ការសាងសង់ពន្ធនាគារថ្មីលើផ្ទៃដីទំហំ ១០ ហិកតា ស្ថិតនៅភូមិត្រពាំងតាសុខ ឃុំព្រៃមូល ស្រុករលាប្អៀ ត្រូវបានពន្យារពេលបណ្ដោះអាសន្ន ព្រោះប្រឈមនឹងវិបត្ដិកូវីដ ១៩។ ពន្ធនាគារថ្មីនេះ អាចដាក់ជនជាប់ឃុំបានប្រមាណ ២ ពាន់នាក់ ហើយដែលគ្រោងបញ្ចប់ការសាងសង់ក្នុងឆ្នាំនេះ។ នេះបើតាម លោក នុត សវនា អ្នកនាំពាក្យនៃអគ្គនាយកដ្ឋានពន្ធនាគារ។
លោក នុត សវនា បានបញ្ជាក់នៅថ្ងៃនេះថា ការស្ថាបនាពន្ធនាគារថ្មីនេះ គឺជាការផ្គួចផ្ដើមឡើងដោយរដ្ឋបាលខេត្ដកំពង់ឆ្នាំង តាមរយៈការដោះដូរទីតាំងចាស់មានទំហំ ១ ហិកតា ដែលមានភាពតូចចង្អៀត ស្ថិតនៅសង្កាត់ប្អេរក្នុងក្រុងកំពង់ឆ្នាំង ប្តូរទៅទីតាំងថ្មីលើផ្ទៃដី ១០ ហិកតា រួមនឹងការសាងសង់សំណង់អគារផ្សេងៗជាមួយក្រុមហ៊ុនឯកជន។
លោកថ្លែងថា៖ «ខាងខេត្ដឃើញថា ទីតាំងចាស់វាតូចពេក ដូច្នេះត្រូវការកន្លែងដែលមានលទ្ធភាពក្នុងការធ្វើការបណ្ដុះបណ្ដាលដល់ជនជាប់ឃុំ និងការធ្វើកសិកម្មនៅក្នុងពន្ធនាគារជាដើម ទើបយកទីតាំងចាស់ដោះដូរទីតាំងថ្មីនេះរួមជាមួយនឹងសំណង់»។
បើតាមលោក នុត សវនា ការស្ថាបនាទីតាំងថ្មីនេះ រួមមានអគារឃុំឃាំង ប៉ុស្ដិ៍សុខភាព បណ្ណាល័យ អគាររោងបុណ្យ រោងសិប្បកម្ម អគាររដ្ឋបាលនិងផ្ទះបាយជាដើម។
លោកបញ្ជាក់ថា៖ «តាមគម្រោង គឺយើងនឹងបញ្ចប់ការសាងស់ងនៅក្នុងឆ្នាំនេះ។ ប៉ុន្ដែព្រោះតែបញ្ហាកូវីដ ១៩ ភាគីក្រុមហ៊ុនបានជួបនឹងបញ្ហាថវិកា ទើបស្នើសុំពន្យារពេលរយៈពេល ៦ ខែ ចាប់តាំងពីពាក់កណ្ដាលខែវិច្ឆិកាឆ្នាំមុនមក»។
លោ សវនា បានឱ្យដឹងថា ទីតាំងពន្ធនាគារថ្មីនេះ អាចដាក់ជនជាប់ឃុំបានប្រមាណ ២ ពាន់នាក់ និងអាចទទួលយកជនជាប់ឃុំពីពន្ធនាគារ នៃខេត្ដផ្សេងទៀតបានផងដែរ។ ចំណែកទីតាំងផ្ទៃដីក៏អាចសាងសង់អគារបន្ថែមទៀតបានដែរ។
លោក ប៉ាវ ហមផាន រដ្ឋលេខាធិការក្រសួងមហាផ្ទៃ បានថ្លែងក្នុងកិច្ចប្រជុំផ្សព្វផ្សាយព្រះរាជក្រឹត្យស្តីពីការបន្ធូរបន្ថយទោស និងលើកលែងទោសកាលពីថ្ងៃទី ១៧ ខែកុម្ភៈ នៅទីស្ដីការក្រសួងយុត្ដិធម៌ថា សម្ទុះអ្នកជាប់ឃុំមានការកើនឡើង ក្រោយពីសមត្ថកិច្ចបានអនុវត្ដយុទ្ធនាការបង្ក្រាបបទល្មើសគ្រឿងញៀនទូទាំងប្រទេស។
លោកថ្លែងថា បច្ចុប្បន្នក្នុងចំណោមអ្នកជាប់ឃុំនៅពន្ធនាគារទូទាំងប្រទេសជាង ៣៩ ០០០ នាក់ មានអ្នកជាប់ឃុំពាក់ព័ន្ធនឹងបទល្មើសគ្រឿងញៀនជាង ២២ ០០០ នាក់ ស្នើនឹងជាង ៥៨ ភាគរយ។ នៅក្នុងកិច្ចការងារគ្រប់គ្រងពន្ធនាគារគឺមានបញ្ហាប្រឈមចម្បងចំនួន ២ គឺទី១ បញ្ហាភាពចង្អៀតណែនក្នុងពន្ធនាគារ ព្រោះកង្វះហេដ្ឋារចនាសម្ព័ន្ធ។
បើតាមលោក ប៉ាវ ហមផាន បញ្ហាប្រឈមទី២ គឺបានបង្ហាញនៅក្នុងព្រះរាជក្រឹត្យស្តីពីការបន្ធូរបន្ថយទោស និងលើកលែងទោសក្នុងជំពូកទី៣ មាត្រា ៤ ដែលបានលើកឡើងថា ការបន្ធូរបន្ថយទោស និងការលើកលែងទោសអាចអនុវត្ដបានតែចំពោះទណ្ឌិត ដែលត្រូវបានផ្ដន្ទាទោសដាក់ពន្ធនាគារ ដោយសាលក្រុមឬសាលដីកាស្ថាពរប៉ុណ្ណោះ។
លោក ប៉ាវ ហមផាន ថ្លែងថា៖ «តាមធម្មតាផ្ទៃអគារដែលយើងមានសម្រាប់ផ្ទុកជនជាប់ឃុំ គឺយើងអាចដាក់បានប្រហែល ១២ ០០០ នាក់។ ប៉ុន្ដែឥឡូវចំនួនជនជាប់ឃុំកើនឡើងដល់ជាង ៣៩ ០០០ នាក់។ បើយើងមិនកែច្នៃបន្ទប់ពន្ធនាគារឱ្យមានធ្នើឬកន្លែងសម្រាប់អ្នកជាប់ឃុំស្នាក់នៅបន្ថែមទេ គឺឆ្លើយតបនឹងចំនួនអ្នកជាប់ឃុំមិនរួចទេ»។
លោកថា កិច្ចការងារការកែច្នៃបន្ទប់ពន្ធនាគារឱ្យមានធ្នើ ឬកន្លែងស្នាក់នៅសម្រាប់អ្នកជាប់ឃុំស្នាក់នៅបន្ថែម គឺប្រធានពន្ធនាគាររាជធានី-ខេត្ដជាអ្នកធ្វើ និងដោះស្រាយដោយមានការគាំទ្រពីថ្នាក់ខេត្ដនិងក្រសួង ទើបពន្ធនាគារអាចទទួលអ្នកជាប់ឃុំបានដូចសព្វថ្ងៃនេះ។
លោកបញ្ជាក់ថា៖ «ការកែច្នៃនេះគឺជាការខិតខំរបស់អស់លោកជាប្រធានពន្ធនាគាររាជធានី-ខេត្ត ចំពោះការប្រឈមរឿងចង្អៀតណែននេះ»។
លោកថ្លែងថា៖ «ដូច្នេះ បើមើលទៅលើការចង្អុលបង្ហាញរបស់ព្រះរាជក្រឹត្យ គឺយើងអនុវត្ដបានតែទណ្ឌិតជាង ១២ ០០០ នាក់ទេ ដែលអាចអនុវត្ដព្រះរាជក្រឹត្យនេះបាន។ ចំណែកពិរុទ្ធជនជាង ១៦ ០០០ នាក់ទៀត ទោះបីអ្នកទាំងនោះបានកាត់ក្ដីរួចទៅហើយក្ដី ប៉ុន្ដែអ្នកខ្លះមិនទាន់មានសាលក្រមស្ថាពរ និងអ្នកខ្លះទៀតនៅជាប់បណ្ដឹងឧទ្ធរណ៍នៅឡើយ»៕