ភ្នំពេញៈ ក្រុមស្រី្តសកម្មជនដីធ្លី ៦ រូបដែលបានធ្វើយុទ្ធនាការស្លៀកខ្មៅទាមទារឱ្យដោះលែងមន្ត្រីសិទ្ធិមនុស្ស និងតំណាងរបស់ពួកគេត្រូវបានដោះលែងវិញហើយកាលពីល្ងាចម្សិលមិញបន្ទាប់ពីអាជ្ញាធរខណ្ឌដង្កោឃាត់ខ្លួនពីរថ្ងៃខណៈដែលសកម្មជនផ្សេងទៀតបន្តធ្វើយុទ្ធនាការស្លៀកខ្មៅតែត្រូវបានអាជ្ញាធររារាំង។
សកម្មជនដែលត្រូវដោះលែងរួមមានលោក យាយ ង៉ែត ឃុន អាយុ ៧៦ ឆ្នាំ (ហៅយាយ ម៉ាំមី) នៅតំបន់បឹងកក់ សហគមន៍ថ្មគោល ៥ នាក់គឺអ្នកស្រី ភួង សុភាព,ខៀវ សាវី សុខ រស្មី, ជាវ ស្រីនិច និងអ្នកស្រី មាស ស្រីពៅ។
សកម្មជនស្ត្រីបឹងកក់ និងសហគមន៍ថ្មគោលរួមទាំងអ្នកលក់ប៉ឺតប៉ោងសរុប ១០ រូបត្រូវបានអាជ្ញាធរខណ្ឌដង្កោឃាត់ខ្លួនកាលពីថ្ងៃអាទិត្យ ខណៈដែលពួកគេ និងពលរដ្ឋប្រមាណ ១០០ នាក់ទៀតទៅធ្វើពិធីបួងសួងនៅមុខពន្ធនាគារព្រៃស (ម២) ដើម្បីទាមទារឱ្យដោះលែងមន្ត្រីសិទ្ធិមនុស្ស និងអ្នកស្រី ទេព វន្នី ដែលត្រូវតុលាការចាប់ឃុំខ្លួនទាំង «អយុត្តិធម៌» ពាក់ព័ន្ធនឹងរឿងដែលមជ្ឈដ្ឋានជាច្រើនយល់ថាជារឿងនយោបាយ។ តែអ្នកលក់ប៉ឺតប៉ោង ៤ នាក់ត្រូវបានអាជ្ញាធរដោះលែងវិញនៅថ្ងៃដដែលបន្ទាប់ពីធ្វើកំណត់ហេតុចប់ខណៈសកម្មជនដីធ្លី ៦ នាក់ផ្សេងទៀតទើបតែដោះលែងពីម្សិលមិញដោយអាជ្ញាធរតម្រូវឱ្យផ្តិតមេដៃឈប់ធ្វើយុទ្ធនាការស្លៀកខ្មៅតទៅទៀត។
អធិការខណ្ឌដង្កោលោក ជឹម ស៊ីថា ប្រាប់ភ្នំពេញប៉ុស្តិ៍ថាអាជ្ញាធរបានដោះលែងអ្នកទាំង ៦ រូបនៅវេលាម៉ោង ៤ ល្ងាចតែមិនប្រាប់ពីមូលហេតុនៃការឃាត់ខ្លួននោះទេ។
ប៉ុន្តែសកម្មជនចំណាស់ម្នាក់គឺលោកយាយ ង៉ែត ឃុន បានថ្លែងថាមុននឹងដោះលែងគេតម្រូវឱ្យពួកគាត់ផ្តិតមេដៃឈប់ប្រមូលផ្តុំខណៈលោកយាយថាព្រមផ្តិតតែនៅបន្តសកម្មភាពប្រមូលផ្តុំទាមទារយុត្តិធម៌ដោះលែងអ្នកជាប់ឃុំទាំងអយុត្តិធម៌។
ដោយឡែកសកម្មជនដីធ្លីបុរីកីឡាអ្នកស្រី ភោគ សុភីន ថ្លែងថាខណៈគ្នាគាត់ ៥ នាក់កំពុងត្រៀមធ្វើយុទ្ធនាការស្លៀកខ្មៅស្រាប់តែសមត្ថកិច្ចមកហាមឃាត់ និងស្រែកថាជាទង្វើខុសច្បាប់។
អ្នកស្រីថា៖ «យើងរៀបចំធ្វើពិធីស្លៀកអាវខ្មៅឱ្យដោះលែងមន្ត្រីសង្គមស៊ីវិល ដោះលែងអ្នកស្រី ទេព វន្នី ហើយមិនទាន់បានធ្វើផងពួកកម្លាំងសន្តិសុខរាប់សិបនាក់មកកម្ទេចរបស់របរពួកខ្ញុំអស់ទៅ»។
អ្នកស្រីថា តាមគម្រោងនឹងហែក្បួនពីអគារចាស់ទៅអគារទី ៩ នៅសហគមន៍បុរីកីឡា។
យ៉ាងនេះក្តីអ្នកស្រីថាការហាមនេះជាការបំបិទសិទ្ធិសេរីភាពពលរដ្ឋដែលមានចែងនៅក្នុងរដ្ឋធម្មនុញ្ញ៕
