.jpg)
លោក ឌុច ពេលនាំមកសង្គ្រោះនៅមន្ទីរពេទ្យខ្មែរ-សូវៀត។ រូប Fresh News
ភ្នំពេញៈ លោក កាំង ហ្គេកអ៊ាវ ហៅ ឌុច ជាអតីតប្រធានគុកទួលស្លែងក្នុងសម័យខ្មែរក្រហមត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀតកាលពីយប់ថ្ងៃទី ៣១ ខែសីហា បន្ទាប់ពីលោកមានអាការហត់អស់កម្លាំងខ្លាំង ខណៈមានវ័យកាន់តែចាស់ជរា និងកំពុងអនុវត្តទោសជាប់ពន្ធនាគារអស់ ១ ជីវិត។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានប្រាប់ភ្នំពេញប៉ុស្តិ៍ពីម្សិលមិញថា ក្រុមគ្រូពេទ្យមន្ទីរពេទ្យបង្អែកជ័យជម្នះ ខេត្តកណ្ដាលបានបញ្ជូនលោក ឌុច មកមន្ទីរពេទ្យមិត្តភាពខ្មែរ-សូវៀតទាំងយប់។
លោកបន្តថា ចំពោះអាការជំងឺគឺក្រុមគ្រូពេទ្យកំពុងបន្តតាមដាន រីឯស្ថានភាពជំងឺស្ថិតក្នុងកម្រិតណានោះ គឺមិនអាចបញ្ជាក់បានទេ ប៉ុន្តែខាងពន្ធនាគារនឹងបន្តអនុញ្ញាតឲ្យលោក ឌុច បានសម្រាកនៅមន្ទីរពេទ្យដើម្បីបានព្យាបាលជំងឺរហូតដល់ធូរស្រាលឡើងវិញ។
លោកបានបញ្ជាក់ថា៖ «ចាំបាច់ដែលត្រូវឲ្យគាត់ (ឌុច) នៅបន្តសង្គ្រោះបន្ទាន់ ដើម្បីឃ្លាំមើលស្ថានភាពសុខភាពគាត់ ព្រោះអាយុគាត់ចាស់ហើយ»។
លោក កាំង ហ្កេកអ៊ាវ ហៅ ឌុច អាយុ ៧៨ ឆ្នាំមានស្រុកកំណើតនៅភូមិពៅវើយ ឃុំពាមបាង ស្រុកស្ទោង ខេត្តកំពង់ធំ។ លោកត្រូវបានចាប់ខ្លួន កាលពីឆ្នាំ ១៩៩៩ និងត្រូវបានឃុំខ្លួននៅមន្ទីរឃុំឃាំងតុលាការយោធា រហូតដល់ថ្ងៃបញ្ជូនមកមន្ទីរឃុំឃាំងសាលាក្តីខ្មែរក្រហមនៅថ្ងៃទី ៣១ កក្កដា ឆ្នាំ ២០០៧។
លោក ងី ម៉េង ប្រធានមន្ទីរពេទ្យមិត្តភាពខ្មែរ-សូវៀតកាលពីម្សិលមិញ មិនអាចសុំការអត្ថាធិប្បាយបានទេ ដោយលោកថា កំពុងជាប់រវល់។
លោក ទិន សុចិត្រា អ្នកនាំពាក្យអយ្យការអមសាលាដំបូងខេត្តកណ្តាលបានប្រាប់ភ្នំពេញ-ប៉ុស្តិ៍កាលពីម្សិលមិញថា អាការជំងឺលោក ឌុច គឺកំពុងមានស្ថានភាពធ្ងន់ធ្ងរខ្លាំង ហើយត្រូវបានក្រុមគ្រូពេទ្យជំនាញកំពុងយកចិត្តទុកដាក់។
លោកបញ្ជាក់ថា៖ «ព័ត៌មានដែលយើងទទួលបាន គឺស្ថិតក្នុងការព្យាបាលនៅឡើយទេ ប៉ុន្តែខាងមន្ទីរពេទ្យ ដែលជាព័ត៌មានយើងដឹងពីខាងកូនៗរបស់គាត់គឺគាត់មានស្ថានភាពធ្ងន់ធ្ងរ ហើយក្រុមគ្រូពេទ្យបានវ៉ៃថ្នាំខ្លាំងៗហើយ។ ខាងយើងនឹងតាមដានសុខភាពរបស់គាត់បន្តទៀត»។
លោក នេត ភក្ត្រា អ្នកនាំពាក្យសាលាក្តីខ្មែរក្រហមបានប្រាប់ភ្នំពេញប៉ុស្តិ៍កាលពីម្សិលមិញថា សាលាក្តីខ្មែរក្រហមបានទទួលព័ត៌មាននេះ ប៉ុន្តែមិនមានព័ត៌មានលម្អិតពីបញ្ហានេះទេខណៈ ព្រះរាជអាជ្ញាខេត្តកណ្តាលគឺជាអ្នកមានសមត្ថកិច្ចទទួលការគ្រប់គ្រងការអនុវត្តទោសនៅសេសសល់របស់លោក ឌុច។
លោក នេត ភក្ត្រា ក៏បានឲ្យដឹងដែរថា លោក កាំង ហ្កេកអ៊ាវ ហៅ ឌុច ត្រូវបានផ្តន្ទាទោសដោយអង្គជំនុំជម្រះសាលាដំបូងនៃ អ.វ.ត.ក នៅថ្ងៃទី ២៦ ខែកក្កដា ឆ្នាំ ២០១០ ពីបទឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាមប្រព្រឹត្តនៅគុកទួលស្លែងដោយសម្រេចផ្តន្ទាទោសដាក់ពន្ធនាគាររយៈពេល ៣៥ ឆ្នាំ សងការជាប់ឃុំខុសច្បាប់ ១០ ឆ្នាំ និងសំណងលើការសហការចំនួន ៦ ឆ្នាំទោសដែលត្រូវអនុវត្តគឺ ១៩ ឆ្នាំ។ ប៉ុន្តែព្រះរាជអាជ្ញាប្តឹងសារទុក្ខជំទាស់។ បន្ទាប់មកអង្គជំនុំជម្រះតុលាការកំពូលបានសម្រេចសេចក្តីនៅថ្ងៃទី ៣ ខែ កុម្ភៈ ឆ្នាំ ២០១២ ដោយផ្តន្ទាទោស ឌុច ដាក់ពន្ធនាគារអស់ ១ ជីវិត។
លោកបញ្ជាក់ថា៖ «នៅថ្ងៃ ៦ ខែ មិថុនា ឆ្នាំ ២០១៣ កាំង ហ្កេកអ៊ាវ ហៅ ឌុច ត្រូវបានបញ្ជូនទៅកាន់ពន្ធនាគារខេត្តកណ្តាល ដើម្បីអនុវត្តទោសជាប់ពន្ធនាគារដែលនៅសល់របស់គាត់ពីថ្ងៃនេះតទៅ»៕
