បន្ទាយមានជ័យៈ អគ្គនាយកដ្ឋានកសិកម្មឲ្យដឹងថា ដំណាំពោតជាង ៤០០ ហិកតា ក្នុងខេត្តបន្ទាយមានជ័យត្រូវបានដង្កូវហ្វូងប្រភេទថ្មី Fall Armyworm បំផ្លាញខូចខាតជាងពាក់កណ្តាល ប៉ុន្តែត្រូវបានជួយសង្គ្រោះមកវិញ។ ក្នុងស្ថានភាពនោះ មន្ត្រីជំនាញក៏បន្តចុះអន្តរាគមន៍ និងបង្ហាញពីវិធីកម្ចាត់ហ្វូងដង្កូវប្រភេទនេះកុំឲ្យបំផ្លាញដំណាំប្រជាពលរដ្ឋបន្តទៀត។
តាមរបាយការណ៍របស់អគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទបានឲ្យដឹងពីថ្ងៃចន្ទថា បន្ទាប់ពីទទួលបានសំណើសុំអន្តរាគមន៍កម្ចាត់ដង្កូវហ្វូងប្រភេទថ្មី (Fall Armyworm) លើដំណាំពោតរបស់មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ថ្នាក់ដឹកនាំ និងមន្ត្រីជំនាញការិយាល័យការពារដំណាំនៃនាយកដ្ឋានការពារដំណាំ អនាម័យ និងភូតគាមអនាម័យបានចុះបេសកកម្មកាលពីថ្ងៃទី ៣-៦ មិថុនា។
របាយការណ៍ដដែលបានបន្តថា ដោយមានការសហការជាមួយមន្ទីរកសិកម្មខេត្ត ការចុះពិនិត្យក៏បានចាត់វិធានការទប់ស្កាត់ និងកម្ចាត់ដង្កូវហ្វូងប្រភេទថ្មីខាងលើបានទាន់ពេល។ តាមរយៈការចុះពិនិត្យជាក់ស្ដែងនៅចម្ការកសិករផ្ទាល់ក៏ទទួលបានលទ្ធផលមួយចំនួនដូចជា ឃុំអូរស្រឡៅ ស្រុកម៉ាឡៃមានកម្រិតបំផ្លាញចន្លោះពី ៣៥%-៤៥% ដែលបំផ្លាញលើផ្ទៃដីចំនួន ៥០ ហិកតា។
ចំណែកឃុំទួលពង្រ ស្រុកម៉ាឡៃមានកម្រិតបំផ្លាញចន្លោះពី ៥០%-៦៥% ដែលបំផ្លាញលើផ្ទៃដីចំនួន ២០ ហិកតា និងឃុំបឹងបេង ស្រុកម៉ាឡៃ មានកម្រិតបំផ្លាញចន្លោះពី ៥០%-៦៥% ដែលបំផ្លាញលើផ្ទៃដីចំនួន ៣៤០ ហិកតា។ ឃុំអូរសំព័រ ស្រុកម៉ាឡៃមានកម្រិតបំផ្លាញចន្លោះពី ៨០%-៩០% ដែលបំផ្លាញលើផ្ទៃដីចំនួន ៥០ ហិកតា។
អគ្គនាយកដ្ឋានកសិកម្មក៏បញ្ជាក់ដែរថា៖ «ដំណាំពោត ដែលរងការបំផ្លាញដោយដង្កូវហ្វូងប្រភេទថ្មីនេះស្ថិតក្នុងដំណាក់កាលលូតលាស់ចេញស្លឹកពីចំនួន ៦-៨ ស្លឹក។ តាមការវាយតម្លៃជារួមរបស់ក្រុមការងារ ការបំផ្លាញមានកម្រិតតិចជាងបើធៀប ការបំផ្លាញនៅពាក់កណ្តាលខែឧសភាមុនពីព្រោះការបំផ្លាញដំណាក់កាលនេះមានភ្លៀងធ្លាក់គ្រប់គ្រាន់ កសិករអាចប្រើប្រាស់ជីបំប៉ន និងថ្នាំពុលកសិកម្មមានប្រសិទ្ធភាពខ្ពស់»។
លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យប្រាប់ភ្នំពេញប៉ុស្តិ៍ពីម្សិលមិញថា ក្រោយមានការជួយសង្គ្រោះរបស់ក្រុមការងារបច្ចេកទេស ដំណាំពោតមួយចំនួនរបស់ប្រជាកសិករ ត្រូវបានជួយសង្គ្រោះឡើងវិញ ហើយចម្ការដទៃទៀតនៅក្នុងខេត្តក៏មិនទាន់មានការបំផ្លាញថ្មីកើតឡើងដែរ។
លោកបញ្ជាក់ថា៖ «ការបំផ្លាញដោយដង្កូវប្រភេទថ្មីនេះ គឺមានច្រើនដែរហើយ ដែលកាលពីឆ្នាំមុនដង្កូវប្រភេទថ្មីនេះបានបំផ្លាញ។ វាបានឆ្លងរាលដាលមកពីខាងក្រៅមក។ វាឆ្លងរាលដាលពីប្រទេសនានានៅក្នុងអាស៊ីយើងតាមរយៈមេអំបៅ ដែលកាលពីមុនឃើញកើតមាននៅក្នុងប្រទេសឡាវ ហើយក៏បានឆ្លងមកយើង»។
តាមអគ្គនាយកដ្ឋានកសិកម្មឲ្យដឹងថា ដើម្បីដោះស្រាយបញ្ហាដែលប្រជាកសិករបានជួបប្រទះ ក្រុមការងារ ក៏បានផ្តល់អនុសាសន៍មួយចំនួន ដោយតម្រូវឲ្យមានការតាមដានវត្តមានមេអំបៅ និងដាក់អន្ទាក់ដើម្បីកាត់បន្ថយប្រជាករ [ពពួក] មេអំបៅរបស់វា និងត្រូវសម្អាតស្មៅជុំវិញ និងក្នុងចម្ការរបស់ប្រជាកសិករព្រមទាំងត្រូវភ្ជួរដីដែលនៅសល់ជុំវិញចម្ការដើម្បីកម្ចាត់ជម្រករបស់ដង្កូវផងដែរ។
អគ្គនាយកដ្ឋាននេះបញ្ជាក់ថា ចំពោះការប្រើប្រាស់ថ្នាំពុលជីវសាស្ត្រ ឬថ្នាំពុលកសិកម្មសម្រាប់គ្រប់គ្រង និងកម្ចាត់ដង្កូវហ្វូងប្រភេទថ្មីនេះត្រូវអនុវត្តជាដំណាក់កាលដូចខាងក្រោម។ ដំណាក់កាលទី ១ នៅពេលដំណាំពោតមានអាយុកាល ១ សប្ដាហ៍ ប្រសិនបើកម្រិតបំផ្លាញចន្លោះពី ៥-៣០% កសិករគួរប្រើថ្នាំពុល ជីវសាស្ត្រប្រភេទ Beauveria bassiana ឬស្លឹកស្តៅ។ ដំណាក់កាលទី ២ នៅពេលដំណាំពោតមានអាយុកាល ២-៤ សប្ដាហ៍ត្រូវប្រើប្រាស់ថ្នាំពុលកសិកម្មដែលមានធាតុសកម្មដូចជាៈ Emanectin benzoate, Indoxacarb, Chloratraniliprol,Flubend iamide,Fipronil,Spinetoram។
ចំពោះដំណាក់កាលទី ៣ វិញ ប្រសិនបើដំណាំពោតមានអាយុកាលពី ៤-៧ សប្ដាហ៍ គឺកសិករត្រូវបន្តប្រើប្រាស់ថ្នាំពុលកសិកម្មដែលមានធាតុសកម្មដូចជាថ្នាំពុលដដែលខាងលើ។ រីឯដំណាក់កាលចុងក្រោយគឺនៅពេលដំណាំពោតមានអាយុកាលលើសពី ៧ សប្ដាហ៍រហូតដល់ទុំនោះ ប្រជាកសិករ មិនគួរប្រើប្រាស់ថ្នាំពុលកសិកម្មដដែលនោះទេ។ ប្រជាកសិករត្រូវធ្វើការអង្កេតតាមដានវត្តមានមេអំបៅ ឬដង្កូវដែលបំផ្លាញដំណាំពោត។ បន្ទាប់មកកសិករត្រូវជ្រើសរើសវិធានការដ៏សមស្របសម្រាប់កម្ចាត់តាមក្រោយ៕