The Phnom Penh Post Search

Search form




Logo of Phnom Penh Post newspaper Phnom Penh Post - ដោះ​លែង​មេការ ឃុំ​កម្មករ​ខណៈ​គ្រួសារ​អ្នក​ធ្លាក់​ដែក​លើ​ស្លាប់​ដក​បណ្តឹង

ដោះ​លែង​មេការ ឃុំ​កម្មករ​ខណៈ​គ្រួសារ​អ្នក​ធ្លាក់​ដែក​លើ​ស្លាប់​ដក​បណ្តឹង

កម្មករ​និង​មេការ​ការដ្ឋាន​ធ្លាក់​ដែក​ស្លាប់​អ្នក​ដំណើរ​ពេល​នាំ​សាកសួរ​នៅ​តុលាការ។
កម្មករ​និង​មេការ​ការដ្ឋាន​ធ្លាក់​ដែក​ស្លាប់​អ្នក​ដំណើរ​ពេល​នាំ​សាកសួរ​នៅ​តុលាការ។ ហេង ជីវ័ន

ដោះ​លែង​មេការ ឃុំ​កម្មករ​ខណៈ​គ្រួសារ​អ្នក​ធ្លាក់​ដែក​លើ​ស្លាប់​ដក​បណ្តឹង

ភ្នំពេញៈ មេការ​ការដ្ឋាន​សាង​សង់​អគារ​បង្ក​គ្រោះ​ថ្នាក់​ស្លាប់​អ្នក​ដំណើរ​របស់​ក្រុម​ហ៊ុន CSCC ចំនួន​ពីរ​នាក់​ត្រូវ​តំណាង​អយ្យការ​សម្រេច​ដោះ​លែង ខណៈ​កម្មករ ៥​នាក់ ត្រូវ​បាន​សម្រេច​ចោទ​ប្រកាន់​និង​បញ្ជូន​ឲ្យ​ចៅ​ក្រម​ស៊ើប​សួរ​បន្ត​នីតិវិធី​នៅ​ក្នុង​ការ​សាក​សួរ​ជា​លើក ទី២ នៅ​សាលា​ដំបូង​រាជធានី កាល​ពី​ព្រលប់​ម្សិល​មិញ។ ជាមួយ​គ្នា​ដែរ ក្រសួង​រៀបចំ​ដែន​ដី​នគរូប​នីយកម្ម​និង​សំណង់ ក៏​បាន​ធ្វើ​សន្និសីទ​កាសែត​អះអាង​ពី​ការ​ចាត់​វិធាន​ការ​ផ្លូវ​ច្បាប់ ទៅ​លើ​ក្រុម​ហ៊ុន​ម៉ៅការ​សំណង់ CANASENO (CSCC) នេះ​ដែរ កាល​ពី​ព្រឹក​ថ្ងៃ​អង្គារ។

កម្មករ ៥ នាក់ និង​មេការ ២ នាក់​នៃ​ការដ្ឋាន​សំណង់​ក្រុម​ហ៊ុន CSCC ដែល​សាង​សង់​អគារ​ក្រុម​ហ៊ុន OCIC ក្នុង​បរិវេណ​ពហុ​កីឡដ្ឋាន​ជាតិ​អូឡាំពិក ត្រូវ​សមត្ថកិច្ច​រាជធានី​កោះ​ហៅ​មក​សាក​សួរ ហើយ​បាន​ឃាត់​ខ្លួន​កាល​ពី​ថ្ងៃ​ចន្ទ ពាក់​ព័ន្ធ​ករណី​ធ្លាក់​ដែក​ជាង ១ ម៉ែត្រ មក​ត្រូវ​អ្នក​ដំណើរ​តាម​ផ្លូវ​ស្លាប់​កាល​ពី​ថ្ងៃ​អាទិត្យ។ នៅ​ព្រឹក​ថ្ងៃ​អង្គារ​ម៉ោង​ប្រមាណ​ជា ៧ ពួកគេ​ត្រូវ​សមត្ថកិច្ច​បញ្ជូន​មក​អយ្យការ ដើម្បី​សាក​សួរ។ ប៉ុន្តែ​ដោយ​មាន​អ្នក​កាសែត​តាម​ប្រមាញ់​និង​អ្នក​ឃ្លាំ​មើល​ច្រើន​ពេក នគរបាល​ក៏​បញ្ជូន​ពួក​គេ​ទៅ​អធិការដ្ឋាន​ខណ្ឌ​វិញ ហើយ​នៅ​ម៉ោង ៦ ល្ងាច​ទៅ​ហើយ​ពី​ម្សិល​មិញ​នេះ ពួក​គេ​ក៏​ត្រូវ​បញ្ជូន​មក​ឲ្យ​ព្រះ​រាជអាជ្ញា​តំណាង​អយ្យការ​សាក​សួរ​ម្តង​ទៀត។

តំណាង​អយ្យការ​នៃ​សាលា​ដំបូង​ភ្នំពេញ​លោក​ព្រះ​រាជអាជ្ញា​រង កែវ សុជាតិ បាន​បញ្ចប់​ការ​សាក​សួរ​ជន​ទាំង ៧ នាក់ ប្រមាណ​ជាង ១ ម៉ោង​ក្រោយ​មក ដោយ​សម្រេច​ដោះលែង​មេការ ២ នាក់​ហើយ​បាន​ធ្វើ​ការ​ចោទ​ប្រកាន់​កម្មករ ៥ នាក់​ទៅ​វិញ។

លោក​ព្រះ​រាជអាជ្ញា​រង កែវ សុជាតិ ដែល​កាន់​សំណុំ​រឿង​នេះ​បាន​ប្រាប់ ភ្នំពេញ ប៉ុស្តិ៍ ក្រោយ​ការ​សាក​សួរ​ថា៖ «សំណុំ​រឿង​នេះ​ខ្ញុំ​បាន​ចោទ​ប្រកាន់​ជន​សង្ស័យ ៥ នាក់​ដែល​ជា​កម្មករ ពីព្រោះ​ពួកគេ​មាន​ការ​ធ្វេស​ប្រហែស​នៅ​ពេល​បំពេញ​ការងារ បណ្តាល​ឲ្យ​ធ្លាក់​ដែក​ពី​លើ​អគារ​ត្រូវ​ជន​រង​គ្រោះ​ស្លាប់»។

លោក កែវ សុជាតិ បញ្ជាក់​ថា ពួក​គេ​ត្រូវ​លោក​ចោទ​ប្រកាន់​ពី​បទ​មនុស្ស​ឃាត​ដោយអ​ចេតនា ហើយ​ត្រូវ​បញ្ជូន​ទៅ​ចៅក្រម​ស៊ើប​សួរ​បន្ត​នីតិវិធី នឹង​សម្រេច​ឃុំ​ខ្លួន​ពួក​គេ​បណ្តោះ​អាសន្ន​នៅ​ពន្ធនាគារ​រង់ចាំ​ជំនុំ​ជម្រះ​តាម​ច្បាប់។ លោក​បន្ត​ថា ករណី​នេះ​មិន​អាច​មិន​ឃុំ​ខ្លួន​បាន​ទេ ព្រោះ​ថា បើ​តុលាការ​មិន​ឃុំ​ឬ​កាត់​ទោស​ទេ ពួក​គេ​នឹង​មិន​រាង​ចាល​ឡើយ។

ជុំវិញ​ការ​ដោះ​លែង​មេការ​ការដ្ឋាន​សំណង់​បង្ក​ហេតុ​នេះ លោក​ព្រះ​រាជ​អាជ្ញា​រង​បាន​ព្រលយ​ឲ្យ​ដឹង​ដែរ​ថា៖ «សំណុំ​រឿង​នេះ​គ្រួសារ​ជន​រង​គ្រោះ​សម្រេច​ដក​ពាក្យ​បណ្តឹង​អស់​ហើយ នឹង​បាន​ទទួល​ប្រាក់​សំណង​ជំងឺ​ចិត្ត​យ៉ាង​គាប់​ចិត្ត​ពី​ក្រុម​ហ៊ុន OCIC រួច​រាល់​ហើយ»។

កាល​ពី​ល្ងាច​ថ្ងៃ ទី២ ខែ​តុលា ស្រ្តី​ម្នាក់​ឈ្មោះ ពុទ្ធ វាន់នី អាយុ ៤៨​ឆ្នាំ រស់​នៅ​ក្នុង ខណ្ឌ​ច្បារ​អំពៅ បាន​ស្លាប់​ភ្លាម​បន្ទាប់​ពី​ដែក​ទម្ងន់​ជាង ៧ គីឡូក្រាម បាន​ធ្លាក់​ពី​ការដ្ឋាន​អគារ​ខ្ពស់​ក្នុង​បរិវេណ​ពហុ​កីឡដ្ឋាន​ជាតិ​អូឡាំពិក​ត្រូវ​បែក​លលាដ៍​ក្បាល​ធ្លាយ​ខួរ​មក​ក្រៅ និង​ហូរ​ឈាម​ពេញ​ផ្លូវ ខណៈ​កំពុង​ជិះ​ម៉ូតូ​ជាមួយ​កូន​ប្រុស​លើ​ផ្លូវ​ក្នុង សង្កាត់​វាលវង់ ខណ្ឌ ៧ មករា។

កូន​ប្រុស​របស់​ស្ត្រី​រង​គ្រោះ លោក ម៉ៅ វាសនា ពី​ព្រឹក​ម្សិល​មិញ​បាន​អះអាង​ប្រាប់ ភ្នំពេញ ប៉ុស្តិ៍ អំពី​ការ​ប្តឹង​ទាម​ទារ​សំណង ១ សែន​ដុល្លារ​អាមេរិក ហើយ​ថា កម្មករ​មិន​គួរ​ទទួល​ខុស​ត្រូវ​ក្នុង​ហេតុ​ការណ៍​នេះ​ទេ។

លោក​ថា ករណី​នេះ​តុលាការ​គប្បី​កោះ​ហៅ​ភាគី​ពាក់​ព័ន្ធ​ទាំង​អស់​មក​អង្កេត។ ប៉ុន្តែ​ក្រោយ​មាន​ការ​សម្រប​សម្រួល​ផ្តល់​សំណង​និង​ដក​ពាក្យ​បណ្តឹង​កាល​ពី​យប់​មិញ លោក ម៉ៅ វាសនា មិន​លើក​ទូរស័ព្ទ​របស់ ភ្នំពេញ ប៉ុស្តិ៍ ដែល​រក​ការ​បំភ្លឺ​ឡើយ។

ប្រធាន​ស្តីទី​សហព័ន្ធ​សហជីព​កម្មករ សំណង់ និង​ព្រៃឈើ​កម្ពុជា លោក សុខ គីន យល់​ថា ករណី​នេះ​តុលាការ​មាន​សិទ្ធិ​កោះ​ហៅ​សួរ​នាំ​អ្នក​ទាំង ៧ រូប​នោះ តែ​មិន​គួរ​ឃាត់​ខ្លួន​ឬ​ឃុំ​ពួក​គេ​នោះ​ទេ ហើយ​បញ្ហា​នេះ​ជា​ទំនួល​ខុស​ត្រូវ​របស់​ប្រធាន​ការដ្ឋាន ដែល​ជា​អ្នក​ជំនាញ​បច្ចេកទេស​និង​ជា​ការ​ទទួល​ខុស​ត្រូវ​ទាំង​ស្រុង​របស់​ក្រុម​ហ៊ុន​មេ នៃ​ការដ្ឋាន​នេះ។

លោក​បន្ត​ថា៖ «ថ្វី​បើ​កម្មករ​ទាំង​នេះ​មិន​មែន​ជា​សមាជិក​របស់​សហជីព តែ​ពួក​យើង​និង​អង្គការ​ពាក់ព័ន្ធ​នឹង​បន្ត​ស៊ើប​អង្កេត​និង​ឃ្លាំ​មើល​រឿង​នេះ ដើម្បី​ពិចារណា​ផ្តល់​សេវា​ផ្លូវ​ច្បាប់ ជួយ​ពួក​គេ»។

លោក សុក សំអឿន ប្រធាន​ក្រុម​អ្នក​ច្បាប់​ការពារ​សិទ្ធិ​កម្ពុជា យល់​ឃើញ​ថា៖ «ការ​ចោទ​ប្រកាន់​កម្មករ​ឲ្យ​ទទួល​ខុស​ត្រូវ​ក្នុង​រឿង​នេះ វា​មិន​ត្រឹម​ត្រូវ​ទេ ព្រោះ​ករណី​នេះ គឺជា​ការ​ធ្វេស​ប្រហែស ហើយ​មេ​ការ​អាច​ទទួល​ខុស​ត្រូវ​មួយ​ផ្នែក​ដែរ»។

ជុំវិញ​ហេតុ​ការណ៍​ស្លាប់​អ្នក​ដំណើរ​បង្ក​ពី​ការដ្ឋាន​សំណង់​មួយ​នេះ ក្រសួង​ដែនដី​នគរូបនីយ​កម្ម ក៏​បាន​ធ្វើ​ការ​ព្រមាន​ក្រុម​ហ៊ុន កំពុង​សាង​សង់​សំណង់​ខ្ពស់​ក្នុង​រាជធានី​ផង​ដែរ នៅ​ក្នុង​សន្និសីទ​សារ​ព័ត៌មាន នៅ​ទីស្តីការ​ក្រសួង​កាល​ពី​ព្រឹក​ម្សិល​មិញ ដើម្បី​ជា​ការ​បំភ្លឺ​ដល់​សាធារណ​ជន ចំពោះ​កំហុស​បច្ចេក​ទេស​ដែល​ត្រូវ​តែ​មាន​អ្នក​ទទួល​ខុស​ត្រូវ​ក្នុង​ករណី​ស្លាប់​មនុស្ស។

អនុ​រដ្ឋ​លេខាធិការ​ក្រសួង​រៀបចំ​ដែនដី នគរូបនីយ​កម្ម លោក កើត សារ៉េត បាន​លើក​ឡើង​ថា ក្រោយ​ឧបទ្ទវហេតុ​នេះ នៅ​ក្នុង​ប្លុក​នោះ គឺ​ដំណើរការ​សាង​សង់​តាម​ធម្មតា។

លោក​បន្ត​ថា៖ «ការដ្ឋាន​នេះ​មាន​ការ​ធ្វេស​ប្រហែស​ដោយ​ការ​គ្រប់​គ្រង​សុវត្ថិភាព...ជា​ផែនការ​ក្រសួង មាន​វិធាន​ការ​កោះ​ហៅ​ក្រុម​ហ៊ុន CANASENO នេះ មក​ធ្វើ​ការ​ណែនាំ​និង​ចាត់​វិធាន​ការ​ផ្លូវ​ច្បាប់»។

លោក កើត សារ៉េត ឲ្យ​ដឹង​ទៀត​ថា ក្រសួង​នឹង​ចេញ​លិខិត​កោះ​ហៅ​នៅ​ល្ងាច​ថ្ងៃ​អង្គារ ដោយ​សារ​ជា​ការងារ​បន្ទាន់​តែ​មិន​ទាន់​កំណត់​ថ្ងៃ​និង​ពេល​វេលា​ជាក់​លាក់ ក្នុង​ការ​សាក​សួរ​ម្ចាស់​ក្រុម​ហ៊ុន​នៅ​ឡើយ។

លោក​ថា៖ «ករណី​នេះ អ្នក​ពាក់ព័ន្ធ​ជា​អ្នក​ទទួល​ខុស​ត្រូវ ហើយ​តួ​អង្គ​រួម​មាន ម្ចាស់​សំណង់ ទីប្រឹក្សា​គម្រោង ក្រុម​ហ៊ុន OCIC និង​អាជ្ញាធរ​មាន​សមត្ថកិច្ច»។

អគ្គ​នាយក​នៃ​អគ្គ​នាយកដ្ឋាន​សំណង់​នៃ​ក្រសួង​ដែនដី លោក ហ៊ុយ ណារ៉ា ថ្លែង​ដែរ​ថា កិច្ច​ស៊ើប​អង្កេត​នៃ​ឧបទ្ទវហេតុ​នេះ ក្រៅ​ពី​ក្រសួង​រៀបចំ​ដែនដី និង​អាជ្ញាធរ​មូលដ្ឋាន ក៏​មាន​ការ​ចូល​រួម​ពី​ក្រសួង​ការងារ ក្រសួង​បរិស្ថាន និង​ក្រសួង​មហាផ្ទៃ ផង​ដែរ។

លោក​បាន​បន្ត​ថា៖ «ព័ត៌មាន​ដែល​ទទួល​បាន គឺ​មាន​ការ​ដោះ​ជន្ទល់​អគារ​ជាន់ ទី១២ និង ១៣ ទើប​ធ្វើ​ឲ្យ​ធ្លាក់​ដែក​ទីប ៥០ គុណ ៥០ ប្រវែង​មួយ​ម៉ែត្រ​កន្លះ ប៉ះ​ខ្ទាត​មក​លើ​ផ្លូវ​បង្ក​គ្រោះ​ថ្នាក់»។

ពាក់ព័ន្ធ​ទៅ​នឹង​បញ្ហា​សំណង់​មាន​សំណង់​ខ្ពស់ៗ ជា​ច្រើន​ទៀត​កំពុង​សាង​សង់ ក្នុង​រាជធានី​ភ្នំពេញ លោក ហ៊ុយ ណារ៉ា អះអាង​ថា ក្រោម​ការ​ជ្រោម​ជ្រែង​ពី​បរទេស​ក្រសួង​មាន​គម្រោង​រៀបចំ​ជា​បទ​ប្បញ្ញត្តិ​ស៊ី​ជម្រៅ ដើម្បី​គ្រប់​គ្រង​ទាំង​មុន​ដំណើរ​ការ ក្នុង​អំឡុង​ពេល​ដំណើរការ និង​ក្រោយ​បញ្ចប់​ការ​សាង​សង់ ដើម្បី​រក្សា​សុវត្ថិភាព»៕

អត្ថបទគួរចាប់អារម្មណ៍