The Phnom Penh Post Search

Search form




Logo of Phnom Penh Post newspaper Phnom Penh Post - ឌ្រីមលែនឌ៍ ​ព្រម​ផ្តល់​សំណង​ដល់​បុគ្គលិក

ឌ្រីមលែនឌ៍ ​ព្រម​ផ្តល់​សំណង​ដល់​បុគ្គលិក

បុគ្គលិក​សួន​កម្សាន្ត ឌ្រីមលែនឌ៍ ធ្វើការ​តវ៉ា​កាលពី​ថ្ងៃ​ចន្ទ​។
បុគ្គលិក​សួន​កម្សាន្ត ឌ្រីមលែនឌ៍ ធ្វើការ​តវ៉ា​កាលពី​ថ្ងៃ​ចន្ទ​។ ហុង មិនា

ឌ្រីមលែនឌ៍ ​ព្រម​ផ្តល់​សំណង​ដល់​បុគ្គលិក

ភ្នំពេញៈ អតីត​បុគ្គលិក​បម្រើ​ការងារ​នៅ​សួន​កម្សាន្ត ឌ្រីមលែនឌ៍ ​ចំនួន ៩៩ នាក់​បាន​ព្រម​ទទួល​យក​ដំណោះស្រាយ​របស់​ភាគី​ក្រុមហ៊ុន​ដែល​ផ្តល់​ប្រាក់​សំណង​មួយ​ចំនួន​បន្ថែម​ទៀត​ឱ្យ​ពួកគេ​ទៅ​តាម​​ចំនួន​​ឆ្នាំ​ដែល​ចូល​បម្រើ​ការងារ​បន្ទាប់ពី​ក្រុមហ៊ុន​ប្រកាស​បិទ​ទ្វារ​ចុង​ខែ​មីនា​នេះ​។

នៅ​ក្នុង​ជំនួប​ពេញ​មួយ​​ព្រឹក​កាលពី​ម្សិលមិញ​មាន ៦ ភាគី​ដែល​បាន​ចូលរួម​ដោះស្រាយ​រួម​មាន​តំណាង​ក្រុមហ៊ុន មន្ត្រី​ជំនាញ​ដោះស្រាយ វិវាទ​នៃ​ក្រសួង​ការងារ តំណាង​បុគ្គលិក តំណាង​សហព័ន្ធ​សហជីព អាជ្ញាធរ​ដែនដី និង​ក្រសួង​មហាផ្ទៃ​ផង​ដែរ។

ក្រោយ​កិច្ចប្រជុំ​ចប់​ទាំង ៦ ​ភាគី​ជាពិសេស​អតីត​បុគ្គលិក​បាន​ព្រម​ទទួល​យក​គោលការណ៍​របស់​ក្រុមហ៊ុន​ដែល​ផ្តល់​ឱ្យ​ពួកគេ។ សូម​រំឭក​ថា​ដំណោះស្រាយ​នេះ​ធ្វើ​ឡើង​បន្ទាប់ពី​មាន​អតីត​បុគ្គលិក​ ឌ្រីមលែនឌ៍ ​​ប្រមាណ ១០០ នាក់​កាលពី​ថ្ងៃ​ចន្ទ​ធ្វើការ​តវ៉ា​ទាមទារ​ឱ្យ​ក្រុមហ៊ុន​ផ្តល់​សំណង​បន្ថែម​ក្រោយ​ពី​ក្រុមហ៊ុន​បញ្ឈប់​ពួកគេ​ពី​ការងារ​។

តំណាង​ក្រុមហ៊ុន ឌ្រីមលែនឌ៍ ​លោក ឆ វ័ន្ត ប្រាប់​ភ្នំពេញ​ប៉ុស្តិ៍​ថា​ទាក់ទង​នឹង​ការ​ផ្តល់​សំណង​កន្លង​មក​ក្រុមហ៊ុន​បាន​ធ្វើ​ទៅ​តាម​ច្បាប់​ការងារ​ដែល​មាន​ចែង​ហើយ​ដោយ​ទី​មួយ​បាន​ជូន​ដំណឹង​ដល់​បុគ្គលិក​ទាំង​អស់​កាលពី​ខែ​កញ្ញា​ឆ្នាំ ២០១៥ ថា​ក្រុមហ៊ុន​នឹង​ធ្វើ​បិទ​ទ្វារ​នៅ​ថ្ងៃ ២៩ ខែ​កុម្ភៈ​ឆ្នាំ ២០១៦ ព្រម​ទាំង​ផ្តល់​ប្រាក់​បៀវត្សរ៍​ចុង​ក្រោយ និង​ប្រាក់​ដំណាច់​​ឆ្នាំ​ផង​ដែរ។

លោក​បន្ថែម​ថា​ មូលហេតុ​ដែល​បុគ្គលិក​ចេញ​តវ៉ា​ដោយសារ​ក្រុមហ៊ុន​កំពុង​ដោះស្រាយ​មិន​ទាន់​ហើយ​សព្វ​គ្រប់​តែ​កាលពី​ម្សិលមិញ​ខាង​បុគ្គលិក​បាន​ព្រម​ទទួល​យក​សំណង​បន្ថែម​នោះ​ហើយ។

លោក​ថា៖ «យើង​បាន​ដោះស្រាយ​សព្វ​គ្រប់​អស់​ហើយ​គឺ​បុគ្គលិក​ព្រម​ទទួល​តាម​ការ​ផ្តល់​ជូន​របស់ ឌ្រីមលែនឌ៍ ​រួមមាន​បុគ្គលិក​ធ្វើការ​ពី ១ ទៅ ៥ ឆ្នាំ​ទទួល​បាន ២០០ ដុល្លារ, ១ ទៅ ៤ ឆ្នាំ ១៧០ ដុល្លារ, ពី​ ១ ​ទៅ ៣ ឆ្នាំ ១៥០ ដុល្លារ, ពី​ ១ ទៅ ២ ឆ្នាំ ១២០ ដុល្លារ​អ្នក​ធ្វើការ​បាន ១ ឆ្នាំ​បាន ៨៥ ដុល្លារ និង​បុគ្គលិក​ធ្វើការ​ក្រោម​ ១ ឆ្នាំ​ទទួល​បាន ៤៥ ដុល្លារ​ក្នុង​មួយ​នាក់»។

អនុប្រធាន​សន្តិសុខ​នៅ ឌ្រីមលែនឌ៍ ​ធ្វើការ​តាំង​ពី​ឆ្នាំ ២០១១ លោក ចាន់ ថន ដែល​បាន​ចូលរួម​ក្នុង​កិច្ចប្រជុំ​ថ្លែង​ថា​ពួកគាត់​ព្រម​ទទួល​យក​ដំណោះស្រាយ​របស់​ក្រុមហ៊ុន​ដែល​ផ្តល់​ឱ្យ។

លោក​បាន​ថ្លែង​​ថា៖ ​«ឥឡូវ​នេះ​ភាគី​ក្រុមហ៊ុន និង​បុគ្គលិក​បាន​សម្រុះ​សម្រួល​ធ្វើការ​ចរចា​គ្នា​ត្រូវ​អស់​ហើយ​អ៊ីចឹង​បញ្ហា​នេះ​ត្រូវ​បាន​បញ្ចប់​ព្រោះ​ភាគី​ទាំង​ពីរ​មាន​ការ​យោគយល់​គ្នា​ទៅ​វិញ​ទៅ​មក»​៕

អត្ថបទគួរចាប់អារម្មណ៍