The Phnom Penh Post Search

Search form




Logo of Phnom Penh Post newspaper Phnom Penh Post - ដំរី «សំបូរ» ត្រូវ​ជប់​លៀង​ជូន​ដំណើរ​ទៅ​មណ្ឌលគិរី​ថ្ងៃ​នេះ

ដំរី «សំបូរ» ត្រូវ​ជប់​លៀង​ជូន​ដំណើរ​ទៅ​មណ្ឌលគិរី​ថ្ងៃ​នេះ

ដំរី​ឈ្មោះ សំបូរ កំពុង​ទទួល​ការ​ថែទាំ​ពី​ម្ចាស់។
ដំរី​ឈ្មោះ សំបូរ កំពុង​ទទួល​ការ​ថែទាំ​ពី​ម្ចាស់។ ម៉ៃ វីរៈ

ដំរី «សំបូរ» ត្រូវ​ជប់​លៀង​ជូន​ដំណើរ​ទៅ​មណ្ឌលគិរី​ថ្ងៃ​នេះ

ភ្នំពេញៈ ដំរី​ញី​ឈ្មោះ សំបូរ ដែល​មាន​ឈ្មោះ​ល្បី​ក្នុង​ប្រទេស​កម្ពុជា ហើយ​ធ្លាប់​បាន​ដឹក​អ្នក​ទេសចរ​កម្សាន្ត​នៅ​ក្នុង​រាជធានី​ភ្នំពេញ ជាច្រើន​ឆ្នាំ​នេះ នឹង​ត្រូវ​ចូល​និវត្តន៍​នៅ​តំបន់​អភិរក្ស​សត្វ​ដំរី​នៅ​ក្នុង ខេត្ត​មណ្ឌលគិរី ហើយ​ពិធី​ជប់​លៀង​លា​ដំរី​មួយ​នេះ​នឹង​ប្រព្រឹត្ត​ទៅ​នៅ​ថ្ងៃ​អង្គារ​នេះ​ដែរ។

យោង​តាម​សេចក្តី​ប្រកាស​ព័ត៌មាន​របស់​ស្ថានទូត​សហរដ្ឋ​អាមេរិក ចេញ​ផ្សាយ​កាល​ពី​ថ្ងៃ​ចន្ទ​ឲ្យ​ដឹង​ថា សត្វ​ដំរី​ឈ្មោះ សំបូរ នឹង​បញ្ជូន​ទៅ​រស់​នៅ​ជាមួយ​សត្វ​ដំរី នៅ​ក្នុង​តំបន់​អភិរក្ស​សត្វ​ដំរី​ពិសេស ស្ថិត​ក្នុង ខេត្ត​មណ្ឌលគិរី ដែល​ជា​កន្លែង​ដែល​ដំរី សំបូរ អាច​រស់​នៅ​ជាមួយ​សត្វ​ដំរី​ដទៃ​ទៀត ព្រម​ទាំង​អាច​ទទួល​ការ​ថែទាំ ការ​ព្យាបាល​បាន​យ៉ាង​ត្រឹម​ត្រូវ​ផង។

លោក ស៊ីន សន ម្ចាស់​ដំរី សំបូរ បាន​ឲ្យ​ដឹង​កាល​ពី​ថ្ងៃ​ចន្ទ​ថា មន្រ្តី​អង្គការ រដ្ឋបាល​ព្រៃ​ឈើ និង​អ្នក​ជិត​ខាង នឹង​មក​ចូល​រួម​ពិធី​ជូន​ដំណើរ​ដំរី​គាត់​ទៅ​កាន់​កន្លែង​ថ្មី ដោយ​មាន​ទាំង​ការ​និមន្ត​ព្រះ​សង្ឃ​មក​ធ្វើ​ពិធី​ប្រោះ​ព្រំ​ឲ្យ​វា​ទៀត​ផង។

លោក ស៊ីន សន និយាយ​ថា៖ «ថ្ងៃ​ស្អែក​យើង​នឹង​សូត្រ​មន្ត​ឲ្យ សំបូរ មុន​វា​ធ្វើ​ដំណើរ​ទៅ​កន្លែង​ថ្មី តែ​ខ្ញុំ​មិន​ប្រាកដ​ថា វា​ត្រូវ​ចេញ​ទៅ​នៅ​ពេល​ណា​ទេ ដោយ​សារ​ខ្ញុំ​នៅ​បង្ហាត់​ឲ្យ​ដំរី​នេះ​ចេះ​ឡើង​ឡាន​កុងតឺន័រ​សិន»។

លោក ស៊ីន សន បន្ត​ថា៖ «ខ្ញុំ​នឹង​ទៅ​ជាមួយ​វា ខ្ញុំ​មិន​អាច​ចោល សំបូរ បាន​ទេ។ ខ្ញុំ​នឹង​ចាំ​មើល​វា​រហូត​ទុក​ចិត្ត​ថា សំបូរ រស់​នៅ​បាន​សុខ​ស្រួល​នៅ​កន្លែង​ថ្មី ទើប​ខ្ញុំ​ត្រឡប់​មក​ភ្នំពេញ​វិញ តែ​ខ្ញុំ​នឹង​នៅ​តែ​ទៅ​មក​មើល​វា​ក្រោយៗ​ទៀត»។

លោក សន ថា ចិត្ត​លោក​ចង់​យក សំបូរ ឲ្យ​ទៅ​នៅ ខេត្ត​កំពង់ស្ពឺ ដែល​ជា​ស្រុក​កំណើត​លោក តែ​លោក​ក៏​គិត​ថា នៅ ខេត្ត​មណ្ឌលគិរី សំបូរ នឹង​ជួប​មិត្តភក្តិ​ជា​ដំរី​ដូច​គ្នា ដែល​មិន​ធ្វើ​ឲ្យ​វា​អផ្សុក និង​មាន​ជ្រលង​ព្រៃ​ភ្នំ​ដ៏​ល្អ​ប្រណីត នៅ​ក្នុង ស្រុក​សែន​មនោរម្យ។

លោក​ប្រាប់​ថា៖ «បើ​ថែម សំបូរ មួយ​ទៀត គឺ​មាន​ដំរី​ចំនួន ១០ ក្បាល នៅ​ក្នុង​តំបន់​អភិរក្ស​សត្វ​ដំរី​នោះ»។

លោក អេង ម៉េងអ៊ី មន្រ្តី​ជំនាញ​ផ្នែក​ព័ត៌មាន​និង​កិច្ចការ​សាធារណៈ​នៃ​គម្រោង​គាំទ្រ​ព្រៃ​ឈើ​និង​ជីវចម្រុះ ដែល​ឧបត្ថម្ភ​ថវិកា​ដោយ​អង្គការ USAID បាន​ឲ្យ​ដឹង​ថា ដំរី​ឈ្មោះ សំបូរ នេះ​នឹង​ធ្វើ​ដំណើរ​ទៅ​កាន់​ទី​កន្លែង​ថ្មី នៅ​ថ្ងៃ ទី៥ ខែ​ធ្នូ ប៉ុន្តែ ម្ចាស់​វា​និង​អង្គការ​ជួយ​គាំពារ​នឹង​ប្រារព្ធ​ពិធី​ជូន​ដំណើរ​នៅ​ថ្ងៃ​អង្គារ​នេះ៕

អត្ថបទគួរចាប់អារម្មណ៍