.jpg)
សិស្សតម្រង់ជួរចូលប្រឡងបាក់ឌុបនៅវិទ្យាល័យទួលទំពូង ភ្នំពេញ ឆ្នាំមុន។ ហេង ជីវ័ន
ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡាពីម្សិលមិញបានណែនាំ និងលើកទឹកចិត្ដដល់គ្រឹះស្ថានសិក្សាឯកជនឱ្យធ្វើការបង្រៀន និងរៀនពីចម្ងាយ ឬតាមប្រព័ន្ធអេឡិចត្រូនិកដើម្បីផ្ដល់ឱកាសឱ្យសិស្សបានសិក្សាបន្ត រីឯសិស្ស ដែលត្រូវប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ ក្រសួងបានអនុញ្ញាតឱ្យប្រឡងតាមប្រព័ន្ធអេឡិចត្រូនិកផងដែរដើម្បីចូលរួមទប់ស្កាត់ការរីករាលដាលជំងឺកូវីដ ១៩ នៅកម្ពុជា។
សេចក្តីណែនាំរបស់លោករដ្ឋមន្ដ្រីក្រសួងអប់រំ លោក ហង់ ជួនណារ៉ុន សរសេរថាក្នុងអំឡុងពេលនៃការរីករាលដាលនៃជំងឺកូវីដ១៩ ក្រសួងអប់រំលើកទឹកចិត្តឱ្យគ្រឹះស្ថានសិក្សាឯកជនលើកកម្ពស់ការបង្រៀន និងរៀនតាមប្រព័ន្ធសិក្សាពីចម្ងាយ ឬប្រព័ន្ធអេឡិចត្រូនិក។
ការអនុវត្តបែបនេះ ដើម្បីផ្តល់ឱកាសឱ្យសិស្សានុសិស្សអាចបន្តការសិក្សា និងកាត់បន្ថយហានិភ័យដែលសិស្សនិស្សិតអាចនឹងប្រឈមមុខ នៅពេលដែលគេទៅជួបជុំនៅកន្លែង ដែលមានហានិភ័យខ្ពស់។ វិធានការនេះក៏ក្នុងគោលដៅចូលរួមចំណែកជាមួយរាជរដ្ឋាភិបាលកម្ពុជាក្នុងការបង្ការ និងទប់ស្កាត់ការឆ្លង និងរីករាលដាលនៃជំងឺកូវីដ ១៩។
ក្នុងស្មារតីធានាប្រសិទ្ធភាពនៃវិធានការនេះក្រសួងសូមធ្វើការណែនាំថា៖ «គ្រឹះស្ថានសិក្សាដែលកំពុងដំណើរការការបង្រៀន និងរៀនតាមប្រព័ន្ធសិក្សាពីចម្ងាយ ឬប្រព័ន្ធអេឡិចត្រូនិកត្រូវរៀបចំរៀងៗខ្លួននូវយន្តការ និងប្រតិទិននៃការបង្រៀន រៀន និងការវាយតម្លៃតាមប្រព័ន្ធសិក្សាពីចម្ងាយ ឬប្រព័ន្ធអេឡិចត្រូនិកឱ្យបានត្រឹមត្រូវ ដើម្បីធានាគុណភាព និងប្រសិទ្ធភាពនៃការបង្រៀន រៀន និងការវាយតម្លៃ»។
សេចក្តីណែនាំបន្តថា៖ «ចំពោះសិស្សដែលត្រូវប្រឡងសញ្ញាបត្រមធ្យមសិក្សាបឋមភូមិ និងសញ្ញាបត្រមធ្យមសិក្សាទុតិយភូមិ ក្រសួងនឹងអនុញ្ញាតឱ្យរៀបចំការប្រឡងតាមប្រព័ន្ធសិក្សាពីចម្ងាយ ឬប្រព័ន្ធអេឡិចត្រូនិកទៅតាមប្រតិទិនគ្រឹះស្ថានសិក្សារៀងៗខ្លួនដោយធានានូវស្តង់ដាគុណភាពដែលអាចទទួលយកបាន។ ក្នុងករណីចាំបាច់ ក្រសួងអប់រំ យុវជន និងកីឡានឹងចូលរួមសហការជាមួយគ្រឹះស្ថានសិក្សា ដើម្បីធានានូវស្តង់ដាគុណភាពនេះ»។
លោករដ្ឋមន្ដ្រីបញ្ជាក់ថា គ្រឹះស្ថានសិក្សាដែលអនុវត្តតាមការណែនាំរបស់ក្រសួងអប់រំ យុវជន និងកីឡាអាចចេញសញ្ញាបត្រមធ្យមសិក្សាបឋមភូមិ និងសញ្ញាបត្រមធ្យមសិក្សាទុតិយភូមិដោយមានការទទួលស្គាល់ពីក្រសួង អប់រំ យុវជន និងកីឡា ប៉ុន្តែសាមីគ្រឹះស្ថានសិក្សាត្រូវចុះហត្ថលេខាដោយខ្លួនឯង ។ ក្រសួងនឹងចុះអធិការកិច្ចតាមការចាំបាច់ ដើម្បីធានានូវគុណភាពនៃសញ្ញាបត្រ។
ក្រសួងអប់រំ យុវជន និងកីឡាក៏បានលើកទឹកចិត្តដល់មាតាបិតា អ្នកអាណាព្យាបាលគ្រប់រូបត្រូវជំរុញ និងត្រួតពិនិត្យឱ្យកូនចៅធ្វើការសិក្សា តាមប្រព័ន្ធអេឡិចត្រូនិកតាមប្រតិទិនដែលគ្រឹះស្ថានសិក្សាបានកំណត់ និងត្រូវជំរុញការធ្វើស្វ័យសិក្សានៅតាមផ្ទះ ដើម្បីកុំឱ្យកូនទៅកន្លែងមួយចំនួន ដែលប្រឈមនឹងការឆ្លងខ្ពស់។
តាមរយៈសេចក្ដីណែនាំដដែល លោករដ្ឋមន្ដ្រីសង្កត់ធ្ងន់ថា៖ «គ្រឹះស្ថានសិក្សាត្រូវធានាស្តង់ដាសុខភាព និងសុខុមាលភាពរបស់បុគ្គលិក និងសិស្សានុសិស្ស ដោយមិនត្រូវមានការចាប់បង្ខំ និងត្រូវរៀបចំកាលវិភាគការងារដែលជួយដល់បុគ្គលិក និងសិស្សានុសិស្សដែលកំពុងស្ថិតនៅក្នុងស្ថានភាពដែលមិនធម្មតានេះ»។
ក្រសួងអប់រំក៏បានអំពាវនាវដល់ម្ចាស់ទីតាំងដីដែលត្រូវបានជួលសម្រាប់ដំណើរការគ្រឹះស្ថានសិក្សាមួយចំនួនឱ្យបញ្ចុះតម្លៃឈ្នួលតាមភាពជាក់ស្តែង ដើម្បីដោះបន្ទុកមួយចំនួនដែលរងផលប៉ះពាល់ពីជំងឺកូវីដ ១៩ និងរកដំណោះស្រាយឈ្នះឈ្នះ សម្រាប់ទាំងអស់គ្នា។
ក្រសួងអប់រំបន្តអំពាវនាវដល់ធនាគារជាតិនៃកម្ពុជាធ្វើអន្តរាគមន៍ជាមួយធនាគារពាណិជ្ជ និងគ្រឹះស្ថានហិរញ្ញវត្ថុទាំងអស់ដែលបានផ្តល់ប្រាក់កម្ចីដល់គ្រឹះស្ថានសិក្សាមួយចំនួនសូមឱ្យពិចារណាបញ្ចុះអត្រាការប្រាក់ និងពន្យារការទូទាត់សំណងទៅតាមលទ្ធភាព ដើម្បីដោះបន្ទុកមួយចំនួនដែលរងផលប៉ះពាល់ពីជំងឺកូវីដ ១៩។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបញ្ជាក់ពីម្សិលមិញដែរថា៖ «សេចក្ដីណែនាំរបស់ក្រសួងអប់រំខាងលើនេះគឺសំដៅទៅដល់ការលើកកម្ពស់ការបង្រៀន និងរៀនពីចម្ងាយដោយគ្រឹះស្ថានសិក្សាឯកជនគ្រប់កម្រិតមិនរួមទាំងសាលារដ្ឋនោះទេ»។
ក្រសួងអប់រំនៅថ្ងៃទី ៨ មេសា បានប្រកាសលើកពេលរៀបចំការប្រឡងសញ្ញាបត្រមធ្យមសិក្សាបឋមភូមិ (ឌីប្លូម) និងមធ្យមសិក្សា ទុតិយភូមិ (បាក់ឌុប) នៅឆ្នាំ ២០២០ ផងដែរ ដោយក្រសួងនឹងដាក់កាលបរិច្ឆេទប្រឡងនៅពេលក្រោយ។ តាមការគ្រោងទុកក្នុងឆ្នាំសិក្សា ២០១៩-២០២០ ក្រសួងអប់រំគ្រោងរៀបចំការប្រឡង ឌីប្លូមនឹងត្រូវធ្វើឡើងចាប់ពីថ្ងៃទី ៣ ដល់ទី ១០ ខែសីហា។
រីឯការប្រឡងបាក់ឌុបនឹងត្រូវធ្វើចាប់ពីថ្ងៃទី ១៧ ខែសីហា ដល់ថ្ងៃទី ៩ ខែកញ្ញា។ ប៉ុន្ដែដោយសារតែការរីករាលដាលជំងឺកូវីដ ១៩ ក្រសួងនឹងកំណត់ និងជូនដំណឹងពីកាលបរិច្ឆេទនៃសម័យប្រឡងទាំង ២ នេះនៅពេលក្រោយវិញ៕
វីដេអូ៖
