.jpg)
ក្រុមមនុស្សពាក់ព័ន្ធគ្រឿងញៀនត្រូវបានដោះលែង។ នគរបាល
ភ្នំពេញៈ លោក ស ថេត ស្នងការនគរបាលរាជធានីភ្នំពេញ គ្រោងបញ្ជូនមនុស្សជិត ១០ នាក់ដែលពាក់ព័ន្ធការនាំគ្រឿងញៀនចូលមជ្ឈមណ្ឌលកម្សាន្តរ៉ុក ទៅកាន់សាលាដំបូងរាជធានីភ្នំពេញ ខណៈពេលដែលមនុស្ស ៣០២ នាក់ដែលពាក់ព័ន្ធការប្រើប្រាស់គ្រឿងញៀន និងមិនពាក់ព័ន្ធត្រូវបានដោះលែងកាលពីយប់ថ្ងៃទី ២៤ ខែកុម្ភៈ ឆ្នាំ ២០១៩ បន្ទាប់ពីបានធ្វើកិច្ចសន្យាអប់រំ។
ការដោះលែងនេះធ្វើឡើងបន្ទាប់ពីស្នងការនគរបាលរាជធានីភ្នំពេញបានពិសោធទឹកនោមរកសារធាតុញៀន និងធ្វើកំណត់ហេតុទៅលើយុវជន និងយុវនារីជាង ៣០០ នាក់ ហើយភាគច្រើន សុទ្ធតែរកឃើញមានសារធាតុញៀននៅក្នុងខ្លួន ហើយត្រូវបានធ្វើកិច្ចសន្យាអប់រំឲ្យត្រឡប់ទៅផ្ទះវិញកាលពីយប់ថ្ងៃទី ២៤ ខែកុម្ភៈ ឆ្នាំ ២០១៩។
វិធានការនេះធ្វើឡើងបន្ទាប់ពី ស្នងការនគរបាលរាជធានីភ្នំពេញបានបង្ក្រាបអ្នកប្រើប្រាស់ និងអ្នកចែកចាយជាង ៣០០ នាក់ព្រមទាំងរឹបអូសបានគ្រឿងញៀនយ៉ាងហោច ៥០ គីឡូក្រាមកាលពីយប់ថ្ងៃទី ២២ ខែកុម្ភៈ និងដែលត្រូវបានបិទជាផ្លូវការកាលពីថ្ងៃទី ២៣ ខែកុម្ភៈឆ្នាំ ២០១៩។
លោក ស ថេត បានអះអាងកាលពីម្សិលមិញថា មនុស្ស ជាង ១០ នាក់ដែលពាក់ព័ន្ធនឹងការជួញដូរគ្រឿងញៀន និងកាន់កាប់អាវុធខុសច្បាប់ត្រូវបានសមត្ថកិច្ចឃុំខ្លួនបន្ត និងបញ្ជូនទៅកាន់សាលាដំបូងរាជធានីភ្នំពេញ។
លោក ថេត ថ្លែងថា៖ «ឪពុកម្តាយរបស់អ្នកដែលប្រើប្រាស់គ្រឿងញៀនបានសន្យាថានឹងយកពួកគេទៅព្យាបាលគ្រឿងញៀន ហើយថា ឈប់ប្រើប្រាស់គ្រឿងញៀនខណៈឪពុកម្តាយរបស់អ្នកដែលមិនប្រើប្រាស់បានសន្យាថា កូនរបស់ពួកគេមិនបានពាក់ព័ន្ធ និងមិនប្រើប្រាស់គ្រឿងញៀន ហើយថាមន្ត្រីនគរបាលរាជធានីភ្នំពេញប្ដេជ្ញាបន្តសកម្មភាពបង្ក្រាបទីតាំងផ្សេងៗទៀត»។
លោក ស ថេត ថ្លែងថា៖ «ចំណែកឯអ្នកដែលពាក់ព័ន្ធទៅនឹងជួញដូរយើងអនុវត្តទៅតាមនីតិវិធីច្បាប់យើងកំពុងតែរៀបចំកសាងសំណុំរឿង និងសាកសួរឲ្យបានហ្មត់ចត់ហើយយើងនឹងបញ្ជូនទៅតុលាការ»។
លោកបន្ថែមថា ស្នងការនគរបាលរាជធានីភ្នំពេញបាននិងកំពុងសាកសួរមនុស្សជាង ១០ នាក់ដែលបានសង្ស័យថា បានជាប់ពាក់ព័ន្ធការជួញដូរគ្រឿងញៀន និងកាន់កាប់អាវុធខុសច្បាប់ដើម្បីរកមេខ្លោង ដែលបានផ្គត់ផ្គង់ និងចែកចាយគ្រឿងញៀនចូលមជ្ឈមណ្ឌលកម្សាន្តរ៉ក់។
លោកថ្លែងថា៖ «យើងកំពុងសិក្សាស្រាវជ្រាវតាមរយៈមនុស្សជាង ១០ នាក់ នេះដើម្បីស្រាវជ្រាវរកប្រភពនាំចូល»។
យោងតាមកិច្ចសន្យាមួយដែលភ្នំពេញប៉ុស្តិ៍ទទួលបានកាលពីថ្ងៃទី ២៥ ខែកុម្ភៈបានឲ្យដឹងថា៖ «នៅពេលដែលសមត្ថកិច្ចអប់រំឲ្យខ្ញុំបានត្រឡប់ទៅលំនៅឋានវិញ ខ្ញុំបាទនឹងខិតខំកែប្រែខ្លួនឲ្យក្លាយជាពលរដ្ឋល្អមិនប្រព្រឹត្ត អ្វីដែលច្បាប់ហាមឃាត់។ មិនប្រើប្រាស់ និងឈប់ប្រើប្រាស់គ្រឿងញៀនគ្រប់ប្រភេទ»។
កិច្ចសន្យាបានបន្ថែមថា នៅពេលដែលពួកគេដឹងថាជនណាមួយប្រព្រឹត្តបទល្មើស ពួកគេត្រូវធ្វើការរាយការណ៍ជូនសមត្ថកិច្ច ហើយនៅពេលសមត្ថកិច្ចត្រូវការពួកគេ ពួកគេត្រូវតែមកបង្ហាញខ្លួន និងមិនគេចវេះឡើយ។
លោក មាស វិរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងអំណរគុណដល់សមត្ថកិច្ចពាក់ព័ន្ធទាំងអស់ដែលបានខិតខំធ្វើការងារនេះក្នុងការបង្ក្រាបដែលបានជួយកាត់បន្ថយជនប្រើប្រាស់ គ្រឿងញៀន ហើយអាជ្ញាធរអាចនឹងរកឃើញមេខ្លោងដោយសារតែសមត្ថកិច្ចបានឃាត់ខ្លួនជនសង្ស័យច្រើនដែលអាចជួយផ្តល់ព័ត៌មានជាច្រើនសម្រាប់សមត្ថកិច្ចស្វែងរកមេខ្លោង។
លោក ថ្លែងថា៖ «វាសំខាន់នៅលើភ័ស្តុតាងថាតើនរណាជាអ្នកដឹកនាំក្នុងការប្រព្រឹត្តបទល្មើសដែលសមត្ថកិច្ច បានរកឃើញ។ យើងបានរកឃើញច្រើននាក់ដូច្នេះអ្នកទាំងនោះនឹងជួយផ្តល់ព័ត៌មានផ្សេងៗសម្រាប់សមត្ថកិច្ច»។
កាលពីថ្ងៃទី ២៣ ខែកុម្ភៈ ឆ្នាំ ២០១៩ វេលាម៉ោង ១ និង ៤០ នាទីទៀបភ្លឺ ស្នងការដ្ឋាននគរបាលរាជធានីភ្នំពេញ និងដោយមានការដឹកនាំសម្របសម្រួល ពីតំណាងអយ្យការអមសាលាដំបូងរាជធានីភ្នំពេញបានបើកប្រតិបត្តិការបង្ក្រាបបទល្មើសគ្រឿងញៀននៅមជ្ឈមណ្ឌលកម្សាន្តរ៉ក់ មានទីតាំងស្ថិតនៅតាមបណ្ដោយមហាវិថីព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញដោយបានឃាត់ខ្លួនជនសង្ស័យចំនួន ៣១១ នាក់ ដែលក្នុងនោះមានជនជាតិចិន ១៤ នាក់ ហើយដកហូតបានគ្រឿងញៀនជាង ៣៩ គីឡូក្រាម និងសារធាតុញៀនជាទឹក ៩ គីឡូ ២ ខាំ ជញ្ជីងថ្លឹងគ្រឿងញៀន ១២ និងកាំភ្លើងខ្លី ១ ដើម។
យោងតាមរបាយការណ៍បូកសរុបការងារឆ្នាំ ២០១៨ និងទិសដៅឆ្នាំ ២០១៩ របស់ក្រសួងមហាផ្ទៃដែលបានបង្ហាញក្នុងសន្និបាតរបស់ក្រសួងមហាផ្ទៃ កាលពីព្រឹកថ្ងៃទី ១៣ ខែកុម្ភៈ បានបញ្ជាក់ថា យុទ្ធនាការប្រយុទ្ធប្រឆាំង គ្រឿងញៀនខុសច្បាប់ លើកទី៣ ចាប់ពីថ្ងៃទី ១ ខែមករា ដល់ថ្ងៃទី ៣១ ខែធ្នូ ឆ្នាំ ២០១៨ កម្លាំងអនុវត្តច្បាប់ បង្ក្រាបគ្រឿងញៀនបាន ៨ ០០២ ករណី ឃាត់ខ្លួន ១៦ ២១៦ នាក់ (ស្រី ១ ៣៣៣ នាក់ ) រឹបអូសវត្ថុតាងបានគ្រឿងញៀន ៥៣៦,៣៦ គ.ក្រ ព្រមទាំងមធ្យោបាយ និងឧបករណ៍វេចខ្ចប់មួយចំនួនទៀត។
តាមរបាយការណ៍ក្រសួងសុខាភិបាលបានឲ្យដឹងថា ក្នុងឆ្នាំ ២០១៨ កន្លងមកនេះ អ្នកញៀនគ្រឿងញៀនដែលទទួលបានការព្យាបាលនៅមណ្ឌលបណ្តោះអាសន្នចំនួន ១៣ ១៦១ នាក់ ស្មើ ៧១% និងតាមសេវាសុខាភិបាលសាធារណៈទូទាំងប្រទេសចំនួន ៥ ៣៩៦ នាក់ ស្មើ ២៩% ក្នុងចំណោមអ្នកញៀនគ្រឿងញៀនទាំងជាង ១៨ ៥៥៧ នាក់ ដែលចំនួននេះមានការកើនឡើងបើប្រៀបធៀបនឹងឆ្នាំ ២០១៧ ៕
