.jpg)
ដំរីញីដែលចូលក្នុងចម្ការអ្នកភូមិកាលពីថ្ងៃអាទិត្យ។ រូបថត សហការី
ឧត្តរមានជ័យៈ ក្រុមមន្ត្រីបាននិយាយថាសត្វដំរីញីមួយក្បាលដែលបានចូលលុកលុយក្នុងចម្ការអ្នកភូមិរំដួលចាស់ ឃុំអម្ពិល ស្រុកបន្ទាយអម្ពិល ខេត្តឧត្តរមានជ័យកាលពីព្រឹកថ្ងៃអាទិត្យនោះបានគេចខ្លួនចូលទៅក្នុងតំបន់ជួរភ្នំដងរែកវិញហើយ ខណៈដែលក្រុមមន្ត្រីជំនាញបរិស្ថាន និងអាជ្ញាធរកំពុងបន្តឃ្លាំមើលពីដំណើររបស់វា។
លោក កូន ទេន សមាជិកក្រុមប្រឹក្សាឃុំអម្ពិលដែលបានចូលរួមដើរតាមឃ្លាំមើលពីដំណើររបស់សត្វដំរីព្រៃញីមួយក្បាលនេះបានប្រាប់ភ្នំពេញប៉ុស្តិ៍ថា សត្វដំរីព្រៃញីមួយក្បាលនោះមានមាឌធំខ្ពស់ និងមានទម្ងន់ប្រមាណជាងមួយតោនកន្លះ។ លោកបញ្ជាក់ថា៖ «ខ្ញុំយល់ថាដំរីព្រៃញីនេះដើរវង្វេងហ្វូង ឬក៏មានអាការចង់ដោយឈ្មោល។ វាមិនកាចទេ ប៉ុន្តែវាក៏មិនត្រូវការឲ្យយើងដើរចូលទៅក្បែរវាដែរ»។
បើតាមការអះអាងរបស់លោក ឆាយ ដួងវិបុល នាយសង្កាត់រដ្ឋបាលព្រៃឈើបន្ទាយអម្ពិល សត្វដំរីនោះបានដេញក្រុមអ្នកភូមិ និងមន្ត្រីជំនាញមួយចំនួនដែលក្នុងនោះក៏មានរូបលោកផងដែរ ខណៈព្យាយាមដើរតាមឃ្លាំមើលពីសកម្មភាពរបស់វាកាលពីល្ងាចថ្ងៃអាទិត្យ។
លោក ដួងវិបុល បញ្ជាក់ថា៖ «ខ្ញុំ និងមន្ត្រីរបស់ខ្ញុំរួមទាំងអ្នកភូមិមួយចំនួនទៀតត្រូវបានសត្វដំរីព្រៃញីមួយក្បាលនោះបំភ័យ ដោយរត់តម្រង់មករកពួកយើងជាមួយនឹងសម្រែករបស់វា គ្រាដែលយើងបានដើរចូលទៅប្រកៀកនឹងវាក្នុងចម្ងាយ ២០ ម៉ែត្រទៅ ៣០ ម៉ែត្រ។ ខ្ញុំបានរត់ដួលជាច្រើនដងដោយសារទាក់ជើងនឹងស្មៅនៅពេលដែលវាដេញក្នុងអំឡុងពេលនោះទូរស័ព្ទរបស់ខ្ញុំមួយគ្រឿងបានជ្រុះ ហើយត្រូវដំរីនោះរត់ជាន់បែកអេក្រង់ផងដែរ»។
លោកបានបន្តថាយ៉ាងណាក៏ដោយពុំមានអ្នកភូមិ ឬមន្ត្រីណាម្នាក់រងគ្រោះថ្នាក់នោះទេ ហើយក៏គ្មានការបំផ្លិចបំផ្លាញផលដំណាំរបស់ប្រជាកសិករដែរ ហើយដំរីនោះវាបានចូលមកក្នុងភូមិដោយស្ងប់ស្ងាត់ និងដោយសន្តិភាព។
កាលពីម្សិលមិញលោក ហាំង ម៉េង អភិបាលស្រុកបន្ទាយអម្ពិលប្រាប់ភ្នំពេញប៉ុស្តិ៍ថា អស់រយៈពេលជាងមួយទសវត្សរ៍កន្លងមកគេពុំដែលជួបប្រទះសត្វដំរីព្រៃដើរចេញចូលនៅក្នុងទឹកដីនៃស្រុកបន្ទាយអម្ពិលនេះឡើយ មិនត្រឹមតែប៉ុណ្ណោះក៏គ្មានប្រជាពលរដ្ឋណាម្នាក់ចិញ្ចឹមសត្វដំរីស្រុកនោះដែរ។
លោក ហាំង ម៉េង បានបញ្ជាក់ថា៖ «វត្តមានរបស់សត្វដំរីព្រៃមួយក្បាលនេះ គឺជាសញ្ញាប្រាប់ថាប្រជាពលរដ្ឋនៅក្នុងស្រុកបន្ទាយអម្ពិលរបស់យើងខ្ញុំនឹងទទួលបានជីវភាពសម្បូរសប្បាយ និងមានសុខសន្តិភាពពេញដោយបរិបូរណ៍»។
លោកបានបន្តថានៅពេលនេះក្រុមមន្ត្រីអាជ្ញាធរមូលដ្ឋានបានសហការជាមួយក្រុមមន្ត្រីជំនាញបរិស្ថាននៃតំបន់ការពារទេសភាពបន្ទាយឆ្មារ និងកម្លាំងយោធាព្រំដែនកំពុងបន្តតាមឃ្លាំមើលពីដំណើររបស់សត្វដំរីនោះ ដើម្បីស្រាវជ្រាវពីប្រភពដែលវារស់នៅ។
ប៉ុន្តែគិតត្រឹមល្ងាចថ្ងៃចន្ទ [ម្សិលមិញ] នេះគេនៅពុំទាន់បានប្រទះសត្វដំរីណាផ្សេងទៀតក្រៅពីដំរីញីមួយក្បាលដ៏ធំសម្បើមនេះនៅឡើយទេ ខណៈវាបានដើរឆ្លងចូលទៅកាន់ជ្រលងជួរភ្នំដងរែកដែលមានព្រៃក្រាស់ និងកំពុងពួនសំងំលាក់ខ្លួននៅក្នុងព្រៃនោះ។ នេះបើតាមការអះអាងរបស់លោក ង៉ា ពៅ ប្រធានស្នាក់ការ តំបន់ការពារទេសភាពបន្ទាយឆ្មារ ខេត្តឧត្តរមានជ័យ។
លោកបានបញ្ជាក់ថា៖ «យើងជឿថាដំរីញីនោះកំពុងដើរស្វែងរកដៃគូរបស់វា គឺដំរីឈ្មោលដើម្បីបង្កាត់ពូជ។ នៅពេលនេះដំរីនោះបានដើរចុះមកក្បែរទំនប់មួយដែលនៅជាប់ជ្រលងភ្នំនៃជួរភ្នំដងរែក និងបានបន្លឺសំឡេងហ្វូមៗជាច្រើនដង ហាក់ដង្ហោយហៅដំរីឈ្មោល ឬហ្វូងរបស់វា»៕
