

ដើម​បណ្តឹង​រដ្ឋប្បវេណី​និង​មេធាវី​ពិភាក្សា​គ្នា​ពី​ការ​វិវត្ត​នៃ​សំណុំ​រឿង ០០២/០១-០២

ភ្នំពេញៈ ដើម​បណ្តឹង​រដ្ឋប្បវេណី ២២០ រូប​នៃ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា (អវតក) និង​សហ​មេធាវី​ជាង ១០ រូប​កាល​ពី​ថ្ងៃ​ចន្ទ​បាន​ជួប​ពិភាក្សា​គ្នា​អំពី​លទ្ធផល​និង​ដំណើរ​ការ​វិវត្ត​សាល​ក្រម​សំណុំ​រឿង ០០២/០១ បញ្ហា​ផ្សេងៗ និង​គម្រោង​សំណង​សម្រាប់​បណ្តឹង​រដ្ឋប្បវេណី​ក្នុង​សំណុំ​រឿង ០០២/០២ គួប​ផ្សំ​និង​វិធាន​ការ​នានា មិន​ពាក់​ព័ន្ធ​ទៅ​នឹង​បច្ចេកទេស​តុលាការ។

ថ្លែង​បើក​កិច្ច​ប្រជុំ​នេះ កាល​ពី​ម្សិល​មិញ ប្រធាន​ស្តីទី​នៃ​ការិយាល័យ​រដ្ឋបាល​របស់ អ.វ.ត.ក លោក ក្រាញ់ តូនី បាន​ថ្លែង​ថា វេទិកា​ជួប​ប្រជុំ​គ្នា​នេះ​អាច​ឲ្យ​ជន​រង​គ្រោះ​បង្ហាញ​នូវ​កង្វល់​និង​សាក​សួរ​ពាក់​ព័ន្ធ​នឹង​ការ​វិវត្ត​នៃ​នីតិវិធី​តុលាការ ការ​កាត់​ទោស​ជន​ជាប់​ចោទ និង​គម្រោង​សំណង​ជាដើម។ លោក​បន្ត​ថា៖ «ជា​ធម្មតា​ការ​ខូច​ខាត ការ​ខាត​បង់​និង​ការ​ឈឺ​ចាប់ បណ្តាល​មក​ពី​ឧក្រិដ្ឋកម្ម​ធំៗ​និង​វិនាស​កម្ម​ដែល​កើត​ឡើង​ក្នុង​សម័យ​ខ្មែរ​ក្រហម មិន​អាច​សង​ឬ​ជួសជុល​ឲ្យ​ដូច​ដើម​ទាំង​ស្រុង​ទេ ប៉ុន្តែ សំណង​មាន​លក្ខណៈ​ជា​ផ្លូវ​ចិត្ត​និង​សមូហភាព​សាលា​ក្តី​ខ្មែរ អាច​នឹង​ជួយ​ប៉ះ​ប៉ូវ​និង​កែកុន​នូវ​ផល​វិបាក​មួយ​ចំនួន»។

គម្រោង​សំណង​ចំនួន ១១ ក្នុង​គម្រោង​ទាំង ១៣ បាន​ទទួល​ស្គាល់​ក្នុង​សាល​ក្រម​របស់​អង្គ​ជំនុំ​ជម្រះ​សាលា​ដំបូង អ.វ.ត.ក កាល​ពី​ថ្ងៃ ទី៧ ខែ​សីហា។ គម្រោង​សំណង​ទាំង​នោះ មាន​គោល​បំណង​សម្រាប់​ការ​អប់រំ​ការ​បង្កើត​ឲ្យ​មាន​ការ​ចង​ចាំ ការ​ស្តារ​នីតិសម្បទា​ជន​រង​គ្រោះ និង​ការ​ចូល​រួម​ទប់​ស្កាត់​កុំ​ឲ្យ​មាន​របប​ឃោរឃៅ​នេះ​កើត​មាន​ជា​ថ្មី​ម្តង​ទៀត។

លោក ពេជ អង្គ សហ​មេធាវី​នាំ​មុខ​នៃ​ដើម​បណ្តឹង​រដ្ឋប្បវេណី​លើក​ឡើង​ថា គម្រោង​សំណង​ចំនួន ២ ពាក់​ព័ន្ធ​នឹង​ការ​ទាមទារ​សាង​សង់​ស្តូប​សាធារណៈ តាម​បណ្តា​រាជធានី ខេត្ត និង​សង់​ស្តូប​រំឭក​ដល់​ជន​រង​គ្រោះ​ក្នុង​របប​នេះ​សម្រាប់​ជន​កម្ពុជា​នៅ ប្រទេស​បារាំង ត្រូវ​អង្គ​ជំនុំ​ជម្រះ​មិន​ទទួល​ស្គាល់​ទេ ក្រោម​ហេតុ​ផល​ពីរ​គឺ «គ្មាន​ថវិកា​និង​គ្មាន​បែប​បទ​គ្រប់​គ្រាន់»។

សម្រាប់​សំណុំ​រឿង ០០២ ដំណាក់​កាល ទី២ ដែល​អង្គ​ជំនុំ​ជម្រះ​សាលា​ដំបូង គ្រោង​នឹង​បើក​សវនាការ​លើ​អង្គ​សេចក្តី​នៅ​ថ្ងៃ ទី១៧ ខែ​តុលា ខាង​មុខ​នេះ អ្នក​ស្រី ប៊ុន ម៉ារី អាយុ ៦៥​ឆ្នាំ ជា​ជន​រង​គ្រោះ​មក​ពី ខេត្ត​កំពង់ស្ពឺ បាន​ស្នើ​ឲ្យ​ដាក់​បញ្ចូល​ការ​ទាមទារ​សំណង​សមូហភាព មាន​ការ​សង់​ស្តូប​ជា​រូបភាព ឬ​អក្សរ ពាក់​ព័ន្ធ​នឹង​ជន​ល្មើស យ៉ាង​ហោច​មួយ​នៅ​តាម​បណ្តា​ខេត្ត-រាជធានី។ អ្នក​ស្រី​ថា៖ «ខ្ញុំ ចង់​បាន​រូប​តំណាង​ជន​ឧក្រិដ្ឋ​ទាំង​អស់ មិន​មែន​យក​មក​បូជា គោរព​អី​ទេ គ្រាន់​តែ​ចង់​បាន​ស្តូប​ទុក​បង្ហាញ​កូន​ចៅ​ជំនាន់​ក្រោយ។ អ្នក​ដែល​ខ្ញុំ​គោរព​គឺ មេធាវី​វិញ​ទេ ដែល​បាន​ស្វែង​រក​យុត្តិធម៌​ដល់​ពួក​ខ្ញុំ»។

លោក អ៊ូច ស៊ុនឡាយ មក​ពី ខេត្ត​កំពត សំណូមពរ​មេធាវី ពិចារណា​ដាក់​បញ្ចូល​ដំណើរ​បោះ​ពុម្ព​សៀវភៅ ឯកសារ​ប្រវត្តិសាស្ត្រ​នានា ពាក់​ព័ន្ធ​នឹង​របប​ប្រល័យ​ពូជ​សាសន៍ សម្រាប់​ដាក់​ក្នុង​បណ្ណាល័យ​តាម​បណ្តា​ខេត្ត​និង​ទីតាំង​ដី​សង្គមកិច្ច ៥ ហិកតា ដើម្បី​កប់​សាក​សព​ជន​ឧក្រិដ្ឋ ទុក​ឲ្យ​អ្នក​ជំនាន់​ក្រោយ​បាន​ដឹង។ លោក​បញ្ជាក់​ថា៖ «ការ​កំណត់​ទីតាំង​ជាក់​លាក់ សម្រាប់​កប់​ជន​ឧក្រិដ្ឋ​នៅ​ពេល​ដែល​ពួក​គេ​ស្លាប់​ទៅ អាច​បន្សល់​ជា​ភ័ស្តុតាង​សម្រាប់​កូន​ចៅ​ជំនាន់​ក្រោយ​យល់​ដឹង»។

ចំណែក​ជន​រងគ្រោះ​មួយ​ចំនួន​ទៀត ក៏​បាន​ទាមទារ​ឲ្យ​តុលាការ​ផ្តល់​ជា​សំណង​លើ​ការ​ខូច​ខាត​ជា​ឯកជន និង​ការ​ពន្លឿន​នីតិវិធី​រក​យុត្តិធម៌។

ទោះ​ជា​យ៉ាង​ណា​សហ​មេធាវី​ជាង ១០ រូប​ដែល​មាន​វត្តមាន​ក្នុង​កិច្ច​ប្រជុំ​បាន​ឆ្លើយ​តប​ថា ពួក​គេ​នឹង​ប្រមូល​យក​សំណើ​ទាំង​អស់ និង​ពិនិត្យ​ពី​លទ្ធភាព ដើម្បី​ដាក់​បញ្ចូល​ក្នុង​គម្រោង​សំណង​បន្ត​សម្រាប់​បណ្តឹង​រដ្ឋប្បវេណី​ក្នុង​សំណុំ​រឿង ០០២/០២ នៅ​ថ្ងៃ​ខាង​មុខ​នេះ។

កាល​ពី​ថ្ងៃ ទី៧ ខែ​សីហា ឆ្នាំ​២០១៤ អ.វ.ត.ក បាន​សម្រេច​ផ្តន្ទាទោស​មេ​ដឹក​នាំ​ខ្មែរ​ក្រហម​ពីរ​រូប​គឺ​លោក នួន ជា និង​លោក ខៀវ សំផន ឲ្យ​ជាប់​ពន្ធនាគារ​អស់​មួយ​ជីវិត ពី​បទ​ឧក្រិដ្ឋ​ប្រឆាំង​នឹង​មនុស្ស​ជាតិ​ពាក់​ព័ន្ធ​ទៅ​នឹង​ការ​ជម្លៀស​ប្រជាជន​ក្នុង​ដំណាក់​កាល ទី១ ទី២ និង​ការ​កាប់​សម្លាប់​ទាហាន​និង​មន្រ្តី​រាជការ​នៃ​របប លន់ នល់ នៅ​ទួល​ពោធិ៍​ជ្រៃ ខេត្ត​ពោធិ៍សាត់៕

អត្ថបទគួរចាប់អារម្មណ៍