ភ្នំពេញ: ផ្ទៃដីបង្កបង្កើនផលស្រូវប្រមាណជាង ៦៧ ពាន់ហិកតា នៅក្នុងឆ្នាំ ២០១៩ បានរងការខូចខាតដោយសារគ្រោះធម្មជាតិ បណ្ដាលមកពីភាពរាំងស្ងួត ហើយក៏បានធ្វើឲ្យទិន្នផលស្រូវថយចុះប្រមាណ ០,៥៤ ភាគរយ។ នេះបើយោងតាមលោកស្រី វុឌ្ឍី អ្នកនាំពាក្យក្រសួងកសិកម្មថ្លែងនៅក្នុងសន្និសីទកាសែតកាលពីម្សិលមិញ។
អង្គភាពអ្នកនាំពាក្យរាជរដ្ឋាភិបាលបានរៀបចំសន្និសីទសារព័ត៌មាននៅទីស្ដីការគណៈរដ្ឋមន្ត្រីកាលពីម្សិលមិញក្រោមប្រធានបទ «បច្ចុប្បន្នភាព និងវឌ្ឍនភាពរបស់ក្រសួងកសិកម្ម រុក្ខាប្រមាញ់ និងនេសាទ» ដើម្បីបង្ហាញសាធារណជនឲ្យបានយល់ច្បាស់ពីសកម្មភាព និងសមិទ្ធផលរបស់ក្រសួងកសិកម្ម រុក្ខាប្រមាញ់ និងនេសាទ។
លោក ស្រី វុឌ្ឍី បានថ្លែងថាកាលពីឆ្នាំ ២០១៩ ផ្ទៃដីដែលកំពុងបង្កបង្កើនផលស្រូវចំនួន ៦៧ ពាន់ហិកតា ត្រូវបានខូចខាតទាំងស្រុងពាក់ព័ន្ធកត្ដាការប្រែប្រួលអាកាសធាតុ ស្ថានភាពជំនន់ទឹកភ្លៀង និងគ្រោះរាំងស្ងួត។ លើសពីនេះការធ្លាក់ភ្លៀងយឺតពីដើមរដូវ និងកត្តាទឹកទន្លេដែលជន់មក តែឆាប់ស្រកទៅវិញ ក៏ធ្វើឲ្យមានការប៉ះពាល់ដល់ផ្នែកដាំដុះ និងវិស័យជលផលខ្លាំងណាស់ដែរ។
លោកបញ្ជាក់ថា៖ «វាជាទំហំដែលយើងបានខូចខាតធំ ដែលទាក់ទងការរាំងស្ងួត និងទឹកជំនន់នេះ»។
អ្នកនាំពាក្យដដែលនេះក៏បានថ្លែងផងដែរថា ក្រៅពីស្រូវ បញ្ហាអាកាសធាតុ គឺនៅមានបញ្ហាមួយទៀតគឺបញ្ហាជំងឺនៅក្នុងឆ្នាំ ២០១៩ មើលនៅក្នុងដំណាំដំឡូងមី ក៏ផលិតកម្មដំឡូងមីហ្នឹងបានរាតត្បាតនូវជំងឺមួយដែលមានឈ្មោះថា ម៉ូសាអ៊ិក ជាប្រភេទសត្វល្អិតបំផ្លាញដំណាំដំឡូងមីដែលធ្វើឲ្យមានការព្រួយបារម្ភដែរ។
លោក ស្រី វុឌ្ឍី បានថ្លែងឲ្យដឹងបន្តថា នៅពេលមានបញ្ហាទាំងនេះកើតឡើងបានធ្វើឲ្យផ្ទៃដីដាំដុះមានការថយចុះចំនួន ០,២ ភាគរយ ហើយថយចុះទិន្នផលចំនួន ០,៥៤ ភាគរយ និងបរិមាណផលក៏ថយចុះប្រមាណ ០,០៦ ភាគរយ (១០,៨៨ លានតោន) ដែរ។ ដូច្នេះក្រសួងកសិកម្ម រុក្ខាប្រមាញ់ និងនេសាទនៅតែជំរុញធ្វើការដាំដុះ ការចិញ្ចឹមសត្វ និងលើកកម្ពស់ការវិនិយោគ ការនាំចេញផលិតផលកសិកម្ម និងម្ហូបអាហារបន្ថែមទៀត។
លោក ថេង សារឿន ប្រធានសម្ព័ន្ធសហគមន៍កសិករកម្ពុជា (CCFC) បានថ្លែងឲ្យដឹងផងដែរថា កម្ពុជាមិនទាន់មានវិធានការជាក់លាក់ណាមួយជួយដល់កសិករក្នុងអំឡុងពេលជួបគ្រោះរាំងស្ងួត និងគ្រោះទឹកជំនន់ទេ។ ប្រសិនបញ្ហាទឹកជំនន់ គេពិតជាមិនអាចដឹងមុនមែន ប៉ុន្ដែបញ្ហាគ្រោះរាំងស្ងួត មន្ត្រីពាក់ព័ន្ធ គួរតែបំផុសគំនិតនាំគ្នាធ្វើអាងស្ដុកទឹក ជីកប្រឡាយ និងធ្វើប្រព័ន្ធធារាសាស្ត្រត្រៀមទុកសម្រាប់រក្សាទឹកទុកប្រើនៅរដូវប្រាំង។
លោក សារឿន ថ្លែងបន្តថាប្រសិនមានការជំរុញបន្ថែមពីក្រសួងកសិកម្ម រុក្ខាប្រមាញ់ និងនេសាទ គួរតែគិតគូររកវិធីដាំដុះ ឬរកពូជដំណាំទាំងឡាយណាដែលអាចសុំាជាមួយអាកាសធាតុ ដើម្បីកាត់បន្ថយបញ្ហា ក៏ដូចជាផ្នែកមួយនៃដំណោះស្រាយដែរ។
លោកបញ្ជាក់ថា៖ «ទាក់ទងបញ្ហានេះដែរ ប្រសិនពាក់ព័ន្ធការចិញ្ចឹមសត្វនេះវិញក៏ត្រូវតែគិតគូរពីពូជទាំងឡាយណាដែលអាចទប់ទល់នឹងបញ្ហាអាកាសធាតុដែរ ព្រោះកម្ពុជាសព្វថ្ងៃនេះបាននាំចូលសាច់សត្វជាច្រើនពីប្រទេសជិតខាង ប៉ុន្ដែក្រសួងកសិកម្មគួរតែសិក្សាលើការផ្ដល់បច្ចេកទេស ឬសម្ភារមួយចំនួនជូនទៅកសិករ»។
លោក ញ៉ិល ភាព តំណាងបណ្ដាញកសិករខេត្តតាកែវបានថ្លែងថា ស្ថានភាពបង្កបង្កើនផលស្រូវនៅខេត្តតាកែវមិនសូវមានអំណោយផលល្អទេ ដោយសារការប្រែប្រួលអាកាសធាតុដែលមានរដូវរាំងស្ងួតអូសបន្លាយយូរខែ ព្រមទាំងមានទឹកជំនន់តាមតំបន់ថែមទៀត។ លើសពីនេះប្រព័ន្ធធារាសាស្ត្រក៏មិនមានគ្រប់គ្រាន់សម្រាប់សម្រួលដល់ការបង្កបង្កើនផលដែរ។
លោកបន្តថា ក្រៅពីធ្វើស្រូវមិនសូវទទួលបានផលល្អនេះតម្លៃជី និងថ្នាំគីមីសម្លាប់សត្វល្អិតក៏ឡើងថ្លៃដែរ រីឯតម្លៃស្រូវមិនសូវទទួលបានតម្លៃសមរម្យទៀត។ ដូច្នេះមានកសិករមួយចំនួនបានបោះបង់ចោលការប្រកបរបរធ្វើស្រែចម្ការ ដោយទៅធ្វើការងារចំណាកស្រុកវិញ។
លោកបញ្ជាក់ថា៖ «ខ្ញុំសូមសំណូមពរទៅរដ្ឋាភិបាលជួយផ្ដល់កម្ចីសមរម្យដល់កសិករធ្វើជាទុនទិញគ្រាប់ពូជ ជី និងសម្ភារកសិកម្មនានា ដើម្បីសម្រួលដល់ការធ្វើស្រែចម្ការ។ ក្រៅពីនេះជួយរកទីផ្សារឲ្យលក់កសិផលរបស់ពួកយើងបានតម្លៃសមរម្យ និងជាពិសេសគឺជួយកសាងបន្ថែមប្រព័ន្ធធារាសាស្ត្រ ព្រោះនៅខេត្តតាកែវមានប្រព័ន្ធធារាសាស្ត្រតិចតួចបំផុត»។
ក្រសួងកសិកម្ម រុក្ខាប្រមាញ់ និងនេសាទបានបង្ហាញថា ក្នុងឆ្នាំ ២០១៩ កន្លងទៅការប្រមូលផលស្រូវសម្រេចបានជាង ២,៥ លានហិកតា ដោយទទួលបានទិន្នផលសរុបជិត ៨ លានតោន។ ដំណាំឧស្សាហកម្មអនុវត្តបានជិត ៥ ម៉ឺនហិកតា តិចជាងឆ្នាំមុនជិត ៩ ពាន់ហិកតា។ ការនាំចេញអង្ករនៅឆ្នាំ ២០១៩ សម្រេចបានជាង ៦២ ម៉ឺនតោន ថយចុះជាង ៦ ពាន់តោន៕