.jpg)
ក្រុមគ្រួសារពេលយកធាតុ (ថង់សនៅក្នុងកញ្ច្រែង) របស់ ឌុច បន្ទាប់ពីបូជានៅវត្តចាក់អង្រែក្រោម ក្នុងខណ្ឌមានជ័យ រាជធានីភ្នំពេញកាលពីថ្ងៃម្សិលមិញ។ ហេង ជីវ័ន
ភ្នំពេញៈ កាំង ហ្កេកអ៊ាវ ហៅ ឌុច អតីតប្រធានសន្តិសុខ ស-២១ ដែលគេស្គាល់ជាទូទៅថា គុកទួលស្លែងបានទទួលមរណភាពកាលពីរំលងអធ្រាត្រឈានចូលថ្ងៃពុធ ទី ២ ខែកញ្ញា ក្នុងអាយុ ៧៨ ឆ្នាំ ដោយរោគប្រចាំកាយ ហើយសពត្រូវបានបូជារួចហើយក្នុងថ្ងៃតែមួយនៅវត្តចាក់អង្រែក្រោម។
ជនរងគ្រោះដែលរួចរស់ជីវិតពីគុកទួលស្លែងម្នាក់និយាយថា លោកស្ដាយដែល ឌុច មិនត្រូវបាននាំដើរមើលការរីកចម្រើនរបស់ប្រទេសជាតិដែលខុសពីកាលពីសម័យខ្មែរក្រហម។
អតីតប្រធានមន្ទីរសន្តិសុខ ស-២១ នៃរបបខ្មែរក្រហមបានស្លាប់នៅមន្ទីរពេទ្យមិត្តភាពខ្មែរ-សូវៀត ដោយសារជំងឺប្រចាំកាយរួមមានជំងឺរលាកទងសួត និងជំងឺសួតធ្ងន់ធ្ងរ។ សាកសពរបស់លោកត្រូវបានបូជារួចហើយកាលពីរសៀលថ្ងៃពុធម្សិលមិញ នៅវត្តចាក់អង្រែក្រោមដោយមានការចូលរួមពីសាច់ញាតិរបស់លោក។ នេះបើតាមការបញ្ជាក់របស់អ្នកនាំពាក្យសាលាដំបូងខេត្តកណ្ដាល។
បើតាមអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ឌុច ត្រូវបានចាប់ និងឃុំខ្លួនកាលពីខែឧសភា ឆ្នាំ ១៩៩៩ និងត្រូវបានយកមកឃុំខ្លួននៅមន្ទីរឃុំឃាំង អ.វ.ត.ក កាលពីខែកក្កដា ឆ្នាំ ២០០៧ ដោយជាប់ចោទពីបទ «ឧក្រិដ្ឋកម្មប្រឆាំងមនុស្សជាតិ» និង «ការរំលោភបំពានយ៉ាងធ្ងន់ធ្ងរទៅលើ អនុសញ្ញាទីក្រុងហ្សឺណែវឆ្នាំ ១៩៤៩»។
អង្គជំនុំជម្រះសាលាដំបូងបានកាត់ទោសឲ្យលោកជាប់ពន្ធនាគាររយៈពេល ៣៥ ឆ្នាំកាលពីឆ្នាំ ២០១០។ ប៉ុន្តែនៅឆ្នាំ ២០១២ អង្គជំនុំជម្រះតុលាការកំពូល បានជម្រះបណ្ដឹងឧទ្ធរណ៍ដោយសម្រេចកាត់ទោសដាក់ពន្ធនាគារអស់មួយជីវិត។
លោកបានចាប់ផ្តើមអនុវត្តទោសនៅក្នុងពន្ធនាគារក្នុងមន្ទីរឃុំខ្លួន អ.វ.ត.ក នៅឆ្នាំ ២០១២ ហើយត្រូវបានបញ្ជូនទៅពន្ធនាគារខេត្តកណ្តាល កាលពីខែមិថុនា ឆ្នាំ ២០១៣ ដើម្បីបំពេញកិច្ចការទោសដែលនៅសល់។ ក្នុងការគ្រប់គ្រងមន្ទីរស-២១ រយៈពេលជាង ៣ ឆ្នាំរបស់លោកជនរងគ្រោះមិនតិចជាង ១២ ២៧២ នាក់ត្រូវបានសម្លាប់។ នេះបើតាម អ.វ.ត.ក។
អ្នកនាំពាក្យតុលាការខេត្តកណ្ដាលបញ្ជាក់ថា៖ «ក្រោមការអនុវត្តទោសនៅពន្ធនាការខេត្តកណ្ដាល ទណ្ឌិត កាំង ហ្កេកអ៊ាវ ហៅ ឌុច ស្ថិតក្នុងសភាពទន់ខ្សោយជាមនុស្សចាស់ជរាក្នុងវ័យ ៧៨ ឆ្នាំ ដែលសុខភាពរបស់គាត់ស្ថិតក្នុងសភាពចុះទ្រុឌទ្រោមខ្លាំង ដោយទទួលរងបញ្ហាសុខភាពរុំារ៉ៃជាច្រើន។ ទណ្ឌិត កាំង ហ្កេកអ៊ាវ ហៅ ឌុច ធ្លាប់បានបញ្ជូនទៅពិនិត្យព្យាបាលនៅមន្ទីរពេទ្យក្រៅពន្ធនាគារ ៤ លើក»។
អ្នកនាំពាក្យបន្តថា កាលពីខែតុលា ឆ្នាំ ២០១៨ ឌុច ត្រូវបានបញ្ជូនទៅមន្ទីរពេទ្យបង្អែកជ័យជំនះខេត្តកណ្ដាល ដោយសារមានអាការហត់ខ្លាំង។ នៅខែវិច្ឆិកា ឆ្នាំដដែលលោកត្រូវបានបញ្ជូនទៅមន្ទីរពេទ្យនេះម្ដងទៀត ដោយមានអាការចុកត្រង់តម្រងនោម។ នៅខែឧសភាឆ្នាំ ២០១៩ លោកត្រូវបានបញ្ជូនទៅមន្ទីរពេទ្យមិត្តភាពខ្មែរ-សូវៀតដោយសារអាការហើមជើង។
ដោយឡែកលើកចុងក្រោយនេះលោកត្រូវបានបញ្ជូនមកមន្ទីរពេទ្យមិត្តភាពខ្មែរ-សូវៀត ដោយសារមានអាការហត់ខ្លាំង ប៉ុន្តែបានស្លាប់នៅវេលាម៉ោង ០០ និង ៥១ នាទីព្រឹកថ្ងៃទី ២ ខែកញ្ញា។ តាមការធ្វើកោសល្យវិច័យរបស់មន្ត្រីជំនាញពាក់ព័ន្ធបញ្ជាក់ថា ឌុច បានស្លាប់ដោយសារជំងឺប្រចាំកាយដែលរួមមានរលាកទងសួត និងជំងឺសួតធ្ងន់ធ្ងរ។
បន្ទាប់ពីការស្លាប់របស់ ឌុច លោក ជុំ ម៉ី អតីតជនរងគ្រោះដែលបានរស់រានមានជីវិតពីគុកទួលស្លែងបានមានប្រសាសន៍ពីថ្ងៃពុធម្សិលមិញថា លោកមិនមានអារម្មណ៍អីទេ ចំពោះការស្លាប់នេះ ដោយសារតុលាការខ្មែរក្រហមបានកាត់ទោស ឌុច ដាក់ពន្ធនាគារអស់មួយជីវិតរួចហើយ។ ប៉ុន្តែលោកស្ដាយដែល ឌុច មិនបានឃើញការរីកចម្រើននៃប្រទេសជាតិ ខុសពីសម័យខ្មែរក្រហម។
លោកថា៖ «បើជាគំនិតរបស់ខ្ញុំ ខ្ញុំយកគាត់ជិះឡានជិះអី មើលមុខវាំងតាមមាត់ទន្លេ តាមស្ពានតាមអី មើលការរីកចម្រើន។ ខាងរដ្ឋាភិបាលឥឡូវរីកចម្រើនខ្លាំងណាស់ ដូចផ្សិតផុសអ៊ីចឹង។ ឲ្យគាត់មើលទៅមុននឹងគាត់ស្លាប់ទៅ ដើម្បីឲ្យដឹងថា អូ ប្រទេសកម្ពុជាគេកសាងបានច្រើន។ កាលគាត់នៅប្រទេសកម្ពុជាអត់មានសាលារៀន ឬស្អីៗឯណាទេ។ អត់មានផ្លូវលើផ្លូវក្រោម ផ្ទះខ្ពស់ៗអ៊ីចឹងទេ»។
លោក ឆាំង យុ នាយកមជ្ឈមណ្ឌលឯកសារកម្ពុជាបានថ្លែងពីម្សិលមិញថា ការស្លាប់របស់ ឌុច គឺជាការក្រើនរំឭកដល់មនុស្សទាំងអស់គ្នាថា បើសិនជាគេប្រព្រឹត្តបទឧក្រិដ្ឋប្រឆាំងនឹងមនុស្ស គេនឹងត្រូវបានផ្ដន្ទាទោសជារៀងរហូតរហូតដល់ថ្ងៃស្លាប់។ លោកថ្លែងថា៖ «គាត់ស្លាប់នៅមុន ១ ថ្ងៃនៃការកាន់បិណ្ឌ ហើយនេះប្រហែលជាធ្វើឲ្យយើងទាំងអស់គ្នាចងចាំដល់ជនរងគ្រោះភាគច្រើនរបស់គាត់ដែរ»៕
